1. تقريري عن رحلتي العائلية إلى أوروبا (النمسا – ألمانيا – سويسرا )


2. بسم الله الرحمن الرحيم


3. تأجير السيارة:


4. المحطة الأولى: فيينا ( عاصمة النمسا ) مدة الإقامة 3ليالي


5. السكن:فندق arion-cityhotel-appartementhotel


6. بتكلم باختصار عن الأماكن اللي زرتها:


7. قصر الشانبرون:


8. ملاهي بارتر:


9. http://www.kindermuseum.at/en

تقريري عن رحلتي العائلية إلى أوروبا (النمسا – ألمانيا – سويسرا )

بسم الله الرحمن الرحيم

أنشر للأخوة والاخوات في هذا المنتدى الكريم تقرير مبسط ومختصر عن رحلتي العائلية ، وطبعاً سبب اختصاري هو أن الشباب في المنتدى ما قصروا وأفادونا بتفاصيل كثيرة عن السياحة في هذه الدول. وقلت ان كتابة تقرير مختصر وفيه خلاصة الفوائد من الرحلة يكون أنفع للمحتاج لمثل هذه الخلاصة.
بداية أفراد الرحلة: 5 أفراد أنا و زوجتي وأولادي الثلاثة: عثمان 9 سنوات والمقداد 5 سنوات والحسن سنتين.
الطيران: على طيران Pegasus التركي.
رحلة الطيران:
الذهاب: الكويت – ترانزيت إسطنبول – فيينا (النمسا).
العودة: زيورخ – ترانزيت إسطنبول – الكويت.
مدة السفر: من 12 يونيو 2014م إلى 26 يونيو 2014م.
خط السيارة: ( فيينا – كابرون – ليقولاند – الغابات السوداء/بلاكفورست وبادن وبادن – سويسرا/انترلاكن ).
بخصوص الحجوزات الحمد لله أجريت معظم الحجوزات بوقت مبكرتقريباً قبل نهاية شهر مارس كنت منتهي من الحجوزات الرئيسية ( الطيران – السيارة –الفنادق ومنها فندق مدينة ليقولاند).
وبالنسبة لتأشيرة الشنغن استخرجتها قبل شهر تقريباً منالسفر والحمد لله ان وصولي كان في النمسا لأن مكتب التأشيرات النمساوية ما عليه زحمه وتقريبا طلعت التأشيرة ب10 أيام.

تأجير السيارة:

استأجرتها من شركة Europecar عن طريقموقع Pegasus ، والسيارة اللي استأجرتها كانت فئة صالون صغيره ويفترض تكون أوديA3 حجم بوكس،وكنت متخوف انها ما تكفي أغراضي وكان معاي 3 جناط حجم 20 كيلو كحد أقصى وهاندباج وجنطة سحب صغيرة وعربة طفل، والله أكرمني لما وصلت مكتب التأجير بمطار فيينا قالتلي الموظفة ان ما عندهم السيارة اللي طلبتها وراح تعطيني سيارة أكبر وكانت السيارة باسات بوكس، والحمدلله السيارة من أروع ما يمكن وفيها نظام ملاحة والنظام رائع ومضبوط وأنقذني لأن الجارمن اللي خذيته معاي كان تعبان أتوقع بسبب البرنامج الصيني اللي كنت مركبه عليه.
ملاحظة:أنا استلمت السيارة من فيينا (النمسا)، و سلمتها في زيورخ (سويسرا)، والشركة حسبت عليي 100 يورو رسوم نقل لاختلاف المحطتين.
حجوزات الفنادق عن طريق موقع بوكنج الشهير، ومدينة ليقولاند حجزت من موقعهم الرئيسي في النت.
وأبدأ بذكر موجز عن كل محطة من محطات الرحله وأهم النقاط فيها:

المحطة الأولى: فيينا ( عاصمة النمسا ) مدة الإقامة 3ليالي

السكن:فندق arion-cityhotel-appartementhotel

https://www.booking.com/hotel/at/arion-cityhotel-appartementhotel-vienna.en-gb.html?aid=1300939
وموقع الفندق على طرف قلب المدينة حوالي 15 دقيقه بالسيارة.
وأنا أخذت شقة دوبلكس عبارة عن غرفة نوم علوية وصالة وتكون حمام مرحاض وحمام للاستحمام!! انا استغربت نظامهم هذا تكرمون المرحاض يكون مفصول عن الاستحمام. والشقة فيها مطبخ و بلكونه.
والأهم في كل الفنادق حرصت على توفر المواقف المجانية،لأن رسوم المواقف نار وتاخذ منك أحياناً إقامة نصف ليلة بالفندق أو أكثر.
الفندق عموما زين واستقبالهم طيب والطاقم متعاون مشكلته بالفطور تشكيلته محدودة جداً وهذي نقطة لاحظتها بأغلب الفنادق اللي سكنتها في سفرتي هذي، واللي يحب البرد تره تكييفهم عادي ما هو بارد وايد وأنا ناسبني لأني مو من هواة البرد الشديد.
وأيضا اللي يسكنه يحتاج سيارة.
بخصوص الأماكن اللي زرتها بالأساس جعلت الأولوية ان يكون المكان مناسب لأولادي فلهذا قد تستغربون إني ما رحت ساحة ستيفنز الشهيرة !!
الأماكن اللي رحت لها بفيينا كالتالي: ( ملاهي بارتر-قصر الشانبرون – برج الدانوب – متحف زووم للأطفال ).

