بشرى سارة لكافة اعضاء ورواد منتدى العرب المسافرون حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق arTravelers.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب وقد تم نشر 400,000 ألف موضوع 3,500,000 مليون مشاركة وأكثر من 10,000,000 مليون صورة ما يقرب من 30,000 ألف GB من المرفقات وهي إجمالي محتويات العرب المسافرون للاستفادة منها والتفاعل معها كحق اساسي لكل عضو قام بتأسيس هذا المحتوى على الانترنت العربي بغرض الفائدة.

لمزيد من التفاصيل يمكنكم مراسلتنا من خلال نموذح الاتصال, العرب المسافرون على Facebook



حرف حزن حرف حزن
رحلتي المتواضعه جاكرتا والجبل وباندوق
16-12-2014 - 02:34 pm

بسم الله الرحمن الرحيم
السلام عليكم ورحمة الله وبركاته
رده واجب <<< بدايه جيده

ترددت كثير وحروفي كلها خجل انا اسرد حروف رحلتي القصيره امام مواضيع الاعضاء والمشرفين الاكثر من رائعه ولكن ماشجعني وجعل تلك السطور المتواضعه تبعد وشاح الخجل هو لعل وعسى ان يستفيد احد مما اطرحه بكل تواضع وفقكم الله جميعا دنيا واخره.

تاريخ الرحله
( 27 اغسطس – 7 سبتمبر) 2014

شركة الخطوط الناقلة
القطريه (سعر التذكره كبقيه الخطوط يعتمد على تخطيطك للحجز من فتره طويله قبل الرحله تحصل على سعر مناسب كانت 2700 ) وللاسف اكتشفت متاخرا بعض الاخطاء الاملائيه بالاسم لي ولصديق العمر الدكتور ابوفيصل في تذاكرنا وبعد مداولات لم نستطع التعديل لكن تم وضع ملاحظه بالحجز بالاسم الصحيح كما هو في الجواز وتمت المغامره بحكم اننا عزابيه بدون عوائل ولم نواجهه اي مشكله لكن حرصت كثيرا على التأكد من وجود الملاحظه بالحجز والتأكد من ظهورها , الوزن 40 كجم المسموح به لكل شخص وخطوط اكثر من رائعه بمواعيدها.

تجهيزات الرحله :
1- معلومات كامله وبدون مجامله من منتدانا الحبيب منتدى العرب المسافرون تمت طباعتها كل صغيره وكبيره استوحيتها من مواضيع الغالين وتصفحتها بهدوء واستفدت منها كثيرا عن التعليمات والتجهيزات والنصائح واماكن التنزه وبناء عليها رتبت جدول للاماكن التي شعرت بالرغبه في زيارتها على حسب ميول المسافر.
2- مسكن – مضاد حيوي للبرد – لصق للجروح – طارد للباعوض – وفيش لتوصيله بشاحن الجوال – مبلغ بالروبيه يعادل 500 ريال لزوم التاكسي والمصروف المؤقت – وبقية المبلغ بالدولار (لهذا الشهر والشهر القادم قد يكون من الافضل اخذ الريال لرغبة الحجاج في اقتنائه لذا قد يكون صرفه معقول ومرغوب هناك) وطبعا تكون 35 دولار للشخص جاهزه عشان الفيزا بمطار جاكرتا – صور للجوازات – العزبه (حبيبة قلبي)(معلبات الافطار وباعتقادي انها هامه نظرا لقرائتي انها الاسعار مرتفعه هناك ومده الصلاحيه – والرز – والبهارات – والقهوه والتمر- وادوات الطبخ كامله – وصحون البلاستيك وملاعق البلاستيك وغيرها من المستلزمات مثل سفرة الطعام) وقد يستغرب البعض احضار تلك الاشياء لكن اردت اراحت بالي من التسوق في بقالات للاسف تستغل وترفع الاسعار حتى السكر احضرته وما المانع اذا كان لم اتجاوز الوزن المطلوب وخاصه ان الوزن راح يقل لاستهلاكي لها واستبدالها بالمشتروات من هناك اعني وزنها.

