- السلام عليكم ورحمة الله
السلام عليكم ورحمة الله
من زمان وانا خاطري اساهم بمعلومات مفيده في بيتي الثاني العرب المسافرون .. الصرح العظيم اللي ما استغني عنه ابدا في التخطيط لأي رحله سواء داخليه او دوليه واليوم عزمت اكتب هالتقرير لعلي ارد فيه لو جزء بسيط من المعروف ..
فحياكم الله جميعا في تقريري البسيط والمتواضع
ليست المره الأولى اللي ازور فيها مدينة دبي ولكن المره اللي فاتت سكنت في فندق وكان فيه بار للأسف وهالشيء غير مناسب للعائلات ابدا..غير الازعاج اللي كنا نعاني منه طول الليل
فهالمره قررنا نسكن في شقق فندقيه افضل لنا وبناء على توصيات الأعضاء الكرام هنا وكانقرار موفق الحمدلله
الرحله كانت 4 ليالي من 23-5-2014 لغاية 27-5-2014
عددنا 4 انا وزوجي وطفلين..
بديت البحث في المنتدى وطلعت بترشيحات كثيره وكنت ابحث في بوكينج لحد ما استقريت على هالشقق
https://www.booking.com/hotel/ae/ivory-grand-apartments.ar.html?aid=1300939 ايفوري جراند للشقق الفندقيه تقييمه في بوكينج 8,6
يعتبر كويس ..كان اهم شي عندنا النظافه والهدوء وقربه من مول الامارات وتكون المنطقه المحيطه بالسكن راقيه و تحتوي اهم الخدمات ..
حجزنا شقه من غرفتي نوم وكان الحجز شامل الافطار وكانت بسعر 2600 درهم شامل الخدمه والضريبه ..
التنظيف كان يومي وطلبت منهم زيادة مفرش وقالوا نعطيكم بس واحد مجانا اما لو طلبتوا اكثر لازم تدفعون ..وكمان الصابون طلبت زياده من الروم سيرفس وقال انو مومجاني لانهم يوميا مع التنظيف يحطون المنظفات المجانيه في دورات المياه اكرمكم الله.. الانترنت مجاني وكان سريع وقوي ماشاءالله ..
ايضا الفندق يقدم خدمة النقل بباصات مكيفه لاربع مناطق منها دبي مول وجميرا بيتش مجانا مرتين في اليوم الساعه 9صباحا والساعه 3 عصرا..
لكن ما احتجنا نستخدم هالباصات فما اقدر اقيم الخدمه..
اترككم مع بعض الصور للوبي الفندق والرسيبشن
وهنا كان المطعم اللي يقدم الافطار وكان جدا منوع وجميل والمكان نظيف لكن الصاله صغيره شوي
وهنا جهة المصاعد
الموظفين في الاستقبال جدا بشوشين وكانت اجراءات الدخول سهله وسريعه وقال لنا الموظف ان ما اعجبتنا الشقه ممكن يغيرها لنا وطلعنا للشقه وكانت حلوه وناسبتنا الحمدلله
هنا شكل مدخل الشقه صورته من عند مدخل غرفة النوم ويظهر جزء من المطبخ وطاولة الطعام
يتبع
اكمل معاكم الصور لداخل الشقه هنا الجلسه المقابله للمطبخ
وهنا صوره اوضح للمطبخ يحتوي غسالة ملابس اوتوماتيك وفرن وثلاجه وكل مستلزمات المطبخ من الاواني وغلايه وحماصه للتوست
واول يوم كانوا حاطين ضيافه بسيطه مجانيه مع علبتين مويه
وهنا غرفة النوم الرئيسيه وكنت مشترطه اثناء الحجز ان تكون الغرف عازله للصوت وبعيده عن الازعاج وفي طوابق غير المدخنين فالحمدلله كانت الغرفه على الزاويه غير ملاصقه لاي غرفه ثانيه ومافيها ازعاج وهو المهم
والغرفه ملحق بها دورة مياه اكرمكم الله
دورة المياه نظيفه جدا ومجهزه بمجفف وفوط وعدة الاستحمام كامله وشبشب
يتبع
وهنا غرفة الاطفال وكان الحمام تبعها خارجي في الممر بين غرفتنا وغرفتهم
ودورة المياه مجهزه بالكامل ايضا
وهنا جلسه امام المصاعد في الدور ال7 اللي كنا ساكنين فيه
وقبل لا انسى حبيت اضيف ان الشقه تحتوي كمان على مكواه كهربائيه ومنشر للغسيل وطاولة كوي ..
تقييمي للشقه جدا ممتازه للعوائل برغم وجود كثير من القروبات الاجنبيه فيها لكن هاديه ونظيفه وهو الاهم..
يفصل بينها وبين مول الامارات ارض فضاء ترابيه كبيره كنا نقطعها مشي اقرب من الدخول في الحارات الجانبيه ..
اللي اعجبني ايضا فيها تعاون الموظفين معانا لاننا بعد ماحجزنا من بوكينج بالفيزا وتم الحجز وكل شي رحت بسحب من الفيزا بالصراف علقت البطاقه جوا الاله ولما رحت للبنك وبلغتهم قالوا عشان نطلع فيزا بديله يبي لنا 4 ايام والرحله قبل هالمده ..
في هالوقت ارسلت للفندق ايميل انو راح ادفع كاش وان مامعاي فيزا فوافقوا على عدم الغاء الحجز واعتبار حجز البوكينج ساري وبنفس القيمه وهالنقطه يشكرون عليها
وهدي صوره ختاميه لفطورنا في احد الايام
ختاما اتمنى اكون وفقت في تقديم التفاصيل المفيده وسامحوني على القصور
التصوير ماكان احترافي بكاميرا جوال وماكانت النيه لما كنت اصور اني اسوي تقرير والا كان بدعت ههه
واخيرا اي سؤال انا حاضره
والى اللقاء في تقرير اخر ان شاء الله
تقرير رائع
يسلموا أختي