بشرى سارة لكافة اعضاء ورواد منتدى العرب المسافرون حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق arTravelers.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب وقد تم نشر 400,000 ألف موضوع 3,500,000 مليون مشاركة وأكثر من 10,000,000 مليون صورة ما يقرب من 30,000 ألف GB من المرفقات وهي إجمالي محتويات العرب المسافرون للاستفادة منها والتفاعل معها كحق اساسي لكل عضو قام بتأسيس هذا المحتوى على الانترنت العربي بغرض الفائدة.

لمزيد من التفاصيل يمكنكم مراسلتنا من خلال نموذح الاتصال, العرب المسافرون على Facebook



هداوه هداوه
( new) منتجع يديد في قرية كوخيم cochem الالمانيه .. لايفوتكم
16-12-2014 - 10:52 pm

Ferienresort Cochem


مقدمه


صباحكم ومساكم فل وياسمين
واااااااااااااااايد تولهت عليكم
واتمنى تكونون تولهتوا عليه
كتابة التقرير عندي أيي بالمزاج وممكن أقرر فجأه وبدون تفكير أنزل تقرير
الفتره اللي فاتت كنت أحس بالكسل ووممتحمسه للكتابه
واليوم يتني الهفه
بس تميت محتاره أكتب عن جنوب أفريقيا مال الصيف اللي فات ولا عن رحلة هالصيف الالمانيه
وبعد مشاورات ونقاشات طويله مع نفسي قررت اكتب عن السفره الأخيره لأنها فيها جديد
أما جنوب أفريقيا فأكثر المعلومات اللي عندي الاعضاء تكلموا فيها وماقصروا ، وعموما تقرير جنوب أفريقيا ممكن اتيني الهفه وانزله في أي وقت
الحين خلوني أخبركم عن تقرير اليوم
الله يسلمكم لما قررنا نسافر السنه اخترنا نسير المانيا وسويسرا
ولكن بغيت مكان جديد في المانيا ماجربته ، فشفت انه جانب دوسلدورف واللي حواليها مازرناه من قبل
وبديت رحلة البحث عن السكن
في البدايه بغيت في دسلدورف بس ماحصلت السكن اللي يرضيني
وعقب وانا أبحث في المنتديات قريت عن قرية كوخيم ولكن ماشي تقارير كثيره عنها
وشفت موقعها مناسب وبعد البحث مع بوعيسى
حصلنا سكن في هاي المنطقه وحصلنا هالمنتجع الخطير

مميزات هالمنتجع



1- موقعه في قرية جميله وكل شي حواليها وهاي القريه فيها فعاليات وانشطه ( بكتب عنها تقريرمنفصل ان شاءالله )

2- انه المنتجع ماسبق سكنوا فيه عرب أو خليجيين ونحن كنا أول ناس حسب كلام الموظفه
يعني تفضلوا اغزوهم

3- المنتجع فيه كثير من الانشطه مثل الغولف وبولينج وبليارد وتأجير سياكل ..الخ

4- المنتجع كبير وفيه كل أنواع البيوت الصغيره والكبيره

5- متوفر في المنتجع سوبرماركت صغير ومطعم

6- قريب وايد من المنتجع ع بعد دقايق بسيطه بالسياره سوبرماركتين ( اسألوا الرسبش عنهم )

7- المنتجع فيه آمان وشرح وحلو
متوفر في البيوت أغلب احتياجاتنا من غسالة الثياب والنشافه وغسالة الصحون ، والمطبخ تقريبا متكامل

8- سرعة خدمتهم لأي شكوى أو ملاحظه أو عطل في السكن

سلبيات المنتجع


1- انه الفوط وفراشات الاسره بفلوس وهذا صدمنا
لما طلبنا 6 أطقم مفارش للاسره ( الطقم عباره عن شرشف ومخده ) طلعوا علينا بـ 50 يورو وطبعا الفراشات ترجع لهم في آخر يوم
واذكر لما يا الريال يا يعطينا المفارش وكان بوعيسى مموجود قلتله نبا فوط 6 وعطانا 6 أطقم ( الطقم عباره وحده كبيره ووحده صغيره )
وعقب لما يابوعيسى وخبرني سالفة الرسوم انصدمت وانقهرت منهم بصراحه ، وقلتله انا خذيت فوط منهم أكيد عيل هذا برسوم ، قال عقب لما نطلع ونحاسبهم بنشوف بكم بياخذون عنا
وعقب نسيت السالفه ، وان شاءالله ماخذوا شي منا يمكن مايدرون عنهم