التعليمات والتوجيهات
استوحيتها من مواضيع منتدانا الغالي فجزاهم الله خير على جهودهم:-
1- تعبئة كرت الدخول الموزع من الخطوط بالطائره , مع الحرص رغم انه لم يكن معي عائلتي على تعبئه كل شخص له كرت خاص وطلب ذلك من المضيفين بالطائره.ويعطونك مثل ماقرأت من سطور الغالين بالمنتدى كرت او جزء من الكرت الي عبيته لا تضيعه حاول تحطه بالجواز عشان مطلوب منك للخروج او فيه غرامه , وفيه رسوم للمطار لا تنساها عن كل شخص 150 الف روبيه تدفعها عند كاونتر الخطوط الي بتروح عليها مع كرت صعود الطائره.
2- حجز وهمي بمده الرحله بفندق بجاكرتا من مكتب الخطوط الي اخذت منه التذاكر (ياويله الي بيعلم علي << ترا رجعت الحمدلله).
3- نيفر ايفر يعني قطعا لا والف لا للهديه سمعت عنها كثير وتجهزت لهم فيزا دفعت رسومها كرت عبيته حجز للفندق كل اوراقي جاهزه ومتحمس بقوه ولا هلله وفعلا مجرد ابتسامه واستهبال اني مافهم هديه اعطيه الحجز هديه اخليه يشوف الفيزا وهالشئ المفروض يحصل من كل المسافرين شمعنى السعودي والخليجي يستغلون حتى لو كان المبلغ تافه المبدأ المفترض يكون واحد.
4- الكل اجمع انه في حاله الوصول لجاكرتا بالمساء الافضل انك تسكن بجاكرتا وترتاح واليوم الثاني تتوجه للجبل تختار الفيلا المناسبه لك او للي مطيورين ماعندهم صبر تسكن بالجبل بفندق والصباح تتوجه بالبحث عن الفيلا المناسبه طبعا فيه فلل حجوزات وهي صعبه ونادره عن طريق النت بس افضل شئ قرأته انك تتوجه بنفسك وتشوف لكن لكن الاهم تكون بوضع مرتاح اخذت كفايتك من النوم ولا تكون مجهد عشان ماتستعجل.
5- اخذنا تاكسي رسمي من المطار للفندق الاكثر من رائع كان سعره 321 ريال ويستاهل حتى لو كانت المده قصيره فيه هي اقل من يوم لكن الراحه مهمه عشان تقرر امور اكثر اهميه لك قراند مركيز خمس نجوم.
6- السائق والسكن قرأت الكثير عنها من اولويات نجاح الرحله لذا احرص على اختيارهم بعنايه.
7- السبت والاحد احذر من هذه الايام لو صادف وصولك لها عشان الطريق للجبل واجازه مواطنيهم والزحام رغم اني ما تصادف وصولي لكن مجرد تذكير لما قرأته.
8- الشعب طيب وخلوق بكل امانه فقط ابتسم وقنوع والاهم اتفق لا تنسى مع حامل الشنط مع السائق دائما الوضوح يريحيك والي فاصل مخه مثلي من الحسابات حط لك ورقه بسيطه اكتب فيها 100,000 روبيه كم تعادل من ريال وحط 200,000 روبيه كم تعادل وهكذا تستفيد منها بالتسوق والاتفاق مع السائق واسعار المطاعم.
9- الملابس وللاسف لم انصت لهذه النصيحه لا تكثر ملابسك الخارجيه احسبها وحط زياده بسيطه رجعت ببعض الملابس للاسف ماستخدمتها وكانت عبئ وهذا خطأ مني وخاصه العوائل او النساء بالاصح >>> بينجلد واذا حصل نقص الشغاله موجوده او تشتري وبرخص افضل من حساب وزن زائد وعبئ عليك.
10- المفاصله والمكاسره ههههه والمضاربه بالسعر لك مطلق الحريه الاهم انك باتزان تتفاهم وتعطي سعرك خاصه بالتسوق والاتفاق مع السائق والايجار لا تصدق اي مبلغ يقال لك فاصل وانت جرئ بالسعر الي تشوفه مناسب لك بالنسبه لي وجدت فرق كبير بين السعر الي يعرض علي بالتسوق وبعد المفاصله اجد فرق كبير ولا تخجل لانهم يخططون على اقناص من ليس لديه خبره.

