بشرى سارة لكافة اعضاء ورواد منتدى العرب المسافرون حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق arTravelers.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب وقد تم نشر 400,000 ألف موضوع 3,500,000 مليون مشاركة وأكثر من 10,000,000 مليون صورة ما يقرب من 30,000 ألف GB من المرفقات وهي إجمالي محتويات العرب المسافرون للاستفادة منها والتفاعل معها كحق اساسي لكل عضو قام بتأسيس هذا المحتوى على الانترنت العربي بغرض الفائدة.

لمزيد من التفاصيل يمكنكم مراسلتنا من خلال نموذح الاتصال, العرب المسافرون على Facebook



FANDA FANDA
Weekend @ Abu Dhabi
17-12-2014 - 08:35 am

بسم الله الرحمن الرحيم

اليوم بتكلم لكم عن رحلتي السريعه لأبوظبي
الرحله صار لها عدة شهور وما كان في بالي انزل تقرير بس عشان افتتاح البوابه قلت اشاركم فيه عشان جذي بتكون التفاصيل الدقيقه غايبه لاني مااظن راح اتذكر كل شي وراح اكتفي اكثر بالصور
وان شاء الله يعجبكم

التحضيرات والحجوزات

السفره كانت سريعه جدا من حيث التجهيز والتحضير , خططنا لها قبل بليله ويوم ثاني سافرنا
كانت السفره بمناسبة ذكرى زواجنا , وكان زوجي مخطط على سفره نفس العام بس بسبب ارتباطاتنا في العمل كان صعبه انه نحصل اجازة طويله نوعا ما
وبما انه السفره ويك اند فلازم مكان قريب , يعني دوله خليجيه وخيرني زوجي بين الرياض وابوظبي باعتبارهم العاصمتين الخليجيتين الي ما زرتهم وطبعا كان اختاري لابوظبي

الطيران
فتحنا اللاب توب وحجزنا تذكرتين على طيران الخليج الدرجه السياحيه
السفر الثلاثاء تاريخ 2 مايو الساعه 4:25 عصرا
والعوده تاريخ 4 مايو 7:20 مساءا
سعر التذكرتين 140 دينار

السكن

فره سريعه في بوكنج قررنا بعدها نسكن في قصر الامارات , كان عرض مميز الليله في حدود 120 او 140 دينار بس على ما خلصنا حجز التذاكر كانت الغرف خلصت للاسف
صراحة ابوظبي فيها فنادق حلوه وخمس نجوم واسعارها وايد ممتازه مقارنه بدبي , فره ثانيه سريعه في بوكنج وقررنا نحجز في فندق شنغريلا ابوظبي
سعر الليله 85 دينار بدون افطار + %16 ضريبه = 88.5 دينار
السعر لليلتين = 177 دينار تقريبا

كل هالكلام كان الاربعاء في الليل والسفر بكون اليوم الثاني الخميس .... اسرع سفره في حياتي حتى لو بروح الخبر كنت اخطط لها على الاقل قبل اسبوع






المشاركات

ارمـــ ARMANI ـــاني ارمـــ ARMANI ـــاني
Weekend @ Abu Dhabi


ياسلاااام عليك مميزتنا FANDA

عقبال العمر كله يارب وجعل ايامكم افراح وسعادة والله يجمعكم بالخير ولايفرقكم

شكلنا موعدين على تقرير رائع ومتميز كما عودتنا

ويشرفني اني ارد عليك اول واحد وتابعين معاك
وبداية قوية وموفقة

شطحة : وهذا اللي بينا وبينكم جسر وتخططين اسبوع

اخوك : ارمـــ ARMANI ـــاني


FANDA FANDA
Weekend @ Abu Dhabi


يوم الخميس وصلنا اليهال عند امي ورحنا بسيارتنا المطار , وقفنا السياره في مواقف المطار للفترات الطويله وخلصنا اجراءات الدخول للطياره وكالعاده كنااخر ناس وصار تاخير حوالي النص ساعه قبل الاقلاع
الرحله الى ابو ظبي كانت مريحه واستغرقت حوالي الساعه

وهذي الصور واحنا في الجو





وصلنا مطار ابوظبي وكان مطار صغير نوعا بس مرتب , الموظفين الموجودين قليلين وقت وصولنا وهذا سبب زحمه وعطله زياده .

