- السلام عليكم ورحمة الله وبركاته ...
- كيف الحال جميعاً ...
- قلت والله ماعندي مانع ، ودي نشوف أبها والقرى اللي جنبها ..
- لاننا كنا على ارتفاع تقريباً 2000 قدم يعني ارتفاع الفيصليه 3 مرات
- سبحان الله
- ياساتر وانا عندي دوام يوم السبت !! وش الحل ؟
- الحل اني انتظر !!
- قلت لها مره ثانيه باد إيرلاينز
- عطوني الورقه بعد ما تمرمطت !!
- حتى قلت لواحد منهم
السلام عليكم ورحمة الله وبركاته ...
كيف الحال جميعاً ...
بصراحه انا كنت مسافر يوم الثلاثاء اللي راح ( 19 ديسمبر ) إلى أبها ، وبالتحديد كان عندنا شغل يوم الاربعاء في قريه اسمها( رجال ألمع ) وكان من المفترض اني اروح الثلاثاء وارجع الاربعاء ( طبعا رحت الثلاثاء لاني ماحب اركب طيارتين بيوم واحد ) يعني ذهاب وإياب في يوم واحد غير موجود بالقاموس حقي ...
قبل الرحله بكم يوم قالوا أبناء العمومه ( عيال عمتي ) ودنا نروح معاك ونرجع الجمعه ! وسألوني وش رايك ؟
قلت والله ماعندي مانع ، ودي نشوف أبها والقرى اللي جنبها ..
المهم اننا طلعنا يوم الثلاثاء الصباح وكان موعد الإقلاع الساعه 9 ووصلنا إلى أبها الساعه تقريباً 10,20 .
وبصراحه كانت أبها أكثر بكثير مما توقعت ، لكن عيبها مافيه تنظيم وتوزيع ( صح ) للأماكن السياحيه ، بمعنى انك بتروح من مكان سياحي وترفيهي الى مكان سياحي يبيلك نص ساعه ، والمفروض تكون الاماكن الترفيهيه قريبه من بعض حتى لايتعب السائح المهم ماعلينا من السلبيات ..
وسكنا في بيت أحد الأقارب في مدينه أبها ( وطبعاً انا مو من أبها ، انا من عروس الشمال ، حايل بعد حيي المهم سكنا بحي اسمه ( شمسان ) وأصر نسكن عنده وللأسف ماكان بيدنا إلا اننا نوافق بعد ماكان يبي يقتلنا
كان معنا بالرحله بعض الزملاء وسكنوا في شقق بودل وبصراحه كانت مره روعه ، ديزاين أمريكي بالكامل ...
واجتمعنا انا وعيال عمتي وزملائي في الشغل في البيت وتعشينا كلنا وكل العيال صارو يمنون على بعض ولعبنا بلاي ستيشن !! وكسرت روسهم واحد ورا الثاني وبالاخير هزمني واحد الله يهداه 3/0 بعد ما انطرد مني لاعبين ، وكان الحكم مره فاشل وانا اطالب من هالمنتدى بالحكام الاجانب في مبارياتي القادمه
وبيوم الأربعاء صحينا أنا وعيال عمتي تقريباً بدري على اساس نفطر وبعدين نتمشى شوي وينزلوني في مكان حفل الافتتاح وكان الحفل الساعه 6 المغرب واتفقت مع زملائي اني بكون في مكان الحفل الساعه 4 العصر ..
وهالقريه اللي اسمها رجال ألمع كان طريقها بجد مرعب !!
ننزل من أعلى القمم إلى القاع بطريق حدث ولا حرج أي غلطه من السواق ( وفاة ) !!
واستغربت لان مالقوا الا هالقريه اللي يسوون فيها افتتاح يخص القرى التراثيه !!!!!
وانا بالطريق نازل ( مطرطع ) وأقول فيه 1000 مدينه وقريه ومالقوا الا هالمكان !!!
والله لو اني داري انه كذا كان ماجيت
بس بصراحه لما تنزل وحتى مع انك خايف لكن بيني وبينكم متعه مابعدها متعه ، خاصه انك وانت نازل بتشق الغيوم يعني منظر صراحه ولا في الأحلام ماقد شفت زي هالمنظر الا بحايل ( آبو التعصب )
لما نزلنا ( الحمد لله على سلامتنا إلى الحين وانا اقول هالكلمه ) اتصلت على زملائي وقلت لهم وينكم ؟ قالوا عند مكان الحفل في بيت واحد !!
