بشرى سارة لكافة اعضاء ورواد منتدى العرب المسافرون حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق arTravelers.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب وقد تم نشر 400,000 ألف موضوع 3,500,000 مليون مشاركة وأكثر من 10,000,000 مليون صورة ما يقرب من 30,000 ألف GB من المرفقات وهي إجمالي محتويات العرب المسافرون للاستفادة منها والتفاعل معها كحق اساسي لكل عضو قام بتأسيس هذا المحتوى على الانترنت العربي بغرض الفائدة.

لمزيد من التفاصيل يمكنكم مراسلتنا من خلال نموذح الاتصال, العرب المسافرون على Facebook




FuNnY GiRL FuNnY GiRL
معقوله عقب كل الحب اللي بينا يصير نوع من الكره !
17-12-2014 - 06:20 am

مابي مشاكل ولاابي حد يهاجمني انا مجرد افضفض عن مشاعري واللي حسيت فيه لما زرت سويسرا وتوني جايه من يومين منها

تغزلت في حبي لها كثير رغم مرات اشوف اشيا ماتعجبني بس لاني احب هالبلد كنت اسكر عيوني عن كل سلبيه فيها بس هالمره تغيرت نظرتي لها

سبق ونزلت تقرير اسمها سويسرا انا احبك بس لااول مره بعلنها لكم

سويسرا انا كرهتك

اكثر شعب كريه شفته رغم اني اشوف كره لنا بس هالمره حسيت نفسي مقدر استحمل نفسيتهم مش الكل اكيد بس اكثر حتى من المانيا تشوف في عيونهم كره لااي حد اجنبي مب ببس للعرب حتى الجنسيات الثانيه اللي يشتغلون هناك يعانون منهم .. شي خايس شعب متخلف ماعندهم اي ثقافه ولايعرفون شي .. خصوصا في الجانب الالماني فعلا شعب ينرفز

وتوني اكتشفت انها غاليه بطريقه مش طبيعيه .. بعطيكم مثال بسيط انا لاول مره اودي معاي اعيالي صغار ولدي وبنتي واللبس اللي يلبسونه اليوم خلاص يندمر وتوهقت لان ملابسهم وسخه قلنا بنودي ملابسهم المغسله تخيلوا اللبس الواحد يغسلونه على 40 ريال مب مسالة اني مقدر ادفع بس فعلا الاسعار مش طبيعيه وكل ماقلت لهم ليه يقولون بيكوز سويسرا اضطرينا نشتري لهم ملابس جديده ونخليهم يلبسونها ولانخسر على غسيل لان مب لبس ملابس اشكثر عندهم ..

رحنا تغدينا في سبايس انديا اللي في انترلاكن مع اني ماكنت ابيه كان خاطري في الايطالي اللي قدامه بس حصلناه مسكر لان الساعه كانت 4 اول شي الخدمه اي كلام نفسيتهم مش حلوه وغير الذبان في المطعم وطلبنا بس لشخصين لان اعياالي صغار وماياكلون هالاكل الفاتوره قريب 600 انقولهم ليه يقولون بيكوز سويسرا .. رحنا في نفس اليوم تعشينا في مطعم لبناني هو الوحيد اللي في بازل الله يعز النعمه من اكله الفاتوره بعد كانت 500 وشوي والله لو المكان يستاهل ترى ماعندي مشاكل ادفع اللي يقهرني ان الاكل اي كلام والخدمه اي كلام والسعر غالي على شنووو

وفي المانيا تغدينا في مطعم هندي شنو عجيب ودلعنا نفسنا في الطلبات والله ماكذب عليكم الفاتوره 200 وشي ومره بعد في مطعم ايطالي الفاتوره اطلعت ميه وشوي لاحظتو فرق الاسعار المانيا والله اشوفها حتى ارخص من قطر واحلى من سويسرا وحلوه للتمشي وفنادقها حلوووه وكبيره الواحد يقدر يتنقل وشوارعها اتجنن

وفي سويسرا اللي بيدور دكان فالليل ماراح يحصل توهقنا نبي ماي اندور من محطه لمحطه حتى الدكاكين اللي في محاطتهم مسكره شنو هذا صدق دوله متخلفه المانيا في المحطات الدكاكين فاتحيه حتى النمسا هم ولاشي فاتح مافي الا البارات اضطر زوجي يجيب لنا من البار ماي وللاسف الغراش كلها قزاز اعتبرها خطره لان معانا صغار طول الوقت اخاف تنكسر على حد فيهم


