وصلنا كوالا الظهر تقريبا الساعة 1 بتوقيت ماليزيا
ركبنا الفان
ووصلنا الي سلانقور فندق البراميد
للمرة الثانية اخترناه :
1- لقربه من صن واي لاقون
2- للوناسة والتفرفر والسوق بالمجمع اللي داخل الفندق
حجزنا من بوكينق
من قبلها ب 4 شهور تقريبا
نوع الغرف :
غرفة سوبيريور مزدوجة أو توأم بدون إطلال مع افطار – الغاء مجاني
لا تسألوني عن اسعار للأسف المذكرة اللي كتبت فيها ضايعة
استقبال رائع والدخول سريع
الغرف
الغرف كبيرة نوعا ما
لكن يحتاج الأثاث بنظري الي تحديث
وخصوصا الحمامات عزكم الله
وعلى السريع صلينا ونزلنا المجمع نبحث عن لقمة ( حلال)
اول ما صادفنا هالحلو ( العمة انتي )
سعره بالكويت غالي شوي وهناك تقريبا نص السعر
يا بلاش
واشترينا من عندهم على ما نتفق على مطعم نتغدا ونتعشا فيه بالمرة
واستقرينا على مطعم فش مانهاتن اللذيذ
سمك وربيان وسلمون مشوي واديلو بالخمس
هذا اللهب عشان يحمر الربيان شوي ويذوب الجبن
يا ويلي ويلاه
ودي اكله الصحن الحين
من يوديني هالساعة وينساني اسبوعين ويرد ياخذني مرة ثانية
عذاب عذاب
لذيذ وأسعاره معقولة جدا
وتمشينا بالسوق
وختمناها بايس كريمي حبيب قلبي من ايام تايلند نكهات وطعم ولا ألذ
ياحياتي هالأيد اللي ماسكته
فديتك ياعمري
والحمد لله على النعمة
رجعنا الفندق ننام ونرتاح استعداد لصن واي لاقون في اليوم الثاني من الوصول الي سيلانقور
تابعوني فاصل ونواصل
بس وين التشجيع ؟؟؟؟ زعلانه

(((اليوم الثاني في سيلانقور)))
اصبحنا بحمد الله
نزلنا نتريق وترسنا الكرشة بس على خفيف
انا يعجبني ريوق هالفندق منوع وكثير فيه اشياء تناسب العرب
واللي يقول غير جذيه ياويله مني
وبعدها اتفقنا التجمع بالأستقبال
الساعة 10.30 للذهاب الي صن واي
طبعا الفندق قريب جدا ملاصق للألعاب
نطلع من باب الفندق على ايدي اليمين فيه سلاسلم متحركة للأسفل
هذه هي صن واي لاقون العجيبة
حصلنا التذاكر بسعر حلو :
5رينجنت للكبير
واعتقد الصغير كان 62 او 65 ر
اذا ماخانتي الذاكرة
وهذه بعض اللقطات ما حبيت اكثر عليكم
لأن فيه وايد صور بتقريري لرحلتي الأولي
وبعدها اتفقنا التجمع بالأستقبال
الساعة 10.30 للذهاب الي صن واي
تعجبني هالثريات بالأستقبال
طبعا الفندق قريب جدا ملاصق للألعاب
نطلع من باب الفندق على ايدي اليمين فيه سلالم متحركة للأسفل
هذه هي صن واي لاقون العجيبة
حصلنا التذاكر بسعر حلو :
5رينجنت للكبير
واعتقد الصغير كان 62 او 65
اذا ماخانتي الذاكرة
وهذه بعض اللقطات ما حبيت اكثر عليكم
لأن فيه وايد صور بتقريري لرحلتي الأولي
والبيض حكايه لذيذ
انا طول السنة ما اكل البيض الا بالسفر
لا تحرموني من السفر عشان ما انحرم من البيض يا ناس خ
والبان كيك قصة عشق لا تنتهي مع مربي الكيا ( وهي نوع من انواع جوز الهند )
هذه صورتها اشتريتها من محل الحلويات المشهور عندهم (Bread Histor)
في بينانغ وشفته بعد في jetty point الميناء اللي في لنكاوي
المعجنات عندهم شي ما حصل
بتشوفون الصور لاحقا في جزء لنكاوي
قيمتها 5 رينجنت بس
يا بلاش وطعمها خطير
لقطة واحنا بالحوض لفندق الصن واي لاقون الجميل
متعه وقفنا كلنا تحت هالمظلة ورشنا الماي رش
متعة لا توصف