وهذي كم صوره سريعه للمطار




خلصنا الجوازات وخذينا شنطتنا ورحنا عشان ناخذ تاكسي , كان في نوعين تاكسي بالعداد والثاني سعر ثابت ب 40 درهم
زوجي عجبه بو السعر الثابت لانه كانت سيارات اودي و لكزس
ركبنا اللكزس وقلنا له خذنا على فندق شنغريلا

شنغريلا

المسافه من المطار للفندق استغرقت حوالي 20 دقيقه
اول ما وصلنا الفندق كان زحمه وسيد سيارات حتى اني صدعت من كثر الناس , كان في بالي رحله ريلاكس وهدوء بس الضاهر اختيارنا كان خاطئ
بس اول ما تدخل لوبي الفندق كل شي يتغير, هدووووء وريلاكسيشن من اول ما تدخلون , والسيارات الى برى هذي كلها رايحه السوق المتصل بالفندق الي فيه مطاعم وخبركم ليلة اجازه والكل طالع من البيت
اول ما تدخل يستقبلونك الموظفين بابتسامه ورحابة صدر ....( كنت حاطه X كبير على فنادق شغريلا بعد تجربتي في عمان بر الجصه )

اول ما تدخلون يكون في شاب على طول واقف يرحب بيكم بالتمر والقهوه
بعدين استقبلنا شخص من الاستقبال تاكد من وجود الحجز وقال تفضوا معاي .. بدون ما ياخذ الجوازات وبدون ما نوقع اوراق او نملي بيانات
يعني وقفتنا كلها 3 دقايق منها دقيقتين كنا نتقهوى فيها

واحنا نمشي مع الموظف يات صوبنا موظفه ثانيه وهي تبتسم وحامله باقة ورد عطتني اياها وقالت " Happy Anniversary"
صعدنا الغرفه وكانت مزينه بالورد وفي سلة فواكه وكيكه صغيره هديه من الفندق بمناسبة ذكرى زواجنا




الموظف الي صعد معانه الغرفه كان معاه الفورمات للتوقيع وجهاز سحب الفيزا , طلب البزنس كارد من زوجي وعبه البيانات منها وعطاها زوجي للتوقيع
صراحه عجبني اهتمامهم براحة النزلاء


FANDA FANDA
Weekend @ Abu Dhabi


بعد ما حطينا اغراضنا في الغرفه وخلصنا الشيك ان كانت الساعه قريب 10 فقلنا مافي مجال نطلع او نروح مكان ونزلنا نشوف لنا مطعم من مطاعم الفندق نتعشى فيه وطبعا اذا وجد البوفيه العالمي بطل كل ما حواليه بالنسبه لي فاخترنامطعم سفره





بوفيه عالمي ولذيذ جدا فيه اركان مخصصه لكل كوزين , صوب ياباني وصوب صيني وصوب هندي وشرق اوسطي ومغربي وكل شي تتمنونه
غير الحلويات الي تحتار فيها



















قاعة المطعم كانت مليانه عالاخر وغالبيتها من الجاليه الهنديه
سعر العشا طلع علينا لشخصين 487.2 درهم اي ما يعادل 50 دينار

بعد العشا طلعنا من القاعه الي فيها العشا الى برى وكان المسبح والبحر والناس مهيطه وسهرانه والشيش عامله عمايلها في تلوث الجو فصعدنا الغرفه ننام بعد تعب اليوم


ملاحظه: اعذروني عالصوره بس كلها بالاي فون وسريعه عشان جذي مب واضحه , وتصوير الاكل كلش مب صوبي


FANDA FANDA
Weekend @ Abu Dhabi


اول ما صحينا من النوم كان هالفيو في ويهنا







غرفتنا تطل مباشره على مسجد الشيخ زايد الله يرحمه , وكان الموظف الي وصلنا الغرفه قال انه غرفتكم شوي بعيده عن المصعد بعد لانه لفيو احلى !!

حجزنا كان بدون فطور ففكرنا وين نروح , اول شي قلنا ننزل بوفيه الفندق وبعدين قررنا نروح سوق البري المتصل بالفندق لانه قالوا لنا انه فيه مطاعم
الفندق يوفر شتر يوصلكم من والى السوق بس احنا فضلنا نروح مشي عشان نستكشف المنطقه



المسافه حوالي 7 دقايق مشيناها عالبحر لين ما وصلنا وكان يومها هدوووء لانه الجمعه والكل نايم وطلع السوق نصه صاك بس لقينا لنا مكان للريوق وهو









