1. سوق تراثي

السلام عليكم ورحمة الله وبركاته
أخواني، كل أمة تعتز بثقافتها وتراثها وتحاول بكل قوتها انها تحافظ على هالتراث وتتباها فيه قدام الثقافات الأخرى، وكمستكشفين نحب نتعرف على اللي يميز المدن اللي نزورها بكل المستويات
اعتقد مافي اجمل من انكم تكونون في مكان وتشوفون التراث ينبض بالحياة ، وتعيشون رحلة مع الأصالة والتراث
وعشان نسلط الضوء على أهمية الحرف والصناعات التقليديّة في التراث الإماراتي، وتعزيزا للجهود اللي يقوم فيها أخوانا اللي يصونون ويحمون هذه الحرف ويحرصون على تعليمها للأجيال المقبلة،
بيتم تنظيم
المهرجان الوطني الأول للحرف والصناعات التقليدية
خلال الفترة من 23 إلى 29 أكتوبر المقبل
ووين؟
في سوق القطارة، العين
وبيكون فالمهرجان الكثير من المسابقات التراثية لفئات عمرية مختلفة من مرتادي المهرجان، وفيه كثير من الفعاليات الحلوة
مثل مسابقة اليولة للصغار
مسابقة إعداد الأكلات الشعبية
وأكيد فيه الكثير من الفعاليات مثل صنع القهوة العربية التقليدية، وبعد عروض الحربية والعيالة والعزف على الربابة وفن الشلة واليوله وورش عمل في فن الحرف اليدوية بعد.

سوق تراثي

بالإضافة طبعا للسوق التراثي للي يحبون الحرف والصناعات التقليدية، والأسر المنتجة للصناعات التقليدية، والجهات المتخصصة في بيع وتسويق المنتجات التقليدية، والهيئات والمؤسسات الحكومية والأهلية المعنية بالمحافظة على الحرف والصناعات التقليدية وإنتاجها وتطويرها. عشان تقدرون تأخذون قطع تذكارية مميزة
واكيد الكلام مب مثل الشوف ..
اللي بيحضر المهرجان بيستانس بالفعاليات والأمور اللي يشوفها
عشان جي لا تضيعون عليكم فرصة حضور هالمهرجان اذا بتزورون أبوظبي فهالفترة
وهذا الرابط عشان تتعرفون اكثر على المهرجان
https://www.abudhabievents.ae/ar/Pages/national-traditional-handicrafts-festival.aspx
والسلام عليكم
اخوكم مسافر ابوظبي