السلام عليكم ورحمة الله وبركاته
حبيت أنقل لكم تجربتي بمركز التأشيرات الموحده بالخبر - قسم فرنسا
حيث أن هذه المعلومه بحثت عنها ولم أوفق في الحصول على جواب شافي عليها فحبيت أنقل لكم تجربتي الشخصية
راجعت المكتب بتاريخ 20 مايو 2014 حسب الموعد لعمل فيزا شنغن لفرنسا لي وللعائلة بعد ماجا دوري قدمت الجوازات مع الأوراق وبعد ماتصفح الجوازات قالي ياخي متى رحلتكم فقلت له في 10 أغسطس إلى 20 أغسطس
قالي خلاص تقدر تطلع بالفيزا القديمه ( حيث أن لدي فيزا من السابق من الألمانية وتنتهي في 2 سبتمبر 2014)
بصراحه كنت شاك لأني مابي اتوهق لو وصلت هناك ومادخلوني فراح الموظف سأل المسؤول عندهم ورجع قالي نعم تقدر تسافر فيها أهم شي ترجع قبل 2 سبتمبر 2014
بس فيه شرط قالي عليه: أهم شي إنك طلعت فيها ألمانيا وختمت دخول لألمانيا لأن الفيزا ألمانية فقلت نعم صحيح حصل مرتين فقال خلاص تقدر تسافر فيها وامورك طيبه،،
معلومه أخرى
جوازي باقي فيه 7 شهور وبوقت السفرة بيكون باقي عليه 4 شهور ويخلص قالي عادي أهم شي أن يوم موعد رجوعك من الدولة الأوروبيه يكون باقي على الجواز وينتهي 3 شهور
أيضاً لو طلعت جواز جديد وفيزتك باقي فيها تقدر تستخدمها بس تدبس الجواز الجديد بالقديم وتسافر بالفيزا القديمه بشرط أن الجوازات مايثقبونها يعني تكون من جميع الأطراف سليمه
هذي بعض المعلومات حبيت أزود فيها الأخوه الأعضاء أتمنى أن يكون بها الفائدة لهم
تحياتي
أبوعبدالعزيز