بشرى سارة لكافة اعضاء ورواد منتدى العرب المسافرون حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق arTravelers.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب وقد تم نشر 400,000 ألف موضوع 3,500,000 مليون مشاركة وأكثر من 10,000,000 مليون صورة ما يقرب من 30,000 ألف GB من المرفقات وهي إجمالي محتويات العرب المسافرون للاستفادة منها والتفاعل معها كحق اساسي لكل عضو قام بتأسيس هذا المحتوى على الانترنت العربي بغرض الفائدة.

لمزيد من التفاصيل يمكنكم مراسلتنا من خلال نموذح الاتصال, العرب المسافرون على Facebook



احلى من العقد احلى من العقد
ايسلندا ... اجتماع البراكين بالثلوج
18-12-2014 - 12:42 am



ايسلندا ... اقرب بلد للقطب الشمالي ..

تقع بين قارة اوربا وامريكا الشمالية ..

ليس لها حدود برية مشتركة مع اي دولة ...

تعتبر قطعة ارض متكونة حديثاً مقارنتاً بباقي الاراضي

اشياء كثيرة تميزها عن باقي دول العالم ...

فهي ملتقى الجليد والبراكين ...

رغم قساوة الطبيعة فيها ....

الا اننا لمسنا فيها رقة وجمال طغى على قساوتها ...

و انعكس الجمال على اخلاق وطباع شعبها ... فوجدناهم من اطيب الشعوب و اكثرهم بشاشتاً وامانتاً

وجودنا كان بالنسبه لهم غريب حيث ان امي وخالتي كانو يتجولون بالعباية ... لكن لم نجد الا ابتسامات رقيقه منهم ومبادرة في المساعدة ولو ان ملامح الدهشه قد تبدو احيانا على وجوههم لمعرفة من اين نحن ...

لدي الكثير من السوالف ارويها لكم عن ايسلندا ...

انها كما يقال عنها ...


ليست كأي مكان اخر

Iceland ... Like no where else


وللحديث بقية ..





المشاركات

احلى من العقد احلى من العقد
ايسلندا ... اجتماع البراكين بالثلوج



خلوني اقولكم فكرة السفر الى ايسلاند

بالنسبه لي كنت اعرفها كأسم ... واعرف ان فيها بركان يثور و يمنع الطائرات من الطيران

في يوم من الايام .. بينما كنت افكر بمخطط الصيف ... كنت حابه ان احنا نجرب شي جديد وقمت افكر وافكر .. وجات ايسلاند في بالي .. قلت يا بنيه ليش مانروح نشوف اش سالفة هالبلاد الي كل ماقرب الصيف ثار بركانها ومنع الطيارات من الطيران

بديت ادور في المنتدى .. لقيت تقرير مااذكر لمن بالضبط بس التقرير يحكي فيه صاحبه قصته في ايسلاندا والتقرير قديم يمكن من 2008 و صاحب التقرير زار ايسلاند من زمااااان يمكن في اوائل التسعينات .. كنت وانا اقرا تقريره وكلامه (( كان التقرير بدون صور )) كنت اتخيل المكان ببالي وكنت انبهر حسيت اني اقرا قصة خياليه لمكان خيالي بعيد عن الارض .. كان يمدح اخلاق الشعب وطيبهم وتعاملهم و كان يقول ان الايسلنديين ضخمين وطوال وعراض (( مع احترامي له )) لكني اعتقد انه من اصحاب البنيه الضئيلة لاني ماحسيت هالشي فيهم ... صحيح اغلبهم اجسامهم رويانه لكن مافيهم طول غريب و عرض عجيب كانو عاديين في الحجم .. لكن بالضبط اخلاقهم كما ذكرها عاليه وتكاد تقول عنهم انهم اخلاقهم هي الاخلاق الي يوصي بها الدين الاسلامي ... واذكر ان صاحب التقرير قار ان نسائهم مايبين فيهم العمر لان الجو شديد النقاوة فمافي تجاعيد في وجوههم .. لكني ماحسيت بهالشي بالعكس العمر يبين عليهم في ملامحهم لكن ليس في جسدهم .. حيث ان الاغلب حتى العياييز والشياب يمشون بظهر صلب مستقيم تحس فيهم قوة البركان ولكن بشراتهم ممتلئة بالتجاعيد .. واكيد السبب جفاف وبرودة الجو عندهم ..

الكلام جدا شدني ... حاولت ادور تقرير ثاني بصور ... مالقيت

قلت مافي الا الترب ادفايزر صديقي الثاني في السفر واحيانا ابديه على العرب المسافرون لان احس ذوقي في السفر يميل للاجانب اكثر من ذوق العرب ويمكن لاحظتو هالشي في سفراتي وواجهت وايد انتقادات بسبب اسلوب السياحه الي اتبعه ...

لكن الناس اهواء وفي ما يعشقون مذاهب

المهم ..

دخلت الترب ادفايزر www.tripadvisor.com
وقمت اقرا واقرا واقرا عن ايسلاند

حبيت البلد اكثر وانشديت لها اكثر

ووسعت بحثي قمت ادور في المواقع الرسميه للسياحه في ايسلاند

وكلها كانت مشجعه جدا جدا جدا ..

خوفي كان ان الاهل ماتعجبهم الفكره

سالت اخواني عن رايهم ... قالو لي اش عاد خل نروح نشوف
سالت خالتي .. لانها بتكون معانا وقلت لها نبذه مختصره ماحبيت احرق البلد عليها ... قالت كيييييييييييفج احنا نثق فيج وفي اختياراتج

وهاي الي احبه في اهلي

يثقون فيني ويؤمنون بقدراتي السياحيه



لما شفت الكل موافق بديت اراسل صاحب احد الشركات السياحية .. اسمه يكتب ymir
وينطق امير

بعثت له في البداية ايميل كتبت فيه اني قريت اشياء عجيبه وجميله عن ايسلاند خلتني اتمنى ازورها و حطيت في بالي العديد من الاماكن الي ابي اروحها واشوفها و اتمنى انك تساعدني في التنظيم والتنسيق و تودينا رحله خاصه يوم 17 -8 .. المهم بعد مابعثت الايميل جاني الرد الي سرني وحسيت ان صاحب الشركه انسان حبوب وطيب ومتحمس لخدمتنا وهاي هو الايميل الي جاني منه



ترجمة الايميل :

عزيزتي عائشة

شكرا على الكلام اللطيف الي كتبتيه في ايميلج !
انا دائما اعتقد ان حظي زين يجيب لي ناس زينين في جولاتي السياحيه
بكل سعاده وتواضع احب اعرض عليج الي اسويه في يوم واحد . في الواقع ان اعمل عمل التريب ادفايز في ايسلاند وهذا يعني ان مهمتي هي التخطيط للناس و مساعدتهم في اختيار الشركات السياحيه الي ممكن تاخذهم للرحلات الي حابين يروحونها . انا كنت ادير مكتب سياحي خاص فيني لمدة 3 سنين وتوقفت في سبتمر الماضي والحين انا اقوم بهالمهمه عن طريق الويب سايت الخاص فيني
www.myreykjavik.is
من هالموقع تقدرين تلقين معلومات عن الرحلات الي انصح فيها ورايي يكون من خلال خبرتي وخبرات الغير.
وعشان اقدر انفعكم اكثر في رحلتكم احتاج اعرف بعض المعلومات عنكم ..
1- ماهو غرضكم من السفر ؟
(( رديت عليه للسياحه وعشان نشوف ايسلاند ونتعرف عليها ))

