1. السلام عليكم

السلام عليكم

لم ياتي النوم الى عيني انا وصديقي علي وجلسنا نتبادل اطراف الحديث وانا اقول له اول مره هنروح القاهره لوحدنا من غير رحله مع المدرسه او اخويا الكبير او حد كبير يعرف القاهره كويس بصلي وقالي ياعم عبدالله سيبها لله ... وماقعدناش كتير وقمنا وتجهزنا وسلمت علي امي وهي تقبلني وتقول لي خلي بالك من نفسك ياابني ... ربنا يحفظها ويطول فى عمرها ان شاء الله هي وامهات المسلمين ان شاء الله
اللهم امين ... ونزلت انا وصديقي علي الى كان بايت عندي عشان نروح سوا ... نزلنا ركبنا الميكروباص الى بيروح للمعديه ... خط المعاشات او خط ابوبكر مش بتفرق كله بيروح للمعديه وكله بربع جنيه وكله بيمر من بورفؤاد كلها ... صراحه المواصلات عندنا احسن حاجه نتميز بيها الحمد لله رب العالمين مفيش زحمه ورخيصه جدا الحمد لله رب العالمين وركبنا قدام عن سواق الميكروباس جمب السواق ... السلام عليكم ... وعليكم السلام ورحمه الله وبركاته ... صباح الخير يارجاله ... صباح الفل والياسمين يااسطا ... رايحين فين بدري قوي كدا قبل الفجر ... رايحين الموقف هنروح مصر ... معلومه: ( رايحين مصر دي معناها القاهره بنسمي القاهره مصر ) تروحي وترجعوا بالسلامه رايحين تعملوا ايه لوحدكم ... صاحبي علي رايح مسابقه القران الكريم فى الحسين وانا رايح معاه وبعديها نتفسح شويه ... هتعرفوا تمشوا لوحدكم؟ دي القاهره كبيره مش زي بورسعيد كل الناس تعرف بعض وصغيره ... اه نعرف ان شاء الله دي اول مره نسافر فيها لوحدنا من غير رحله او مع حد عارف القاهره ... بس احنا مسافرين سايبين الامر لله اولا ثم للمصريين الجمال ... وعلي راي المصريين ( الى يسئل ميتهش) ونزلنا وركبنا المعديه الحبيبه والجو كان سقعه ووصلنا الى بورسعيد ركبنا ودخلنا مسجد السلام الضخم الجميل ماشاء الله وصلينا الفجر وركبنا تاكسي ورحنا الى موقف ( مصر ) عند السوبر جيت وركبنا وتحرك الاتوبيس ذاهبا الى القاهره العظمي.
بصيت من شباك سوبر الجيت وفظلت اشاهد شروق الشمس الجميل وبصيت لصديقي الحبيب لقيته نايم وقلت فى نفس ربنا يوفقك وتفوز ان شاء الله فى مسابقه القران الكريم ... واما صحي من النوم ظلينا نحكي عن الاهلي المصري لاننا اهلاويه جدا وبنموت فى الاهلي وفظلنا نحكي عن مباراه الاهلي المصري وبرشلونه يوم 24 القادم وان شاء الله الاهلي هيفوز ووصلنا القاهره ... ونزلنا رحنا عن مطعم واكلنا حبيب المصريين الجميل الفول والطعميه وبعديها رحنا الى الحسين وهوا طلع المسابقه وانا قلت له بروح بنام شويه فى مسجد الحسين واما تخلص تعالى هناك قالي اوكي وراح وانا دخلت المسجد صليت ركعتين وفيه جماعه من السعوديه كانوا جالسين سلمت عليهم وسلمت علي جماعه من شرق اسيا ... وقلت انام شويه وقبل انام صورت الصور دي من داخل مسجد الحسين التاريخي
وبعديها من التعب لاني كان بقالي يومين مانمتش نمت والموبايل الى كنت بصور بيه كان فى ايدي ونمت من غير مااحس ...
معلومه ... انا عمري لم يتجاوز 17 سنه ... مش بقول اني صغير لا انا كبير الحمد لله وراجل كمان بس قصدي يعنى مرحناش القاهره لوحدنا من غير رحله او مع حد دي اول مره نروح لوحدنا واحنا منعرفش الطريق ازاي ...
وانا اسف علي الاطاله فى مقدمه الموضوع
وان شاء الله الموضوع عجبكم
واستنوني بقي ان شاء الله فى باقي الموضوع والصور والتقرير من القاهره العظمي
واخوكم
عبدالله
دمتم بخير