الجبل (البونشاك)
بدون جدال مواضيع واقتراحات وجداول الاعضاء كفت ووفت فقط اقرأ ودون وضع اليوم والتاريخ , اليوم الاول البحث عن فيلا مناسبه والراحه واكمال النواقص ان كان هناك نواقص , اليوم الثاني سفاري وهكذا ضع جدول مرتب ولا تنهك وتتعب نفسك وعائلتك بجدول ملئ باماكن متباعده رغم قصر المسافه الا انها تتضاعف مرات بسبب الزحام احرص على اختيار ما يناسبك كسائح وضع جدولك البعض لا يرغب بالملاهي لذا استبعدها وهكذا وان لم تستطع السائق يساعدك في التوضيح بخبرته وانت تختار واهم شئ تتفاوض مع المسؤل عن الفلا مباشره ان جعلت السائق وسيط ممكن يرتفع السعر عليك, طبعا كان عندي اكثر من اسم للفل ولفيت مع سائقنا الحبيب الرااائع وللاسف كانت غير مناسبه لكبر حجمها او لسوء اثاثها او لموقعها وفجاه حصل مالم يكن بالحسبان مجمع كوتا بوقا قرات الكثير عنه والتحذيرات تصوروا احبتي اجد نفسي امام بوابته المهم لم يكن هناك مانع توقعت انه بيوصلنا لفلا واذا بنا امام المجمع ودخلنا وشفنا الفلل وحصلنا فيلا صغيره رائعه , المجمع بالنسبه لي غير موحش كما قرأت وعلقت كوتا بوقا لا لا لا , واصر صديقي الدكتور الا نرى بأعيننا والحمدلله توفقنا بفضل من الله عيوبه المجمع الازعاج بكل امانه لمن نومه خفيف نتيجه سلوكيات البعض هدانا واياهم الله من رفع اصوات الموسيقى او المفرقعات او اصوات الدبابات , وكل سائح له تحمله ويعرف قدراته الفيلا ذات المسبح وارى الكثير يصر عليها اعتبرها خطر على الاطفال لان مارأيت بدون سياج وايضا بروده الماء والاهم ان الوقت راح يكون قصير بالسكن نظرا لوجود السائح خارج الفيلا الاهم النظافه بالنسبه لي, الاطلاله لها دور كبير بالسكن لكن كسائح اجد التنزه بالامكان السياحيه مهم لذا اجد فيلا بدون اطلاله او استفيد من الاطلاله ساعه وسعر عالي جدا وفرق لا والمناظر هي من المؤكد بجدولي السياحي.
الاماكن السياحيه اخجل بسردها لاكتناز مواضيع اعضائنا ومشرفينا بها وايضا على حسب ميولك ورغبتك.
اخذنا خروف صغير يمي يمي راائع 450,000 بعد ان كان سعره اكثر بس وش قلنا المفاصله , ووجدنا عوائل من السعوديه الله يحفظهم ويحفظ الجميع بالمجمع نظامهم كان مثل برنامجنا عند خروجنا اشوفهم متجهزين للخروج وقبل الغروب العوده والعشاء والنوم, الدله والتمر الصباح والفطور الجيد احيانا تطق براسي ابي اتنح افصل مخي بالمره اسوي فول ويكون وجبه تصبر بعدها اي شئ خفيف بالظهر بعدها العشاء بالفيلا كبسه ولا تعلمون احد ههه مانقدر نستغني عنها.
واسمع بالبقاله السعوديه كل الشارع بقاله وفيها بضائع سعوديه وبكل امانه ماحتجتها فقط الدجاج بقيه الاحتياجات من الفا مارت او السفن الفن بقالات رسميه اندونيسيه وسعرها معقول.مطعم ماما نوره اكثر من رائع وجربته اخذت شيش طاوق سانتدوتيش تصبيره لتاخرنا بالعوده.
والشباب ماشاء الله الخليجي بالدبابات الشخصيه تستاجر اسرع وسيله وللاسف اميزهم عشانهم بدون خوذه.
اخذنا شغاله اكثر من رائعه وامينه ونظيفه اما الطبخ اتولى هالامر بنفسي وطبخت اول يوم اكثر من رائعه بس ماتنافس طبخي << وخروا عني مصدق نفسه.
رقم السائق : اسمه فجر +6285223329960
رقم الشغاله : فريده +6287712511280
تحذف (+62) وتحط بدالها صفر من داخل اندونيسيا ان شاء الله يكون مسموح وضع الارقام
الباعه اصحاب الدبابات اذا شافوك جالس برا يجون يعرضون بضائعهم ورخيصه وفيه اشياء غريبه وحلوه وعلى حسب رغبتك التسوق على حسب نصائح الاخوه والاخوات من جاكرتا افضل او باندوق وانا اتبعت نصيحه التسوق من جاكرتا باخر الرحله.

