السلام عليكم ورحمة الله وبركاته
أنا والكثير منكم أكيد من محبي الطبيعه والابتعاد عن زحمة وازعاج المدن
هاذي ثالث مره أزور فيها بريطانيا وحاليا صار لي قرابة الشهر في لندن
فقررت هالمره أنا والأهل نطلع في رحلة استرخاء للتمتع بجمال الأرياف والطبيعه الخلابه
فكان لنا وقفه وحيره لأي منطقة نروح ونقضي فيها هذي الرحله
في البداية قررنا التوجه الى منطقة البحيرات ( Lake Distriects )
لأني أسمع انها منطقة جميله وتتمتع بطبيعه جميله
ولكن هذا ماكان يكفيني عشان أقطع مشوار بدون درايه كافيه بالسكن من واقع تجربه شخصيه أو أحد ويفيدنا فيها
وكتبت موضوع للاستفسار عنها في المنتدى , لكن بدون أن أحصل اجابه من شخص مجرب
فغيرت الوجهة الى منطقة تبعد عن لندن قرابة ( 3 ساعات ونصف ) بالقطار
==
اسم المنطقة ( Liskeard ) في مدينة ( Corwall )
عددنا ( 5 ) أشخاص ... 3 كبار وطفلين
سعر التذاكر كامله ذهاب وعوده = 137 باوند
الذهاب على الدرجة الاولى , والعوده على الدرجه العاديه
( لأن الفرق مش كبير بينهم ... بس كنت أحب أجرب بنفسي وأعرف الفرق بينهم )
وعلى فكره ... هذا السعر كان مخفض كون عندنا أطفال تحت 4 سنوات
لأن لما يكون عندك أطفال ويسافرو معك يكون لك تخفيض .. من غير تخفيض البطاقة العائليه الخاصه بهم
==
عموما توكلنا على الله وكان خط الرحله بالقطار كالتالي
من محطة ( بادنجتون ) في لندن – الى محطة ( ليسكارد ) في كورن ويل
وهنا الأسماء بالانجليزي للي حاب ياخذها حرفيه
( Paddington ) - ( Liskeard )
==
المده الزمنيه للرحله 3 ساعات ونصف , لكنه حصل تأخير وتوقف وصارت المده 4 ساعات
ولكنها كانت جميله بسبب المناظر والخضره اللي منتشره على طول الطريق
والحين بترككم مع بعض المناظر من القطار والمناظر اللي شاهدناها في طريقنا
( وماراح أكثر منها لأن تركيزي بيكون على المنتجع بشكل أكبر )
هذا مانع يتجول بسيارته في وسط القطار
وهذي كراسي الدرجه الاولى ... وكانت فعلا أفضل من الدرجه العاديه كونها أوسع
مرينا على هذا الجسر الجميل وأخذت كذا صوره على الماشي
==
ووصلنا بالسلامه الى محطة ( ليسكارد ) وأخذنا تاكسي الى منتجع غابات Deerpark
المسافه كانت تقريبا 18 ميل من المحطه وكان سعر التاكسي 24 باوند
بعدها وصلنا للغابه الجميله وتفاجأنا بروعتها وجمال المنتجع وطبيعته الخلابه جدا
وهاذي بعض المناظر لهذا المكان الجميل والبقيه تأتيكم
==
أول ماوصلنا نزلت أنا الاستقبال ومجرد ماعطيتهم الاسم سلموني المفتاح
وقلت لهم أهم شي الموقع يكون مميز ... قالو خذ المفتاح ولو ماعجبك المكان ارجع لنا
وأول ماطلعت من عندهم على طول قابلنا هذا المنظر
وسكنا في هذا الكوخ الجميل , اللي يتكون من غرفتين وصاله ومطبخ وحمام أعزكم الله
( والسكن مهيأ لعدد 6 أشخاص كبار من غير الأطفال )
وكانت هذي البحيره هي اطلالتنا في الصباح والمساء مع صوت غدير المياه بقربنا
( وفخاطري قلت ... اللي يرجع لكم ويقولكم ان المكان مب عاجبنه )
وكان البط هذا صديق لأولادي مانع وسعيد ورفيقهم وين ماراحو
وكنا نتمشى بين هالمناظر في تجولاتنا من و الى السكن
والأطفال كثير يستمتعو بهالمناظر والأجواء واطعام البط والأسماك والسناجب
هذا منظر للكوخ اللي سكناه من زاويه اخرى
شو رايك وانت جالس على البلكونه وتستمتع بهالمناظر والطبيعه والأجواء البارده مع كوب كابتشينو حار
وشو رايك لما تطلع انت وأهلك وسط الغابه وماتسمع الا أصوات العصافير وأغاريدها
وشو رايك مع هالجوله وسط الغابه تلقى مجرى مياه عذب بين الأشجار وتلعب فيه انت وأطفالك
مانع يجهز نفسه للعب بالماء بفسخ حذاءه ( والأب من الطرف الآخر خلف الكواليس )
بعدها ترجع السكن وتكمل جلسه فالبلكونه وتبدأ تجهز العشاء بنفسك
وفالأخير أهديكم كعادتي أحد الورود اللي صورتها قرب الكوخ
وان شاء الله لي رجعه لأبين لكم ميزات وعيوب هذا المكان من واقع تجربتي
ولكن الى ذلك الحين ... أحب أقولكم بأنه مكان مميز للراحه والاسترخاء
وأنا رحت له خاصة ان عندي الوالده ... وماحبيت أتعبها بالمشاوير الكثيره مثل سفراتنا الخاصه