قلت ومنهو هالواحد هذا ؟
قالوا سألنا عن أحد عنده عسل طبيعي وقال تعالوا بيتي ولما دخلنا قال ماتطلعون الا وانتم متغدين ؟
قلت اها الدعوه كذا اجل انا جايكم وبقوله حنا مستعجلين وابي اللي عندك لان عندنا شغل ضرووري لازم نخلصه قبل الحفل !!
قالوا : اوكي ننتظرك .
وانا ووجهي مسوي راعي فزعه وبطلعهم من هالورطه اللي هم فيها صرت معهم محجور
ليه ؟
لما وصلنا للبيت بعد ما اخذت الوصف ، طلع لي راعي البيت وجلس يهاوش !!
قلت ( يقطع ام النظام البايخ ) كنت بتهاوش انا وياه أحسبه يسبني طلع الرجال يهاوش ويعلي صوته علشان ندخل جوا بيته !!
قلت ياطويل العمر والله عندنا اشغال ونبي نخلصها ، قال والله ماتمشي وغصب عليك تنزل ويقولي أو يقولنا انا واللي معاي بتنزلون ولا اشوف لكم طريقه ثانيه بس ؟
راح بعد أقل من دقيقه وجانا وشوفوا وش معاه وهذاك اللي ورا ولده وباين انه خايف !!
لما شفناه كذا قلنا خلاص ياحبيبي لو تبغى ننام عندك خلاص بننزل قال ايه هذا الكلام !!
وتقهوينا عنده وأكرمنا بالعسل بس ماهو طبيعي للأسف !!
وهذا المجلس حقه عنده استخدامات كثيره للتأثير على أي احد يجيه ويبغاه يقلط عنده ، يعني في سلاح وفيه سيف وفيه رمح وفيه وفيه وفيه تقولون بيت ارهابي
وبعدين شفت الوقت يمر ومابقى على الحفل شي ، قمت وقلت ياطويل العمر حنا قدرناك وجلسنا وتقهوينا عندك ونبيك الحين تقدرنا وتسمح لنا نطلع !!
بغى يسوي حركه ما قد شفتها الا بأفلام جاكي شان ... وبعدين قاموا كل العيال وفهموه وطلعنا من الورطه اللي كانوا زملائي فيها وصرت معهم بغلطه لاني رحت مسوي بطلعهم وصرت ضحيه معهم ..
وهذي صورة الشايب وهو جوا ماسك السلام وجالس يغني لنا جنوبي والسلاح اللي معاه مصنوع عام 1885 م
والحمد لله عدا الحفل على خير وطلعنا من الحفل الساعه 8 ونص تقريباً والحفل ماخلص الا الساعه 10 !!!!
وهذا مكان الحفل
( امحق ) بس بصراحه زملاي كانت رحلتهم الساعه 11 وكان يالله يمديهم وخاصه ان الحفل تأخر الى الساعه 7 وربع !!
وقلت بروح معاكم ياحلوين والله اللي ماجلست وانتم مانتم فيه ورحنا كلنا واعتذرنا ان رحلتنا وخفنا نتأخر عليها ..
المهم اننا طلعنا من لأعلى قمة الجبل ولكن كانت الطلعه غير النزله وكان الطريق فاضي وهذا سهل مهمتنا في الرجعه ...
الشي اللي موب زين ان الأجواء تتغير حسب الارتفاع وانتم تعرفون انه هالمنطقه مابين مرتفع ومنخفض يعني الله يعينك كل شي لازم تلبس وتشي الجاكيت !!
ونزلوني عند عيال عمي وحلفنا عليهم الا ينزلون ( جلست أقلد الشايب اللي قال بغديكم ) وقالوا حنا طلعنا من الحفل علشان الرحله وتبي تعطلنا انت عن رحلتنا !!
قلت والله ماتروحون لو أقل شي بياله شاي وقهوه والحمد لله نزلوا وبعدين توكلوا على الله ...
وكان فيني نشاط غير طبيعي وقلت للعيال يالله على فندق قصر أبها ( نروح نتقهوى هناك ) قالوا ما تشبع انت قهوه قهوه قهوه ، المهم طلعنا للقهوه واللي أرقل أرقل واللي تقهوى تقهوى واللي جلس يكلم صديقه اللي بالرياض ويسولف له عن أبها !! ( ياجنيف الحين ولا حايل ) واللي جلس على الآي بود احم احم ويسمع أغنية محمد عبده :
لاتجرحيني جرحك العام ماطاب ... .. داوي بحنانك ما مضى واجرحيني ..