2- كم نفر انتو وشنو نوع قروبكم ؟
(( قلت له عائلة من 8 اشخاص معانا اطفال ومراهقين وكبار شوي في السن و شباب ))

3- ايش فكرتكم وخطتكم والاشياء الي تبون تسوونها في ايسلاند ؟
(( كتبت له مقاله عن كل الاماكن الي فيخاطري ))

4- هل عندكم سكن اذا ماعندكم خذو فكرة عن شققنا الفندقيه ..
www.reykjavikperfectapartments.is
(( رديت عليه ان احنا خلاص حجزنا السكن و مانحتاج نحجز سكن وطبعا شكرته ))

وبعدين قال في الايميل اذا كان هاي اول زيارة لنا لايسلاند ينصحنا بقراءة الفاك الي في موقعه عشان ناخذ معلومات اكثر .. وهو يسعده ان يعطينا اختيارت مختلفه لرحلتنا بناءا على رغبتنا وميزانيتنا.
واخر شي ختم الايميل وقال : تحياتي الدافئة من ريكفيك ذات الرياح ( الجو غريب اليوم وكأن الصيف ذهب لاجازه و ترك الشتاء بداله )

-------

بعد ماقريت الايميل اعلاه حسيت اني قاعده اقرا ايميل من صديق قديم ابتسمت بسعاده

ورديت عليه ..

وقدرت انسق معاه جدول رحلاتنا كل يوم في ايسلاند .. واتفقت معاه اني اروح معاه رحلة ثاني يوم لنا في ايسلاند و الباقي مع شركات اخرى هو نسق لي الحجوزات معاهم طبعا بدون ماياخذ أي ربح له هو ربحه من الرحله الي قدمها لنا . بل بلعكس جاب لي خصومات من بعض الشركات ...

بعد ماصار المخطط كامل في بالي ..

سالت امير متى لازم ادفع فلوس الرحلات .. بعتبار ان كل الشركات تطلب دفع مسبق للتاكيد..

قالي بكل طيبة الايسلنديين وحسن ظنهم بالاخرين .. من قال لازم تدفعين الحجز تاكد خلاص ولما تجين وبتروحين أي رحله دفعي بنفس اليوم ... يالهم من خلوقين وطيبين وحسنين ظن بالناس ..



رسمت خطة سير سفرتنا النهائي ... حجزت الفنادق وحان وقت حجز وسائل المواصلات من بلد لاخر ..

و حجزت على الطيران الايسلاندي وكان خط الرحلة كالاتي

ستوكهولم - ريكافيك تاريخ 16-8-2013
ريكافيك - امستردام تاريخ 21-8-2013

5 ليالي في ايسلاند ..خفت ازيد .. لاني مب متاكده اذا البلد فعلا تستاهل نتم اكثر او لا .. وكلكم تعرفون اسلوبنا في السفر نمل ان طولنا بنفس المكان حدنا اسبوع ...

وتم حجز الطيران 7 كبار وطفله ب 18144
يعني متوسط سعر الشخص بـ 2268 ريال قطري

طبعا حسيت ان السعر مرتفع نسبيا للتذكره .. لكن هاي هي وسيلة المواصلات الاريح والاسرع والواحد مب كل يوم يروح ايسلاند :)



وسعر الطيران عطانا مؤشر ان الاسعار لن تكون رخيصه في ايسلاند ...

-----------

في تاريخ 16-8- 2013

توجهنا الى مطار ستوكهولم في السويد وخلصنا اجرائات السفر الي كانت اليكترونيه والتعامل جدا بسيط مع الجهاز الالكتروني وتوجهنا للطائرة ..

خريطة الرحلة وشوفو ايسلاند بعيده وفي مكان معزول عن الباقي ..



طيران ايسلاند

http://www.icelandair.com/

هو طيران غير اقتصادي لكن لايقدم وجبات مجانيه فالي حاب ياكل يشتري .. والي حاب يسمع يشتري سماعات عشان التلفزيون وايضا في افلام مجانيه وافلام بفلوس ..

مدة الرحلة من ستوكهولم الى ايسلاند تقريبا 4 ساعات وشي مب متذكرة بالضبط .. والطيارة عاديه مافيها مميزات



وبعد مدة من التحليق فوق الغيوم .. بدأنا الهبوط .. وبانت لنا ايسلاند .. وكنت متحمسه اشوف شنو الي بيبان من الطيارة اول شي وقمت اصور لعل وعسى اصور معلم مشهور



لاحظت ان اشهر معلم هو انه لاتوجد مدن كثير والمكان كله اخضر بدون مرتفعات او اشجار او غابات وحسيت الارض كانها ملعب كرة قدم





الساعة تقريبا 3 ونص العصر ودرجة الحرارة 11 .. بالنسبه لنا قمة الحماس



ونزلت الطيارة ...



واكثر الاشياء مثيرة للدهشة في ايسلاند ..
ليس .. الجمال والطبيعه والشلالات
في الواقع .. ان رقم ريئس الوزراء موجود في كتاب دليل الهاتف ..

(( وللعلم .. حتى رئيسهم ممكن زيارته في مكتبه بكل سهوله و رحنا مكتبه بس مازرناه بس خذنا لفه في المكتب ))

نزلنا للمطار ..

والمطار كان غريب نوعا ما ... القادمون مع المغادرون ونمر على بوابات الطيارات و الي كانو واصلين مثلنا يمرون على بوابة المغادرون اعتقد لو واحد بيدش ببوابة الطيارة محد دره عنه ..

وعقب ماخلصنا من اجرائات المطار .. لاحظنا عيون الناس .. نظراتهم باستغراب مرفوقه بابتسامه ترحيبيه ..

و قمنا ندور السواق الي حجزته مسبقاً من النت كالعادة .. و كنت مشدده على هالنقطه بالذات في ايسلاند حبيت ان نروح ايسلاند وكل شي محجوز مسبقا ومترتب مسبقا وماتركنا شي للصدفه والحظ لان طبيعة البلد مجهوله بالنسبه لنا ...

لقينا عيوز حاملة لوحة عليها اسمي ... قمنا نطالع بعض قلنا هاي وين فيها شده ترفع حقائبنا النفاثه وتدخلها السيارة ... المهم ان احنا مشينا وراها وطلعنا من باب المطار الى المواقف وقمنا نتلفت حولنا

المكان ذكرني بالشتاء في البر .. كلشي حولي هادئ وفارغ والارض مسطحه مانسمع الا صوت الريح ...

كان المكان مثير للدهشة والتسائل



وهاي السيارة وصلنا لها و جينا لين اللحظه الحاسمه .. لحظة ادخال الحقائب ... ومامدانا الا ماشاء الله عليها العيوز

قامت ترفع الشنط بكل سهوله ويسر وتدخلها الباص ماشاء الله عليها قويه



وبعد ماقعدنا في الباص ... او الفان ... تحركنا للخروج من المطار




وهاي حجز السيارة

من موقع فياتور

www.viator.com



سعر التوصيل من المطار الى الفندق 735 ريال ... ومدة الرحلة تقريبا 45 دقيقه ..

وللحديث بقية



احلى من العقد احلى من العقد
ايسلندا ... اجتماع البراكين بالثلوج



كل واحد منا قعد بمقعد .. داخل الباص ..

ومشى الباص وبدينا نطلع من حدود المطار وشدني هالمجسم ..



