1. 2- احجز تذكرة سفرك من الانترنت

السلام عليكم
هذا اول موضوع واول مشاركة واتمنى انكم تتقبلونه بسعة رحب
انا احب تايلند وزرتها كذا مرة
وحبيت اشارككم ببعض النصائح اللي ودي اقولها سواءاً للسياح الجدد وحتى القدم واتمنى انكم تشاركونا نصايكم اذا عندكم نصيحة يستفيدون منها الاعضاء قبل لا يسافرون
(على فكرة هذي النصائح كتبتها في منتدى آخر ولكن اكتشفت بأن صاحب الموضوع كتب موضوعة بتاريخ قديم وانا تعبت نفسي وانا اكتب النصائح آخر شي انقفل الموضوع لأني رديت على موضوع قديم فراح ردي هباءاً منثورا ههه)
بسم الله نبتدي
اقول لكم بعض النصائح حسب خبرتي من تايلند
1- حدد وجهتك بتايلند.. بوكيت بانكوك بتايا شانغ ماي ... كثير من الاماكن تقدر تروح لها ولكل مكان حسبة وطريقة

2- احجز تذكرة سفرك من الانترنت

3- احجز التاكسي اللي ياخذك من المطار و يوصلك لي الفندق من النت ايضاً .. لأنك اذا وصلت هناك راح يعطونك اسعار مرتفعة .. وانت بعد توك واصل وما تبي تتعب راسك راح تدفع له المبلع اللي اهو طالبه.. فحاول تحجز تاكسي ياخذك من المطار يوديك الفندق من النت لأنه ارخص
4- لا تفكر تاخذ تاكسي من خارج المطار .. إما تحجزه من النت .. او من مكتب داخل المطار ، التكاسي اللي خارج المطار لهم مشاكل عديدة مع السياح في مواضيع سابقة موجودة داخل هذا المنتدى من تجارب مختلفة من الاعضاء
5- احجز فندقك من النت أيضاً لانها ارخص من انك تحجزها هناك.. في موقعين معتمدين اللي اهم (أجودا وموقع بوكينج) حاول تحجز فندق بو ثلاث نجمات وفوق نهائياً لا تحجز اقل من ثلاث نجمات .. لان الفندق ماراح يكون امان وخدمة سيئة وتصير لك مشاكل انت في غنى عنها.. ثلاث نجمات وفوق على شان لا يصير معاك مثل ما صار لكثير من الاخوة اللي حجزو فنادق رخيصة بقصد التوفير،، واخر شي تحسفو انهم ما حجزو بفندق جيد ومحترم
6- إذا وصلت بالسلامة حط في بالك شي واحد فقط .. إبتسم دائماً .. لانك على ارض الابتسامة ، لا تزعج نفسك ولا تحاول تزعج التايلنديين وحاول تتغشمر وتظحك معاهم ولا تكشر بوجهك عليهم. ترى التايلنديين يموتون على السائح اللي يضحك وينكت ويسولف مهما كانت جنسيته .. راح يحبونك واح تحبهم. تساهل معهم بس لا يستغفلونك! خلك صاحي
7- حاول تشيل معاك مبلغ متوسط.. لا تشيل معاك مبالغ كبيرة، اذا احتجت تقدر تسحب من بطاقتك العادية من اي بنك ( اللي سحبت منهم بنك لونه بنفسجي وبنك لونه اصفر.. اللي لونه اصفر اهو افضل لأنه يخليك تسحب مبلغ اكبر شوي من باقي البنوك) وكل عملية سحب يأخذون منك عمولة 200 بات تقريباً فأنت خلك ذكي واسحب أكبر مبلغ ممكن تسحبه لان في كل حالة سحب ياخذون منك ال200 بات فأنت اسحب اكبر مبلغ ممكن تسحبه افضل
8- حاول تبتعد عن الشيميلات (ليدي بوي) هؤلاء البشر متخفّين على هيئة جنس ناعم لكنهم اكثر ناس مشاكل وبلاوي زرقه.. اكثرهم يشيلون شنط.. وداخل الشنط لازم يكون فيه على الاقل سلاح ابيض (سكين، رنج بوكس، صاعق كهرباء، رذاذ الفلفل الحارق) الى ما شابه .. فحاول حتى ما تحط عينك بعينهم لأنك اذا مريت صوبهم يضلون يطالعونك لما تحط عينك بعينهم .. فالافضل انك ما تشوفهم افضل
واذا واحد منهم نشب لك قول له (آي هاف ليدي .. شي إن ذا هوتيل سليبينج) وهو راح يفهوما انك مو راعي شيميلات بس شرايكم بالطريقة؟ ههه
9- ابتعد عن تجار المخدرات.. خصوصاً بالاماكن المشبوهة .. واي شخص يجي جنبك يقول لك ( يو وانت وييد؟ مارجوانا؟) قول له (نو) وحاول حتى لا تشوف وجهه وأمش بعيد عنه
10- لا تتسرع بشراء اي شي هناك .. كاسر واذا ما نزل بالسعر قول له اوكي مع السلامة وروح .. اذا ناداك معناته بينزل من السعر اذا ما ناداك معناته ان هذا سعره النهائي ؛)
11- احجز رحلاتك من المكاتب السياحية والكشكات الموجودة بالشوارع ( هذا بالنسبة لبوكيت) وكاسرهم واذا شفت السعر مرتفع روح حق كذا واحد .. نفس الرحلات نفس كل شي بس السعر يختلف على حسب الشركات
12- تجنب السباحة بالشواطيء اللي فيها ناس كثير .. لان اغلب الشواطيء تكون ملوثة بالمشروبات الكحولية والبول عزكم الله وغيرها .. واذا ودك تسبح بالبحر حاول تشوف لك شاطئ بعيد عن الناس
13- لا تفكر تأجر جيت سكي من بتايا نهائياً لان اللي يأجرون نصابين و حرامية يخلونك تدفع غرامة على الفاضي، لا تاجر جيت سكي!
14- اذا اجرت سيكل.. الخوذة لا تفارق راسك ، الشرطة هناك ما عندهم غشمرة، واخذ الحذر وانت تسوق خصوصاً بالليل لان في بعضهم يسوق وهو سكران ، فدير بالك وامش حسب التعليمات
15- لا تناقش التايلنديين في امور سياسية او دينية
16- اذا وصلت تايلند روح اقرب سيفين اليفين واشتر خط وعبيه رصيد انت وربعك على شان تتواصلون هناك وسعر الخط وتكلفة الدقيقة المحلية هناك رخيصة جداً
هذا كل اللي عندي واذا تذكرت شي راح اقول لكم
وانا اسف ما في تنسيق بالموضوع لأني كتبته من التلفون ولي رد ثاني تكملة النصايح