باندوق
وهي بكل صراحه مدينه اكثر من رائعه وتستحق الزياره ووفقنا الله بمنتجع رائع واخذنا فيلا قد تكون السبب الرئيسي لطرح موضوعي المتواضع هذا لكي يستفيد منه ان شاء الله من يرغب كل شئ فيها عشره على عشره نظافه خدمه تغيير شراشف تنظيف الله يكرمكم الحمام اطلاله رائعه هادئه مسبح والبرنامج السياحي تزخر به مواضيع الغالين بالمنتدى , ترانس ستديو الملاهي ببنادوق اكثر من راااائعه خاصه للعوائل والاطفال يحتاج لها يوم كامل من وجهة نظري الشخصيه.

جاكرتا
فندق قراند ماركيز هو محطتنا ببدايه وصولنا وكانت افكار الاخوه اكثر من رائعه ان لا نستعجل ونرتاح اول يوم خاصه لمن رحلته وصولها بالمساء والاهم تحجز عن طريق بوكينق او أي حجز موثوق به عشان ترتاح من القلق واستقبالهم كان اكثر من رائع.
بكل امانه بالعوده اخر الرحله لم نوفق بالشقه المناسبه هي شقه معقوله بمجمع لكن لا انصح بها مقابل برج بكري تور وهنا نهايه الرحله بجاكرتا التسوق بسوق مانقو ديوا باسعاره المعقوله بعد المفاصله <<< مصمم يكاسرون , زياره منطقه انشول وهي منطقه اكثر من رائعه ومناسبه للعوائل بالملاهي المثيره سعر تذكره الدخول 250 الف واذا تحب السنويه 350 الف ولا يفوتكم قسم الثلج وبقيه الاجزاء بالملاهي او المنطقه الخريطه توضح كل قسم ولعبه فقط اقرا وشف ميولك وتوكل على الله ممكن الانتظار ممل شوي لكن بوجهة نظري الشخصيه يستاهل , وللاسف وهذا سوء تخطيط مني شخصيا وهذا الي احب انوه له التخطيط مهم وكتابه الجدول والاستفسار عن المكان ومواعيده للاسف لم احظى بفرصه زياره رحله لاحد الجزر رغم ان البعض يمدحها نظرا للحضور مبكرا الساعه 8 صباح وتشمل الرحله ثلاث وجبات مما يدل على طول برنامجها واكيد روعته نظرا لطبيعة اندونيسيا الساحره اما جو جاكرتا للاسف كئيب رطوبه وحر لكن بالمقابل الترفيه والتسوق يبعد السلبيات احيانا.
