دبي المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
هاوية الاسفار
16-12-2022 - 03:02 am
السلام عليكم و رحمة الله و بركاته
بعد اطلاعي على تقارير اخواني في بوابة الرحلات حبيت اشارككم بعض من المناطق الجميله و الرائعه في بلادنا و التي تستحق الزياره و الاستمتاع بمناظرها و اجوائها الرائعه
يوم الجمعه الموافق 31/ يناير
توجهنا الى وادي القحفي عن طريق منطقة حتا
المنطقه جبليه بحته و تحيطها الجبال من كل جهة و الهواتف النقاله يستحيل
استخدامها في المنطقه لعدم وجود ارسال و نصيحه لمن يذهب مع عدة عوائل البقاء بالقرب من بعض او خلف بعض بالسياره
اما بالنسبه لنا فالرحله كانت عائليه و قد قمنا باستخدام جهاز لاسلكي
استفدنا من خلاله كثيرا في التواصل مع بعض و هذه صورة الجهاز

و لمن يريد معرفة مكان الشراء فهو من السوق الصيني
بسم الله نبدأ
انطلقنا من دبي باتجاه منطقة العوير و بعدها الهباب و المدام و الطريق كله سيده
لا يمين و لا يسار
هذه صور من منطقة البداير منطقه ترفيهيه فيها العاب و دراجات ناريه و الحين طوروها
و فتحوا فيها محلات و سوبرماركت يعني سوق صغير

و فيها بعض الحيوانات الاليفه و الطيور سارحه في البر
و هذا التل المشهور اللي يتوافد عليه الشباب للصعود بالسيارات و الدراجات الناريه

و له ذكريات جميله ايام الطفوله فكنا تقريبا كل اسبوع في حتا وفي طريج الرجعه نوقف تقريبا عشر دقايق نشوف الصاعد و النازل
و هذي صوره من المنطقه اللي قضينا فيها ايام الطفوله كلها

و بعد الغداء كنا نلعب بالكوره صغار و كبار
و الحين تستوي اللخبطه في مركز للحدود نطلع من حدود الامارات

ندخل حدود عمان

بعد ربع ساعه نرجع مرة ثانيه و ندخل حدود الامارات

المرور في الدخول و الخروج سهل جدا و يجب ابراز الهوية الوطنيه
بس مشكله اذا صادفك واحد يدقق في الهوية ساعه و يأخرك و اللي جنبه بدون ما يشوف الهويه
يقول توكل على الله و هذا اللي صار معانا
كملنا الدرب و هذي صورة جميله لسلسلة الجبال

الحين صار في حتا سوق مثل سوق الجمعه اللي في الذيد

يبيعون زوالي و مفارش و فخار و اواني منزليه و جدور و غيرها الكثير بس ما نزلنا
مرينا على مقهى ناخذ من عنده كرك لان طلعنا من البيت متاخرين و ما تريقنا و في الحدود تأخرنا وايد

بس للاسف طلع شاي ليبتون و صابين فيه حليب بدون طعم
بعدين بييكم دوار الحصن الكبير و تاخذون يمين نسيت اصوره
هذي صوره من الطريق بعد الدوار

رفرف يا علم في اعالي الجبال و القمم

و بعدين بييكم دوار مستطيل صغير في آخر الشارع تاخذونه يسار و تدخلون منطقه سكنيه
و على يساركم فيه سوق اعتقد للخضار او اللحوم و بعده يسار و هناك لازم تسألون من وين الدرب لانه ما في اي لوحه تدليكم الطريج
بعدين في محلات على يمينكم دكان و خياط و لاندري تدخلون يمين و على اليسار جبل مرسوم عليه اعلام

هذي صورة جلسة خارجيه لاحد البيوت عجبتني و ارجوا من اصحاب البيت يسامحوني على التصوير

صوره من الطريق

بوابة و حرس للحدود

و السياج تمتد لاعلى الجبل

يتبع


التعليقات (8)
هاوية الاسفار
هاوية الاسفار
صوره من الطريق

وصلنا الى مبتغانا

هذي النزله و لازم تتحذرون من النزول و خاصه للي يملكون سيارات صالون

اليوم المنطقه فاضيه و ما فيها غيرنا

خذنا مكاننا بالقرب من الوادي و جهزنا الاغراض و اول شيء وضع الثلج على المشروبات
لانه الجو اليوم حار و الشمس ساطعه

اليوم غدانا مشاوي تكه و كباب

في الطفوله ما كنا نفكر في الكراسي لكن الحين من الاساسيات في الرحله

طبعا بتقولون ليش حاطينهم في الماي هذيل اليهال يالسين يتبردون في الماي
و هذا الحميض الجبلي و ما شاء الله اوراقه كبيره و غير عن البري لحقت اصوره بعروقه قبل التنظيف