وفيه كوبليه مره يجنن اللي يقول فيه :يابعد كل القرايب والاحباب ... ضاع العدل فالناس لو تظلميني
في غيبتك كل الملا عندي أغراب .. محدن أبي قربه ولاحدن يبيني
طبعاً لحد يفهم غلط ،لكن الأغنية واللحن مره روعه وتخش جو وعالم ثاني ( أغنيه قديمه طبعاً لكن عالم ثاني ) .
بعدين رجعنا للبيت ونمنا ..
في يوم الخميس كان يوم المغامرات الكبير ...
كان ودنا نروح لمنطقه اسمها ( ريده ) وهالمنطقه معروف بكثرة النباتات لان فيها تقريباً اكثر من 2500 نوع من النباتات !!
وهي محميه بالاًصل والحمد لله اننا دخلناها وبصراحه كانت شي فظيع كل ماتنزل بالسياره كل ماتتغير عليك النبانات والورود !! لتغير المناخ !!
لاننا كنا على ارتفاع تقريباً 2000 قدم يعني ارتفاع الفيصليه 3 مرات
المهم كان الطريق مو مزفلت ( يعني تراب ) وكنا ننزل من فوق الى تحت بهالطريق الوعر !! وبعض الاحيان تشوف منحدر يعني مافيه حاجز يفصلك عن الأرض يعني بالعربي أي زله من السواق ( بتقولون كان كوكتيل يكتب بهالمنتدى وكان اللي يرحمه يكذب كثير )
المهم انا كانت معاي كاميرا SONY وقريبي معاه SONY وقلنا كل واحد يصور وبعدين ننزلها في file واحد ( احب اتفلسف بالانجلش بعض الاحيان )
وجمعنا صور عن هالمنطقه وأحب أفرجيها لا إلكن حبايب ألبي ( اللبنانين ماشاء الله عليهم أي واحد يشوفونه يحبونه بسرعه وش قلوبهم هذي ) ..
أجل لو يعرفك من سنين وشلون راح يكون حبه ؟؟
المهم ماعلينا شوفوا هالصور ياحلوين :هذي الصورة وحنا بالقمه وكنا بننزل لتحت بس شوفوا المنظر وتحسون كأنه بداية خطر هالطريق
شوفوا الطريق اللي تحت على اليسار تشوفون وشلون الغلطه وش تسوي ، يعني فمان الله
وهذي صوره للطريق بعد
أعلى الجبل اللي نزلنا منه شوفوا وشلون بعيد ولسى باقي نفس المشوار بس لتحت !!
شوفوا هالقلعه ، قلعه تاريخيه كانت لحكام عسير قبل آل سعود
صوره للقلعه ولكن تشوفون السور اللي يطلع من القلعه ويمشي لفوق ، هذا يسمونه سور عسير العظيم لا أمزح معاكم هذا أول لما كانوا يبون يطلعون الجبال يسوون طريق زي كذا ويمشونه فوقه برجلوهم
لما قربنا للقلعه ، وكان ودي ندخلها لكن معرضه للسقوط في أي لحظه !!
شوفوا الطريق بالنصف ( قاطع الجبل الترابي )
انتبهوا لاتقرصكم
بعدين اخترنا مكان وجلسنا علشان نتغدا فيه ونتقهوى ونشرب الشاي وأنا ما أفارق عصير برتقال ( الربيع )
وهالمكان اللي حنا فيه مليان بالثعابين وهذا جلد ميت لثعبان !
هذي أعلى القمه اللي كنا فيها ولسى فيه مشوار تحت
الضباب غطا الجبل بالكامل
الآي بود ومتعة أبو نوره بالاجواء هذي وخاصه أغنية يامدور الهين ترى الكايد أحلى
غنم مدري تيوس أهم شي حيوان نباتي
فيه شي ياخوي ؟[]
سبحان الله
وحنا طالعين من هالمكان نزلنا على الوادي تحت وجانا مطر قوي ، وخفنا يجي السيل ويشيلنا ونروح في خبر كان ، والمطر قوي وصعبه نرجع مع طريقنا لانه مو ( مسفلت ) يعني مره خطر وفيه أمطار !! ، مشينا بالوادي والطريق كان متعب بجد ، وضيع السواق الله يهداه !! ، قال مدري وين المفرق اللي يطلعنا فوق ( وكان المفرق سفلت ) وماحصله وقال لازم نرجع لأول الوادي ونطلع مع طريقنا اللي جينا معاه !!!!!!!!