قمت ادقق فيه واتسائل ايش هاي ؟؟

قنبله ... لا مااعتقد في حد يسوي مجسم لقنبله جدام المطار ..
زيتونه ... يمكن بس اش دخل الزيتون بايسلاند ..
باذنجانه ... لا اش دخل الباذنجان في المطار ..
وبعد التعمق بالشكل اكتشفت انه بيضة ديناصور وذيل الدايناصور طالع من البيضه .. يعني البيضه قريب تفقس :)



وطلعنا من حدود المطار ... ومشينا في طريق طووويل مافي شي حولنا لايمين ولا يسار اللهم بين فتره وفتره تمر سياره جنبنا



ساد الصمت المكان عيونا على الشبابيك نشوف وندور ... المكان كما قلت لكم سابقا .. كانه ملعب كورة قدم كبيييييييييييييييييييييييييييييير مافيه الا حشيش وغيوم ..




بين فتره وفتره نلمح بنايات بعيده وبسيطه .. المكان خالي من معالم الحضارة ...



حسيت الكل ساكت ومنصدم ... حاولت اكسر الصمت الرهيب و اجس النبض ، قلت لهم جنه مافي شي حولنا ... الا ترد علي خالتي وتحاول تلطف الجو .. عادي الزين في سفرنا ان احنا مانطول في المكان سواء كان حلو المكان ولا مب حلو بنقعد كم يوم وبنروح مابتضيع السفره كامله .. قلت لها ان شاء الله المكان بيكون حلو وبتستانسون ... اضحكت ضحكت مجامله ههه ان شاء الله وعينها على الشباك



رجعت تسندت وكملت تأملي بالشارع والمكان حولي

من بعييييد كنا نمر على كم بيت بس مانشوف حركة ملحوظه





شفت بعيد مجسمات كبيره من الصخور في مكان مافي شي غير هالمجسمات




تدرون شنو هاي ... هاي لافته عليها اسم قريه او مدينة ... نعم هذه مدينة .. لكنها خاليه تماماً مافيها الا حشيش ولافته




وانا قاعده اشوف واحاول ادور شي من الاشياء الي تعودت عليها في كل المدن الي زرتها ... مثل الاشجار ، البيوت ، الجسور ، ليتات الشوارع .. السيارات أي شي ... مالقيت شي يشبه أي دوله اخرى ...



وتذكرت كلام صديقتي ... لما قلت لها اني بروح ايسلاند ... قالت لي بتروحين ايسلاند ...؟؟؟ عاد تعرفين اش بتسوين وين بتروحين هناك ولا بتوقفين في الشارع تتلفتين تدورين شي تسوينه ...

حسيت هاي الي قالته واقع ... يحكي لسان حالي





وشوي قمنا نشوف المسطاحات المائية مخلوطه ببحيرات صغيره .. كان شي مختلف




ومن بعييييد بدت معالم الحضارة تبين لنا .. بيوت وبنايات واحنا نتجه لها قلت اكيد قربنا من العاصمة





لما قربنا من المدينة .. نطقت خالتي وقالت .. باين ان البلد كلش مب متطورة



قلت لها .. لا هي مب متطوره من حيث البنيان .. هم ناس بسيطين وحياتهم بسيطه العاصمه مافيها عمارات و فن عمارة و هالسوالف .. عايشين بإسلوب بسيط وعادي





مرينا ببحيره جدا جميله ... ورايقه





وقربنا من سكنا الكائن في وسط العاصمة ..



العاصمة هي ريكافيك ... ماكنت اعرف انطق الاسم الى ان وصلت ايسلاند وسمعت الناس شلون ينطقونها .. لانها تكتب بهالطريقة ..

reykjavik

جزء قصير ... تقبلوه مني لهذا اليوم ..

وللحديث بقيه


احلى من العقد احلى من العقد
ايسلندا ... اجتماع البراكين بالثلوج


ودخلنا للعاصمة الصغيره ريكفيك .. وبدأت مضاهر الحياه تكون واضحة .. وشفنا باص سياحي مكشوف ...


البيوت والبنايات كلها شبه بعض تقريبا بس الوانها تختلف المكان كأنه لعبه


وواضح جدا ان الجو بارد وجميل كما نحبه



ووصلنا لين الفندق ..

في ريكافيك اغلب الفنادق على هيئة شقق فندقية ... مستواها جيد والفنادق قليله ...
كنت باحجز غرف في فندق .. بس فكرت ان الاكل لو ماكان كما يجب في المدينة ... افضل ان يكون عندنا شقة فندقيه فيها مطبخ صغير نقدر نجهز لنا اكلات بسيطه وايضاً عشان الوسع ...

الشقق اسمها ..
home luxury apartment
موقعها بالضبط في نص السنتر وشارع التسوق والي هو افضل شارع في ريكافيك العاصمه بجانبنا على طول ...


شكل ماتشوفون ان حجزنا 3 غرف بسعر 2355 يورو لمدة 5 ليالي يعني سعر الليله للغرفة 157 يورو لليله يعني مايعادل تقريبا 780 ريال قطري لليله للغرفة الواحدة ...

الشيك ان كان في مدخل شقق فندقيه اخرى واعتقد انهم كلهم واحد بس باختلاف الاسماء اسم الشقق الاخرى K apartment لما دخلت اسوي شيك ان عندهم لقيت طابور طووووووووووووووووويل

كلهم صينيين ومسوين ازعاج ويسولفون بصوت عالي

ولين شفت الموظف على طول جاني وقالي نعم راويته حجزنا وقال جدامك كل هالصينيين وكانو فوق ال 40 واحد .. وبعدين اقترح انه يجدمني عليهم بما اني اقل منهم

سألهم بصوت عالي ممكن اخلصهم قبلكم وقام المترجم ترجم للصينيين السالفه

الا كلهم قالو اووكي اوووكي اووووكي

وخلصنا وعطونا المفاتيح ورحنا لين غرفنا ...

صار موقف طريف

الصينيين صار بينهم لخبطه في موضوع الحجوزات وفي ناس تلخبطو وصارت مشكله بسيطه لاتذكر ..

لكن بالنسبه للايسلنديين ان هاي مشكله غريبه

تخيلو ثاني يوم لين جانا امير ياخذنا يسيحنا ..

قال لنا بستغراب

يقولون ان امس صارت مشكله مع قروب الصينيين صج ولا لا ..


ضحكني حسيتهم يحليلهم متخرعين ماتصير عندهم مشاكل ترا الي صار شي لايذكر ابدا خخخخخخ

المهم ...

لين رحنا نستلم غرفنا خالتي كانت بالدور ال2 ومافي اسنسير فضطرو بمساعدة بعض العمال حمل حقائبهم الى الاعلى وهاي اسوء شي

اما احنا غرفتنا كانت في الدور الاول ونصعد سلالم بس قليله ..