عنصرية شعبهم خااااااااااايسه والله وهالشي بينفر السياح منهم اذا ماثقفوا شعبهم المتخلف مع السياح ويعلمونهم اشلون يتعاملون بطريقه مؤدبه معانا مب يطالعونا حشرات ولاشي علشان انا لابسه حجاب ولا علشان واحد لونه شوي اسمر ولون شعره اسود ولا لانه مش اوروبي .. في هالسفره احتكيت في الشعب اكثر من كل مره حسيت اني عرفت تفكيرهم النمساوين احسن منهم وألطف والكل يتكلم انجليزي السويسرين يعرفون بس مايبون فيهم نذاله النمسا اشوفها حلوووه وشعبها طيب ويساعدون وماعندهم عنصربة السويسرين حسيت هالمره بالفرق لاني زرت الثنتين حتى في اجو في النمسا كان روعه جينا سويسرا جانا الحر مادري ليش حبيت النمسا هالمره من كل النواحي طبيعه واماكن سياحيه اكثر من سويسرا

في بلادي احنا ماعندنا مشكله مع اي جنسيه في بلادنا ولا اي ديانه سوى كنت مسلم مسيحي بوذي هندوسي سيكي اي ديانه كانت احنا نتعامل مع شخص مب دين بس هم كثير يهمهم ان الشخص اتكون عينه زرقا ويكون اشقر ويكون نفسهم ولا خلاص الكل بيخيس النفس وياه وبيطالعونه بنظرات

اليوم الاخير لنا لبست عبايه لان بنروح المطار خلاص بنرد بلادنا حسيت نفسي اليسا ولا نانسي كنت كاشخه بالعبايه والنظرات والشنطه كل العيون علي والله حبيت الوضع ترى خخخخخخ شعور حلو ان الواحد يكون ملفت الانظار يقولون برج الاسد كذا مادري صج ولا خخخخخخخخ بس اكيد غيري مايحب .. كل هذا لاني لبست عبايه عيل اللي يلبسون نقاب اشلون يطالعونهم !


تصوروا في محل بيكري وحده عندها كيكاات وسويتات تخيلوا بس نحل قاعد يدور على الكيك ويمشي وانا وجهي لااردي تغير وصار كذا قامت اتكلمنا بنفس خايسه ان النحل يجي منه العسل وان هالشي مب وصاخه غير النامس والذبان شوفو وصاختهم والله انهم شعب مافي نظافه ااااابدا عايشين مع الحشرات والنامس والذبان


تبت توووبه اني اسافر في الصيف شنو فطست من الحر اول مره اسافر هالوقت في موسم الصيف والسياحه .. انا انسانه اكره الحر تدرون ولاحد مشغل المكيف مع ان في مكيفات هذا اللي قهرني في مكيفات بس ذابحهم البخل امبطلين الدرايش والبيبان طول الوقت قاعده اهف على عمري انا الوحيده هم مافي اي احساس بالحر مادري من الصح انا ولاهم وغير الذبان انا جنوني شي اسمه ذبان اتوتر واوتر اللي معاي لان يدي اتصير مروحه الذبان في المطعم كله ولافي اي حد اشتكى ولاقال شي غيري انا حسسوني ان انا الغلط وهم الصح هالشي وصاخه شنو مكان اكل كله ذبان وحشرات ونامس ولاتتوقعون بتستانسون في حدايقهم طول مانا امشي في نحل وفي ذبان كبيرررر وحشرات مادري اشلون هم فارشين على الارض وقاعدين بين النحل ومستانسين وانا اشرد كل ماقربت مني نحله


وملااااحظه صارت لي مع اعيالي

رحنا حديقه علشان اليهال يستانسون تدرون حصلنا اطفال على كبر اعيالي اعمارهم 4 و 5 اهلهم مفصخينهم بدون اي ملابس ومخلينهم يلعبون في الالعاب ويتسبحون انا اعيالي اول مره يشوفون هالمناظر لان في بيتي ممنووووع اي حد يشوف الثاني ولو حتى بالغلط شي مش مسموح جد توهقنا اخليهم يلعبون ويستانسون واليهال كلهم مفصخين ولاانغير المكان في الاخير قلنا لهم لاطالعون لان حرام ومايصير وعلمتهم غض البصر صارو بنفسهم يصدون او يسكرون عيونهم بيدهم اذا شافوا اي منظر مب اوكي .. ماعندهم ادب هالاهل حتى لوكان طفل عيب اخليه كذا بدون اي ملابس ماعرف اشلون تفكيرهم اللي بيروح مع اعياله راح يشوف من هالاشيا كثيررر واعياله بيتعلمون اعيالي اعرفوا الخمر واشيا واشيا خخخخ ولدي يمشي الحين يقلد اللي شاربين خمر خخخخخخ بس الحلو ان صار عندهم اعتزاز بدينهم وصارو يقولون الحمدالله احنا ماعندنا نفسهم