بتكلم باختصار عن الأماكن اللي زرتها:

قصر الشانبرون:

القصر رائع وكبير ومتنوع المرافق وبالمناسبة هو القصرالصيفي للعائلة الإمبراطورية، وأنا أخذت التذكرة العائلية اللي تدخل فيها القصرالرئيسي وقصر الأطفال، وموقع المتاهة الموجود في القصر، وخصصت زيارة في اليوم الثاني لحديقة الحيوان الشهيرة وهي من ضمن مرافق القصر ولو الواحد راح في الصباح الباكر للقصر أتوقع يقدر يزور جميع المرافق بيوم واحد، وملاحظاتي كالتالي:
·القصر الرئيسي: حجمه مو كبير وايد لكنه جميل يعني قصر دولمه بهجه في تركيا أكبر منه وأفخم بوايد.
القصر ومرافقه تغلق أبوابه الساعة 5 مساء على ما أعتقد ويعتمد على حسب الموسم فيجب على الزائر التأكد في حينه.
وهذي صورة للقصر الرئيسي:·قصر الأطفال: في صالة بعد المدخل مباشرة تقدرون تلبسون فيه ملابس النبلاء في القصر للرجال والنساء والأطفال وفي مقاسات للجميع إلا الأحجام الكبيرة ما أتوقع في مقاسات، وتقدرون تاخذون فيه صور تذكارية بكاميراتكم وبالمجان، وأشوفها تجربة حلوه للعائلة وأنصح فيها.
·حدائق النصر وتلة النصر أو المشابهة لبوابة النصر: رائعةوتنسيقها جميل، وبأعلى التلة تشوف فيينا كلها أو المدينة القديمة وما حولها تحديداً.·المتاهة في القصر: هذا الموقع شهير وفيه متاهة كبيرةبالأشجار وهي جميلة وبجانبها منطقة ألعاب حركية للأطفال رائعة جداً ومرتبه أنصح بها. ·حديقة الحيوان: هذه الحديقة شهيرة جداً وكبيرة ويقال أنها أقدم حديقة حيوان في العالم وفيها حيوانات نادرة مثل دب الباندا والدب القطبي و وحيد القرن، وهي جميلة ومتنوعة وتحتاج أكثر من ساعتين، عيبها الوحيد أنها غيرمنظمة من ناحية مسار زيارتك يعني تحتاج تنتقل من جهة إلى جهة عشان تشوف مجموعةحيوانات معينة. وهذي صورة لمدخل الحديقة:تتوفر في القصر جولات في عربات الخيل وأسعارها غالية شوي، وأيضاً جولات بالقطار.
بخصوص مواقف السيارات: المواقف كثيرة حول القصر بعضها بعيد بعض الشيء وبعضها قريب وكلها بمقابل مالي، أنا وقفت في الموقف القريب جداً من القصر وكان في ساحة مفتوحة لكن وأنا طالع اكتشفت ان غالي جداً يعني ثلاث أو أربع ساعات حسابهم ب39يورو، أما حديقة الحيوان فلها مواقف مجانية بجانبها وإذا حصلت مكان فيها فهذا شي ممتاز.
بخصوص رسوم دخول القصر أشوفها طبيعية وما هي غالية وايدوفي خيارات متعددة في مكتب التذاكر.

ملاهي بارتر:

الملاهي جميلة وكبيرة ومتنوعة وفيها ألعاب تناسب كل الأعمار وفيها مطاعم، أسعار الألعاب صراحة غالية شوي وكل لعبة لها سعر، والملاهي فاتحة إلى الساعة 12 بالليل تقريباً. الملاهي ما أنصح فيها بالليل المتأخر وخاصةأيام العطل لأن يكثرون المراهقين وأيضاً السكارى.
برج الدانوب:
ما عندي إضافة على هالمعلم المكان حلو ومطل البرج رائع على فيينا ونهر الدانوب، وبجانبه حديقة كبيرة وجميلة، لكن ما في مرافق كثيرة أخرى،وما أشوف أن يكون له أولوية كبيرة في جدول رحلتك إلى فيينا.
متحف أو مركز زووم للأطفال:
مكان جميل في وسط فيينا القديمة وأتوقع قريب من ساحة ستيفنز، وفيه أنشطة مهاراتية متعددة للأطفال وأنا أنصح فيه بشدة للعوائل، وفيه أكثر من ورشة ودورات متعددة. وهذا موقعهم الالكتروني:

http://www.kindermuseum.at/en

وبنهاية رحلتي في فيينا أنصح بهذا المطعم لقيته بالصدفةوهو مطعم تركي تديره عائلة تركية محترمة وأكلهم طيب جداً وتعاملهم رائع، وهذي صورةالمطعم :هذا اللي عندي عن مدينة فيينا وإن شاء الله أقدر أنزل باقي التقرير وأتمنى رواد المنتدى يستفيدون منه