خلوني ارويكم غرفنا

هاي سريري انا واختي


وهاي طاولة الاكل و السوفا بد وفوقهم تلفزيون بالنسبه لنا ماحتجنا السوفا بد ولا التلفزيون


وهاي المطبخ .. فيه فرن ومايكروويف و ثلاجه و غلاية ماء و توستر وكلشي ممكن تحتاجونه


اما الحمام فقصته قصة ... اتذكر اول مادخلت غرفة خالتي شفتها متضايقه وتقولي سكري باب الحمام فييه ريحه مب نظيف .. رحت طليت فيه شكله نظيف لكن ريحته خايسه وشغلنا المروحه الشفاطه عشان الريحه تخف وعقب طلعت رحت غرفتنا ولين رحت اشيك الحمام .. شميت نفس الريحه ونفس الشي فتحت المروحه الشفاطه و انا من طبعي لازم اودي معاي لين اسافر مبخره الكترونيه وعود او شمعة بريحة وكنت موديه معاي مبخره الكترونيه رحت فتحتها وحطيتها في الحمام ... ولما رحت اشيك حمام امي نفس الشي الريحه نفسها موجوده وهم ايضا فاتحين الشفاطه .. ففسرت الموضوع ان المجاري عندهم ريحتها فايحه و من خبرتي في الحمامات خخخ ان الحمام اذا كان نظيف والريحه من المجاري فان الشفاطه تزيد الطين بله وتطلع ريحة المجاري اكثر فنصحت الكل انهم يسكرون الشفاطات ... وفعلا لما سكرنا الشفاطات الريحه خفت بس مازالت موجوده ... و اليوم الثاني لين طلعنا مع امير اخبرنا ان مياه الصنبور هي مياه معدنية طبيعيه وان مياه الصنبور الساخنه تجي مباشرة من تحت الارض الى الحمام وهذا يعني ان المياه كبريتيه مسخنه عن طريق البراكين الموجوده تحت الارض ... وهذا الي يفسر ريحة الحمام ... ريحة الحمام هي ريحة المياه الكبريتيه .... لما عرفنا السبب تقبلنا الموضوع و توقفنا عن التذمر ... بالذات ا المياه الكبريتيه مفيده جدا للبشره وللاستشفاء من الام المفاصل ...


الدوش ماعجبني بس كان ممشي حاله


انا عادتا احب البانيو بالذات في البرد احب اخذ حمام ساخن في البانيو بس يالله شنسوي بعد ..

وهاي السوفا بد والقعده ..


المطبخ


طاولة الكي والمكواه والمكنسه الكهربائية


وغرفتنا لين نفتح الباب نشوف حوش صغير والشارع الي جدامنا هاي هو


كل الغرف بنفس الموديل مع اختلافات بسيطه مثلا هاي سرير امي


تصنيفي للشقق انها جيده .. مساحتها جدا معقوله .. نظيفه .. وممكن ان احنا نطلب خدمة الغرف كل يومين مره وهاي عيب طبعا مب ميزه ان غرفنا مب كل يوم تتنظف بس واحنا هناك ماخليناهم ينظفونها لان ماتصلنا لهم ماكنا فاضيين .. الانترنت في الغرف مجاني .. وحولنا كلشي تتخيلونه مطاعم وكوفي شوبات ، سوبرمركتات مغسلة ملابس موقف للتكاسي .. يعني الموقع سوبر .. بس مستوى الشقق جيد

ايضا يوجد في الغرف تقريبا 4 مدفئات وواحده في الحمام المجموع 5 دفايات في كل غرفه ومافي مكيف هواء لان اصلا مافي داعي للمكيف كنا احيانا نفتح الدفايه وننام

في هذه الاثناء بعثت رسالة بالجوال لامير اخبره ان احنا وصلنا الفندق فرد علي خلاص نص ساعة وبكون عندكم ...

والسبب هو الله يسلمكم ... من كثر ماهو متحمس للقائنا عرض علي انه ياخذنا لجولة بالاقدام في العاصمة ريكفيك يعرفنا على اهم معالمها و يحكيلنا بعض قصص الشعب الايسلاندي وهذا الشي ببلاش وراح يكون هديه منه لنا ... تخيلو جولة سياحية بالاقدام مع مرشد محترف ببلاش وبدون أي مقابل ... وقالي بالايميل ان احنا نختار الوقت الي يناسبنا واذا كان العرض عاجبنا .. فطبعاً رديت عليه بايميل ان هاي كرم منه واكيد بنقبل هديته ... وعلى قولت القايل انا غنيه واحب الهديه خخخ
.....

في موضوع حابه اذكره

بينما انا وامير كنا نتفق على الرحلات بالايميل .. تذكرت طبع الاجانب ... ان هم لما يقابلون أي حد عادي يسلمون عليه باليد ويحتضنونه عند الوداع .. وطبعا لاني مابي انحط في هالموقف المحرج قررت اخبره مسبقاً بهالشي

وارسلت له بالايميل اني حابه اقوله معلومه تخص ثقافتنا وعاداتنا واتمنى انه يتقبلها بصدر رحب وهي ان الحريم عندنا والرياييل مايتصافحون باليد ... وان أي نوع من التلامس الجسدي بين الحريم والرياييل غير الاهل يعتبر غير مقبول ابدا ابدا ... وايضاً اخبرته اننا لانشرب أي نوع من الكحوليات ولا ناكل أي شي فيه نسبه من الكحول او لحم الخنزير او أي منتج من منتجات الخنزير
رد علي بصدر رحب انه سعيد باني اخبرته بهالمعلومه وانه يحترم عاداتنا و بيحط هالنقطه في باله وشكرني لاني خبرته هالمعلومه ....

وفعلا طول الفتره الي كنا فيها مع بعض ابدا ما تعدى هالخط الاحمر الي رسمته له بالعكس تقبل من امي تصرفات تجيب العيد هههههههه

وللحديث بقيه


احلى من العقد احلى من العقد
ايسلندا ... اجتماع البراكين بالثلوج


استعدينا كلنا سريعاً وريحنا لين وصلتني رساله من آمير كاتب لي فيها ان انا راح اكون عندكم عقب 10 دقائق ..

وفعلا ماصارت 10 دقائق الا وامير اسفل البيت انا كنت كل شوي اطل من باب البيت اجيك اذا وصل ولا لا .. وطبعا لما وصل اتصلي وانا رديت وطلعت له ... ويحليله كان في قمة الاحترام والتواضع والسعادة برؤية سياح من بلد بالنسبه له لم تكن من ظمن خارطة البلدان الي يعرفها ...

ناديت امي واخواني وخالتي وبناتها وتجمعنا كلنا عند الباب نعرف امير علينا ...

قبل مانجي لايسلند كنت افكر اجيب لامير هديه معاي من قطر وكنت حابه اجيب له شي يرمز لطبيعة حياتنا ... فقلت اكيد في فالمطار شي عليه كلمة قطر ..

وفعلا لما رحت المطار قلت لخالتي الفكره وقالت خلاص انا بعد بشتري له هديه .. فقلت لها اوكي ..

اختارت هي تشترله تمر بالسمسم ..

وانا شريت له جمل مكتوب عليه قطر .. و مثل الصحن الصغير الي يحطون عليه الكوب على شكل رجل لابس غتره وعقال وثوب ..

----

بعد ماعرفنا امير علينا ... عطيته الجمل و الصحن الصغير وقلت له هاي هديه بسيطه منا لك ... وخالتي عطته التمر ... مبدأيا ماعرف التمر قام يشوفه ويقلب العلبه .. قمنا شرحنا له ان الي داخل تمر بالسمسم والعسل وانه حلو ..
شكرنا وكانت تعابير وجهه كانه فرحان ومنحرج وحسينا انه طيب مسكين وخجول ههههه

واستانس وايد على الجمل وقال انه بيعتبره جمل الحظ وبياخذه معاه في كل رحلاته ...



وبدأنا الجولة التعريفيه في العاصمة مشياً على الاقدام .. طلعنا للشارع الرأيسي ونزلنا للجنوب


ولو ملاحظين لوحة مكتب السياح .. وهو قريب جدا جدا من بيتنا



لو اتجهنا شمال نروح للسوق و شارع المشاه واذا رحنا للجنوب نروح جهة المطاعم والكافيهات

واحنا رحنا جنوب




عدد سكان ايسلند تقريبا 310 الف نسمة .. لذالك مانشوفها مزدحمه والكل عايش بسلام ووئام ... تدرون تذكرت قطر قبل ... كنا 300 نسمه الشوارع فاضيه ومافي زحمه ننام واحنا مطمئنين وكل واحد يعرف الثاني .. ننام وبيبانا مفتوحه لا عمرنا سمعنا عن سرقة ولا جريمه ولا أي شي من هالسوالف ... وكانت اكبر حادثه نسمع عنها ان فلان دعم بسيارته و تعور ...