انا من عشاق الشتا اكتشفت بلادهم ماينراح لها في الصيف لان ولاحد يشغل مكيف وحتى في فنادق سويسرا بس مراوح يقصون علينا مافي مكيفات يقولون ليه نحط مكيف علشان شهر حار مع انه من شهر 5 عندهم حر واذا فتحتو الدريشه خذوا انواع الحشرات الدبور والنحل والذبان واشيا اول مره اشوفها عندهم ماتتخيلون اشلون عانيت وقت النوم حر موووت الغرفه المكيف بس صوت


وغير الظلام اللي في شوارع اوروبا جد اوروبا فالليل موحشه ظلام دامس مافي الا ليتات السياره يازين بلادي في كل مكان ليتات ونور خصوصا اللي يسكن في الارياف راح يعاني او اللي بيستخدم الهاي وي


الحمدالله على النعمه في بلادي والله ان احنا في نعمه وخير وصج جونا حار بس في مكيفات وين ماتروح ومكيفات بارده هم فطسونا حر ومستحيل اتروح كوفي شوب ولامطعم كله ذبان وحشرات عادي البلديه اتسكر المكان هم هالشي عاااادي عندهم حتى في المطاعم التركيه النامس يدووور على الخضرا مالت السندويشات والناس تطلب وتاكل الوضع جدا عادي مافي شي مسكر كل شي مكشوف وماشفت حد ينقرف الاانا واعيالي بعد مثلي


هل برجع سويسرا مره ثانيه ؟

ماتوقع انا رحت لها اكثر من 5 مرات كل مره كنت اكتشف اعيوبها وامشي بس هالمره حسيت طفح الكيل منها واتوقع اني صرت من عشاق المانيا صج فررررررررررق في كل شي شوارع سويسرا من اغبا شوارع العالم واي حد جرب وساق في سويسرا راح يفهم كلامي اما المانيا كله ادعس والقلب داعيلك وشوارعهم حلوه وسيعه اما الغبيه سويسرا شوارعها ماساه والله واسعار الفنادق معقوله للعايله والشقق وكل شي سعره حلوووو في المانيا وغير انها مريحه نفسيا الصبح فيها شي ثااااني وكل منطقه جمالها غيرررر


ارجع اقولكم حبيت افضفض وكلامي هذا ماطلع الا بعد زيارات كثيره واحب اقولكم ان الجانب الفرنسي اخلاقهم واااااااايد احسن من اللي في الجانب الالماني هم العنصرين اكثر بس التخلف واحد عندهم
وارجع اقولكم اني بس افضفض لانكم اسرتي الثانيه ارتاح لما اكتب واقول اللي في خاطري ومب شرط اللي انا اشوووفه غيري يشووفه كل شخص له نظرته ومابي هجوووم بليززززز عادي مستحيل الاراء اتكون نفس الشي لازم في اختلافات واتمنى تتقبلون الاختلافات بكل صدر رحب

احب منتدى العرب المسافرون وهو اغلى موقع على قلبي

اتمنى اني كنت خفيفة ظل عليكم

في امان الله





المشاركات

ابوناصر 22 ابوناصر 22
معقوله عقب كل الحب اللي بينا يصير نوع من الكره !


الحمد لله على السلامة أختي الكريمة
وعودا حميدا
والسفر في عادته لابد فيه من بعض المشقة
ربما 95% من السياح يذهبون هناك لما حبى الله تلك الديار من جمال رباني
من تلال خضراء وجبال مكسوة بالثلوج وبحيرات صافية نقية وانهار على الدوام جارية

