بورصه المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
ابوسليمان Q8
04-12-2022 - 11:42 pm
  1. وصلنا المكتب جان يقولون لي ادفع 2000 ليره !!

  2. الحين الصدمه الكبيره


بسم الله الرحمن الرحيم
بالبدايه أحب اقولكم اني زرت تركيا كثيرا .. وكل مره أستاجر من شركة بدجت أو أفيس فقط
السفره الأخيره كانت بشهر ابريل اللي طاف .. أجرت سيارة من بدجت 5 ايام مع تأمين شامل
المهم بعدها بكم يوم .. قدر الله وماشاء فعل طلعت من شقتي في بورصه و لقيت السياره مدعومه من الجانب الأيمن من أولها زلوغ فقط وآخرها مخفوسه ..
ذكرت الله ومباشرة اتصلت على رقم الطوارئ اللي عطوني اياه المكتب ..
شرحت له الموضوع و رد علي بسؤال واحد فقط .. قالي انت مأمن شامل ؟؟ .. وقلت اي نعم .. فكان رده بأن ماكو أي مشكله وماحصل إلا الخير وأستمر بسفرتي طبيعي وفقط وقت تسليم السياره أوقع على ورقه وبس ..
مشت الأيام وصار وقت الرجوع للمطار لما سلمت السياره جان يسويلي قصه طويله ويقولي تعال معاي المكتب داخل .. وانا مصدوم طبعا وباقي على اقلاع الرحله ساعه ونص تقريبا ..

وصلنا المكتب جان يقولون لي ادفع 2000 ليره !!

حاولت فيهم ماكو فايده اقوله يارجل أنا اتصلت عليكم وقلتولي انت عندك تأمين شامل لاتحاتي , سلم سيارتك وبس .. فقال لي موصحيح هالكلام .. كان لازم تجيب معاك تقرير حادث من المخفر , وبهالحاله الحين مانقدر نمشيك بدون ماتدفع ال 2000 ليره ولاتحاتي ترا ان شاالله مجرد أيام و راح نرجع لك شيء من المبلغ بعد ماتتصلح السياره
عطيتهم 2000 ليره كاش وانا اصلا مستعجل أبي الحق عالطياره ، مشينا ورجعنا لديرتنا الحبيبه ..
مر على هذي السالفه شهر و 10 ايام بالضبط

الحين الصدمه الكبيره

اتصل علي اليوم وقبل قليل رقم تركي رديت عليه .. فإذا اللي يكلمني مدير فرع بدجت صبيحه
و يقول اخوي انت دفعت لنا 2000 ليره بس السياره طلعت تكلفة تصليحها اكثر .. والحين نبي منك 1300 ليره زياده .. وترا إذا مادفعتها راح نرفع عليك قضيه .. يا خبراء شنو الحل معاهم ؟؟ والله ضيقو خلقي . وقولولي هل فعلا الحق معاهم ولا الموضوع فيه نصب ؟؟


التعليقات (7)
PilotX
PilotX
للتوضيح والفائدة للجميع التأمين الشامل بدون تقرير الشرطة يفقد الكثير من مزاياه مثال: الكفرات وزجاج السيارة لايدخل ضمن التأمين اذا حصل ضرر ولم يكن هناك تقرير للشرطة بالنسبة لموضوعك صعب ان ابدي رأي بدون معرفة كثير من التفاصيل وبدون معرفة اذا ماوقعت على اي اوراق ومحتواها ومستغرب ان الموظف قال لك مافي مشكلة لأن تأمينك شامل وبعدها طلب تقرير الشرطة! اقترح تتواصل مع الشركة الأم في امريكا