بالضبط هم نفس الشي ويمكن احسن

آمنين في بلدهم .. سماههم على وجوههم طيبين وخلوقين جدا جدا .. على فطرتهم وعفويتهم ... مايأذون بعض و لايقلون ادبهم على بعض .. المهم

وصلنا لين منتصف المدينة بالضبط وفي حديقة صغيره فيها كراسي للاطفال


وبعض النصب التذكاريه الي نسيت هي تذكار لايش




وهاي هو امير وشايل الجميل بايده ويشرح لنا الاماكن


ومازلنا نمشي وراه




وهاي امي و بنت اخوي الصغيره في اخر الركب .. اهني توقفنا مع امير وقام يكلمنا عن البلدية والحكومه الايسلندية .. وامي ماكانت فاهمه لانها ماتتحجى انجليزي فتركتنا وقعدت على احد الكراسي هي وبنت اخوي اشوي الا اشوف شايب ايسلندي راح لهم وقام يلعب بنت اخوي ويبتسم لها ... عادتا الاجانب مايسوون هالشي لكن الايسلنديين غير بسيطين


وهاي هو مبنى البلدية او الحكومة ..


يقول امير .. ان الدولة تحكمها الكنيسة والكثير من القرارت تخرج من الكنيسة .. وانه بعد ازمة البنوك في الفتره بين 2008 و 2010 وعند خسارة 3 بنوك ايسلندية كانت مملوكه للحكومه صارت الدولة في ازمة اقتصاديه لحد الحين يعانون من هالازمه .. واصبحت الديون على ايسلندا اكثر من السيوله الي عندهم ... و يقول ان بريطانيا احد الدول الي تطالب ايسلندا فلوس .. وقال لنا بكل زعل واسف واحراج ... ان الشعب الايسلندي لن ينسى الاهانه الي جاتهم من رءيس الوزراء البريطاني (( اعتقد مااذكر بالضبط من )) يوم طلع في التلفزيون وقال
Iceland we want cash not ash

يعني ايسلاند نبي فلوس مب رماد ... قصده ردولنا فلوسنا الي نطالبكم اياها بدال ماتعطونا رماد البركان ...

ويعتقد الايسلنديون ان هالشي غير لائق وانه جرحهم ...

الشعب الايسلندي ايضاً تعب من سالفة الديون .. ويطالب الحكومه توقف الضغط عليهم في سالفة الضرائب وهالاشياء عشان تسدد الديون بالمقابل ...


ويقول امير .. ان مره من المرات الشعب ثار على الحكومه وسوو مضاهرات .. وبدال مايرمون بعض بالقنابل قامو يرمون مبنى الحكومه بالعصي والفؤوس (( حمع فأس )) كما كانو يعملون الفايكنج اجدادهم


وهاي مبنى البلدية من الخلف .. وتوجد في الخلف حديقة على شكل الشمس


يقول امير ان الديانة الرسمية للبلد هي المسيحيه ولكن هناك قله وهو واحد منهم وقع في الكنيسه انه ليس مسيحياً و اتبع دين اجداده الفايكنج وصار يعبد اله قوى الطبيعه الي هو في اعتقادهم يسمونه ثور THOR ,, وفي افلام وايد نازله باسم ثور الي هو اله الطبيعه ..
والشمس هي رمزهم ويقول رغم ان البلديه لاتعترف الا بالمسيحيه كدين رسمي لكن رمز اله الطبيعه الي هو الشمس مرسوم في حديقتهم ..


و كملنا طريقنا لزيارة مكان اخر


والجدير بالذكر انه راح يتزوج وحده مسيحيه وهاي اول مره تصير عندهم ان مسيحيه تتزوج واحد من دين الفايكنج فهو اقترح يجيبون مطوع مال دين الفايكنج ومطوع مسيحي ويتزوجون بالطريقتين المسيحيه والفايكنجيه



الجو صار بارد وصوت النورس والبط حولنا و بحيرة جميله بجانبا




توقفنا عند البحيره .. وقال لنا امير انه يجيب بنته (( هو مب متزوج بس عنده بنت من صديقته القديمه خخ )) تاكل البط والعصافير دائما ..

ويقول لو عندنا خبز جان اكلناهم ... ولما شاف بنت اخوي .. قال تدرون بنعطيهم من الاكل الي جبتوه ... عاد انا استغربت ماخبرت البط ياكلون تمر .. فتح العلبه و اكل حبه و انبهر بالطعم وقال وااااااو هاي لذيذ جدا واخذ التمره الثانيه واكلها وتم يطالع التمره ومستغرب وقال شنو هاي تين ..خخخ الله يهديك يا امير من الصبح نقولك تمر مع سمسم وعسل ومكسرات واخر شي تقول تين .. قلنا له لا هاي الي ينبت من شجرة النخيل واعتقد فهم لكنه الظاهر اول مره يشوف وياكل تمر لانه جدا انبهر بالطعم وقال بعطي البط بس حبه وحده اخاف يخلص .. و فعلا تجمعو الطيور ونتف لهم التمره و عطاهم وكانت لحظات بارده وحلوه ..


هاي ماري اش سالفته







هاي البطه مصره على انها تاخذ تمره زياده ..



وبعد البحيره .. دخلنا امير الى احد المباني وقال لنا ان مكتب الرئيس يقع في هالمبنى في الطابق الثاني واذا كان موجود بنشوفه ... يعني الموضوع بسيط عندهم ولا في حراسه ولا غيره وهاي خريطة ايسلاند في النص وراونا مكانا في الخريطه ووين بكره بيودينا


وقال انه من المتوقع غداً يثور بركان ... وان شاء الله اذا ثار البركان بياخذنا عنده عشان نشوف ثورة البركان ... كنت بتشقق من الوناسه بشوف بركان ثائر يا حلاوة يا بقلاوه .. واستأذنا انه يجيب بنته اذا ثار البركان في الايام الجايه لانه حاب يراويها ثورة البركان وبيمر علينا وبيودينا معاه .. قلنا له أي عادي جيبها تشوف ... مسكين بيودينا على حسابه وبعد يستأذن انه يجيب بنته .. بس للاسف ماثار البركان خيب ضننا فلاتستانسون مابتشوفون بركان ثاير



واتجهنا مشي باتجاه المدينة القديمة





شوفو هاي البيت الاصفر هو بيت امير و الحديقه هي حديقة الفريج .. وهم كلهم يهتمون بالحديقة


وقفنا عند الحديقة و قال لنا ان الناس في ايسلند يؤمنون بوجود الإلف (( الاقزام )) والعمالقة وهاي شكل الالف

وللتوضيح الالف ELF هو عقلة الاصبع او الاقزام الي قد عقلة الاصبع والجاينت هم العمالقة





ولان الايسلنديين يؤمنون بوجود الالف والجاينت فهم يحترمونهم جدا ويعتقدون ان الاقزام والعمالقه هم اصحاب ايسلاند الاصليين و ان الفايكنج لما جو ايسلند وسكنو فيها مامانعو الاقزام والعمالقه واسمحو لهم بالسكن في ايسلند معاهم لهالسبب هم يحترمونهم ومستحيل يشيلون أي حجر في حفر من مكانه لانهم يؤمنون ان هالحفر هي بيوت الالف او الاقزام ولازم مايخربونها وان انوجد الحجر في نص الارض يبنون البيت حوله بطريقه ان الحجره او الصخره ماتخترب ولاتنشال احتراما للالفس