A-S-H-R-A-F A-S-H-R-A-F
Weekend @ Abu Dhabi


تقرير رائع وجميل وصور رائعة جدا

تحياتي لك


Usas Usas
Weekend @ Abu Dhabi


ماشاء الله

بداية طيبة , متابعين


FANDA FANDA
Weekend @ Abu Dhabi


بعد الريوق ردينا الفندق وقضينا الوقت بين البحر والمسبح لوقت صلاة الضهر





اول ما تقعد الموظفين ايبون لكم براد صغير فيه ماي وفوطه مبلوله
الفندق يوفر رحلات لعدة مناطق سياحيه في أبوظبي منها جزيره ياس وحلبة الفورمولا والفراري ومسجد الشيخ زايد بس انه كنت ابي ريلاكس كل ما نعزم نروح مكان واتذكر انه عيالي الله يخليهم مب معاي اهون واقول خل اريح او ارقد لانه لحظات الهدووء نادره جدا في حياتي

الضهر رحنا المارينا مول من اكبر المجمعات في ابوظبي وماشاء الله كان مزحوم عالاخر والغالبيه كانت جاليات عربيه تفرفرنا في المجمع شوي لين ماحسينا بالجوع
وهذي كم لقطه للمجمع



محل Manchester City


كوفي شوبات في نص المول قعداتهم حلوه



قعدنا ندور لنا على مكان للغدى وكل مكان زحمه الفود كورت والمطاعم والي نلقى فيه مكان ما يعجبني المنيو
اخر شي استسلمنا لريحه الكباب ودخلنا


المطعم اكله لذيذ وكميته ممتازه مقارنه بالسعر
طلبنا 2 شوربة عدس وصحن مزات مشكله و جلوكباب مع رز بالزعفران ومرقة باميه مع رز ومع المشروبات كولا وماي وعصير برتقال كل هذا اذا مو غلطانه طلع بحدود 150 درهم
ما لقيت صوره للاكل الا هذي

بعد الغدا تمشينا مره ثانيه في المجمع نهظم الي اكلناه وبعد العصر طلعنا من المول ووجهتنا القريه التراثيه الي المفروض تكون قبال المارينا مول مباشره ورحنا صفينا مع طابور التكاسي عجبني النظام الي عندهم للتاكسي

هذا موقف Tour Bus عن المول وطبعا مع جونا الخليجي الصيفي ابدا ما افكر اركبه بس خذينا منهم لروشور عشان نغش منه اماكن نزوها


وهذا مجسم رملي عند المول يشجع عالقراءه بس ما ادري من مخربه خساره


ركبنا مع التاكسي وقلنا له خذنا القريه التراثيه ويزعم ما فهم وشوي مني مناك يفهم فيه زوجي قال اوكي الا نشوفه يلف بنا يمين ويسار الين ما نزلنا هني





ما ادري شنو يطلع بس كل شي الا القريه التراثيه


revan11 revan11
Weekend @ Abu Dhabi


تقرير رائع
وعسى أيامكم كلها سعاده
يعطيك العافية


FANDA FANDA
Weekend @ Abu Dhabi


بعد المقلب الي خذيناه طلعنا من الجبره الي كنا فيها ووقفنا تاكسي وقال له زوجي القريه التراثيه على طول عرفها بس اه قلت خلاص ما ابي اروح عافك الخاطر
قال على وين ؟؟!! طلعت لبروشور الي خذناه من البج باس وشفت الاماكن القريبه لقيت قصر الامارات قلت يا الله عليه خل نشوفه




الدخول للفندق مجاني تاخذ فيه لفه وممكن تاكل في احد المطاعم الموجوده

وهذا من الداخل اول ما تدخل صوره للشيخ زايد الله يرحمه



حسيت اني في جاليري لافاييت




وعلى قد ما الفندق فخم جدا الا انه لفت نظري الدري الي ينزل للمسبح والبحر كان السجاد مستهلك جدا يبيله تغيير


بس مثل ما قلت ما ياثر نهائي على مستوى فخامة الفندق وتحسفت شوي انه ما لحقنا عالحجز فيه
قبال الفندق ابراج الاتحاد ويمدحونها جدا للسكن



بعد جولة قصر الامارات توجهنا للوجه التاليه وكانت الكورنيش
ورغم انه الكورنيش يمتد مسافه كبيره بس كان مليان عالاخر جاليات عربيه واسيويه رغم انه درجه الحراره كانت عاليه جدا


مشينا شوي وما استحملنا فدخلنا نبرد على نفسنا شوي





يمكنك فتح موضوع جديد للمناقشة او الاستفسار والمشاركة.

احجز الفندق بأعلى خصم:
خصم يصل إلى 25% خصم يصل إلى 25%

Share

Weekend @ Abu Dhabi