1. هذا المكتب تحجز منه للسيفتي بوكس

الجسر المعلق متعب للصعود له
ملاحظات مهمه جدا : ( صن واي لاقون)

• انا استأجرت سيفتي بوكس في صن وي يفتح عدة مرات بقيمة 15 ريجنت ويتبرمج مع الساعه اللي بالمعصم ويفتح عن طريقها ( حفظت بها الكاميرا والفلوس وشنطتي بما فيها )

احتفظ بالفاتورة لأن هالقيمة ترجع لي عند تقديم الوصل عند الشباك اللي حجزت منه اللوكر بنهاية اليوم قبل الساعه 7 مساءا
( هذا اكتشفته مكتوب بالوصل او الفاتورة لما رجعت الفندق وراحت علي ال 15 رينجت )

هذا المكتب تحجز منه للسيفتي بوكس

• عند الدخول تدفع تأمين 20 رينجت للساعه اللي بيدك وفي نهاية اليوم لما تسترجعها اما تاخذ ال 20 رينجت اللي دفعتهم او تختار من الهدايا الموجودة عند باب الخروج ( انا اخترت تي شيرت وساعات للعيال حلوين والله )
• استأجرنا تيوب كبير ( القارب ) للاستمتاع بالأحواض طوال اليوم دفعنا 30 رينجت – لما ترجع القارب لهم يرجع نص القيمة لأنها كانت تأمين فاسترجعنا 15 رينجنت ( حلوين وينفعون )

فاحرصوا على الأحتفاظ بالوصل او الورقه اللي يعطونك اياها لاسترجاع هذه المبالغ البسيطة لأنها تنفع لشغلات ثانية وتسد باب مثل ما انقول بالكويتي
طلعنا الساعة 6 سكرنا الباب عنهم لا يتعبون حرام ههه
نحلل فلوسنا
كانت يوم حلو وماشاء الله صار ناس وايد وبعض الألعاب يصير فيها دور طويل
لكن اسمتمعنا
يا حلات فندق ومنتجع الصن واي لاقون المدخل يشرح القلب
رجعنا نغير ونسبح بالفندق استعدادا لقضاء باقي اليوم بالتسوق ومن ثم عشاء لذيذ

وتفرقنا كل يختار ما يحب للعشاء
انا واختي وعيالنا قعدنا في بيتززا هت
فرق بين خدمة الكويت وماليزيا
عندهم برود مو طبيعي عيزنا واحنا ننتظر الطلب
والوجبات صغيرة
ياخي انتو تشوفون نفسكم احجام صغيرة مثل الكتاكيت مو لازم احنا مثلكم
ههه

وسعر الوجبه اغلي من الكويت
وجبتي

وبعد الأكل لك الحمد والشكر على النعمة
تسوقنا
واخر شي حلينا بسينامون

ووقفت اصوره وهو يسويها

يقيسها بالمسطرة وبالملي

اللي ما عجبني ولفت نظري
انه مو لابس قلوفز ( يعني كفوف نايلون)

لما اشتريت العلبه فيها 4 حبات بسعر 13 رينجنت
لقيت فيها شعر ولاعت جبدي
وبدلها لي وما اشتهيت اكل بعد
وزعتها على الشباب
عليهم بالعافية