وهاي البيت الاصفر بيت امير


وقال انه ساكن في جزء والباقي مسويه مثل شقق مفروشه يسكن فيهم السياح وكان بيسكنا في بيته لو كنا ما حاجزين فندق .. طبعا بيسكنا بفلوس مب ببلاش خخخخ لاتفكرون انه بيسكنا ببلاش خخخ



و انتهت جولتنا التعريفيه في ريكافيك ودلانا على مقهى غسيل الملابس كما يسميه .. وعلى السوبرماركتات والمطاعم الي يحبها وعرفنا على المدينة .. و قبل مايودعنا قلنا له احنا ميتين من الجوع وخاطرنا ناكل شي من المطبخ الايسلندي ... قال انصحكم بالسمك فايسلند مشهوره جدا باسماك بحر الشمال ... مع ان اغلبنا مايحب السمك قلنا نجرب وين ممكن ناكل سمك ؟ وبنفس الوقت الي حاب شي غير السمك يطلب له يعني مانبي مطعم بس للاسماك .. قال لنا انه يعرف مطعم طبخه يذكره بطبخ جدته خخ واتصل يسأل اذا في حجز لان عادتا يكون المطعم مليان .. ومالقى حجز ل8 اشخاص .. فقال بدخلكم مطعم ثاني واخذنا لهالمطعم


ولما وقفنا عند الباب كان ريحته سمج ماحبينا الريحه بس ايضا كان المطعم مليان وقال لنا انتظرو دقايق نجهز لكم طاوله .. وبهالوقت جى اتصال لامير من المطعم الي يطبخ اكل نفس اكل جدة امير خخ وقال جهزنا لهم مكان اذا حابين .. وقال لنا امير جهزولكم مكان و اتحمسو بالذات لين عرفو انكم جايين من مكان بعيد :)

ورحنا مشي للمطعم الثاني

وبينما احنا نمشي للمطعم الثاني مرينا على هالصخره المقسومه بالنص .. ومحطوطه امام دار البلدية


وقال لنا امير ان هو يفتخر انه من الناس الي شالو هالصخره وحطوها جدام دار البلديه عشان يذكرون الحكومه ان مهما ادعت الحكومه انها زينه وديمقراطيه تضل هناك فجوه بين الحكومه والشعب

يتبع


احلى من العقد احلى من العقد
ايسلندا ... اجتماع البراكين بالثلوج


ووصلنا للمطعم



دخلنا امير ونادا الموظفين في المطعم وقال هاي الي قلت لكم عنهم وودعنا راح ..وتمنى ان احنا نستمتع بالاكل ..

قعدونا على هالطاوله وكانت اجواء المطعم حلوه كانه بيت قديم فيه حميميه بس الطاولات جدا قريبه من بعض .. واذكر الكل كان يطالعنا





كنا يواعه وايد والصغيره وصلت حدها وتمت تقول ابي اكل ونفسيتها اختربت مشكله احنا ناس اذا جعنا نعصب خخخخخخ واخيرا جات اطباقنا .. للعلم كانت الخيارات في المنيو جدا قليله

مع اني ماحب السمك بس قلت اذوق سمكهم وطلبت سمك


ولاني ماحب السمك فماحبيت الاكله وخالتي لين ذاقت قالت مب مطبوخ عدل مسلوق سلق خفيف .. الظاهر هم يحبونه بهالطريقه

والباقيين طلبو ستيك لحم .. كانو يقولون انه نص ونص واحلى من السمك


ولين خلصنا وجينا نبي ندفع ونطلع طلبو منا ان احنا ننتظر قليلا لان المطعم حاب يقدم لنا سويت هديه من المطعم .. قلنا لهم مب لازم لان احنا كنا تعبانيين ندور الفراش .. بس اصرو وقالو 5 دقايق ويجهز هاي حلا ايسلندي مصنوع من الروب والفواكه ... وجابوه ... كان طعمه حلو وشيرته خفيفه وفيه طعم روب


وبعد ماخلصنا اكل وحاسبنا شفت فاتورتي ل 4 اشخاص تقريبا ب 4000 كيرونا وماكنت اعرف كم بالضبط تساوي حسيت بالصدمه وقلت في قلبي واااايد 4000 ودفعت بالبطاقه لاني مالقيت فلوس ايسلند عند الصراف ولين رجعت وشيكت مع البنك لقيتهم تقريبا يطلعون 120 ريال فقلت زيييييييين مب وايد .. وطلعنا من المطعم وكان الجو بااااااارد اسنانا قامت تطاقق


ورجعنا لفندقنا وهاي بيتنا الباب الي على اليمين غرفة امي والي على اليسار غرفتي والشباك الي فوق غرفتي هو شباك خالتي ..



ورجعنا تدفينا وفتحنا كل الدفايات ... ونمنا ...

وللحديث بقيه


احلى من العقد احلى من العقد
ايسلندا ... اجتماع البراكين بالثلوج



اليوم هو ثاني يوم لنا في ايسلند ..

رن المنبه على الساعة 9 لان الاتفاق اليوم مع امير ان جولتنا تبدأ الساعة 10 الصبح .. قمنا نتجهز .. و قلت اشيك على درجة الحرارة وكانت



ووصانا امير امس ان احنا ناخذ جاكيتاتنا معانا دائما لان المكان قد يكون بارد جداً ..

لبسنا وتجهزنا وعلى الساعة 10 بالضبط امير وصل جدام البيت مع سواق في سيارة فان ..

دخلنا السيارة وكان الجمل باستقبالنا



خلوني اعطيكم فكرة عن رحلة اليوم ..

الرحلة اليوم هي من اختصاص امير وهو الوحيد الي يسويها

اسمها Private Gourmet Day Tour

الترجمة : رحلة سياحيه مرفهه خاصه

كان سعر الرحلة في البدايه اكثر من المبلغ الي اقولكم عليه لكن قلت لامير ان السعر عالي فقال بيسوي لي خصم 10 بالاميه وفي المقابل هو لن يحضر معانا فقط السواق بيكون موجود .. وافقت لكن اخر يوم من حماسه قال انا متحمس القاكم وباجي اخذكم للجوله السياحيه لكن مابي الـ 10 بالاميه وراح اخذ فقط مبلغ الرحله بدوني ... وافقت وشكرته ..

سعر الرحلة ل 8 اشخاص في سياره فان خاصه هو 270000 كرونا ايسلنديه يعني تقريبا 8100 ريال قطري يعني سعر الشخص هو 1012 ريال قطري ..

اكيد بتقولون ان السعر مرتفع ... نعم انها اسعار الجولات السياحيه في ايسلند كلها تقربيا مرتفعه ... الاكل معقول .. الفنادق معقوله .. لكن الرحلات السياحيه مكلفة ...

مشت السياره وابتعدنا عن العاصمة و هاي الطريق .. كلشي حولنا اخضر







هالجزء مافيه كلام وايد ...
















لو تلاحظون الارض والجبال كلها خضراء لكن مافي اشجار عاليه صح ولا لا ؟





سألت امير عن سبب عدم وجود اشجار في ايسلاند الانادرا ...

