1. و العودة 30-10-2013 نوصل الكويت باذن الله الخميس 31-10-2013 ..

بسم الله الرحمن الرحيم
السلام عليكم و رحمة الله و بركاتة

بعد انقطاع طويل عن المنتدى و السفرات بسبب مشاغل الحياة و الدوام :| السفره غصبتني ارجع للتوثيق و الافاده من كثر ما اهيه تسوى ..
الاعداد للسفرة و التفكير فيها و التخطيط كان من زمان .. لكن الجد بدا بشهر اغسطس 2013 .. و تم الحجز الفعلي ب19-8-2013 ..
كان البحث و التركيز بين رحلات رويال كاريبيان .. لسمعتها بين شركات الكروز و جوده خدماتها و ما فكرنا باي شركه ثانيه ..
انحصر البحث بكروزات شهر 10 .. أولا يتوافق مع اجازات كل قروب السفر المكون من 6 .. ثانيا نستفيد من اجازه العيد ال 9 ايام .. ثالثا الناس كلها راجعه من اجازاتها و المدارس باديه فالزحمه اخف و الاسعار افضل .. رابعا الجو داينا بهالوقت حلو ..
الرحلات المتوافقه مع توريخنا كانت
كروز اليونان (مناطق من اليونان و تركيا وممكن كرواتيا )
كروز اوربا (برشلونه .. روما .. فينيسيا .. كابري .. فلورانس .. نيس .. كان )
كروز الكناري (فيجو اسبانيا – لشبونه البرتغال – 3 جزر من الكناري – ماديرا البرتغال – لاكرونيا اسبانيا)
اول وحده اليونان شلناها من اللست لان كل كروزات اليونان كان فيها وقفات بتركيا .. و احنا فينا تشبع من تركيا و نبي نغير ..غير ان كانت 5-6 ايام الكروزات ما تسوا ..
ثاني شي اوربا .. كان في اراء مؤيده لها .. لكن احنا من 4 شهور تقريبا نفس القروب زايرين نفس المناطق و الكروز كان 7 ايام بس ..
اما الكناري .. (اختياري ) .. الكروز 12 ليله .. يعني نحلل الكروز و نعيش التجربه جد فيه 4 ايام متفرقه كلها بالكروز بالبحر .. ثاني شي فيه مناطق يديده ما شفناها من قبل كلنا غير ان ماراح نفكر نروح لها بسفره عاديه مثل جزر الكناري و البرتغال (آآآه و ما أدراك ما البرتغال ) ..
ميزه ثانيه اغرتنا ان الكروز ينطلق من ميناء ساوتامبتون في بريطانيا (نفس المينا اللي مشت منه تايتنك) يعني نقدر نقعد جم يوم بلندن بعد الكروز ..
سوينا التصويت و تم اختيار هذا الكروز و توكلنا على الله ..
بعد مقارنه اسعار شركات الطيران و الاوقات .. اخترنا طيران الخليج .. السعر و الوقت مناسبين جدا ..
الطيران 13-10-2013 الساعه 7 صباحا و نوصل لندن مطار هيثرو 3 العصر و الترانزيت في البحرين اقل من ساعتين ..
سعر التذكره كان 248 دينار .. السعر شوي مرتفع لان فتره عيد و الحجز ما كان وايد مبجر ..
الكروز كان يمشي في 14-10-2013 .. الساعه 4 العصر .. الى السبت 26-10-2013 الخامسه صباحا ..
حجزنا ليله في ساوث امبتون بجانب المينا في فندق سوفتيل .. كان سعر الليله للغرفه 28 دينار كويتي و الحجز كان عن طريق بوكينق ..
و حجزنا 4 ليالي بعد الكروز في فندق راديسون اللي باوكسفورد ستريت بلندن ..

و العودة 30-10-2013 نوصل الكويت باذن الله الخميس 31-10-2013 ..

شيكنا موقع رويال كاريبيان للحجز كان السعر جيد .. لكن حبينا نقارن اذا في عروض في مواقع ثانيه.. باكسبيديا حصلنا سعر افضل لكن شرط يكون الحجز عن طريق بطاقه امريكيه او كنديه ! كلمناهم ماكو فايده ..
حصلنا نفس سعر اكسبيديا في موقع برايس لاين .. افضل بشي حلو عن طريق الموقع الاصلي .. لكن نفس شرط اكسبيديا لازم بطاقه امريكيه او كنديه .. دقينا علينا تلفون و كانوا متعاونين جدا قالولنا اذا حجزتوا عن طريق التلفون راح نعطيكم نفس سعر العرض و نقبل الدفع ببطاقتكم الكويتيه .. ! ممتاز ممتاز .. و اتممنا الحجز عن طريق التلفون .. دقوا عن طريق النت لان على ما خلصنا الحجز بالتلفون خذينا تقريبا ساعتين .. ينقل الاسامي بالضبط و الدفع و التفاصيل و التاكيد و الف هولد .. اشوه كنا متصلين عن طريق النت ..
توزيع رحلتنا كالتالي :

تم تأكيد حجز الطيران من الكويت الى لندن طيران الخليج

تم حجز سياره خاصه من مطار هيثرو الى فندق نوفوتيل ساوثامبتون بعد مقارنه الاسعار بين القطار او باص او سياره استقرينا عالسياره بما ان السعر مناسب و احنا 6 مع جناط وايد و الوصول ليل و غيره ..
عن طريق شركه Rose English Transfer
الطريق من هيثرو الى الفندق (بجانب المينا) تقريبا ساعه و شوي .. كلفتنا السياره (ميني باص مكيف جديد مزود بخدمه واي فاي) 122 باوندز شامل رسوم الكردت كارد و الباركينق ..

تم حجز فندق في لندن للاربع ليالي ما بعد الكروز بفندق Radisson Blu Edwardian و هذي اول مره نجربه ..

ملخص للتكاليف الأوليه :
تذكره الطياره : 248 دينار
سعر الكروز للشخص : 476 دينار
سعر الغرفه بفندق نوفوتيل ساوث هامبتون : 28 دينار الليله .. يعني الشخص 14 دينار
سعر الغرفه بفندق راديسون اربع ليالي بلندن: 354 دينار .. الشخص 177 دينار ..
يعني التكلفه على الشخص : 915 دينار كويتي
و تم الانتظار على نار ليوم السفر ..
نكتفي بهذا القدر كمقدمه للسفره و اخليكم مع بعض الصور للتشويق ..