2- بعده عن بعض المدن مثلا
دوسلدورف تبعد ساعتين
وكولون ساعه ونص
وبون أظن ساعه ونص
وفرانكفورت بعد ساعتين أو ساعتين ونص وهكذا
بس بالنسبه لنا ماكان عائق ، لأنه عندنا سياره والجو أغلب الايام جميل

3- غرف النوم صغيره انا أحب الغرف الكبيره

4- البيوت عباره عن طابقين ولأنه نحن خذينا ثلاث غرف نوم ، فطلعت غرفة نوم وحده تحت وهنتين فوق
طبعا يختلف حسب حجم البيت اللي بتحجزونه ، والتفاصيل في الموقع لكل سكن وبيت
وتفاصيل كامله حتى شو اللي متوفر في هاي البيوت من خدمات يكتبونها ، حتى انتوا تختارون رقم البيت اللي تبونه من حيث موقعه

5- المنتجع بدون تكييف ولامراوح فاذا الجو حار فالله يعينكم والمشكله اذا فتحنا الدرايش ممكن اتينا حشرات ، بس المنتجع في منقه مرتفعه والجو عادة يكون حلو فيها

6- الكوايه ممتوفره ونطلبها منهم مبلغ تأمين ويرجع لما نرجع الكوايه سليمه

7- الحمام منفصل عن الشور وتقريبا هذا نظام اغلب الاجانب وما أدري شو هالتخطيط التعيس اللي يسوونه

8- غرفتنا كان فيها البانيو ولكن الغريب انه قسم الشاور يفصله عن غرفة نومنا جداربدون باب يعني مفتوح ع الغرفه ومافيه خصوصيه
وعزكم الله الحمام ( المرحاض ) برع الغرفه في الممر
والطابق اللي فوق كان الحمام منفصل ، وغرفة الشور والمغاسل بروحها

9- الواي فاي كان برسوم ولكن عيبه ضعيف ، ما أدري هذا بسببهم لابسبب الشبكه أو الشركه اللي اشترينا منها البطاقات ، كانت شركة blau

ملاحظات


اللي يحب يسكن في هالمنتجع انا رآيي ياخذ معاه
فراشات للاسره قديمه من بيتهم ويتخلص منها هناك
فوط
كوز للحمام لأنه ماعندهم شطاف

موقع المنتجع

Ferienresort Cochem - Holiday Park Ediger-Eller :: Roompot Parcs

موقع المنتجع بالعربي

الترجمة من Google

عنوان المنتجع

Am Kellerborn 1, 56814 Ediger-Eller,

خريطة موقع المنتجع

خرائط Google‏

صور من النت عن المنتجع

صور منوعه عن المنتجع (أضغط هنا )

صور للمنتجع من تصويري



ع فكره نحن يلسنا فيه 18 يوم ، واول يومين فطسنا من الحر ولكن من عقب انجلب الجو وصار حلو لين روحنا
بالنسبه للسعر ماعندي فكره كم بوعيسى دفع ، وعموما تقدرون تعرفون هالشي من موقعهم

يالا نتفرج ع الصور



هذا مبنى الاداره
وفي هالمبنى بتحصلون كل شي
السوبرماكت والمطعم والالعاب والرسبشن


































يسوون حركات حلوه حق اليهال





















عزكم الله ، في هالمكان الزبالات ، وكل يوم نرمي زبالتنا هنيه بعد مانجمعها في هاي الخشه



في المنتجع مسطحات خضرا وبحيره وممشى حلو
كنت بعض الاوقات أنش بدري والكل نايم والبس لبس رياضه واتمشى في المنتجع
وهاي الاوقات من أحلى الاوقات عندي لأني أكون مع نفسي والطبيعه والجو الحلو



















