بشرى سارة لكافة اعضاء ورواد منتدى العرب المسافرون حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق arTravelers.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب وقد تم نشر 400,000 ألف موضوع 3,500,000 مليون مشاركة وأكثر من 10,000,000 مليون صورة ما يقرب من 30,000 ألف GB من المرفقات وهي إجمالي محتويات العرب المسافرون للاستفادة منها والتفاعل معها كحق اساسي لكل عضو قام بتأسيس هذا المحتوى على الانترنت العربي بغرض الفائدة.

لمزيد من التفاصيل يمكنكم مراسلتنا من خلال نموذح الاتصال, العرب المسافرون على Facebook



راهية دوم راهية دوم
رحلة راهية دوم الى نيويورك أرض الحرية:)
17-12-2014 - 05:30 pm

السلام عليكم ورحمة الله وبركاته




من أبوظبي الى نيويورك كانت رحلتنا في يوم الخميس الموافق 24/8/2014 ,,, ولمدة شهر ,, قضيناها مابين نيويورك وفلوريدا ( أورلاندو) تحديدا ,, طبعا والت ديزني .



الناقل كان طيران الاتحاد وللامانة أول مرة أجربه وكذلك أول مرة أسافر من مطار أبوظبي الدولي ,, متعودة على طيران الامارات ومطار دبي الدولي,, وكنت بالفعل حاجزة على طيران الامارات والغيت الحجز بسبب الخدمة الرائعة الي قدمها طيران الاتحاد ,, الا وهي احم احم بدينا نتكلم بالفصحى ههههههه الله يستر. الخدمة هي ان اجراءات التشيك ان لمطار جون كينيدي او اي مطار في أمريكا تتم من مطار أبوظبي الدولي .... يعني كل الاجراءات الامنية انخلصها من مطار ابوظبي الخاصة بامريكا من تفتيش واسئله واستفسارات وبيانات الخ ,,, كاونترات خاصه بامريكا موجوده وتنختم جوازاتنا من أبوظبي دخول أمريكا

طبعا التفتيش كان دقيق واااااااااجد وماخلو شي مافتشوه باقي بس نحن ايحطونا تحت الجهاز وايسوولنا اسكان ههههههههههه

لكن اتم فبلادك ومرتاح وماشال هم الوصول , توصل نفسيتك مرتاحه ومعنوياااتك أب أب أب .



نظرا لأني أول مرة أجرب طيران الاتحاد واكيد فيه منكم كذلك ماجربه , فباخذكم معاي جولة داخل الطيارة تكتشفونها بنفسكم وتتعرفون عليها مثلي .. خلكم بالقرب




الحين بنسوي الشيك ان







ندخل الطيارة باسم الله








اول مادخلنا جاني مضيف وقالي أنا بكون في خدمتكم وفي رعايتكم وأي طلب لاتترددين تطلبينه مني ,, وسألني شو أشرب طلبت اورانج جوس ,,, وللاطمئنان على بنتي الي ماتصبر عن اللبن لاني نسيت اخذ لها لبن والا بتحشرني طول الدرب ,, فسألته هل عندكم لبن ؟؟؟ فقال ::: الثلاجه مترووووووووووووسة لبن الحمدلله ارتحت .

















وهذا خط رحلتنا من أبوظبي الى نيويورك ,, مرينا على قطر والبحرين وبعدها تفاجأت انا مرينا على اربيل فالعراق
ابصراحه خفت واستغربت ليه ماغيروا مسار الرحلات على أماكن غير امنه وخاصة بعد حادثة الطيران الماليزي ... والحمدلله مرت على خير وطلعنا صوب تركيا وبعدين البحر الأسود واوروبا وبعدين مرينا فوق مانشستر , قطعنا االمسافه بحدود 6 ساعات لين اهنيه وبعدين دخلنا أجواء المحيط الاطلنطي وقعدنا فيها 7 ساعات واشوي تقريبا وبعدين مرينا على اطراف كندا ونحن نازلين ووصلنا نيويورك










عطوا (الجوري) بنتي فدييتها ,, هدية ,, ومن ضمن الهدية كان فيه صور للحيوانات مع أسماءها ,,, واتفاجأت أن البنت تتخبل على الحيوانات وبالذااااااااااات الجيراااااف والمونكي ,, والاليفانت .




