- قبل ان ابدأ ^ كل هذي مقدمة
- صعب افصّل فيها مراح اخلص لو كتبت يومين
كتقرير ماليزيا الذي كان عبارة عن حشو و كلام بدون صور ، اضع لكم اليوم عن تركيا بدون صور ايضا لكن على شكل نقاط لجعل الموضوع اجمل و حتى لا اجبرك على الدخول في تفاصيل لاتريدها .. بعد ذلك لك الحرية في السؤال و سأجيبك بما استطيع
لا اضع الصور لاني لا اعرف وضعها و لا اريد تعلم وضعها ، ولان صوري غالبا شخصية لي وللعائلة
ماني من النوع اللي يصور اللوحات وهيك .. كذلك انا لا احب رؤية صور التقارير لاني احس اني احرق الرحله "يقرا الكلام و لاجات صورة يناظر بنص عين " .. ابي اتفاجأ بجمال الاماكن والمناظر لاوصلت
قبل ان ابدأ ^ كل هذي مقدمة
اشكر ماجد الفهد اللي مهد لي الطريق و وضح لي الرؤية في البداية حيث كانت اسئلتي غبية مادري وين اوزانجول و ايدر و بورصه و يلوا ، مادري وين الاماكن اللي تستحق السكن والاماكن اللي صد رد .. ساعدني في عدة امور و هو غني عن التعريف كالنحلة هنا لا تكل ولا تمل له مني خالص الدعوات بالتوفيق والسعادة و ان يحقق له ربي كل امنية
بسم الله .. نبدا النقاط
اغلب فنادق اسطنبول ان لم تكن جميعها الغرف فيها ضيقة و هذا حال اوروبا بأكملها كما اظن فلا تنزعج
داخل اسطنبول لديك خيارين الاول ان كل اللي معك خفيفين فلديك الترام والمترو ، اذا اللي معك شياب و كبار سن و حركتكم صعبة و ثقيلة مالكم غير موتر كبير باليوم يوقف على راسكم في كل مكان يساعدكم في الاغراض يكاسر عنكم و يعلمكم بالمطاعم الكويسة والرخيصة حتى لو دفعت من مئة الى 150 دولار فيها حقها .. التكاسي ابعد عنها راح يطلعون فلوس قريبة من السعر اللي ذكرته توي ، لكن راح تكون غير مرتاح و كل شوي تدور تاكسي و تكاسر ومايشغل المكيف و لديهم طرق في النصب والاحتيال رهيبة و عجيبة ، ماتأكدت الا لما شفت بعيني
- خارج اسطنبول طبعا سواق باليوم و ارشح سبانجا و معشوقية جميلين جدا ، هم مكان واحد تقريبا ، طلعتك لاتخلى منها ، بورصا و يلوا و ابانت و الشباب انت و حريتك و رواقتك
- كنت افكر باستئجار سيارة بإسطنبول و هونت .. لما شفت بعيني الوضع صعب جدا مدينة مزدحمة و القيادة صعبة الكل مستعجل و طرق كثيرة و اغلب الفنادق مافيه مواقف مجانية و كل الاماكن المواقف بفلوس .. لو انت راعي طناخة يمديك تسويها بشرط ان تتأكد ان سكنك فيه مواقف مجانية و مكانه واضح و ماهو بين دواعيس ، و تسجل كل شي بإحداثياته بأماكنه بالضبط ، بتوفر كثير على نفسك رغم ذلك الاماكن اللي خارج اسطنبول بتعاني من بعض الصعوبات قليلا فيها
- التسوق للملابس انصح بشارع الاستقلال فيه محلات ممتازة و رخيصة فنايل و قمصان شورتات و بناطلين على 19 ليرة و انت ماشي ، باقي البضايع الرخيصة جزم و غيرها تلقاها بأكسراي بسطات بأسعار مناسبة "اكسراي قريبة من سلطان احمد تروحها بالترام"
- السوريين و الاكراد اللي يشحذون مزعجين و من عيوب اسطنبول خصوصا في شارع الاستقلال .. فيه ولد جلس معنا نص ساعة من محل الى محل باس يدينا و رجولنا ، مشكلة تعطي واحد يجونك عشرة .. يا تسحب عليهم من الاول ولا تحمل خلي معاك فكة قروش بو نص ليرة و وزع و احتسب الاجر
- اقتنعت تماما ان البلد هذي بس يضبطون المشويات .. لاتغلط و تطلب بحري او ستيكات فتندم ، غالي و سيء
- حاول ماتروح اسطنبول في عز الصيف ، لاتقول الجو جميل .. بالنهار الشمس صاحية ولما تطلع بتعرق و بتتضايق .. صدقني بتعرق كثيير
- رحت اسطنبول 4 ايام و اشوف حدها خمس ايام بالكثير ، لان عندي الشمال الطبيعة والخضرة و الاجواء الحلوة فبيكون لها النصيب الاكبر من الايام
- الشعب التركي فظ او "تشَز" .. غير ودود بالعربي ،على مايقولون الناس
لكن الناس تبالغ كثير.. كثير قابلت من سواقين و بياعين و ويترز مطاعم و موظفين فنادق طيبين و لطيفين و اصحاب ابتسامة ، فموقف واحد لايعمم الموضوع عالشعب بأكمله في الشمال الناس لطفاء جدا
- خلك حليم طيب ودود متسامح .. شفت خليجيين اغبياء يخربون السفرة عليهم و على اهلهم .. مثلا في المطعم يجلس ينتظر الطلب نص ساعة ولان طلب اللي جمبه وصل قبله صار يصرخ في المطعم ليش و ليش و انا جيت قبله .. و قام دفع حساب المقبلات و مشى .. خرب جو الرحلة على اهله بنفسيته الخايسة عشان عزة النفس والكرامة على قولته
- لو ماقدرت تنزل سعر مشوار او بضاعة او شي الى السعر اللي تبيه و دفعت مبلغ تحس انه فوق المستحق .. اجعلها نية للصدقة و تذكر ان هذا هو مصدر رزق لذلك الرجل و هو يعول زوجة و ابناء و يريد ان يوفر لقمة العيش لهم .. بالنية تحصل على الاجور العظيمة
- اذا كان توفيرك و نظامك الاقتصادي في الرحلة سيجعلك و من معك في تعب و نكد و تجرجر و تمرمر فاترك ذلك .. قرشك يعزك
الشمال طبيعة ساحرة للعيون والعقول ، لاتكون من النوع اللي يسكن جميع المدة في طرابزون و يتنقل بين القرى الاخرى دون السكن .. اسكن فيها ، قومة الصبح فيها لها جو ثاني النوم كذلك
آيدر و اوزانقول يستحقون السكن و الباقي زيارة سريعة .. فيه شهرين يكون فيها الجو في الخليج حر و رطوبة بشكل فظيع ..
