جاكرتا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
عادل السويدي
05-12-2022 - 09:21 pm
السلام عليكم ورحمة الله وبركاته
أحب ان اشكر كل الاخوه على الرد ع الاستفسارات وسعة صدرهم معنا
بيض الله وجيهكم وماقصرتوا
الرحله كانت من 5 جون الي 16 جون .. قصيره نوعا ما بس استمتعت صراحه
الوصول كان الساعه 10 ليلا .. ولكون الوصول متأخر تم حجز فندق FM7 لقربه من المطار
وتم التواصل معهم قبل المجيء بيومين عن طريق حسابهم في تويتر وتم الرد علي وتطميني وفعلا استقبلني موظف بلوحه فيها اسمي واتجهنا للفندق وهي خدمه مجانيه تقدم من قبل الفندق
تشيك ان سريع .. ونوم اسرع
الفندق نظيف والتعامل رائع البوفيه جيد
في الصباح السائق ( فيري ) بالانتظار .. وقد تواصلت معاه عن طريق سائق اخر اللي هو اندي مكاوي ولقيت رقمه بواحد من التقارير

السائق بعد التجربه ممتاز اشتغل بالرياض سنتين ونصف يتكلم عربي ويعرف الجبل كويس
اخذنا ع الجبل مباشرة وكانت زحمه موت مع انه يوم خميس 6 جون .. وكان عندهم اجازه مدري وش حقته لكن وش هالحظ .. وصلنا للجبل الساعه 12 وكنت حاجز في سيروني3 من قبل ولان التشيك ان حوالي الساعه 2 قلت يافيري ياقاهر الدهون ودنا مكان نتكي فيه لين يفرجها ربك
واخذنا ع حديقة الزهور .. شفت تقارير كثيره عنها لكن الواقع غير سبحان الله

جلسنا فيها حوالي 3 ساعات وبعدها توجهنا للفندق وكان الطريق مره زحمه وواقف لكن الاجواء كانت تساعد ان الصدر مايضيق

بعد مافتح الطريق قلت يافيري جوعاان قال عليك برويال الجزيره
وفعلا كان افضل مطعم اكلت فيه خلال الرحله !! كان اوكيه
بعدها اتجهنا لسيروني سوينا تشيك ان وع طول ع الغرفه ونوم
وصحيت الصباح ع منظر وش اقول بس

منظر وهواء منعش يرد الروح .. تقهوينا في البلكونه .. اتجهنا لبوفيه الافطار !
الحمد لله كان فيه بيض ولا كان ماافطرت .. الحمد لله ع النعمه بس اكلهم ماعجبني ابد ابد
انطلقنا لتامان سفاري الساعه 9
الحبيب كان ماخذ وضع الانسداح وش عليه

والاخ كان نايم

مدري وش فيهم حيوانات هاليومين مكسلين .. ولا شكلي جاي بدري
ابو الشباب تأثر بالجو العام وسحبها نومه

صوره من الاعلى في التلفريك

المهم جلسنا فيها لين قبل المغرب .. صراحه ماتنمل ابد ابد .. ممتعه لابعد حد
توجهنا لمطعم ياهلا .. وكان كويس لكن رويال الجزيره لايعلى عليه
بعدها توجهنا للفندق وترييحه في البلكونه وكاسة شاي بعدها نومه اليمه
في صباح اليوم التالي بعد الفطور وعند الساعه 9 اتجهنا لغابات وشلالات شليمبر

صراحه تجربه ممتعه .. ساعتين قضيناها هناك وبعدها التوجه لبحيرة الليدو

شلّة طلع البدر علينا

بعدها كنا بنروح حديقة الشمس الا زحمه والخط مسكر .. قلت اقول يا فيري يابعدهم انت .. ودنا للفندق بس نقضي بقية اليوم بالحديقه والبلكونه .. وكنا تعبانين من الشلالات
ووصلنا الفندق .. تغدينا ومن الارهاق نمت قبل لاتوصل الساعه 7
في الصباح بعد الافطار اتجهنا لمزارع الشاي

بعدها توجهنا الى منطقة البراشوت
وهذي صوره لمسجد التعاون من الاعلى

وهذي وحده طلعت ارجل مني وطارت بالباراشوت .. طبعا متعلقه بواحد بس ولو ارجل
اتهزت صورتي قدام المدام

بعدها اخذنا الاخ فيري الى تشيبوداس او سيبوداس
روعه المكان ولا ينمل .. واخذنا فيه فرشه وجلسنا نتفرج ونتلفت بين هالعالم

وطلعنا منها حوالي الساعه 4 ومرينا حديقة الفراوله ع الطريق

صراحه ماكان فيها شي .. وتقول اللي هناك ان الجو مأثر عليه لكن ماعليه اهم شي حصلت لي عصير
اتجهنا للفندق تكينا ع البلكونه نطلطل ونستمتع بالاجواء .. ونتقهوا وتعشينا نومنا
صحينا ع الساعه 8 وفطور وكان فيه قروب تحت مسوي اكشن ورقص ومسابقات .. اتسلينا فيهم نطل عليهم من فوق .. بعد صلاة الظهر اتجهنا لكوتا بونقا .. منها نشوفه ومنها صديقي يقول سيروا علي .. هو والمدام بتاعته اخذين فله هناك .. ورحنا وتفرجنا ع المجمع وركبنا قارب الجندول ولعبنا شويات .. واتجهنا للاخ الكريم .. بعد الساعه 10 اتجهنا للفندق وكانت اخر ليله لنا في سيروني3
يتبع