امس سويت حمله تنظيف قشرة وقوية على كل البيت
وللأسف ما حصلت مذكرتي اللي فيها كل الأسعار والملاحظات
( فص ملح وداب)
فأعذروني بحاول اعصر مخي كثر ما أقدر
بس ها لا يطلع لكم منتج جديد اسمه ((( عصير مخ ))
ان شفتوه بمحلات العصير فحقوق الأنتاج لي انا
بالنسبة لفندق البراميد
Pyrimed Hotel @ Sunway Resort
حجزنا من موقع بوكينق
وكل ما أدخل واحصل سعر اقل احجز جديد واكنسل القديم
( ذكية انا )
هذه الأسعار
غرفة سوبيريور دبل او توأم غير مطله + افطار
بسعر اجمالي 1410 رينجت + 16% خدمة وضريبة
وعليكم الحساب
لمدة 3 ليال
( اسفة ذكرت في بداية الموضوع انهم ليلتين بس فأرجو المعذرة)
من تاريخ 30/8 الي 2/9/2012
وهذه بعض اللقطات للفندق للي ما يعرفونه

الشطاف وما أدراك ما الشطاف
مسأله حياة او موت

وسيفتي بوكس
اول ما نوصل على طول يتم اختيار الرقم السري والفلوس والجوازات
بالحفظ والصون

عدة تالي الليل بعد التعب والرحلات

صالة الفطور

فاكهة الدراقون
اللي ما يذوقها هناك يطوفه نص عمره

واهم شي بالريوق
البيض والاوليت
ياناس والله طعم البيض عندهم لذيذ ومافيه زفرة

لقطة خارجية للفندق من علي الجسر
يسلم راسك يا ( أسد )

بعد ما خلصنا العشاء في البيزا و التسوق على اصوله والمشتريات محمله على الأكتاف
والعيال لهم نصيب الأسد
يمه هذا ويمه نبي هذا ....
وانا مالي الا اقول اخذوا يا نظر عيني
عليكم بالعافية
وادفع وابتسامتي نص نص عند الكاشير من هول الصدمة
عليهم بالعافية
فرصة اكثر المحلات فيها خصومات وعروض
والسفر هذه حلاته ترجع الشنط مليانة وكله بثمنه
انا ام مثالية وحلوة وزينة صح ؟؟؟
اليوم الثالث (( سيلانقور ))
بعد ما أصبحنا بحمد الله وافطرنا
اتفقنا مع تاكسي من الفندق لجولة الي :

• الينابيع الحارة
• شلالات سيلانقور
• الماينز

اخذنا 2 تاكسي عائلي
اجرة الواحد 60 رينجنت
القيمة الأجمالية توزع وتقسم على جميع افراد الرحلة
هذا الحلو ان فيه امور نتشارك فيها تقلل علينا المصرف شوي
المحطة الأولي
الينابيع الحارة
هي مجموعة من الأحواض مليانة مياه حارة طبيعية من جوف الأرض
نار حارة نار
اخبرنا سايق التكاسي انها تعالج بعض الأمراض
وشفنا هناك بشر كثير يتسحبون من هالماي
واللي قاعد ومغطس رويلاته
فيه اطفال يؤجرون عليك طشت ومغرفة
اعتقد كانت ب 5 رينجت واللي يبي يزيد ويحسبها صدقة بارك الله فيه
الأحواض عميقة واللي يروح ومعاه اطفال ينتبه لهم
الله يحفظهم
وهذ الحوض للمساج
فيه احجار تمشي عليها واحلى مساج
بس الماي حار واللي يتحمل هو الشاطر
الجو كان حار نوعا ما لأن الشمس طالعة
والشياب اشكثرهم بنص هدوم
ياخذ ويصب على روحه من الماي الحار
ما شاء الله تبارك الرحمن
كان فيه عايلة سعودية
الأب وعياله اعمارهم 4 5 سنوات
يوقفون بالحوض الصغير عادي ولا كانه ماي حار
ابوهم فرحان فيهم يقول احسن خليهم يتحملون
وزيادة ياخذ ماي ويصب عليهم
الله يحفظهم له صج خوش ناس
اخذنا بهالمكان تقريبا ساعة الا ربع
انصلخنا من الشمس
وتوكلنا على الله الي الشلالات

