يا اخوان
استغرب من بعض الاخوه في ترديد هذا السؤال ولا ألوم من يسافر لأول مرة أو ليس عنده خبرة في السفر
لكن عتبي على خبراء تركيا !! خذ معك دولار لا لا خذ يورو ! ولا تدري اصرف ليرة من السعودية احسن لك !!
ليش ليش كل هالحوسه !
ليش اشيل معي كاش واخاطر بنقله من مكان لمكان حتى يصبح هم على قلبي !!
يا أخوان ترانا في عام 2013 م
فيها بطاقات صراف آلي وفيه بطاقات فيزا وماستر وفيه بطاقات إئتمانية بالشحن !
وللحين برضه في ناس تشيل كاش !!
السائح الاوربي لو تنفضة هو واغراضة ما لقيت معه 100 دولار وحنا ربعنا تلاقي محفظته مليانه
وشنطة المدام مليانه ( كنز متحرك ) !! ليه ؟ ليه ؟؟
هذا الي يطمع الناس فيكم
يا جماعة قسم بالله الفرق في التوفير ما يسوى الغثا في نقل الدراهم وهمها
صدقوني ان الفرق بين ما تصرفه من الصرافين هنا ومكينة الصرف الالي في تركيا ليس كبيراً خصوصاً على المبالغ التي تحت 20 الف ريال
ريح راسك من شيل الكاش ومعك بطاقة الصراف خذ المبلغ الي تبي وقت ما تبي ...
خل معاك بطاقتين صراف كل وحده حطها بمكان
بعطيكم مثل حي صار معي شخصياً
وانتم احكموا بعدها تشيلون كاش او لا
تفاجأت بأحد الاخوة قبل اسبوعين في اسطنبول معه 6 الف ليرة تركي جايبها كاش من صراف في الرياض !
سألته كم سعر الصرف قال 2:09
قلت تعال معي دقيقة للصراف وادخلت بطاقتي الراجحي ( الصراف الالي )
وسحبت 1500 ليرة تركي
انحسبت علي في حسابي مبلغ ( 3200 ) ريال سعودي
بسعر صرف بلغ حوالي 2:11 + عمولة 35 ريال للعملية
بينما هو صرف من الرياض 1500 ليرة ب ( 3135 ) ريال
يعني في المبلغ كامل 65 ريال الفرق !!
واذا افترضنا
انك دافع الفنادق من بوكينج ودافع حق التذاكر بالله عليكم كم بتصرفون من 1500 ليره في الرحلة ؟
وهل تستاهل 65 ريال الفرق اني اغامر بحمل الكاش من ديرة لديرة ومن فندق لفندق ؟
تحياتي للجميع