وقالي ان فالواقع فعلا مافي اشجار عاليه في ايسلند ... علمياً مانعرف ليش ومافي شي اكيد لكن هو حاليا يحظر للدكتوراه وهاي هو بحثه ... وهو يعتقد ان عدم وجود الاشجار راجع للإلفس او عقلة الاصبع او الاقزام الي هم سكان ايسلند .. و الاقزام بالنسبه لهم هالحشيش كأنه غابه عاليه و هاي لانها ارضهم فغاباتهم صغيره مثلهم وبالنسبه لنا هالغابات مجرد حشيش ... جاتني الضحكه في قلبي على موضوع بحثه وعلى تفسيره هههه ... لكن بيني وبين نفسي فكرت و اعتقد ان السبب قد يرجع الى ان الماي الموجود تحت الارض في ايسلند يغلي من البراكين والبراكين قريبه فالاشجار الكبيره اكيد جذورها كبيره تموت وماتنبت من حرارة الماي ... والسبب الثاني اعتقد ان الشجره مايمديها تنبت الا جى الثلج جمدها وذبحها ...

اش تعتقدون السبب ؟؟ ماتعتقدون ان اسبابي مقنعه اكثر من سبب امير ؟؟

مرينا ببحيره حلوه يقول امير ان نصها حلو ونصها مالح













يا سلام على الهدوء والطبيعه الصافيه



كل الاراضي في ايسلند حتى الجبال و الشواطئ اغلبها اذا مب كلها مملوكه لاشخاص ومزارعين .. ويقولكم مايستغنون عن الارض ولا يبيعون الارض مهما صار

مثلا شوفو هالجبل وهالارض الكبيره وهالخضار كله .. ملك لشخص





واحيانا نشوف بعض الناس يملكون شلالات مع الجبال ... وبحيرات



شوفو بيت صاحب الارض بعد مشي مده بالسياره نشوف مبنى بالنص وهو مبنى صاحب المزرعه









و توقفنا عند استراحه قال لنا امير ان هاي الاستراحه فيها دورات مياه اذا حابين تنزلون لان بعدين مافي حمامات ودربنا طويل وقال تقدرون تشترون ماي من الجمعيه ...



انا كنت محتاجه اسحب فلوس للرحله وعشان ادفع لامير لان ماعندي كاش .. رحت للصراف الالي وسحبت وجاني مسج تم الخصم من حسابك .. لكن ماطلعت لي الفلوس والكرت طلع حاولت يمين يسار ماقدرت اعرف ولا افهم الي مكتوب ورحت اكلم الموظفين في الجمعيه .. قالو احنا مانعرف الحل بس عطوني رقم البنك وقالو كلميهم وعطوني عنوانهم عشان اعطيهم اياه في حالة اسألوني باي فرع سحبتي .. وتميت متوتره لان المبلغ مب قليل .. وخفت يكون راح علي ... قلت بكلم البنك اسأل ..

لما سألت بنك قطر قالو لي مومبين ان في عملية سحب صارت اليوم ... و الحمدالله رصيدي كامل مانخصم منه شي .. الحمدالله طلع الصراف مخرف ...

وعقب رجعت السياره ولين رديت لقيت امير يوزع جزر وقالي اخذي جزر ايسلندي ..



وكملنا طريجنا ..























شوي ووقف امير وقام يدلي السواق الطريج



وشوي الا يقول لنا : الحين بندخل حقل بركاني قديم مستعدين ..

قلنا نعم مستعدين ..

وقال بشغل لكم موسيقى الغناء على طريقة اصوات مبهمه مالها معنه مجرد إيمائات وتأوهات واصوات الطبيعه عشان تعيشون بحاله نفسيه متناسقه مع المكان .. وافقنا ..

وشغل لنا المسجل .. كان موسيقى هاديه وصوت بنت تقول مممممممممممممهممم مههه واااا ييييي مممممووووو كااااااا تتتتييييييي يعني كلام مش مفهوم .. بس صوت هادئ وجميل

ودخلنا حقل البركان



طبعا الحمم البركانيه بردت خلاص وصارت كانها صخور متعرجه ومدببه احياانا بدون اشكال ثابته
وكنا رابطين حزامات الامان لان السياره كانت تناقز





ومازال اليوم في اوله ..

وللحديث بقيه


احلى من العقد احلى من العقد
ايسلندا ... اجتماع البراكين بالثلوج



مرحبا اعزائي ..

اخر شي قلته لكم ان احنا دخلنا حقل حمم بركانيه .. طبعا من البروده والزمن تحولت الحمم الى صخور متعرجه ومازلنا نشاهد المكان باستغراب




سبحان الله منظر الماء دائما يبعث السعادة .. اعتقد الماء احد مصادر الطاقة الاجابية











الصور كثيرة والكلام قليل .. اتمنى ماتتمللون













كنا نمشي وسط حقل الحمم البركانيه و مافيه شارع واضح كان امير هو الي يدلي السواق ويقوله لف يمين امش زياده وهكذا







الى ان وصلنا لنقطة ... وقفنا فيها وامير قال لنا نزلو انتو الان في وسط المجهول in the middle of no where

اول مانفتح الباب كان الهواء بااااااااااااارد وصوت الريح يصفر في المكان و الورود البرية منتشرة على الارض ... مكان قمة في الجمال .. لاتشوفون حد حولكم ولا حد يشوفكم




المشي على الحمم البركانيه شوي صعب




هاي سيارتنا




مشينا ورا امير




وودانا عند هالنبع او البحيرة




وقال لنا هاي هي البحيرة الي قلت لكم عنها ووصيتكم تجيبون معاكم ملابس سباحه عشان تسبحون فيها ..



طبعا بتستغربون ... شلون نتسبح ودرجة الحرارة اقل من 9 درجات يعني بررررد



الكل كان متردد .. يقولون شلون نسبح وشلون نبدل صعبه ..




أي صح نسيت اقول لكم اهم نقطة ... هالنبع هو نبع ساخن يعني البركان يسخنه تحت الارض ويطلع لنا دااااااافئ وحلو نشوف الفقاقيع تطلع منه وشوية ابخرة ..






ماستحملت على طول قعدت عالحشيش وحطيت رجلي سبحان الله حسيت بالدفئ يسرسح على جسمي وقلت لهم حلووووو دافي والكل يطالع الا اخوي ماتعطل فسخ ملابسه ونزل وانا اطالعه وودي انزل وراه بس امير واقف على جبدنا ويصورنا خخ



اشوي الا اشوف امي تروح له .. وتاشر له بيده وتقوله قو قو go go وتاشر على حجابها ووتقول نو نو وترد تاشر وتقول قو قو هالانغليز مايستحون ههههه




فهم امير ان احنا ماقادرين ننزل لانه هو موجود على طول راح وقال للسواق يحرك السيارة وراحو وقفو بعيد ورا الجبل عشان يخلونا ناخذ راحتنا اميه بالاميه



طبعا احنا ماصدقنا و لبسنا لبس السباحه المايو الاسلامي الي تخبرونه مايو الفقمه خخخ وقلنا لاخوي لاتلف صوبنا عطنا ظهرك عشان بنات خالتي ياخذون راحتهم ونزلنا بدون حجابات حتى ومافي طير في المكان بس احنى



المكان جميل يبعث الهدوء والاسترخاء والسعاده في النفس



هاي اخوي مسكين كلش مالف صوبنا



وهاي احنا




تعرفون الاحساس لما يكون الجو باااااااارد وانت في ماي دافي وحواليكم طبيعه تجنن والمكان مافيه غيركم و 100 بالاميه خصوصيه في وسط الطبيعه ... اكيد ماتعرفون الشعور لانكم ماجربتو






السما تجنن




فكرنا نستفيد من التربه البركانيه الي تحتنا و نحط ماسكات في وجوهنا واخوي تحمس قام دهن جسمه كله بالبطين البركاني




اخوي في لحظة تأمل وصمت



يمكن تمينا في البحيرة قريب الساعة ... وعقب قررنا نطلع لان متنا من الجوع السباحه تجوع



لبسنا وتنشفنا بعناء وتكاسل وثقل





الواحد ماوده يتحرك من هالمكان الزين



وركبنا السيارة الا نشوف امير يحليلاته مجهز لنا سندويجات روست بيف اعتقد اسمه لحم مدخن الي من طخة المرتديلا بخبز ايسلندي ومن الجوع حسيت ان هالسنوديجات جدا لذيذه وكلنا منها بشراهه وكنا في البدايه مستحيين نطلب سندويج ثاني لين قال لنا امير اخذو قد ماتبون هاي كله لكم ... وفعلا كله راح في بطنا خخخخ



وقال لنا تبون اصب لكم شامبين ... قلت له احلى يا شامبين ... اسقني من هذا يا غلام ...