قعدت اعلمها بعض الأسماء ,, وماشاءالله عليها حفظتهن, ذكية البنت طالعة علي هههههههههههه









وهاي الدرجه الاولى قدامنا










والحين جا وقت النوووووووووم ,,, سكروا الليتات ,, وشغلوا النجوم الي فالسقف .



للأمانه أنا مانمت ولكن بنتي وولدي ناموا , تقريبا اربع ساعاتوالحمدلله انهم ناموا في نص المدة ويوم صحوا كان باقي على وصولنا بالسلامه ساعتينبس ....
واااااااااااااااااااااااااااااااااااااااااااو وصلنا فوق نيويورك وكانت شبيهه بلندن اكثير بالذات منطقة المطار نفس نظام البيوت وكلها خضرة

واتفاجأت أن المدرج على طول على المحيط يعني نحن نازلين على المدرج اول نقطه له المحيط ,, كان منظر رووووووووووووووووووووووعة ابصراحه لكن ماصورته لان الموبايل مغلق وكان مكاني في النص ولكن اراقب من دريشة الجيرااان هههههههههههههه.

هبطنا في مطار جون اف كينيدي الدولي ,,, وماتتخيلون الزحمه ,, لدرجة يوم نزلنا يوم خففت الطياره قعدنا ساعه وشوي يمكن لين وقفت الطياره ,, قدامنا طيارات سيد طويل ماشاءالله لدرجة انه استوينا سيدين اشوف جنبنا بعد سيد كله طيارات واقف ,, نوقف ونمشي اشوي اشوي ,, هههههههههههههه ضحكت تذكرت زحمة دبي ,, اول مره اشوف بعد زحمه وسيدات واقفه في المطارات ,, والى ضحكني اكثر أن فيه جسر في المطار بعد تمشي عليه الطيارات
وأخيراوصلنا المطار ونزلنا من الطيارة بسرعه وعلى طول اول مانزلنا وصلنا سير الشنط حصلناشنطنا سيده وشليناها وعلى طول طلعنا بره المطااار , ولاحتى شافوا جوازاتنا ولاشي ,, لذلك خدمة الطيرااان بالنسبه لمطار أمريكا كانت رووووووووووووعه ,, كانت الساعه فينيويورك 4 ونص .

نسيت أقولكم أن الهدف من رحلتيهي زيارة أختي والتسوق وسيرة والت ديزني. وكانت باستقبالنا هي وزوجها وبناتها الله ايحفظهم واستقبلتنا بحراره وخذنا شنطنا وطلعنا ..

هذا ماعندي لهذا اليوم خلكم بالجوااار وانتظرواباقي التقرير

دمتم بود














المشاركات

Impact Impact
رحلة راهية دوم الى نيويورك أرض الحرية:)


اهلين اختي

والحمد لله على سلامتكم

ومتحمسين لبقية التقرير واسلوبكم المشوق

في الجوار .. تحياتي :)


شارلوك هولمز شارلوك هولمز
رحلة راهية دوم الى نيويورك أرض الحرية:)


بداية رائعه وتفاصيل مفيدة ..حلوة جمعت العائلة الله يجمعكم على الخير
متآبع ولاتطولي علينا

هولمز


عشقي جنوني عشقي جنوني
رحلة راهية دوم الى نيويورك أرض الحرية:)


متابع معكم والحمدلله على السلامه واعجبتني الفكره حق اتحاد الاماراتي


راهية دوم راهية دوم
رحلة راهية دوم الى نيويورك أرض الحرية:)


نكمل معكم الجزء الخاص لهذا اليوم ,,,

طبعا وصلنا بيت أختي وكانت الساعه تقريبا 6 بسبب الزحمة من المطار لين البيت ,, وأفطرنا ولله الحمد , الفطور في امريكا كان في حدود الساعه 8 وربع تقريبا

هاليوم طبعا ماسوينا فيه شي , وارتحنا علشان ثاني يوم نبدى بهمه ونشاط


ابصراحة هاليووووووووم مانمت فيه أبد وكنت متحمسة أبغي ايمر هاليوم علشان ثاني يوم نطلع فيه وأشوف نيويورك


