السلام عليكم
الى ان اجهز تقرير عن سيرلنكا حبيت افيد غيري من بعض النقاط بخصوص السفر لسيرلنكا
او على الاقل من وجهة نظري
سفرتي كانت في 24 سبتمبر الى 5 اكتوبر
موزعه كالتالي
2 هوناس فولس
1 امايا بكاتدي
3 في اراليا نوراليا
2في تاج بنتوته
1 سينمون باي بنتوته
2 جراند سينمون جراند
في البدايه احب اوضح ان الجوازات السيرلنكيه تعطي القادم شريحة اتصال مجانيه وانا عطوني شريحة وزوجتي شريحة وفيها شحن 50 ربيه
ونفعتني كثير
الريال افضل من الدولار
فخذ معك ريال واصرفه لروبيه ومايحتاج انك تحول الريال الى دولار ثم تحوله الى روبيه
الصرف من خارج المطار افضل من المطار
وللعلم الصرف ممنوع لديهم يوم الاحد والي يصرف يوم الاحد يعتبر مخالف لقانون سيرلنكا
( معلومه ماني متاكد منها اذا من المطار لكن من خارج المطار صعب الصرف يوم الاحد وقال لي سيرلنكي ان الشرطة تمسك الي يصرف يوم الاحد !)
اذا كان وصولك لسيرلنكا صباحا فالافضل انك ماتضيع يوم في نيقمبو
وتتجه الى كاندي
فندق هوناس رائع لكنه 3 نجوم
واشوف اني اخطيت لو حطيت امايا ليلتين وهوناس ليله افضل وتكون ليله الهوناس للاسترخاء وزياره بحيرة جنة الدنيا
وللاسف التك تك يودي للبحيره من الفندق ب 3000 روبيه ( تقريبا 100 ريال ) مستغلين الوضع !
امايا فندق رائع وخذ اطلاله على المسبح تكون اروع
يوجد مجمع تجاري في كاندي حليو صغير وفيه مطعم برجر كنج
فندق اراليا جميل وقريب من جراند وقريب من مطعم جراند الهندي
لكن الفندق تحس ان سباكتة مضروبه شوي يعني ممكن تشوف تسريب في دورات مياه او الشور
لكن عموما الفندق مقبول جدا وبديل مناسب عن جراند
يوجد بزار في نوراليا اسعاره حلوه واغلب الي يبيعيون فيه مسلمين لكن يبي له مكاسر
اغلب الاماكن السياحيه تدخل الاطفال مجانا مع السائح يعني لو معك اطفال قص تذكره لك ولزوجتك والاطفال يدخلون عادي لا تتدقق
سعر الدخول للاسف مرتفع للسائح بعكس السرلنكي الي يبي يدخل
بنتوته
التاج روعه بمعنى الكلمه وتعامل راقي من الموظفين والعاملين في الفندق ويحطون فعاليات وعروض غالبا الساعه 11 صباحا
ونصيحه لا تطلع من الفندق فهو بحد ذاته سياحه
القارب الزجاجي نصابين ومقلب ولايستاهل ريال وااحد !!
والسلاحف كذلك
وحتى رحلة النهر استغلال ويحاولون يستغلون الشخص ويلعبون عليه مع شخص اطلق عليه ابو شنب مسوي قبطان !!
اعتقد الجلوس في الفندق والاستمتاع بالمحيط والمسابح والتمشيه قرب الفندق افضل من الخروج لقارب زجاجي او السلاحف وغيرها
كولمبو ليلتين في فندق جراند فندق جميل ورائع انصح فيه
وزيارة حديقة الحيوان وطبعا دخولها للسائح 2500 روبيه للشخص 1800 روبيه للطفل
بس نصيحه لاتقص للاطفال لانهم يدخلونه مجاني
والمجمعات الموجوده في كولمبو
وفيه سوق للجمله للي يبي يشتري برخيص وهو سوق كنه البطحاء عندنا
استغربت من عدد السواح السعوديين في سيرلنكا بصراحه ماتستاهل الاعداد الكبيره الي شفتها خاصه انها دوله لاتجد فيها حضاره لا في شوارع ولا في مباني شامخه
لكن رزق لهم
السيرلنكيين بصراحه قسمين قسم مرحب وقسم يريد ان يستغلك وينصب عليك
فلا تتراخاء عن حقك او تتنازل