وعليكم السلام ورحمة الله وبركاته ..
حياك عزيزتي وطاب حالك يارب ..
من ناحية تقسيم الأيام ممتاز ومريح ومناسب لكم كعايلة ..
منطقة سيلانجور راقية ورايقة وأجمل بداية لرحلتكم , وأفضل وأفخم فندق فيها هو صن واي لاقون
بل هو من أفخم فنادق ماليزيا على الإطلاق ..
بالنسبة لبينانغ الطيران أريح لكم فعلا , وتقدرين تروحين طيران وترجعين باص ومدته 4 ساعات وليس 5 ..
أما الفنادق فالاثنين هي أفخم فنادق بينانغ وهي تابعة لشركة واحدة ( شانغريلا )
وهي على شاطئ واحد ( شاطئ الباتو فرنجي الشهير) ..
الراسا ساينغ 5 نجوم والقولدن ساندس 4 ولكن كلاهما فخم ونظيف ومريح
وشخصيا أفضل السكن في القولدن ساندس لأن إطلالته عالبحر أفضل
أما زيارتك للنكاوي في يوم واحد فأعتبرها مستحيلة وما يمديك ابدا
لو بتروحين بالعبارة مدتها 4 ساعات ( اتجاه واحد ) والعودة كذلك ومتعبة وليست رحلات سياحية وفخمة كما تتوقعين
والطيارة كذلك يبغالها وقت وانتظار في المطار وتعب , ومتى يمديكم تتمشون وتاخذون راحتكم !!!
فأنصحك تلغين الفكرة نهائي ..
وبالنسبة لكوالا ما دمتي تبحثين عن الفخامة والرقي أنصحك بالسكن في الماندرين
صحيح الماريوت فخم ولكن الماندرين اسطوري وأتكلم عن تجربة شخصية قريبة
وتقدرين تشوفين كل تفاصيله في تقريري الخاص عنه الموجود في مواضيعي أسفل المشاركة ..
وبالمناسبة منطقة البرجين ليست بعيدة كثيرا عن شارع العرب وأنا وضحت ذلك بالصور في موضوعي ..
أما عن مكاتب السياحة فالمنتدى يمنع ذكر أسماء المكاتب ووكالات السفر أو التطرق لها بأي شكل
لكن عموما أنصحك عزيزتي بالاعتماد على نفسك والحجز من النت فهو أرخص وأسهل وأسرع ..
أتمنى لك رحلة ممتعة وسعيدة بإذن الله ..
أختك .. شموخ

يالبى قلبك ياشموخ اشكرك على سرعة الرد
فرحتيني بسلانجور لأن فيه احد يذمها واحد يمدحها
وبينانج قررت على جولدن ساندس
باقي كوالالمبور شفت تقريرك واعجبني وايضاً مدحتي فندق ترديرز فما ادري مالأفضل بس اخاف يصيرون بعيد مره عن شارع الوناسة
وبناتي صغار ويتعبون من المشي والله محتارة طيب لو بقارن بين ويستن والماريوت ايهما افضل ولماذا ؟ وهل يوجد فندق قريب منهم وافضل منهم
يهمني حمام السباحة يكون حلو ونظيف لأن بناتي يحبون السباحة الله يحفظهم
ساعدوني فأنا في حيرة من فنادق كوالالمبور
وبالنسبة للنكاوي اكثر شيء عجبني الكهوف احب هذي المغامرات اذا فيه في بينانج مثلها بالله دلوني عليه
واي مكان حلو وعجيب في ماليزيا اذكروه لي ولكم دعوة في ظهر الغيب
من زمان ماسافرت وودي افجر كل الطاقات ههه

اعجبتني فكرة اني ارجع في الباص ايش رأيكم
هل الطريق ممتع وكم مدة التوقف وهل حجز تذاكر الباص سهلة لأني بحجز من هنا الطيران
وهل الطريق امن ؟

يالله احس كلامي كثير ادري بتتحملوني ومشكوري مقدماً
جلست ابحث بالنت ولقيت كوالالمبور مافيه بين الناس اي اتفاق على الفنادق كل واحد يمدح فندق ويتمسك فيه
ايش رايكم بفندق رويال شولان أو الجراند ملينيوم او تريدرز او مندرين او ويستن او الماريوت
تهمني الفخامة والتعامل الراقي وفطور يفتح النفس وموقع ممتاز
في انتظاركم

