فرنسا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
alrodan
02-12-2022 - 10:03 pm
  1. وبصمنا الحمد لله وأنتهت أزمتنا كلها وطلعنا على صلاة الظهر ..


السلام عليكم ورحمة الله وبركاته
في البداية أحب اشكر جميع الأعضاء في هذا المنتدى على مساعدتي وأجابتهم على أسألتي
,, أحنا طلاب وعددنا 2 ذهبنا من تبوك إلى الرياض للتقديم في المكتب الموحد
في البداية حجزنا موعد لكل شخص موعد في يوم 27 ( أمس ) الساعه 9 تماماً ,,
وصلنا المكتب الساعه 8 تماماً .. ولكن خلونا نوقف ونصف سرا لين الساعه 8ونص حتى تدخل ..
دخلنا بحمد الله وتوجهنا الى الأستقبال لأخذ رقم على الموعد .. للأسف الجميع هناك يتحدث الأنجليزيه بدون أستثناء .. وهذي المشكلة كانت صعبه علينا أنا وصديقي بحكم ضعفنا في الأنجليزي ,, أعطيته ورقة الموعد وأعطاني رقم وتم التوجه الى مكتب فرنسا ..
. وصل رقمي في المكتب عند الموظف الأخير ( باكستاني ملتحي ) دخلت عليه انا وصديقي وسلمت عليه ورد علينا السلام .. أعطيته الأوراق المهمه .. قام ياخذ الي يبيه ويرجع لي الي مايبيه .. فجأه قام يتكلم معاي انجليزي ( واخوكم يالله يخارج حاله بالانجليزي ) بس اني فهمت من كلامه ان قالي النموذج هذا قديم لك ولصديقك وأعطاني نموذج بنفس الأسئله بالتمام لكن الفرق ( أن نموذجي من 3 صفحات ) ونموذجه من صفحتين .. وكمان قال لي وين عنوان الكفيل حقك ( انا على كفالة أخوي ) (الوالد متوفي) , وقالي بعد ما تخلصونها هاتوا لي الساعه 2 omg والكلام هذا الساعه 9وربع ؟؟؟؟
ما أهتمينا لكلامه وقلت تعال بس نعبي النموذج .. عبيت النموذج حقي وحق زميلي بخط اليد ,, وأتصلت على أخوي قلت له الموظف يقول يبي عنوان السكن حقك ؟ قال مافيه شي أسمه عنوان السكن . عندهم ورقة الكفاله فيها رقمي وفيها عنوان دوامي وعليها شعار وختم الشركه ( سابك ) قولة مافيه شي أسمه عنوان السكن هذولا يحبون يعقدون الواحد مثل العام ( العام قدمنا انا واخوي سوا وطلعت فيزنا بحمد لله لكن اخوي يقول لما كنت عندهم يقعد يطلب اوراق اول مره اسمع فيها مثل الغرفة التجاريه لشركة سابك . قاله اخوي هذي مو مطلوبة وشركتي سابك ماتحتاج ورقة تصديق من سابك قدمها على مسؤوليتي واذا رفضت انا المسؤول وفعلاً قدمناها وما رفضوها )
المهم لما خلصنا تعبئة النموذج توجهنا لنفس الموظف وقلنا في شي ناقص ؟ قال الصفحه الثالثه من جواز اخوك . وصديقي من جواز أبوه الي عليها التوقيع .,
هذي ماكانت معانا نهائياً ,, وش الحل والمشكله لازم نخلص شغلنا اليوم لأن المغرب رحلتنا الى تبوك ؟
أتصلت على اخوي قلت ابيها قال انا بالدوام وجوازي في البيت بس لحظه ادورها في الايميل ,, والحمد لله فرحني يوم قالي هذي هي في الايميل الصورة .. قلت ارسلها على ايميلي سريع .. وتم ذالك .
صديقي اتصل على ابوه نايم اتصل على اخوه رد عليه .. قال ارسل لي الصفحه الثالثه من جواز ابوي . وتم ذالك لكن مافيها توقع ابوه ؟؟ لا اله الا الله الأمور بدت تضيق علينا كل شوي ,,
خرجنا من المكتب الى المكاتب الي في الشارع المقابل نطبع الاوراق من الايميل وكلهم رفضوا ماغير واحد يماني الله يجزاه خير صاحب استديو تعاون معانا وقال اوكي طبعنا ورقة جواز اخوي وورقة جواز ابو صاحبي ..
رجعنا المكتب ورفضوا يدخلونا وكلهم يتكلمون انجليزي .. احاول اتفاهم معاهم شوي شوي بالانجليزي لين ما سمح لنا ندخل ( قلت له في اوراق ناقصه مني ورحت اطبعها من المكتبه ورجعت ) ..
لكن المشكله الان مافيه توقيع على جواز ابو صاحبي .. قلنا ايش الحل ومرتبكين ؟ الا فيه رجال سعودي جنبنا معاه قلم اسود وحريف ههه قال اوقع لك مكانه بقلمي اسود ما يبان هو صورة او اصل قلنا اي والله تكفى ضبطها .. وفعلاً وقع نفس توقيع ابو خويي وما تلاحظ انه تزوير او توقيع جديد كأنه صورة
رجعت للموظف الحين واوراقي كلها كامله الحمد لله ..دخلنا عليه قال خذوا رقم جديد قلت له احنا كنا عندك بس رفضتنا وخلصنا الاوراق ورفضوا المكتب يعطونا رقم جديد ( لأنهم شخمطوا على ورقة الموعد ) قال لا انا بسأل المشرف ( المشرف سعودي ) سأل المشرف قاله عن موضوعنا قال خلصهم اذا كملوا اوراقهم عادي
قال البكستاني تعالوا يالله .. وياخذ اوراقي كامله وياخذ الي احتاجه كله
1- أصل وصورة الجواز
2- تعريف الراتب حق أخوي
3- ورقة الكفاله الماليه حقت اخوي
4-النموذج مع عدد 1 صورة شخصيه فقط
5-صورة تأكيد الحجز حق بوكنق
6-صورة من الشنغن الأخيره
7- صورة جواز اخوي الصفحه 1 و 3
8-التأمين الصحي
وبعدها أخذ اوراق زميلي ..
واخذ منها نفس الطلبات بأستثناء ( حجز البوكنق )
لأنه كتب على الملف حقي 1/2 وزميلي 2/2
وبحمد لله تم دفع الرسوم 323 ريال لكل شخص .. وتوجهنا الى التبصيم ..( انا قلت للموظفه , انا بصمت شهر سبتمر الماضي هل لازم ابصم واتصور من جديد .. قالت نعم لابد )