والملاحظات موجودة في كل بلد , لكن الطرح ربما كان قاسيا
فالفنادق هناك بالفعل قليل جدا من يوفر التكييف لنزلائه بسبب قصر فترة الحر لديهم والسائح خبير نفسه
فعليه البحث عن مايناسبه , فهناك مواقع للفنادق والشقق لاتحتاج الى مكيفات لبرودة الجو بسبب موقعها
وأما المطاعم فبالفعل هناك ( بعضها ) تبالغ بأسعارها خاصة سبايز انديا رغم عدم جودة أصنافه وهناك تناولت وجبة واحدة فقط ولم أعد , وغيره من المطاعم مثل المطعم الأيطالي على بحيرة ثون
كانت نوعية أصنافه جيدة جدا وسعره لخمس أشخاص لم يتجاوز 50 فرنك 210 ريال سعودي
أما السلوكيات الأخرى التي تختلف ولاتتناسب معنا ولا مع ديننا فهذا شيئ متوقع منهم
فهم لايعتقدون نفس معتقدنا
( وسيد قومه المتغافل )
تحياتي


قايد قايد
معقوله عقب كل الحب اللي بينا يصير نوع من الكره !


اختي الغاليه
اخر اعلان لمقاطعة اروبا كان في السنه الماضيه بالنسبة لي
ولن اذهب لها الا لرحلات العمل فقط
اشياء لفتت نظري ومنها اتخذت هذا القرار
اولا : اي مكان كنت اسكن فيه مع عائلتي اسال ملاك الفندق عن ذروة عملهم وربحيتهم وطرقها
فكانو يعطون اجابات تتلخص في سر البنوك الخليجيه اللتي تصيف في بلدانهم
فهم ينظرون الينا وكأننا مكائن صراف متحركه
فهم يعرفون اوقات عطلاتنا
ويوقنون بأننا سندفع مهما كلف الامر ,,,,,, اكبر مشكله


والاهم من الكل ان من سبب هذا الشيء لنا هو نحن بتصرفاتنا وعدم مبالاتنا
وعدم حسن التصرف
شاكر ومقدر ماكتبتي
تحياتي


ابوناصر 22 ابوناصر 22
معقوله عقب كل الحب اللي بينا يصير نوع من الكره !


المشاركة الأصلية كتبت بواسطة قايد
اختي الغاليه
اخر اعلان لمقاطعة اروبا كان في السنه الماضيه بالنسبة لي
ولن اذهب لها الا لرحلات العمل فقط
اشياء لفتت نظري ومنها اتخذت هذا القرار
اولا : اي مكان كنت اسكن فيه مع عائلتي اسال ملاك الفندق عن ذروة عملهم وربحيتهم وطرقها
فكانو يعطون اجابات تتلخص في سر البنوك الخليجيه اللتي تصيف في بلدانهم
فهم ينظرون الينا وكأننا مكائن صراف متحركه
فهم يعرفون اوقات عطلاتنا
ويوقنون بأننا سندفع مهما كلف الامر ,,,,,, اكبر مشكله


والاهم من الكل ان من سبب هذا الشيء لنا هو نحن بتصرفاتنا وعدم مبالاتنا
وعدم حسن التصرف
شاكر ومقدر ماكتبتي
تحياتي
أعتقد أن الأستغلال يكون في أغلب البلدان السياحية وفي بلادنا العربية على وجه الخصوص يظهر الأستغلال بأوسع أبوابه
سكنت في غرفة وصالة على شاطئ جدة وبدون أفطار ب1800 ريال !!!!!!
وفي شاطئ نصف القمر غرفة وصالة بدون أفطار ب1900 ريال !!!!!
وفي انترلكن ( فندق ) سكنت غرفتين وصالة ومطبخ واطلالة على البحيرة وأفطار ونادي صحي متكامل ب1300 !
في أعتقادي ان السائح باستخدام التقنية الحديثة والحجز عن طريق النت باستطاعته مقارنة الأسعار واختيار الأفضل بينها
....
لكن مما أدهشني في سويسرا هوالأختلاف في سعر المشروبات الغازية بين المطاعم وبين بعض السوبرماركت
فالمطاعم تبيع الكولا ب3,5 فرنك مايعادل 15 ريال تقريبا !!! بينما تباع في السوبرماركت وبسعر الجملة ب ,0
0,45 سنت أي مايعادل 1.90 ريال تقريبا !!!! أعتقد الفرق واضح وكبير لكن السبب لدي غير ظاهر ولا معروف !!!


فارس من خيال فارس من خيال
معقوله عقب كل الحب اللي بينا يصير نوع من الكره !