في هالوقت لاتروح تركيا ابد .. حتى الشمال فترة صحو الشمس راح يكون حر مزعج . نصيحة
- في الشمال احجز موتر من المطار و تحرك بنفسك انت ملك نفسك و تملك الوقت و الاختيار ، لاسواق ولا شي خصوصية تامة .. كذلك اوفر .. سجل القرى والاماكن و احداثياتها اللي بتروحها في الماب اللي بجوالك او جهازك ..
- لكن الصراحة الجي بي اس ينكب كثير ، غير كذا في اماكن مراح تعرف تروحها و انا تعرضت لمواقف بايخة و محرجة .. يعني مثلا اكشبات ، الناس تمدحها و تقول جميلة و شفت لها صور روعه .. فلما تشغل سيارتك و تروح اكشبات و توصل المنطقة وش تسوي ؟ انت فيها الآن .. كيف اروح المكان الجميل المرتفع المليئ بالخضرة و المهيئ للجلوس ، فتجلس تدور بالمكان.. تتفاجئ ان الصورة الجميلة اللي شفتها بالنت جزء من القرية و يقع في جهة لاتعرفها ، و تدخل دواعيس لانت اللي عارف المكان و لاقادر تسأل عنه .. طبعا راح تلقى بالنت احداثيات لمركز القرية او المدينة فقط و لما توصل بتعرف انك ضايع و حاير ، لازم تعرف كل قرية و منطقة وش بتسوي فيها بالضبط ، مو كل الاماكن مثل ايدر كل شي فيها حلو و يصلح انك تجلس و تفرش بساطك .. فلازم تسأل شخص سافر قبلك و راح بموتره و تعرف عنه التفاصيل الدقيقة
- هناك منطقة عند حدود جورجيا اسمها ارتفين .. جميلة جدا و بها سكن ،، بعيدة شوي .. اقرب مكاان لها آيدر لها بعض الصور الباهرة على النت لكن التفاصيل والتقارير شحيحة جدا عنها .. تمنيت زيارتها من ايدر لكن ضايقني الوقت .. طبعا اجمل مكان في الشمال ايدر
- في الشمال ترى الحجاب بشكل اكبر ، المحلات والمطاعم التي تشغل الموسيقى اقل ،، تشرح الصدر بكل مافيها ... التعري و الوجوه الكاشفة اقل في الشمال ،
- الشمال عليك ان ترتب جدولك بنفسك و تبحث عن الاماكن بنفسك لترى من خلال الصور ما الذي يستحق الزيارة .. تحتاج شغل و اعداد و ترتيب ..
صعب افصّل فيها مراح اخلص لو كتبت يومين
- لاتنسى البساط و عدة الشاهي والقهوة والحب والمكسرات .. اذا بتسكن في شقق و يوجد مطبخ صغير هات عدتك كاملة و اطبخ .. او قدر الضغط عشان تطبخ لاجلست في مكان حلو اذا كنت راعي طناخة ..
- حنا في آخر الايام ملينا من المشويات ، جربنا كم مرة نطلب بحري من بعض المطاعم اللي في طرابزون عالبحر .. عادي جدا اكلهم البحري، اضطرينا نسير على برجر كنج و ماكدونالدز اللي بالسنتر في طرابزون
- طرابزون مدينة تشبه اسطنبول من ناحية الحياه و الحركة خصوصا السنتر ، السنتر به بضائع ومحلات ، متنوعة الاسعار عالية الجودة .. بشكل عام تركيا لو تبحثت كويس فيه اشيا رخيصة و حلوة كثير
- هناك باصات صغيرة تنتشر في المدينة و تتنقل بشكل مستمر بين سنتر طرابزون و مجمع فورم و مجمع جواهر اوت لت الملاصق للنوفوتيل و عدة اماكن لا اعرفها .. الشخص بليرتين ،
وضعت الامور الاساسية .. اللي عنده سؤال عن حاجة معينة فرعية و فيها تفصيل .. لو اقدر او اعرف راح اساعد
سلملم