و هذا مجرى الوادي

التقاطه عجبتني

و هذيل شباب المستقبل ما شاء الله عليهم صعدوا الجبل و يابولنا اكبر عروق للحميض

شوفوا الماي صافي و نقي

هذي صور من الرحله قبل اسبوعين

و هني تجهيز الفحم للشوي الرياييل جهزوه و ساروا يصلون في المسيد

الفحم جهز و الرياييل بعدهم

تكرمون هذا الحمام و لازم يكون موجود معانا

المرحاض زوجي خذاه من اسواق السنيدي في الدمام

هذي البطاطا غسلتها بماي الوادي و جهزتها للعشاء و بخبركم بعدين شو بسوي فيها

تعبنا من الانتظار و قلت بصور المكان

لحظة لعب بالماء

اللحم تصيخ و صار جاهز للشوي

شيش طاووق

البصل و الطماط


هاوية الاسفار
هاوية الاسفار
لقطات و لحظة تأمل

سبحان الله

خلاص الفحم ترمد

و بدأنا الشوي

صار الاكل جاهز

ما في مجال اصور الباقي
الحمدلله انتهينا و بعدها قمنا نتمشى و نلقط حميض

جراده

قبل اسبوعين البقعه كانت ما شاء الله مليانه ما قدرنا نمشي و ناخذ راحتنا

مكان جميل و مظلل بالنخيل بس للاسف ما فيه مجرى للماء

هدوء تام

يشبه القطن

يكفي هذا لليوم و غدا لنا تكمله باذن الله
يتبع ,,,,,

فيصل
فيصل
وعليكم السلام ورحمه الله وبركاته
ماشاءالله
دخلتم عمان ورجعتم دخلتم الامارات
المنطقه من التقارير يبليها زياره ان شاءالله وبالشتاء ( مذاكر زين )

هاوية الاسفار
هاوية الاسفار
فيصل
حي الله مديرنا
اهم شيء المذاكره
المنطقه وايد حلوه يبغيلها سياره 4 ويل و استكشف المنطقه بنفسك
شكرا على المتابعه

هاوية الاسفار
هاوية الاسفار
هذي الصخره موقعها جميل سمعتوا عن صخرة الروشه بلبنان هذي صخرة القحفي

شلال صغنن

شوفوا انعكاس الشجر في الماء

كهف

منظر جميل للغيوم

لحظات لعب و رمي الصخور الصغيره في الماء

اشعة الشمس من ورا الغيوم

قرٌب المغيب و استعددنا للرحيل من المكان و طبعا قبل الانطلاق يجب علينا ترك المكان نظيفا و انظف من ذي قبل
و للأسف هناك بعض العوائل يتركون القاذورات خلفهم و كأن هناك احدا سيقوم بالتنظيف من بعدهم
و ينسون ان النظافه من الايمان
صوره اخيره للمكان

صور من طريق العوده

وقتها الجو مال للبروده و استمر في الازدياد

وادي خميس

فيصل
فيصل
ماتقصرون جانب النظافه يتخلى البعص عنه وكانه واجب علي العماله فقط
شكرا لك

هاوية الاسفار
هاوية الاسفار
سبحان الله طبقات صخريه في الجبال و الوانها متدرجه

حصن حتا

مزرعه تحت الحصن

بالقرب من دوار الحصن الكبير

حل الظلام و اذن المغرب وقفنا عند مسجد في منطقه سكنيه تابعه لعمان لاداء صلاة المغرب
و بعدها كملنا المسير لين دوار العوير محطتنا الثانيه للعشاء

هاي بقعتنا اللي ما نستغنى عنها من ايام الطفوله و لين الحين الحمدلله
جهزنا المقادير و الفحم للشوي
البطاطا اللي غسلتها في ماي الوادي الحين بنشويها
لفيناها في ورق قصدير و حطيناها على الفحم عشان تنشوي

المقادير اللي بحطها في البطاطا

خيار مخلل يقطع مكعبات صغيره
زيتون اسود و اخضر مقطع
لبنه حامضه مع روب
زبده ، جبن موزاريلا
ملح و فلفل

نخلط اللبنه و الروب مع الخيار المخلل
البطاطا تاخذ وقت عشان تستوي حطينا الحطب في مكان ثاني

و صوره احلى

جهزت البطاطا

نقطع البطاطا من النص و نحط الزبده و الجبن و الملح و الفلفل

نهرسهم مع بعض

نحط خليط اللبنه

و بعدين نحط الزيتون

و احلى بطاطا تركيه مقلده و طعمها لذيذ
و في الجانب الآخر برجر مشوي

خبز البرجر بعد التجهيز يحمص قليلا

وجود الكرك مهم للاسف محد صوره لاني كنت مشغوله و الكيمره عند عيال خواتي يشاركوني في
التصوير
و بهذا انتهى يومنا على خير و زادت البروده
اتمنى ان يكون التقرير عجبكم

فيصل
فيصل
ما قصرتي
البطاطا التركيه وعرفنا الوصفه
شكرا لك


خصم يصل إلى 25%