الحمد لله على السلامة اختي فني غير
الله يعينك شكلك عانتي وتبهذلتي في سويسرا وبالعكس فضفضتك ورأيك صدقيني في يوم من الايام احد ابيستفيد منها
واما العنصرية فربما اغلب دول اوروبا موجود هالشي فيهم ولا ادري مع العرب خاصه او حتى بقية الجنسيات يحصل معهم هالشيء
وعن جمال سويسرا وطبيعتها الخلابه والسالبه للعقول لايختلف عليها اثنين
ووجهة نظري الخاصة اشوف سويسرا اجمل بلد اوربي بطبيعتها
ونصيحه لك ولاي شخص لمن يسافر يحاول يستمتع بكل لحظة يقضيها هناك ويجعل المنغصات خلف ظهره ولا يلتفت لها
الف شكر لا ابدأ رأيك وأن شاء الله احد يستفيد من هالملاحظات
وفي النهاية ماقول إلا يازين البرازيل طبيعه وجمال ومافيها عنصرية نهايئاً
وكذلك لايوجد استغلال للسائح واسعارهم معقوله ومقبوله
تحياتي لكِ




كوتي كوتي
معقوله عقب كل الحب اللي بينا يصير نوع من الكره !


وجهة نظرك لها احترامها وبالعكس كلنا اسره واحده وكل واحد منا له وجهة نظر وواجب على كل شخص احترامها
واكيد فيه ناس مؤيده وفيه ناس معارضه
أما أنا محايد في اللي طرحتيه
استقبال موظف المطار شي طبيعي لأنه حتى عندنا هنا وهو ربعنا وديرتنا انفسهم شينه البعض مو الكل
غلا الأسعار انا معك وهذا شي معروف من زمان

وشكرا لك على طرحك


القطري القطري
معقوله عقب كل الحب اللي بينا يصير نوع من الكره !


السلااااااااااااااااااااااام عليكم

اول شي الحمدالله على السلامة ..
ومن اول ماقريت ان السفرة فيها صغار ضحكت لأني حاليا اعاني من نفس الموضوع ^_*
والمشكله جاي مع عيالي بدون ولا مره يعني حرمه ^_*
يعني انا بابا وانا ماما وانا ميري *_*
وموضوع الغسيل او الطبخ او اي شي يتعلق بالاطفال الافضل تاخذون شقه وخصوصا غسالات الملابس سهلة الاستخدام اهنا <<< خبره الحين *_^

بلخص الموضوع من وجهة نظري في نقطتين :
1- السفر مع الاطفال له مساوئ ومحاسن
2- التوقيت ماخدمكم وعن نفسي مستحيل اسافر في الصيف ولولا ظروف دراستي حاليا في بريطانيا ماجبت عيالي عندي ..

ولا اتلومين الشعب لأن الظروف المحيطه فيكم ماخلتكم اعتقد اتشوفون كل شي حلو لان اتحاتون اول شي الصغار واحتياجاتهم مثل تكرمون الحمامات وغيرها ..
وفوق هذا اختيار الاماكن الي اتناسبهم هذا بعد ياخذ جزء من حمل المسئولية ..

والحمدالله ع السلامه مره ثانيه ..
وان شاءالله اتعوضونها في سفرات احسن


عش اللحضه عش اللحضه
معقوله عقب كل الحب اللي بينا يصير نوع من الكره !


السفر بحد ذاته متعه ولا يخلو من مشقه واحيانا بعض المنغصات التي لازم نتجاهلها
سويسرا حلوه وجميله وشعبها فيهم الطيب والخدوم بصراحه خصوصا كل اللي تعاملت معاهم في استقبال الفنادق
وفيهم السئ الاخلاق واذكر واحد في وين قن في مطعم كان تعامله فظ وقبيح هذا شخص فقط بس غيره مالاحظت شي
واما بخصوص نظراتهم احيانا فما حفلت فيها
وجهه نظرك تحترم بس صدقيني اذا ركزتي على السلبيات وتوقعتيها فستقابلين منها الكثير تبدا بافكار وبعدها تتجسد على ارض الواقع
دمتم بسويسرا


FuNnY GiRL FuNnY GiRL
معقوله عقب كل الحب اللي بينا يصير نوع من الكره !