التعليقات (9)
عادل السويدي
عادل السويدي
السلام عليكم .. تابع
صحينا الصباح وسوينا تشك اوت من الفندق .. وكان بانتظارنا سائق اخر
اسمه ديدي من باندونق .. من اهل الحته .. واخذنا ع باندونق ع طول
كان سائق ممتاز امين وهادي .. اشتغل في بريده 5 سنوات .. عجبني حيل

وصلنا فندق سينسا ع الساعه 1 وكان ونعم التوصيه .. ممتاز لابعد حد
نظافه وموقع وبوفيه افطار ممتاز
نزلنا تحت نستكشف الاسواق والكوفيات والمطاعم
بعدها ركبنا مع السايق .. واتجهنا لهالمطعم وكانت تمطر بغزاره

كان مطعم رايق جدا وموقعه عجيب .. واكله ممتاز جدا
بعدها توجهنا للفندق للراحه والنوم
وفي الصباح بعد الافطار وحوالي الساعه 9 انطلقنا
البدايه كانت مع كامونج جاجاه اتوقع اسمه زي كذا .. كان حق العاب ومنتزه
دبابات + سيارات + 4 دي وطلعنا .. كانت تجربه ممتعه جدا خاصة الفور دي
طيحوا قلبي حسبي الله عليهم
بعدها قلت له ودنا للبركان .. قال لا في بحريه قريبه لازم اوديكم لها
قلت ياابن الحلال جينا الليدو .. قال بلا ليدو بلاهم .. الليدو مخيسه وغاليه 300 الف
هذي افضل وجديده لها 6 شهور .. طبعا باسلوبه قال هالكلام
توجهنا لهالبحيره وصراحه جازت لي .. صحيح اصغر من الليدو
بس ترتيب .. ومطاعم وكوفيات وتشجير واهتمام بزياده وسعر رمزي للدخول

وكنت ناوي اصور اكشاك الكوفيات والمطاعم بس المطر الغزير خلاني اركض ركض للسياره ..
كني اخذ شاور .. صراحه باندونق لازم تمشي ومعاك مظله شي ضروري ..
المهم كانت بحيره جدا جدا روعه
بعدها اخذنا للبركان وشفناه من الاعلى

بعدها تم التوجه الي ساري آتر

واخذنا غرفه خاصه لمدة ساعه وصراحه احلا استرخاء

بعدها توجهنا الي فالي كافيهوصراحه كان جدا روعه .. لكن ماقدرنا نجلس برا بسبب الامطار
جلسنا فيه مايقارب الساعه ورجعنا للفندق .. ريحنا شوي ونزلنا نسوي هجمه مرتده ع بيتزا هت ..
ونمنا .. صحينا الصباح .. افطرنا .. توجهنا لمحطة القطار ع رحلة الساعه 12 الى جاكرتا
وكنا قاصين التذاكر امس قبل نبدأ جدولنا
رحلة القطار جدا ممتعه ومناظر ع الكيف ., للاسف الكاميرا نسيت اشحنها .. ولاصورت الا بالايباد والصور مو واضحه .. بس انصح فيه وبقوه واشكر اخونا نديم اللي شجعني ارجع عليه
وصلنا لجاكرتا .. اخذنا تاكسي بلوبيرد الى استون مارينا انشول .. لي تحفظات عليه بذكرها بالاخير
سوينا تشيك ان .. طلعنا منقادو سكوير .. لشراء الهدايا والتبضع .. وطلعنا واتجهنا لمطعم الجزيره .. ع امل انه يكون مثل رويال الجزيره بس ماش .. كان كويس لكن رويال غير ( دعايه مجانيه ) هع
اتجهنا للفندق ونومه .. بعد الظهر اخترت فقط عالم البحار من منطقة انشول لانه شي جديد علي .. وكان تجربه ممتعه وافضل شي انه مكيف نيهاهاهاي ياهي حر جاكرتا
بعده طلعنا ع طول لسوق شيمباكا ماس .. وتسوقنا وفرينا فيه فر وتعشينا من ماك .. وطلعنا ع الفندق
نمنا وصحينا الظهر واكلنا وسوينا تشيك اوت .. انتظرنا باللوبي لمدة ساعه بعدها توجهنا للمطار عائدين