TARZAN
TARZAN
اول نصيحه لك لاتدفع لهم ولا فلس
خلهم يرفعون قضية
حركاتهم ذي عشانك دفعت ال2000 ليره طمعتهم فيك
ومعروف ان ربح هالشغله مهو من قيمة التأجير ابدا
الربح يجي من مبالغ التأمين والمطالبات
ودي اقول لك كان كلمت الشرطه واخذت تقرير بس اللي صار صار
ودي اقول لك لو راسلت بدجت مباشرة واخذت منهم التوجيه كتابيا بدل الاتصال الهاتفي بس اللي صار صار
الله اعلم هالفلوس اللي خذوها منك راحت في جيوبهم مهو لشركة التأمين
انت خل مراسلاتك معهم بالايميل عشان تثبت عليهم
لاترد على اتصالاتهم ابد
اخوي احيانا الشرطه ماتجي تخطط الحادث وتعطيك تقرير
هنا مندوب التأمين يجي يتأكد من اللي صار لانه في الاخير شركته هي اللي بتصلح السياره
لكن اللي اشوفه ان شركه التاجير ( بدجت ) يحاولون يسحبون منك مبالغ بدون علم شركه التأمين

طارق عنايات
طارق عنايات
في البداية قدر الله و ما شاء فعل
الحمد لله على كل حال
هل أعطوك إيصال ب 2000 ليرة؟؟
هل دفعت تأمين بالبطاقة الائتماني ام الدفع كان كاش
الموظف اللي كلمته كان عربي او تكلمت معاه إنكليزي ؟
بكل الأحوال نصائح الأخوة صحيحة
حاول تكلم الادارة المركزية وحاول توثق مراسلاتك معاهم
الله ييسر لك أمورك

SAMSUNG99
SAMSUNG99
الاخ ابوسليمان السلام عليكم.
بما أنك وصلت دولتك ، والقضية لازالت موجودة ،أقترح عليك الاتصال بسفارتك واطلاعهم على كل التفاصيل. وتزويدهم بعقد الايجار.
بالنسبة للتأمين ،، هناك تأمين ضد الغير -طرف ثالث Third Party وهو الزامي وأساسي.
والشامل يسمى CDW أي Collision damage waiver وفي هذا النوع تتحمل انت مبلغ رمزي ثابت عن أي اضرار لحقت بالسيارة وتسمى excess
يتفاوت المبلغ في كل شركة وعادة لايتجاوز 1000$
وفيه تأمين شامل يغطي كل شي ويكون أغلى ويسمى SCDW ،
S super
بالنسبة للأشياء الاستهلاكية كالإطارات والزجاج لايشمله التأمين العادي Cdw
وكما قالوا الأخوان لو كان معك تقرير الشرطة أفضل. وكان الله بعونك.

Usas
Usas
قدر الله وماشاء فعل انصحك بالتواصل مع السفارة وتزويدهم بكافة الاوراق والمستندات المطلوبة

علي الواهبي
علي الواهبي
الله يعينك عليهم
اهم شي قفل الفيزا حقتك

ماجد الفهد
ماجد الفهد
قدّر الله وما شاء فعل
شكرا لك حرصك وتنبيهك
ودي فقط أضيف نقطتين عشان الجميع ينفادى هيك مشاكل وتحسبا لأي مشكلة ممكن تقع :
1. تقرير الشرطة مهم جدا جدا جدا وبدونه لن تحصل سوى على وعود فضلا عن الخوف والترقب والكثير من المراسلات والإنتظار.
2. في حال وجود مشكلة في السيارة مثلا أو حتّى في أي شأن آخر ، أحرص على الحضور مبكرا للمطار قبيل الرحلة ب 4 أو 5 ساعات
والسبب ببساطة ، أن هذه الأمور تحتاج وقت وربما خلاف على أي نقطة ، ولذلك لو إستدعى الأمر ، يمكنك طلب شرطة المطار ، وهذا لن يحصل إذا لم يكن معك وقت كاف
ولو كنت في مكانك ، لحضرت قبلها بيوم ورتبت أموري بهدوء.
أكرر شكري وتقديري وربي يسهل أمورك ويرجع لك دراهمك سالمة غانمة


خصم يصل إلى 25%