بيني وبينكم انا قلت هذا يومي وبدت الأرض تمتلي بالمويه وصرنا نمشي بشوي شوي والمسافه علشان نطلع من هالوادي اللي حنا فيه يبي لنا ربع ساعه تقريباً وجالسين ندعي يارب سهل علينا
وهذا الطريق بالوادي ولما بدا المطر يشتد علينا وشوفوا الطريق بس
ونمشي ونلقى مكان على اليمين على اساس انه يطلعنا فوق الجبل ولكن للاسف لما مشينا شوي طلع الطريق مسدود !! يعني لازم نرجع للوادي مره ثانيه ونكمل لطريقنا الأول !!
بعضنا قال نجلس لما ربك يسهل وبعضنا قال نمشي واللي مكتوب بيصير !!
واجتمعنا على اننا نكمل الطريق وكل خوفنا يجي برد واذا جا برد اتوقع خلاص حنا واللي بوسط البحر الأحمر زي بعض لكن هو معاه قارب وحنا لأ ..
ونقول للسواق اسرع يقول ماقدر الطريق وعر وفعلاً كان الطريق وعر وكله ( حصى كبير ) !! وبعدين الحمد لله خف المطر ولكن بعد ما امتلت الارض مويه ولكن الشي الزين ان مامشى السيل .
ورجعنا لطريقنا الأول بالسلامه وبقى الشيء الثاني اللي هو طلوع الجبل !!
الى نص الجبل الطريق اوكي بصراحه ولكن بعدين بدا الضباب ، ياساتر طلوع جبل وبطر يق وعر وضباب ( يالله حلوها )
جتنا لحظه ( ضباب كثيف ) ولا قدرنا نتحرك وجا السواق قال بنوقف شوي لما يخف الضباب ، ووقفنا الى ما خف الضباب وكملنا طريقنا بشوي شوي لانه مازال الضباب ولكن أخف من قبل .
والحمد لله طلعنا من المحميه بصعووبه بصراحه وأول ماطلعنا ومشينا بالشارع ( توني أحس بنعمة السفلت ) صورنا الضباب اللي أخف بكثير من ضباب الجبل
بعدين الحمد لله وصلنا البيت وتحممنا وغيرنا ملابسنا وطلعنا لأحد المطاعم المعروف ( بالمظبي والمندي وغيرها ) لكن ماعرف اسمها صراحه ، وأكلهم بجد مره حلو ..
ورحنا البيت ونمنا بعد يوم مرعب .
صحينا الجمعه وأكلنا عريكه ( والله ياهي شي ) مصورها بالجوال بس قهر لما دخلت flash طلعت كل الصور الا صورة العريكه !! نحس والله
المهم صلينا الجمعه ورجعنا تغدينا بالبيت وبعدين طلعنا لمنتزه السحاب ( أعلى قمة في الشرق الأوسط ) وكان الجو بارد
وهذا حنا بالطريق للمنتزه
شوفوا الضباب بدا يخرب علينا متعة النظر
والحين وصلنا منتزه السحاب وشوفوا الغيوم تحتنا ..
أما هالصوره تحسون مايحتاج لها أحد مبدع في التصوير
عناق قريب بين غيمتين ( ياعيني على الوصف )
بعد العناق اتجهوا لنا ( فوق )
وشوفوا لما غطانا وشلون الرؤيه
]قبل ما أكمل انتم شفتوا الصور اللي فوق ، الحين شوفوا هذي صورتين للنمسا وما أتوقع فيه فرق
طلعنا من الحدايد اللي كأنها شبك وجلسنا نصور وبصراحه تخيلوا واحد مزح معاي وطحت ومت !!
كان أبكي من القهر
هذي صوره للمنحدر اللي صورنا عنده !!! ياساتر والله لو تكرفس أحد مننا راح غلطه بجد لكن والله متعه
وفي الأخير بصراحه كان الجو والرحله اوكي
إلى قبل مانروح للمطار كان كل شي تمام ، لكن لما رحنا للمطار وكعادة الخطوط السعودية تأخرت الرحله ، كان من المفترض نقلع الساعه 9 وربع ( يوم الجمعه ) ولكن تأجلت الى الساعه 2 ونص الفجر !!
ياساتر وانا عندي دوام يوم السبت !! وش الحل ؟
الحل اني انتظر !!
جلسنا الى ما أقلعت الطياره وقبل ما ندخل الطياره قلت لموظف الخطوط اللي عند البوابه أبغى ورقه عذر منكم للدوام لاني بروح الدوام الساعه 11 الصباح واخاف يسألوني يقولون ليش متأخر الا هالورقه معاي قالي مافيه ورقه !!