طبعا طلعتنا بتكون قريب المغرب علشان نفطر بره ,,, وكنت طالبه منهم ايودوني مكان مفتوح في الهوااااء الطلق لان شبعنا حرررررررر ورطووووووووبة في البلاااااد ,,, وأبغي أتنفس وأشم هوا فريش اشوي
جا وقت المغرب وسرنا صوب البحر والجزء المقابل لمنهاتن تحديدا وكاااااااااااااااااان المنظر روووووووووووووعه مكاااااااااااااان مفتوح كله اماكن للقعده وفيه اماكن للباربيكيو وقعدنا انزهب للفطور وصورت لكم هالمناظر ,,, طبعا سويت زوووووووم من كاميرة اي فون 5 اس يعني الخلل من الكاميره موب مني
































الجووو كان خووووووووووووورافه باااااااااااااااارد لدرجة لبسنا شي ايدفينا ,, والمنظر رووووووووووووعه وسكون وهدوء ,,, قعدت اتأمل المنظر وانا سااااااااااكته وماودي أحد ايكلمني موووووووووووووووووول .. هههههههههههههههههههه طبعا الكل عصب مني انتي امس واصله ونحن ولهانين عليج ,, وانتي في طقوسج الخاصه وقعدات التأمل ههههههههههههه

مراعاة لمشاعرهم ,, استجبت لطلبهم وقعدت أسولف معهم ,, وقمنا لعبنا من اليهااال لين الساعه 11 تقريبا وردينا البيت وكلنا نشاااط وحيويه ,,


ثاني يوم الصبح قعدت الساعه 4 ونص الفجرا ,,, والحمدلله بعدها بشوي كان وقت الصلاة وصليت والساعه 7 حسيت ببروده فقلت خلني اشوف كم درجة الحراره

شوفوا كم









وااااااااااااااااااااااااااااااااااااااااااااو رووووووووووعه الجو ,,, اتفاجأت فيه ابصراحة لأن اختي دوم كانت تشتكي ان الجو بالصيف يستوي حر ورطوبه وانه مافي فرق وااايد عن جو الامارات وقاعده اتعد الايام والليالي علشان اتخلص بعثتهم واترد البلااد ,,

فانتظرت ريلها طلع وانقضيت عليها وسويت هجوم مباغت وقلتلها الحين هذا نفس جونا فالاماراااات ؟؟؟؟هههههههههههههههه


راهية دوم راهية دوم
رحلة راهية دوم الى نيويورك أرض الحرية:)


اليوم قررنا انروح نتسوق ,, فرحنا مانهاتن مركز اسمه مايسز ,, شفت عندهم براند هيرمز وتعجبني عطورهم ومومتوفره عندنا فكل الاماكن ,, وكنت ادور عطر من ايستي لودر وكان رجالي وحصلته وبعد عطر نسائي من ايستي لودر عجبني
أخليكم مع الصور ...














هذا الامباير استيت مالهم





بكمل صور مول مايسز , المول اكبير وااااااااااااااااااااااااايد بالعرض وهو 10 طوابق كل طابق مختص بشي معين مثلا الطابق الاول للعطور الثاني للشنط الثالث للاطفال الخ













ونحن منسجمين بالتسوق ,, اختفت الجوري مع انها كانت تحت عيني وانتبه لها وماسكه ايدها ,, وطبعا بنتي توقيت جلستها في عربانتها نص ساعه بس وتبدى تتملل وتبغيني أشلها أو أنزلها من العربانة ..

طبعا أعصابي تعبت عالاخر , وقعدت اناديها فالحمدلله طلت من تحت الثياب وطلعت نفسها وخلت وجهها بس ورا الثيااااب .. كااان خاطري فهالوقت اعضها واخليها اتصيح من القهر ,, ولكن عديتها لانها كانت تضحك ومابا اشل المكااان بصراخها



أنا هناااااا هههههههههههه







طبعا وقفنا كل شئ لان ماقدرنا نمشي من الخوف عليها ,, ورحنا ل مااك عندهم وكان في نفس الطابق الي كنا فيه ,, وطلبنا لها شيبس وايس كريم وقلنا نقعد اشوي لانها سيبت ركبنا
المهم ونحن جالسين جت عايله امريكيه وقعدت جنبنا ,,, ومعاهم بنت أكبر من بنتي بحدود 8 أشهر .. جت عيني على جوري اشوفها قااعده منبهته وتتأمل البنت ,,,وكانها دمية أو شي ماأدري,, لانها أول شي كانت مستحية بعدين بدت تتحسس شعرها وشباصاتها وايدها واطالع البنت باستغرااااب .. اتوقع بسبب كثرة الشباصات بشعر البنت