وصلنا سائقنا الرائع للمطار طبعا استغنينا عنه بجاكرتا وماصبرت عنه اتصلت عليه ولما عرفت انه لما يتفق مع احد عشان يستفيد طلبت منه توصيلنا للمطار انبسط وطلبتيه ايضا بانشول لندره التكاسي هناك وبعد المسافه نوعا ما وخبرته بالمنطقه , بالمطار ودعنا بالاحضان مثل الاخوه وبدون تفاخر ولله الحمد نقلنا صوره طيبه عن بلدنا وطبيعتنا واخلاقنا الاسلاميه السمحه مع الضحك والمواقف الطريفه من الجميع , بالمغادره قبل الدخول للصاله الصغيره قبل باب الطائره التفتيش وازعاج هديه هديه شكلهم عرفوا اني مادفعتها هع بالدخول بس مافيه المبدأ واحد ابتسامه بكل لطف واستهبال ادفع بمزاجي لانسان خدمني ماعندي مانع اما فرض لا.
برنامج سياحي او توزيع ايام بكل حقيقه اخجل ان اقدم هالشئ امام مواضيع لا تقارن باطروحتي البسيطه ومثل ماقلت ممكن منتجع باندوق او الفيلا بالمنتجع هي سبب رئيسي لطرحي هذه السطور المتواضعه الفيلا ببناندوق ثلاث غرف وتحت بالكراج غرفه للسائق اخذنا بالاحضان لما عرف انه له سكن وسعرها مليون ومئتين ان لم تخني الذاكره هذا بعد طبعا هههههه المفاصله لاني اتوقع نقصت بعدها منهم مبلغ بسيط لكنه يتجمع خصم مكاسره 50 الف عن كل يوم وخصم بالتسوق وخصم بالمشتريات من الباعه تتجمع ومن حقك لانهم يزودن السعر, اعتذر لقله خبرتي او لقله معلوماتي الجبل بونشاك مكان اكثر من رائع , احجز فيلا فيه بناء على نظرك وعلى مشاهدتك على الطبيعه لها حاول ماتدفع الا يوم واحد والباقي قول لما اصرف بكره عشان لو فيها عيوب ماتكمل المبلغ لحد ماتتصلح او تغيرها اكتب جدول لكل يوم وخطط ماهو عيب تكتب وتخطط مع الي مسافرين معك راح تحس بالترتيب والراحه باندوق رائعه اسواقها مازرتها للاسف , جاكرتا رائعه للتسوق والتنزه اذا باقي براسك حب مانطحن تقدر تخلي يومين لها على حسب رغبتك البعض يحب الطبيعه البعض يحب الصخب والزحام والتسوق والاماكن السياحيه العامه , ابتسم دائما وكن الافضل منهم بكل شئ , الصور للاسف ممكن تكون عشوائيه وغير مركزه لقله خبرتي وفقكم الله جميعا.
العذر والسموحه على قلة المعلومات لكن اجد الاستكشاف اكثر من رائع صحيح المعلومه الجاهزه حلوه لكن كمثال تحب تجلس بباندوق اذهب للمواضيع المخصصه عنها سوي لك جدول على حسب رغبتك الشخصيه.