ابو ناصر 22

اشكرك لانك اول من رد على موضوعي وشرفني تواجدكم جميعا ومقطع الفيديو اللي حطيته خيالي وبعدين دام يجيهم حر يعني لازم مكيف احنا الشتا عندنا شهر ومع هذا انحط دفايات وقت البرد ونلبس شتوي نعطي كل وقت حقه بس هم ذابحهم البخل كل شي اكسبنسف بيموتون على الريال .. شكرا لمرورك

قايد

لااااا حرام لاتسوي مقاطعه حق اوروبا كلها شهر 9 اجمل وقت انك اتزور اوروبا انا مجربه من قبل كم مره اما الصيف اشرد لانه حر موت .. المانيا حلوووه وعائليه ومنظمه وحتى النمسا اشوفها عائليه واذا اموركم الماديه طيبه لندن بعد خيال

اول محطه لنا كانت برلين وماتتخيل اشلون استانسنا فيها مافيها زحمه حلووووه وجوها كان يجنن واسعارها ارخص من بلادنا الخليجيه في كل شي بصراحه حبيتهاااا لاتقاطع اوروبا بس ابتعد عن الاماكن اللي طايحين فيها العرب لان هم اللي يشوفونا بنوك متنقله

شاكره لك مرورك

فارس من خيال

شرفني تواجدك وردك على فضفضتي وجنوني


لاحرام ماتبهدلت بالعكس استانست والله اول محطه لي كانت برلين وحدي حدي استانست فيها ثاني محطه سكنت في منطقه اسمها fugen اقدر اقولك جنه وابتعدنا عن زيلامسي وزحمتها توفقنا في المكان وفي السكن وحتى رحنا مناطق ايطاليه اول مره اشوفها حلوووووووه تبعد ساعتين تقريبا عن مكانا وثالث محطه سويسرا السكن كان في الجانب الالماني حتى جماله اقل من الجانب الفرنسي هذا اللي لاحظته وترى انا استمتع ماعليكم بس هالمره شفت سويسرا بنظره ثانيه لما قارنتها في برلين وفي المانيا كلها والنمسا حسيتها غبيه ويبيلهم يثقفون شعبهم ويعلمونهم ان العالم كله في حضارات مب هم بس ملوك الارض .. والبرازيل مشروع يبيله والله دام تمدحها واذا رحت لها نبي انشوف تقرير منك لان تقاريرك مشاءالله دايما مبدعه

شكرا لك

كووووتي

شاكره لك مرورك .. انا ماعانيت من موظفين المطار بالعكس كانوا طيبين وحتى لوعانيت اعتبره شي طبيعي مثل ماقلت عندنا مخيسين النفس اشلون هناك خخخخخ

لما وصلنا مطار برلين قطر كانت مرسله واحد من السفاره علشان يسهل امور القطرين الف الف شكر لهم ويعطيهم العافيه ماقصروا على هذا الشي بالعكس عاملونا بكل احترام وكانو يضحكون ويانا .. وغلا الاسعار ليته على شي عدل عندهم اللي يحرني اشيا خايسه وغاليه على الفاضي

القطري

وعليكم السلام والله يعيييييييييييينك انا لوزوجي مب معاي مستحيل مستحيل اسافر وياهم لان هو اللي يضبطهم مايخافون مني ومعاهم رجعنا صغار صار في السفره ملاهي وحدايق وهالسوالف خخخخ

احنا في برلين وفي النمسا سكنا في شقق قلنا بنغير في سويسرا ابي فندق علشان في ناس تنظف انصدمت ان التنظيف بفلوس تبي ينظفون غرفتك ادفع

وصح كلامك الصيف ماينفع السفر فيه هاذي اول مره واخر مره حر حر حر احنا في الشتا انطلع الدفايات هذا واحنا شتانا شهر ماسوينا مثلهم وقلنا شتانا شهر بس

شاااااكره لك المرور والله يردك انت واعيالك بالسلامه ويعينك على السنداره


q8ya metnaqla q8ya metnaqla
معقوله عقب كل الحب اللي بينا يصير نوع من الكره !


فني الحمدلله على سلامتكم
شوفي كل مكان في الطالح والصالح وبما انج قارنتي كذا ديره لازم وحده منهم بتطلع الخسرانه وللاسف انه سويسرا اهي اللي طلعت في نظرج
وبالنسبه للغلا اوربا نار في الصيف وسويسرا معروفه انها غاليه
بس على سالفه تظيف الغرف بيزات هذا شي يديد اي مناطق وفنادق اللي جذي تنظيفهم
وفضفضي ولاتخشين شي
يامحط الانظار انتي يانانسي :)



يمكنك فتح موضوع جديد للمناقشة او الاستفسار والمشاركة.

أبحث واحجز بأعلى خصم:
خصم يصل إلى 25%

Share

معقوله عقب كل الحب اللي بينا يصير نوع من الكره !