( حقير وواطي صراحه )
قلت الحين خطوط زفت ومأخرين الرحله خمس ساعات وجايبين موظفين سيئين وتقول لا ماني معطيك !!
قال : الرحله مخبرين العملاء قبل 3 أيام انها بتتاخر ( نصاب ) قلت ياحبيبي انا حجزت من يومين على هالرحله وأصلاً انا جيت أبها قبل يومين تستهبل علي انت ..
قال مافيه ورقه ( شين وقوي عين ) قلت خير ان شاء الله أخذت اسمه ( والله انه حقير ياناس وواطي ولا يعرف يتعامل مع الناس ) ودي أشكي عليه لكن من يسمع ، المهم اتجهنا إلى الطيارة
الا هالمضيفه بوجهي لما طلعنا الدرج قالت هاي قلت باد إيرلاينز قالت : وات
قلت لها مره ثانيه باد إيرلاينز
قامت ونادت السعودي ( المضيف ) وقالت له شف هذي وش يبي الظاهر يبي ريال ولا حاجه زي كذا جاني وقال وش فيك اخوي ؟
قلت لا بس بعلمها ان هالخطوط سيئه ( طلع الرجال محترم ) قال ليه ياخوي قلت سالفه طويله قال رح مقعدك وبجيك ورحت المقعد وجاني والله ياناس انه جلس فوق راسي كل شوي جايب لي عصير وجايب له قهوه ومره مويه وبعدين عصير ( قلت له ياخوي حست معدتي اهدا من كذا ) الله يجزاه خير وقال فيه موظفين مره سيئين وتعاملهم سيء لكن وش نسوي حنا مغير نرقع غلطاتهم ..
والله ماقصر ، لما وصلنا الرياض الساعه 4 وربع الفجر !!
عطوني الورقه بعد ما تمرمطت !!
حتى قلت لواحد منهم
تأخرون الرحله ولا تعتذرون عن التأخير كل همكم نرحب بكم على الخطوط السعوديه وحسن الضيافه ولا نشوف شي وغير كل هذا تحبون تمرمطون بالواحد قال ليه : قلت له السالفه وقام وصف لي مكتب واحد من زملاه وأعطاني واللي زاد القهر اني مارحت أداوم يعني المرمطه حقت الورقه راحت عبث والورقه شقيتها ورميتها !!
أمحق خطوط سعوديه ...
ومع حبي للجميع واتمنى انكم استمتعتوا ، وللأمانه والله عندي صور كثيره لكن اغلبها صور شخصيه والصور الثانيه ماكان ودي أثقل الصفحه أكثر من كذا ...
وهالموضوع نزلته في أحد المنتديات بنفس الإسم ( خاص ) ومنتدى آخر بإسم ( كوكتيل )، والحقوق محفوظه لروتانا
ومع حبي للجميع
والسلام عليكم
فديت قلبك والله يالغالي على هالتقرير الحلو
وش هالتقرير , وش هالابداع , وش هالاسلوب الحلو , وش هالنفس الحلوه , وش هالتعابير الخيال, والله ماشاءالله عليك مبين عليك نفسك حلوه وانسان مرح وحبوب من خلال هالتقرير والتعابير الحلوه , والمواقف الي واجهتوها تحسدون عليها
يعني حسب ماشوف 9 مواقف صعبه مريتو فيها , بدايتها كانت بالغدا تحت التهديد والاختطاف , واخرتها الطياره وعدم روحتك للدوام
وغير كذا ماشاءالله اسلوبك في التعبير عن كل صوره زادها حلى يالغالي, ربي يسعدك , انت لازم تاخذ جوله على كل السعوديه وتسوي تقارير نفس هذا , لآني متأكد انك راح تسوي قصص ماهو تقارير من الاحداث الي تمر فيها وكذلك من تعبيرك الحلو واسلوبك بالتعليق واهم شي تقرير عن حائل بما انك منها
انا سعيد بهالتقرير الحلو وسعيد بهالصور الجميله , واذا عندك صور عادي زودنا تراك انت حلى التقرير , على فكره كم كان عددكم؟ وشنو الحفل بالظبط
تبي الصراحه؟ ياحظ الي بيروح معاك رحله , والله بينبسط لان مبين تملك اسلوب جميل لآسعاد الاخرين
(ماشاءالله عليك عشان ماتقول حسدني)
تحياتي لك: سلطان الشرقية