لالالا

الحقيقه ضحكنا يوم قال لنا هالكلمه وقلنا له لا شكرا احنا مانشرب كحوليات قال لا شوي بس شربو لاتكثرون ... قلنا له احنا مانشرب بالمره ... قال اكيد هاي نوع طيب ... قلت في قلبي لو شاريلنا ماي احسن وارخص له ولنا ... لكن لما شاف اصرارنا فهم انه ممنوع منع قاطع ومانتغشمر في هالموضوع خخ

وللحديث بقية



احلى من العقد احلى من العقد
ايسلندا ... اجتماع البراكين بالثلوج



ومشت السيارة فينا مره ثانيه في حقل الحمم البركانيه




التربه البركانيه لونها احمر غامج والعشب لما ينبت على الحمم ينبت كأنه سجاده من العشب













وطلعنا من الحمم البركانيه ومشينا في الشارع الرئيسي




وبعد مامشينا فتره من الزمن .. وصلنا لمحطتنا الجديدة .. وتوقفنا امام البحر ...


نزلنا والجو بااااااااااااااااااااااااااااارد


وزع علينا امير لحافات وقال تدفو فيهم وكلنا خذنا لنا لحافات وتلففنا فيهم


وبدأت رحلة اكتشاف المكان


شوفو الطاوله اش حلوها تشجع ان الواحد يحط اكله وياكل



المكان جدا جميل وهااااادئ ككل الاماكن في ايسلند والهوا بارد ..




قال لنا امير امشو سيده وعقب بتشوفون جدول صغير عليه جذوع شجل على شكل جسر اعبرو الجسر وتأملو البحر من ذيج الجهه وبتشوفون حيوانات مختلفه واهم حيوان حاولو تشوفونه هو كلب البحر ..




شوفو البركان بعييد الفوهه من فوق تبين انها بركان


مشينا بنفس الاتجاه الي قال لنا امير عنه



ووصلنا الى الجدول و الجسر المكون من جذوع الشجر


وقتها هلت العبرات وتذكرت المثل القائل عصفورة ووردة و جدول صغير ونسمت الموده من حولنا تطير الحمد لك والشكر لك يا الله (( ماهلت العبرات بس الاحساس كان لايوصف ))




من كثر ما هيضني الجدول او النبع قمت اصوره من كل الاتجاهات






ومازلت مستمره اصور الجدول والجسر وكل شوي اغير الاغنيه الي اسمعها مره فيروز ومره صباح


و عقب ماحسيت اني مسختها من كثر ماصورت الجدول قلت اكمل طريجي لين البحر






خبراء علم الطاقة دايما ينصحون بالجلوس امام البحر او الاستحمام في البحر لانه ياخذ الطاقه السلبيه الي في جسمنا ويعطينا طاقه ايجابيه تبعث فينا الراحه والسعاده


قعدنا على الصخور نتأمل البحر وندور كلب البحر




متلكوتين باللحافات وقاعدين نسولف ونتأمل الدنيا الحلوه


شوي الا شفنا راس كلب البحر وشفنا راس واحد ثاني


شوفو في النص دائرة هاي راس كلب البحر كان كل شوي ينط يطلع ويدخل بس يخاف يقرب منا


حاولو تدققون بشكله .. يشبه الكلب العادي بس املط



هاي صورة لكلب البحر من النت ... ترا ينابح هوهوهوو الدبدوب


و للحديث بقية



احلى من العقد احلى من العقد
ايسلندا ... اجتماع البراكين بالثلوج



اخر شي قلته لكم ان احنا قعدنا ندور كلاب البحر و نسولف ونسمع فيروز على شط البحر ...







مانسمع حولنا غفير صوت الهوا والماي







قررنا العوده الى امير عشان انشوفه اش قاعد يجهزلنا



وصلنا عنده وبطني قام يصوصو الريحه كانت لذييذه



كان قاعد يشوي لنا اكل ويجهز لنا اكل بالطريقة الايسلنديه



عيني قامت تتطاير بين المواعين والطاوله والاكل



اتذكر انه سألني اذا في شي معين ماتحبون تاكلونه .. فقلت له بالايميل ان احنا مانحب السمك وممكن ناكل ربيان او ام الربيان والدجاج واللحم وفقط هاي الي ناكله من اللحوم .. مانحب البيض ونعشق الجبن :)

فكان اول طبق قدمه لنا هو ربيان مشوي ومتبل بطريقة معينه .. لكن الطعم يهبل حلووووو احلى ربيان مشوي كلته بحياتي صج صج صج لذيذ والتتبيله لذيييييييذه



وبينما كنا ناكل الربيان المشوي كان امير يشوي بمساعدة السواق ويجهز باقي الاكل واحنا كلنا فضول نعرف شنو الي بيجهز وتحمسنا نذوق باقي الاكل بالذات من عقب ماذقنا الربيان






يعيني يا ليلي ... كشته جميله كانت



جهز الطبق الثاني .. سندويج لحم خرفان ايسلنديه بالتتبيله والصلصه الايسلنديه المعده منزليا ..




ماتتخيلون شلون اللحم لذييييذ وطري ولين .. وطعم السوس اااه يا طعم السوس والمشروم عذاب من حلاته




بعضنا لاهي ياكل وهو قاعد عالارض والبعض ياكل وهو واقف والبعض واقف مع امير ..



يبيله سندويج ثاني



ودجاج مشوي ... لذييييذ وناااطع ولا يعرف للزفر طريق (( يعني كلش كلش مب زفر ))



وايضا سندويج ثالث مع قطع مقطعه صغيراً من الستيك الطري اللذيذ المغروس باعواد صغيره





بالنسبه لي كان احلى لحم كلته بحياتي ماعمري كلت بطراوته ولذته ... وخلص المالح وجاء الحلو على الطريقة الايسلنديه ... روب بالفواكه بالطريقة الايسلنديه





وايضاً طعمه حلو وخفيف




وبهذا انترست بطونا بألذ الاكلات الايسلنديه اللذيذه والمشويه في الهواء الطلق ... وقعدنا متنحين جدام البحر .. لين جانا امير وقال يالله نكمل رحلتنا عشان نشوف كلشي حسب الخطه ...


وللحديث بقية



يمكنك فتح موضوع جديد للمناقشة او الاستفسار والمشاركة.

احجز الفندق بأعلى خصم:
خصم يصل إلى 25% خصم يصل إلى 25%

Share

ايسلندا ... اجتماع البراكين بالثلوج