هذا التاكسي

المحطة الثانية
((( الشلالات )))
بالطريقة بعد الينابيع الحارة
المكان حلو لكن شوي رطب
ويبيله مشي شوي داخل
طبعا انا يقتلني هذا الجو واخاف من شوفه الزواحف بأنواعها
يعني لا يطلع لي سحليه والا بريعصي انتهي
وصلنا الشلال انا وقفت تحت والعيال والأهل قعدوا فوق الشلال
المنظر حلو والماي بارد يرشرش
حرام احد الشباب طاح منه الموبايل والحمد لله الكفر بس اللي راح بالشلال ما قدرنا انطلعه
وشاتريناله لما رجعنا كفر من البراميد
يعني يا جماعة انتبهوا على اغراضكم وانفسكم وخصوصا اذا فيه صغار
المكان شوي يزلق لأنه رطب
وهالحلو كان عند البوابة باستقبال الكل

المكان عبارة عن حديقة كبيرة فيها ناس وايد قاعدين ببداية الحديقة
وفيها مجري للماي عيالهم يبلبطون فيه
خ
هذا كشك للي يبي ماي عصير شبس

والقرود منتشرة

هالطبق كان ينباع هناك
كلش ما يشجع

آآآآآآآآآآآآآآآه ماكو لياق وحر ومشي
اطلعت روحي
ما أحب هالاماكن بس مجبورة اكون مع الاهل بكل مكان
الله لا يفرقنا ويبعد عنا العين
ووصلنا الشلال

ومع السلامة يا حلو و
الي لقاء اخر باذن الله

المحطة الثالة والأخيرة بجولة اليوم الثالث في سيلانقور
(((الماينز )))
هذه المرة الثانية نزوره
انا كان ودي اجرب القارب اللي فيه مصعد
قرأت عنه تقارير كثيرة
اول ما دخلنا مجمع الماينز حجزنا رحلتين
الواوا سبلاش
والرحلة الثانية مدتها ساعة اللي فيها المصعد المائي
الأسعار ارتفعت شوي عن المعام الماضي
لكن كانت ان ما خانتني الذاكرة
ما بين 28 - 35 رينجت
الرحلتين حلوين
وهذه مقتطفات من الجولة

واو شو كبير
((( الورل))
والمنطقة مليانه منه في كل مكان

من يقايش على هاللقطة ؟؟؟

صديقاتنا البطة السودا والبيضا

الرحلتين حلوين انصح فيهم للي معاه صغار
وصار العصر ولازم نرجع الفندق نريح شوي
وعقبها نتغدا ونتعشي بوقت واحد ذبحنا لاجوع بعد هاللفه
واللي ناقصه شي للتسوق هذه هي ليلتنا لأخيره في البراميد
وبعدها سنتجه الى لنكا اوي

بعد الراحة و السباحة وتغيير الملابس
وطلعنا كشخة على سنقه 10
توزعنا كل يختار الأكل اللي على هواه
انا ووحدة من خواتي اخترنا الطربوش
دخنا 10 دوخات على ما لقيناه
اكيد فيه ناس بتعلق على صور الأكل
لكن انا اقول انا انسانة استمتع بتصوير كل صغيرة وكبيرة
واحب تصوير الأكل مخصوص
هذا طلبنا
معكرونة بالجبن
مو حلوة كأنها بلاستيك

فتوش
لذيذ

ربيان مشوي بس شوية يمكن 6 حبات
وايد حلو ومتبل عدل

بالمنيو هذه المفروض زبيدي
بس انا اشك في ذلك
بس كانت لذيذة

فيه بلكونة وقعدة خارجية للمطعم
لكن كلها شباب وشيشة ما ارتحنا نقعد فيها
وهذه اطلاله صن واي لاقونية ليليه

الأسعار بالرينجت :
فتوش 15
سمك مقلي 35
معكرونة الحبن 28
شيش كباب 26
ربيان مشوي 50
شبس 7
سفن اب 5
ماي 5
بيبسي دايت 6
فاتورة مطعم الطربوش 182.00 رينجت بس
خدمة 18.200
المبلغ كامل 200.20 رينجت بس
تقييمي للمطعم 9/10
الأكل لذيذ
الأسعار مناسبة
القعدة مريحة وخصوصا داخل الصالة
الخدمة جيدة
وعلينا بالف عافيه ***