بنتي دومها أم كشة ,, تعبت معاها أسحي شعرها وارتبه وأحطلها شباصه ,, مااتكمل ساعه تتملل واتشل الشباصه وكل مااحاول احطها اترد مره ثانيه اتشلها واتنشع شعرها وكل مانها الكشة أب أب أب أب , فأخليها خلاااص براحتها ,, والشي الثاني لازم اتشل الشوووز مالها وين ماكنا بالذات اذا اقعدت في عربانتها ,, أقولها ماما انتي كيوت موب لايق عليج موووووووووووووول هالتصرفات الغجرية ههههههههههههههههههه


راهية دوم راهية دوم
رحلة راهية دوم الى نيويورك أرض الحرية:)


الحين بحط لكم مقتطفات من الجسر الي يربط مانهاتن ببروكلين على مااعتقد









مقتطفات من مانهاتن ليلا وتحديدا جنب مركز مايسز ...






وااااااااااااااااااااااااااو الصورة الي بحطها الحين عاجبتني بشكل





مقتطفات صباحية من مانهاتن












مقتطفات صباحية من بروكلين وهي منطقه ثانيه في نيويورك






نفس المكان ليلا



هاليوم أفطرنا في مطعم تركي اسمه علي بابا , واكله روووووووووووعه ابصراحه وكان اخر يوم في رمضان وثاني يوم العيد ,,,, كل عام وانتم بخير





هذا ماعندي لهذا اليوم

خلكم بالجوار

متابعة شيقة


راهية دوم راهية دوم
رحلة راهية دوم الى نيويورك أرض الحرية:)


المشاركة الأصلية كتبت بواسطة Impact
اهلين اختي

والحمد لله على سلامتكم

ومتحمسين لبقية التقرير واسلوبكم المشوق

في الجوار .. تحياتي :)
هلا فيكم في تقريري المتواضع

الله ايسلمكم , وعلى فكرة من حمسني أكثر للذهاب الى نيويورك ,,, تقاريرك المشوقة ,,,, كنت اتابعها من خمس سنوات وناوية أزور أمريكا ,, وسبحان الله الله أكرمني أكثر مماتوقعت , وراحت أختي ورحت أزورها وقعدت شهر بدال الأسبوعين الي كنت بروح فيهم كسياحه , مع سهوله بالحركه لان اختي صارت خبره بالاماكن الحلوه والسياحيه والتسوق , بالاضافه اني ماتعبت نفسي بالحجوزات ومعرفة المواصلات ومكان الاسواق الخ من التحضير الي يسبق اي سفرة .

شكرا لمتابعتك وخلك بالجواااار


راهية دوم راهية دوم
رحلة راهية دوم الى نيويورك أرض الحرية:)


المشاركة الأصلية كتبت بواسطة شارلوك هولمز
بداية رائعه وتفاصيل مفيدة ..حلوة جمعت العائلة الله يجمعكم على الخير
متآبع ولاتطولي علينا

هولمز
فعلاا حلوة جمعت العايله ,, والله ايديمها علينا وعليكم يااارب .

الحمدلله ان تقرير أعجبكم ,, وباذن الله مابتأخر فيه ..

خلكم بالقرب


راهية دوم راهية دوم
رحلة راهية دوم الى نيويورك أرض الحرية:)


المشاركة الأصلية كتبت بواسطة عشقي جنوني
متابع معكم والحمدلله على السلامه واعجبتني الفكره حق اتحاد الاماراتي
الله ايسلمك

ايه فكرة طيران الاتحاد رووووعة , والحين بتتفعل نفس الخدمه على طيران الامارات وقريبا ...

بتحصلون كل ماهو مميز في الامارات ,,,

دائما سباقة لكل ماهو مميز ومفيد .

أشكرك على المتابعة .



يمكنك فتح موضوع جديد للمناقشة او الاستفسار والمشاركة.

أبحث واحجز بأعلى خصم:
خصم يصل إلى 25%

Share

رحلة راهية دوم الى نيويورك أرض الحرية:)