اتمنى انكم استمتعوا بهالجزء .. وللحديث بقيه





المشاركات

ابو ناصر ودرر ابو ناصر ودرر
( new) منتجع يديد في قرية كوخيم cochem الالمانيه .. لايفوتكم


يعطيك العافيه ام عيسى وتقرير مميز كعادتك حفظك الله

لو تكرمتي ايش ابرز الاماكن اللي ممكن نروح لها وقريبه من المنتجع مثلا بحيرة او شلال او زحليقة :) بحدود ساعه او أقل عن المنتج


شكرا لك


hasssssan hasssssan
( new) منتجع يديد في قرية كوخيم cochem الالمانيه .. لايفوتكم


ماشاءالله تبارك الله
رائعه كـ روعتك ياعزيزتي
باين انها روعه
شكرا لك على النقل والشرح ...


هداوه هداوه
( new) منتجع يديد في قرية كوخيم cochem الالمانيه .. لايفوتكم


المشاركة الأصلية كتبت بواسطة ابو ناصر ودرر
يعطيك العافيه ام عيسى وتقرير مميز كعادتك حفظك الله

لو تكرمتي ايش ابرز الاماكن اللي ممكن نروح لها وقريبه من المنتجع مثلا بحيرة او شلال او زحليقة :) بحدود ساعه او أقل عن المنتج


شكرا لك
الله يعافيك أخويه ويحفظك
ان شاءالله بجاوبك ع سؤالك بس خليك متابعني بعدني بعطيكم صور أكثر عن المنتجع وعقب بخبركم عن قرية كوخيم وشوفيها
ولكن اللي أحب أخبرك ياه الحين انه هالمنتجع يبعد عن سنتر القريه بالسياره من 10 دقايق لين ربع ساعه
وفي القريه الكثير من الانشطه الحلوه والمناسبه للكبار والصغار







المشاركة الأصلية كتبت بواسطة hasssssan
ماشاءالله تبارك الله
رائعه كـ روعتك ياعزيزتي
باين انها روعه
شكرا لك على النقل والشرح ...
العفو أخويه
وشكرا ع مشاركتك وخليك متابعني لازال عندي الكثير


FuNnY GiRL FuNnY GiRL
( new) منتجع يديد في قرية كوخيم cochem الالمانيه .. لايفوتكم


ياسلام شنو هالسبرايز الحلوووو



نووووورتي ياام عيسى واخيرا شفنا تقريرج وحشتينا



وبالنسبه لكوخيم اعيونا كانت عليها رحنا قطاع كولون ودوسلدورف في فبراير اللي فات بداية السنه بس مامدانا انزورها رحنا امسترخت حبيتهااااا وذاك القطاع اصلا مافيه خليجين وايد اكثرهم اللي هناك علاج قليل سياح انا كلش ماعجبتني كولون ولادوسلدورف بس حبيت سوق دوسلدورف وموقعهم حلو تقدرين تروحين كذا مكان هاذي ثاني مره ازور هالقطاع لان امي كانت هناك وبعد ماحبيتها احلى مافي الموضوع ان امي وابوي هناك بس اتذكر في هولندا رحنا اندهوفن كنه نسيت الاسم ومنطقه بعد جنبها كلهم هولنديات حبيتهم والاكل التركي هناك ابداع كلمة روعه شوي عليه هولندا حلووووه





متابعه وياج


مقدام مقدام
( new) منتجع يديد في قرية كوخيم cochem الالمانيه .. لايفوتكم


تقرير رائع كعادتك خبيرتنا

المنتجع شكله حلو وهادي بين احضان الطبيعه وبعيد عن زحمة المدن



ومتابعين معاكم كيف قضيتوا هذي الايام في هذي القرية الهادية


فتاة الدمى فتاة الدمى
( new) منتجع يديد في قرية كوخيم cochem الالمانيه .. لايفوتكم


يسعد مسائك وكل أوقاتك يارب ياغالية
أكيد تولهنا عليك وعلى الأيام الحلوة اللي جمعتنا برمضان