حياكم الله على قدح من القهوه والي مايعجبه الكوفي المهيله قدامه والقدوع













































بالنسبه لي مهم طارد الباعوضي يخلي النامسه زي كذا

السائق الرائع الخلوق





كان فيه جريمه هنا المسكين كانت وفاته بالليل










المشاركات

حرف حزن حرف حزن
رحلتي المتواضعه جاكرتا والجبل وباندوق




لا تنسى تاخذ الي نفسك فيه افضل لك وتسدحها بالشنطه من معلبات وشيبسات


وهذي اثار جريمه ثانيه


عجبتني الليمونه الي طايره من البخار اخيرا تحقق حلمي

فيلا بمجمع بباندوق والعنوان بالكرت





209 اطلالتها رائعه الفلا وهي الي اخذناها بها كراج للسياره وغرفه سائق وحمام اكرمكم الله



عنوان المجمع ببنادوق








وسلامتكم يمكن عاد اتغلى عليكم ولا ارد او ادخل هههه العذر والسموحه احبتي في الله الي اقصده أي سؤال ان لم يكن جوابه بين ثنايا سطوري المتواضعه بكل رحابه صدر الاخوه يردون ويساعدون بعض
الاهم استكشف لذه وحلاوه السفر في الاستكشاف هنا احصل على المعلومات المهمه من السكن والسائق والاماكن وبعدها حاول تبحث عن الجديد اندونيسيا مليئه بالاماكن واعتمد على نفسك بعد الله تجد لذه اخرى وتوني اعرف تعب الاعضاء في طرح مواضيعهم الله يكتب لهم الاجر.


That's How We Do It That's How We Do It
رحلتي المتواضعه جاكرتا والجبل وباندوق


ما شاء الله عليك تخطيط عالي و واضح الخبره عندك

يعطيك العافية موضوع مرتب و نقاط مهمة جدا


و مشاكل البعض في الجبل صراحة كرهتنا بهالمنطقة ( الواحد ما يعرف يستر نفسه)


أستمر يا غالي استمتعنا بالموضوع ولو فيه نقاط و محاور حديث تقدر تتطرق لها يا ليت تتفضل علينا


بالنهاية اشكرك ع طرحك للفيلا في باندونق (= ما صدق ع الله حفظ الكرت


بأذن الله لي زيارة لها


دايتكوم دايتكوم
رحلتي المتواضعه جاكرتا والجبل وباندوق


ماشاء الله تبارك الله

الحمدلله على سلامتكم أخي الكريم


أسعدني والله تقريرك لأمور كثيرة
توفيقكم في الرحلة
ترتيبكم لها
طريقتك في التعامل مع الشعب الإندومي أيّاً كان

نصائحك وتوجيهاتك الرائعة


ماكتبته أخي الكريم يعتبر تقرير ورسالة في نفس الوقت ,




من الأعماق شكراً لك .


طارق2004 طارق2004
رحلتي المتواضعه جاكرتا والجبل وباندوق


ما شاء الله تقرير جميل وسرد اجمل منك اخي
مجمع بوري سوتابودي جميل وهو يقع بالوسط بين باندونق ولمبانغ ومنطقته جداً هادئة ولكن احرص يكون معك كل اغراضك لان ما فيه شيء قريب منها مثل البقالات وهي اقع على الشارع العام وفيه منها فلل مكونة من غرفتين وقلاث غرف وايضا توجد شقق من غرفة واحدة وعيبها انه لا يمكن حجزها بالانترنت ولكن ممكن الاتصال عليهم وعمل حجز بدون دفع اي مبلغ
اختيارات موفقة بالسكن


طيف الشمـال طيف الشمـال
رحلتي المتواضعه جاكرتا والجبل وباندوق


تقرير موفق


الرمادي333 الرمادي333
رحلتي المتواضعه جاكرتا والجبل وباندوق


جميل ورائع
من الموبايل


ابوهاشم1 ابوهاشم1
رحلتي المتواضعه جاكرتا والجبل وباندوق




أبو فيصل 2007 أبو فيصل 2007
رحلتي المتواضعه جاكرتا والجبل وباندوق


بارك الله فيك ع التقرير الجميل الوافي



شكرا لك


لوفتهانزااا لوفتهانزااا
رحلتي المتواضعه جاكرتا والجبل وباندوق


الله يعطيك العافيه



يمكنك فتح موضوع جديد للمناقشة او الاستفسار والمشاركة.


Share

رحلتي المتواضعه جاكرتا والجبل وباندوق