وبصمنا الحمد لله وأنتهت أزمتنا كلها وطلعنا على صلاة الظهر ..

  • موقف طريف .. ( لما طلعنا للشارع الا صلاة الظهر . قلنا خلنا نرجع نصلي بالمسجد داخل المكتب قبل تفوتنا ههه .. مرينا في الامن كمان ههه قلنا عندنا اوراق وهذي اوراقنا ( بهذلناه المسكين ) ويالله دخلنا ونروح نصلي ونطلع ) ههه

أدري كلامي كثير ولقلقتي واجده بس حبيت اسرد لكم قصتي بالتفصيل ههه
ما يستفاد من الموضوع :
1- النموذج طبعه اخوي موقع السفاره في جدة وقال مرفوض هذا قديم !!
2- كشف الحساب ما طلبه ولا انتبه له فقط أخذ تعريف بالراتب !!
3- حجز الطيران ما اخذه ابداً !!
4- صورة البطاقة البنكيه والفيزا ما طلبها ابداً
5- تعريف الطالب من الجامعه ما طلبه ولا اخذه نهائياً
بالمختصر المفيد تروها سهله جداً الأمور لكن سبحان الله يجيك خوف ووسوسة انهم يرفضونك ..
بالأخير دعواتكم لنا أن الفيزا حقتنا تطلع بسلام ولا ترفض ( الحمد لله الأوراق سليمة 100% )


تأشيرة
التعليقات (8)
داير أسافر
داير أسافر
المفروض يكون هناك موقع للمكتب الموحد يضعون فيه اللوائح والأنظمه لكل متقدم سواء كان طالب أو سائح أو عائلة أو باحث عن علاج
وكذلك يتم تحديثه على حسب المستجدات والمتغيرات وبالتالي تكون الأمور واضحه وشفافه ولا يحصل التباس للمتقدمين قد يضعهم في موقف محرج ويعيشهم في قلق ورهبه
عموما الحمدلله تمت أموركم على خير
وإن شاء الله تفرح بقبول الطلب واصدار الشنقن

آخـــرفـــرصــة
آخـــرفـــرصــة
و عليكم السلام
الحمد لله اموركم تيسرت
و عقبال ما نبارك لكم بالفيزا

haifooonali
haifooonali
السلام عليكم حابه اسال عن الابلكيشن للسفاره الفرنسيه هل هو يتعبا اون لاين؟ولا اطبعه واعبيه بخط يدي؟ واذا فيه ابلكيشن جديد الله يعافيكم من وين اطبعه وشكرا

alrodan
alrodan
آخرفرصة
الحمد لله على كل حال والله يسمع منك يارب ..

alrodan
alrodan
داير أسافر
والله اني أتمنى ذالك بصراحه لكن للأسف انا هذي ثاني فيزا لي من المكتب الموحد في الرياض .. في الموقع يكتبون لك اشياء ولما تتعب وتجهزها وتروح ما يسألك حتى عنها .. هذي قمة القهر

alrodan
alrodan
haifooonali
بصراحه ما ادري هل تقدري تعبيه اون لاين او لا ,, وتقدري تطبعيه وتعبيه بخط اليد عادي .. كل الي شفتهم معبينه بخط اليد بقلم أزرق .. واذا تقدري تعبينه بالكمبيوتر عن طريق برنامج ال pdf يكون أفضل بعد علشان الخط واضح ..
وبالنسبه للأبلكيشن الجديد بحاول ادوره لك الي عطاني اياه وارفقه في الرد الجاي .. والي عنده الابلكيشن الجديد ياريت يساعد الأخت ويحط الرابط

haifooonali
haifooonali
alrodan
انا عارفه عبيته العام بخط اليد بس سمعت انه فيه ابلكيشن جديد فحبيت اسال قبل والله يعيطيك العافيه اخوي

alrodan
alrodan
haifooonali
معليش على التأخير أختي
ما اقدر ارفق روابط لأن مشاركاتي قليلة ,,
لكن ادخلي اخر موضوع المثبت أسمه
متطلبات و نماذج كل الدول لعام 2014
وانزلي تحت تلقين مكتوب نموذج فرنسا


خصم يصل إلى 25%