وبالنسبة للمنتجع شكله رائع وهادئ ورايق بعيدا عن صخب المدينة وضجيجها
وأهم شي في بلياردووو
بس بجيب شرشفي ومخدتي معاي لأنه هالألمان طلع مالهم أمان هههههههههههه

الجو شكله خرافي والصور مميزة ورائعة كعادتك
ايش نبغى بجنوب أفريقيا والرجيمات وبرامج التنحيف خلينا عايشين حياتنا
مافي أحلى من الأكل


متابعين معك وبانتظار بقية الصور ونشوف كيف قضيتوا 18 يوم


قايد قايد
( new) منتجع يديد في قرية كوخيم cochem الالمانيه .. لايفوتكم


ام عيسى

ياهلا وغلا ومرحبا الساع

ومرحبا مليون في بوابتي المحبوبه المانيا

ام عيسى
نروم انقول ان كوخيم مثل قارمش ,,,,, لكن بشكل اهدى وريف اكثر طبيعه؟

والحمد لله على السلامه

تقبلي تحياتي وتقديري


هداوه هداوه
( new) منتجع يديد في قرية كوخيم cochem الالمانيه .. لايفوتكم


المشاركة الأصلية كتبت بواسطة FuNnY GiRL
ياسلام شنو هالسبرايز الحلوووو



نووووورتي ياام عيسى واخيرا شفنا تقريرج وحشتينا



وبالنسبه لكوخيم اعيونا كانت عليها رحنا قطاع كولون ودوسلدورف في فبراير اللي فات بداية السنه بس مامدانا انزورها رحنا امسترخت حبيتهااااا وذاك القطاع اصلا مافيه خليجين وايد اكثرهم اللي هناك علاج قليل سياح انا كلش ماعجبتني كولون ولادوسلدورف بس حبيت سوق دوسلدورف وموقعهم حلو تقدرين تروحين كذا مكان هاذي ثاني مره ازور هالقطاع لان امي كانت هناك وبعد ماحبيتها احلى مافي الموضوع ان امي وابوي هناك بس اتذكر في هولندا رحنا اندهوفن كنه نسيت الاسم ومنطقه بعد جنبها كلهم هولنديات حبيتهم والاكل التركي هناك ابداع كلمة روعه شوي عليه هولندا حلووووه

متابعه وياج
ياهلااااا والله وأخيرا
مب عارفه أوصلج واليوم خذيت من عش عش النيك نايم مالج
والحين تفاجأت بردج هنيه
ع فكره سالفة الخاص اللي هناك لين الحين مب عارفتله
حبيبتي والله انتي اللي نورتيني
غريبه ماعجبت كولون ودسلدورف الصراحه وايد حبيتهم
عيل سويلنا تقرير عن هولندا مكن نعزم عليها
هولندا زرتها مره وحده وكانت في شهر عسلي







المشاركة الأصلية كتبت بواسطة مقدام
تقرير رائع كعادتك خبيرتنا

المنتجع شكله حلو وهادي بين احضان الطبيعه وبعيد عن زحمة المدن


ومتابعين معاكم كيف قضيتوا هذي الايام في هذي القرية الهادية
الروعه هو وجودكم اللي فرحني
في هالجزء من التقرير بس بخبركم عن المنتجع وعن هاي القريه وشوفيها
وعقب انشاءالله بفتح تقرير ثاني وبكتب عن الاماكن اللي زرناها من هالمنتجع
وع فكره هي مب هاديه وايد بالعكس فيها حركه بس مب شرات المدن لكنها حلوه وايد


توبليرون توبليرون
( new) منتجع يديد في قرية كوخيم cochem الالمانيه .. لايفوتكم


ماشاءالله

المنتجع باين عليه حلووو
بس صج في عضو اخر ذكر ان في منتجع مادري اي دىله كمان اخذوا فلوس على اغطية السرير
اهم شي انكم تستمتعون باجواء المانيا الجميلة
شكراا لك



يمكنك فتح موضوع جديد للمناقشة او الاستفسار والمشاركة.


Share

( new) منتجع يديد في قرية كوخيم cochem الالمانيه .. لايفوتكم