1. بسم الله الرحمن الرحيم


2. تابعوني...


3. الصورة الاولى للمنزل وباقي الصور مايحيط به


4. صرة للبيت ليلا


5. بصراحه كل شي كان فالبيت والمنطقه امنه جدا .


6. أترككم مع صور من القصر


7. هاذي صورة


8. فن العمارة عندهم سحرني واعجبني

بسم الله الرحمن الرحيم

أخواني وأخواتي في منتدى العرب المسافرون ,,, السلام عليكم ورحمة الله وبركاته..
وأخيرا بحطلكم تقرير مبسط وصغير وشامل عن رحلتي الى بريطانيا الصيف الماضي من 10-8-2013 ولمدة أسبوعين تقريبا,,,, وكانت موزعة بين لندن ومنطقة البحيرات ,, بوينس تحديدا ومن هناك رحنا زيارة الى مدينة يورك الهادية والجميلة,,,

تابعوني...

وصلنا الى مطار دبي الدولي الساعه 10 مساء لان طيارتنا كانت الساعه 2 فجرا,, ورحلتنا كانت على خطوط رويال بروناي ,, وبصراحة كانت الرحلة ممتازة جدا بالنسبة لخدماتهم واحترامهم وتشعر بالحميمية في التعامل معهم , وكل شوي يطلون عليك ويسألوك اذا كنت محتاج شي , والابتسامة دايما بادية على وجوههم. ومرت الرحله بدون الشعور باي تعب ولله الحمد.
أحب السفر ليلا لان فالليل اتشوف الاضواء الجميلة وخاصة اوروبا ,, مرينا على عدة مدن اوروبية كانت الاضواء لامعه ومنظر جميل جدا جدا اعجبني ونساني الوقت بصراحة وحتى كنت اتابعه بشغف وبالخريطة الي فالطيارة كنت أشوف المدن الي نحن فوقها.
وأخيرا وصلنا الي بريطانيا وتحديدا لندن مطار هيثرو وكان زحمة فتمينا انطير فوق المطار لين أعطونا الاذن بالهبوط وكانت الغيوم كثيره وكثيفة والجو جونان بصراحة ,,
طبعا انطلاقا من هذه النقطة أبدء بشكري لهذه البوابة الي استفدت منها كثيرا ومن تقاريرها واشكر كل من جاوب على اسألتي وماقصر معي في كل استفسار وسؤال .
أخص بالشكر أخوي القطري لانه ماقصر معاي مول ,, واتحمل كثرة اسئلتي لذلك اوجه له تحية كبيره وأقوله بيض الله ويهك وفي ميزان حسناتك باذن الله.
هبطنا ولله الحمد والمنة مطار هيثرو وكان زحمه وايد, لكن الحمدلله مشينا بسرعه بالذات لانهم شافو معانا طفلة أمورة فقدمونا وافتحوا لنا سيد ووصلنا الى الكاونتر وحصلنا هندي يالس ومرتز عليه ورافع خشمه فوق ,,,, ههه
انهينا اجراءاتنا بسرعه وخذنا الشنط من السير وطلعنا وحصلنا السيارة الي حجزوها لنا أصحاب البيت الي في لندن واقف دريولهم وكاتب اسمنا على لوحه وينتظرنا , وطلعنا من المطار وركبنا السياره ورحنا بيتنا الي في لندن,,
في لندن سكنا في منطقة النايتس بردج ووفقنا باختيار المنطقة بصراحة لان كل شي قريب منها والبيت كان قريب من هارودز بحدود 3 دقاق مشي وطبعا على طول هو خلف الشارع الرئيسي الي يقع فيه هارودز وهالشارع فيه كل شي سواء بقالات مطاعم كافيات صيدليات دوبي حتى صالونات المنطقة حيويه جدا وارتحنا فيها بصراحة كثير.
أتركم مع صور المنزل.