ياهلا حبيبتي حياك ..
وأبد ياعسل كلامك مو كثير ومعاكي حق تحتارين خصوصا في فنادق كوالا من روعتها
تهمني الفخامة والتعامل الراقي وفطور يفتح النفس وموقع ممتاز
أنصحك بتريدرز وبقوة وراح تدعين لي بإذن الله ..
فخامة , موقع , استقبال وتعامل راقي جدا , بوفيه لذيذ ومنوع , راحة نفسية عجيبة
بالإضافة إلى أجمل إطلالة في كوالا ..
وهو ليس بعيد عن شارع العرب دقائق معدودة وانتي هناك , ودققي زين في صورة تريدرز في موضوعي
وإذا مصممة على شارع العرب أنصحك بالماريوت , فخم وموقعه ممتاز في قلب شارع العرب ..
ومن ناحية المسابح بصراحة الفنادق الفخمة مسابحها نظيفة ورائعة عادة ..
اختيارك في بينانغ جميل ولا تفوتك هناك هضبة بينانغ وبحيرة اير ايتم والتمتع بشاطئ الباتو فرنجي
الأكثر حيوية ونشاط في ماليزيا بأسرها وكذلك شارع الباتو فرنجي , المشي فيه متعة بحد ذاتها
كنت ليليا ( أمتّره ) ذهابا وإيايا
وبالنسبة للعودة بالباص من باب التغيير وتجربة شي جديد والتمتع بالطريق وروعته
خصوصا في باصات ايرولاين الفخمة والطريق آمن جدا وحيوي وجميل لا تخافين حبيبتي ..
ولو فيه أي استفسار عزيزتي كلنا حاضرين للطيبين ..
وأتمنى من الأخوان يشاركون بآراؤهم القيمة عشان ترتاحين أكثر
موفقة حبيبتي بإذن الله ..

ياحبي لك شموخة شكراً لك
عملت بحث وقرأت تقارير لقيت الماريوت سيء قديم اثاثة الفخامة فقط في الاستقبال والممرات وفطوره محدود فأستبعدته وشولان كذلك صغير وبعيد عن شارع العرب وفيه تقاطع سيئ
وملينيوم قديم جداً وتم تحديثه
يتبقى لي ويستن ومندرين وترديرز
فقررت انا اقسم البلد نصفين 4 ايام في ويستن لكي اكون في قلب شارع العرب
ويومين اما في مندرين او تريدرز واحترت بينهما
ياليت تذكرون الفرق بين مندرين وتريدرز من جميع النواحي فخامة وخدمة واثاث والوان وبوفيه فطور وقربهما من حديقة البرجين وسوق سواريا
وهل قراري صائب بالانتقال بين فندقين ؟
قرأت مواضيعك شموخ وجدت انك انبهرتي بالمندرين وارتحتي نفسياً في ترديرز فحيرتني
ولاحظت ان المندرين الوانه اجمل انا بصرية اهتم بالألوان اما تريدرز الوانه باهته طبعاً ليس كل همي الالوان انما الموقع والفخامة والخدمة
وياليت تذكرون لي الاماكن الجميلة في كوالا وفي بينانج كمغامرات واماكن بديعة
ما ابي ارجع ويقولون ليه مازرتي كذا او ليه مارحتي لكذا
خالص حبي لشموخة ولكم جميعاً

والله التريدرز ولا كل الفنادق
أتوقع هو الوحيد اللي مايختلف عليه إثنين
رائع بكل ماتعني الكلمة من معاني
أما الماريوت فعلاً موقع ممتاز ومصنف خمس نجوم
لكنه قديم وأثاثه وديكوراته موديلها قديم

خذي العلم اذا تبين الفخامة والاناقة وفندق يستاهل الف نجمة
خذي فندق ماندرين اورنتال وهو قريب جدا بإمكانكم من خلال
الممشى المكيف تذهبون الى شارع العرب
وكذلك تردرز ممتاز بس انا مجربها اثنينها
المندرين اورنتال افخم وارقى واجمل
بحياتي ما دخلت فندق مثله بالفخامة وحسن
التعامل حسيت اني رجل اعمال صراحه
وفي النهاية هي اراء وانتم اصحاب القرار الاول والاخير

حيرتوني
كريستاله اشكرك على الرد والتفاعل وانتظر منك نصائح عامة اكثر
ابو معاذ اتفق معاك بالرأي نظراً لما قرأت من تعليقات
بس يمكن الستات لهم وجهة نظر لاحظ ان شموخ وكريستاله قالوا تردرز يمكن فيه شيء انثوي نحبه
وانت قلت في الماندرين كنك رجل اعمال فما ادري احترت
طيب هل قراري صائب بالانقال بين فندقين هل الماندرين او تريدرز مختلف بشكل كبير عن ويستن
انتظر الاراء لاني بكرا بحجز لاتخلوني