السلام عليكم
كيف الحال وأخوان وأخوات
اشكر كل شخص استفدت من تقاريره في هذا المنتدى الرائع
بدون مقدمات ......ذهبت إلى قطر أو بالعامية رحت قطر في تاريخ 22-11-2013م
تقريري راح يكون على شكل أسئلة ويخالطها بعض الدعابة....أن شالله تستفيدون منه
س1 / متى رحت قطر ؟
مكتوب فوق ههه
س2 / السفر كان عن طريق طائرة ولا سيارة ؟
سيارة
س3 / من وين نقطة الأنطلاق ؟
من الدمام إلى قطر
س4 / كيف كان الطريق ؟
من الدمام إلى الأحساء جدا ممتاز ....يوجد ساهر
من الأحساء إلى منفذ سلوى نقدر نقول أنه ممتاز ...لايوجد ساهر ...لكن لاتسرع لأن روحك غاليه
س5 / وين سكنت ؟
في فندق كونكورد الدوحة
س6 / من وين حجزته ؟
من موقع olotel.com
أول مره أسمع فيه... يعني أسعارة زينه وهل موثوق؟
بالنسبة لسعر الفندق اللي كنت ابحث عنه حصلت عنده أفضل سعر وهو 378 لليلة الواحدة بدون فطور لكن كان سعرة في بوكننق حوالي 500 ريال.
الناس تفكر أن بوكنق رخيص لا لا ياحبيبي ... من خبرتي البسيطة لم أجد موقع بوكنق رخيص نهائيا
س7 / طيب ..أجل ماتنصح في موقع بوكنق ؟
أنا أقولك قارن السعر مع مواقع ثانية وفي مواقع تعمل لك مقارنة مع أكثر من موقع مثل hotelcombaiend أو hotel compaire
بالنسبة لي أحب أستخدم هالموقع لمشاهدة الغرف وموقع الفندق وأشياء زي كذا لأن صرحة الموقع جدا مرتب والصور فيه واضحة
س8 / طيب .. ماقلت لنا عن الفندق رايك فيه ..يستاهل السكن ولا فندق فاشل ؟
الصراحة الفندق ممتاز وهو خمس نجوم ..مريح ..هادئ
س9 / اوك... عيوب الفندق ؟
لايوجد به شطاف أكرمكم الله
س10 / طيب بعض الصور لدورات المياة موجود فيها ؟
كلامك صحيح يوجد في بعض السويتات ومش كلها .. أما الغرف مافيها
س11 / الحين هالفندق قريب من مواقع سياحية ؟
نقدر نقول قريب من سوق واقف
س12 / شرايك ب سوق واقف .. والأماكن اللي زرتها ؟
والله السوق وسيع صدر .. تغير جو فيه... أما ألاماكن اللي زرتها هي:
فيلاجيو مول ... مجمع تجاري جميل وفخم
اسباير زون... حديقة جميلة ...المواقف مجانية .... ولكن بالنسبة لي تعتبر عادية لأني متعود على كورنيش الدمام والخبر
كتارا... عبارة عن مطاعم ومقاهي مقابلة للبحر...يستحق الزيارة...لاتنسون محل جباتي وكرك رهيب
لؤلؤة قطر.... موقعه بعيد وهو عبارة عن مقاهي ومحلات تجارية نار يعني غالية ومرسى للسفن..... من وجهة نضري إذا عندك وقت فاضي روح له ... لأني أشوفه عادي....هذي وجهة نضري
س13 / أجل شكلك ماشالله تدل في قطر ؟
لا والله ماأدل ولا شارع... الله يخلي شاشة السيارة هي اللي توصف اللي الطريق أو أحيانا أستخدم الأحداثيات
س14 / كيف وجت قطر ؟
يكفي انها بلد خليجي...مريحة فيها وساعة صدر ....قريبه من القلب...بلد جالس يتطور أكثر
س15 / طيب لو خيروك بين قطر ودبي ؟
بكل تأكيد دبي
س16 / أنت شخبارك ؟
والله تمام ههه
اتمنى غطيت كل الأسألة اللي تدور في بالكم
دعوة في ظهر الغيب تغنيني عن الشكر