عادل السويدي
عادل السويدي
اخيرا في الختام ..
تقييمي للفنادق سيروني3 ممتاز جدا كموقع وخدمات لكن فيهم شوي لكاعه
كنت حاجز سويت غير مطل قبل اوصل لانهم يقولوا مافي ديلوكس مطل متوفره !
لكن بعد الوصول واللي انتم خابرين استجابوا .. وع طول غرفه ديلوكس باطلاله متوفره !!
فندق سينسا .. ممتاز جدا .. هاديء ونظيف وموقع ممتاز !
استون مارينا .. كنت متخوف منه صراحه من كلام بعض الاخوان في المنتديات واساليبهم المخيسه مع العرب
اول ماوصلت .. مكيف الصاله حار ولا يبرد بالعكس ينفخ حار ولااستفدت من الصاله ابد
اتصلت عليهم ووصلوا ولاحلوا المشكله وطالبت انهم ينقلوني قالوا كلها فل
السيفتي بوكس خربان .. قالوا طيب حط جوازاتك وقروشك عندنا ورفضت وعد الحاح شالوه وجابوا واحد غيره
لكنه مو مثبت يعني عادي تجي وتشيله وتمشي
باب الحمام تكرمون قفل ع نفسه ولا يفتح .. جو وفتحوه .. المايكرويف خربان ولايشتغل وصراحه مليت من كثر مااتصل عليهم واشتكي فقلت بالطقاق مابيه
وقت التشيك اوت خفت من حاجه قريتها هنا وصارت مع ولد خالتي نفسها .. سالفة انتم وصختوا اللحاف وبناخذ التأمين كله
طبعا انا كنت حريص مااوسخ شي بس قلت بيلاقون شي عشان يلهفونها بس ابشركم الامور تمام .. لكن مسكين سعودي يسوي تشيك اوت جنبي يحلف يقول والله ماشربت غير مويه ياجماعه .. وهم يسحبون منه 140 الف يقولون الا انت شارب اشياء ثانيه .. عاد مدري الرجال يحلف
تقولون لي اسكن مره ثانيه فيه اقول معصي ولا انصح فيه ابد !
صحيح في ناس كثير جو وتوفقوا فيه لكن برضو ناس كثير تشتكي منه .. فابعد عن الشر وغني لووه ياباشا
السواقين .. ممتازين جدا .. واللي يبي ارقامهم حاضر !
خلال كل تلك الايام امطار وخير ماعدا يوم واحد كان في جاكرتا !
الشعب جدا طيب .. وبشوش !
كلمة هديه لم اسمعها الا في بحيرة الليدو .. وشلالات شليمبر .. والمطار
لكن اسلوبهم بالمطار استفزازي جدا .. اوروبي قدامي ووراي اوروبي اخر بالسرا
ولا قالهم شي وانا نشبوا لي هديه هديه .. ولا يمشيني لين اعطيه .. بالاخير صرت اسفههم وامشي
وكنت حاط يدي ع قلبي لايوقفوني ويستنذلون معاي لكن الحمد لله
التقرير بسيط لان التقارير كثيره والاخوان غطوا الكثير ماقصروا
حبيت اشارككم بشي بسيط من الصور لهالسبب ..
شكرا لكم جميعا

Rami
Rami
الحمد لله على السلامة
خير الكلام ما قل ودل
عندي بعض الاسئلة عن المسافات بين المناطق وخصوصا حول باندونق لان معي كبار بالسن
راح ارجعلك لاتروح بعيد

AL-MosBah
AL-MosBah
تقرير محمل بكل الأشواق وكل الذكريات .. يا سلام عليك .. يا سلام عليك
الحمد لله على السلامة ونورت البوابة بهذه الإطلالة والتقرير الجميل والصور الرائعة ..
ممكن تضع أرقام السائقين هنا بالتقرير طالما تنصح بهما وسوف نضع الأرقام بالقائمة المثبتة بعد ذلك ..
ياريت اسم البحيرة في باندونق !!
شكراً على هذا التقرير والنصائح القيمة .. دمت بخير

سعودي عاشق سفر222
سعودي عاشق سفر222
تقرير شافي ووافي وكافي
لكن لدي سؤال هل زرت البحيره في باندونغ والبركان ومنتزه شياتر في يوم واحد
وماسم البحيره الي في باندونغ
وشكرا لك على هذا التقرير الرائع الذي يستحق أن يقال فيه خير الكلام ماقل ودل

طارق2004
طارق2004
الحمد لله على سلامتك وصدق اللي قال خير الكلام ما قل ودل ,,, تقرير خفيف لطيف مفيد جداً حتى للخبراء في الديرة )
بسألك زي ما سألوك الشباب وش اسم البحيرة اللي في باندونق !!!
انا كنت هناك في الحج الماضي ولا سمعت عنها شيء ,,, اكيد سووها بعد ما رحت خ
تسلم حبيب قلبي على هالمجهود

! تعبكـ راحه !
! تعبكـ راحه !
تقرير سريع ومختصر وتستاهل الشكر عليه
والمهم انك انبسطت

أول عالمي
أول عالمي
تقرير جميل ومختصر وخفيف بس ياليت تعطينا اسم البحيرة في باندونق
وفقك الله

عاشق الرياض11
عاشق الرياض11
تقرير يعطيك الزبده
استون مارينا كثر حوله الكلام ولو نعمل لهم مقاطعه يكون أفضل حتى يعرفون كيف يستلكعون


خصم يصل إلى 25%