الصورة الاولى للمنزل وباقي الصور مايحيط به

صرة للبيت ليلا

البيت كان جورجيان هاوس ولكن مجدد بالكامل والحمدلله يناسبنا نحن كمسلمين, وكان عباره عن 3 غرف نوم وصالة و3 حمامات وبلكونه ومطبخ وغرفة طعام ,,, طبعا الى استغربناه ان كل غرفه في طابق يعني المطبخ وغرفة السفره في طابق تحتي وفوقه غرفة نوم وغرفة الغسيل وفوقه الصاله والطابق الي فوقه الماستر روم والطابق الي فوقه غرفة نوم,, أحسبوهم انتو كم طابق طلع معاكم.
صاحب المنزل امريكي الاصل وزوجته من انجلترا ووايد حبونا وجوا زارونا مرتين ورحنا اتعشينا وياهم في مطعم ايطالي قريب من البيت اكله لذيذ بصراحه بحطلكم الصور باذن الله.

بصراحه كل شي كان فالبيت والمنطقه امنه جدا .

طبعا وصلنا البيت الساعه 9 ورتبنا اغراضنا وكانت معانا المندوبه دفعناها مبلغ التامين وكانت جايبه لنا 3 باقات من ورد الجوري باقه للماستر روم باللون الابيض وباقة للصاله باللون الاحر وباقة لغرفة السفره باللون الاصفر وبعد كان معاها خبز سليس وحليب وعصير برتقال وجبن . شكرناها وروحت.
اول يوم تحديدا من بعد الظهر بداية العصر طلعنا نستكشف المنطقة وانشوف شو الي فيها .
ثاني يوم من الساعه 10 طلعنا من البيت باتجاه قصر الملكه , طبعا الغلط الي ارتكبته اني مااستخدمت الباصات في التنقل لان كل شي قريب منا وخذت القارمن اول يوم بحيث يدلينا المكان ولكن للاسف القارمن شكله ماينفع مول ولو اعتمدت على الاي فونا فضل لكن ابعد كنت شارية بطاقه بريطانيه ,, المهم مشينا يمين ويسار وماخلينا مكان كل شوي نسأل حد.الي اتفاجان فيه ان الانجليز الي هناك مايعرفون الاماكن هناك ماادري شو السر , والي فعلا دلانا على المكان هي عايلة مصرية ,, وأخيرا وصلنا بعد ساعة ونص مشي .طبعا رحنا على المعرض الي بالقصر وما رحنا صوب البوابة وتبديا الحرس لان قلت بنشوفها وبنمرها ونحن فالباص السياحي.

أترككم مع صور من القصر

هاذي صورة

أنهينا جولتنا فيه وبعده سرنا صوب بق بن ولندن اي ونفس الشي سرنا مشي وماعرفنا وين محطة الباصات والاندرجراوند شليته من الحسبنا ن لان معانا عربانة بنتي الحلوة. ونحن ماشيين مرينا على مطعم ايطالي وعنده فش اند شيبس فطلبنا ايطالي وجربنا الفش اند شيبس عني شخصيا ماعجبتني , لكن عجبة البعض الاخر.
يوم وصلنا الجسر قريب بق بن في هناك كنيسه وعربانه تبيع ايس كريم قعدنا شوي كلنا ايس كريم ومرينا بق بن وبعدها مرينا عالجسر الي يودي لندن اي وكان زحمه من قلب. واخذنا تكت سريع وركبنا لندن اي وهاذي بعض الصور من لندن اي.

فن العمارة عندهم سحرني واعجبني

ونحن طالعين شفنا ان هناك فيه الباص السياحي وخذنا تكت لين وركبناه واتمشينا فيه لين وصلنا النايتس بردج وقفنا هناك ونزلنا سيده كان في مطعه ام شي لبنان يمكن ارز لبنان او شي وكان قريب من البيت دخلنا اتعشينا فيه وكان ام روعه والمسئول عنه كان ودود جدا وقعد يسولف معنا.
هاي وجبة من عنده.
انصح الي بياكل عنده انه مايطلب وجبة لكل شخص لان وجباته كبيره جدا وانصحكم باللحم لان طعمه حلو
ردينا البيت بعد مامرينا اتسوقنا شوية اغراض من البقاله الي جنبنا واستقرينا فالبيت وكان الجو بارد ورائع جدا استانست وايد عالجو .