1. 2- بالنسبة للسكن نصحوني بفريزر انسادونغ واكوود كوكس و سم ريست

السلام عليكم ورحمة الله وبركاته
يمكن العنوان تكرر كثير بس الناس تختلف باحتياجاتها
ابيكم تساعدوني الله يجزاكم الجنه خصوصا اني مخططه اسافر ولاول مره لدوله مش عربيه
اول شي بعطيكم معلومات بسيطه عشان من خلالها تساعدوني وانا ادري انكم مب مقصرين عشان كذا جيت هنا
اول شي حنا عددنا 6 كثير ادري بس الظروف اجبرتنا
ثاني شي حنا مانبي متاحف وقصور واشياء تاريخيه يعني مانستهويها بشكل عام
ودنا بالترفيه والتسوق اكثر شي
المخطط نجلس 14 يوم ان شاء الله
والفترة بتكون ب اغسطس باذن الله
مع اني قريت انه بيصير زحمه ومدري ايش ؟
ودي اجرب المترو بس محتارة اخاف اضيع ويصير زحمة خصوصا أمي تتوتر من هالشيئين ,
ف اكبر احتمال اننا بناخذ تاكسي ويكون جامبو
ببدأ باستفساراتي وتراني لفيت المنتدى كله عشان استفيد احسكم بتصفقوني وتقولون معيودة الاستفسارات , المهم ابي اجابات شافيه انا من النوع المتردد شوي وانا اللي بنضم الرحله ولاول مره < مب وجه مسوؤليه
1_ ابي اعرف الفيزا مسبقة الدفع تنفع هناك ؟ ولا عادي بطاقتي الصراف ؟ وكيف بصرف او من وين هناك طبعاً ؟

2- بالنسبة للسكن نصحوني بفريزر انسادونغ واكوود كوكس و سم ريست

بس لما دخلت البوكينغ مالقيت اوكوود كوكس , وسم ريست مايدعم شقه اما فريزر مالقيت الا يكفي اربع بالغين واذا بتجيبين اشخاص زيادة الواحد باليوم يطلع تقريبا ب200 وشي يعني الثنين زيادة بيصيرون حوالي 500 باليوم أحس غالي شوي وانا بالغالب ابي شي مريح ومرتب ونظيف وقريب للاماكن وسعره حلو لان للنوم بس
لقيت بالهوم واي شقه بقنقنام تجنن صراحه وتكفي 6 اشخاص وزيادة وصورها مره مرتبه بس مدري محتاره عشانها بقنقنام لان ودي بميونغدون ؟ واذا طلعت لجيجو وش افضل فندق وسعره حلو ممكن احجز فيه وين القاه؟ ساعدوني تكفون
3- الاماكن السياحيه الحلوه يعني بين ترفيه وتسوق وسعة صدر بعيد عن المتاحف والتاريخ ودي ترتبونها لي بجدول لا في سيؤول ولا بجيجو ؟ بثره ادري
4- التكاسي كم تكلف تقريبا بالمشاوير الخاصه الجامبو ؟ ولو اضطريت للمترو وش طريقته وكيف اعرف ومن وين اقص تذاكره؟
5- ودي بمرشد سياحي يتكلم عربي ويفيدنا بس مدري كم بيكلف ؟ ومن وين ممكن احجز ؟ عادي ممكن نستغني عن التكاسي لو خذنا مرشد سياحي ونصير نستخدم الباصات والمترو شرايكم ؟ صح افضل سياره خاصه بس قلت لبابا ياخذ رخصه دوليه ورفض خايف نضيع وكذا يقول بروح اتمشى مب اضيّع غير كذا ادري فيه جي بي اس وكذا بس لازم احداثيات وخرابيط ماش الفكره مرفوضه
6- لو بغيت مثلا ً اروح لمكان امي وابوي مايبون يروحون له معانا وش ترشحون لهم يمكن يعجبهم ؟بحيث حنا نروح لمكان وهم مكان يستهوونه ؟
7- طبعا كم مره جربت اشوف حجوزات الطيران يطلع عندنا التاريخ 6 اغسطس والوصول هناك بيصير في 7 اغسطس عشان فارق التوقيت وش وضعي بالحجوزات ؟ *وليت احد يفهمني شسالفة الساعه 16:30 ؟*
8- كم تقديركم للميزانية لستة اشخاص باسبوعين ؟
9- فيه بعض الفنادق يكتبون ان فيه نقل مكوكية مجاني لشارع التسوق ميونغدون كل ساعه مافهمت وش السالفه ؟ المهم حسيته شي حلو
اتمنى تدعمون الاجوبه بروابط ممكن تفيدني للحجوزات والله يجزاكم الجنه
طبعا مخططه من الآن اكتب كل الاماكن اللي بترشحونها لي واطلعها من قوقل باسمها الكوري واسجلها واضبط وضعي من هنا لان معي عائله ومابي ابلش هناك
لو خطرلي اي استفسار ان شاء الله بكتبه كنت محتاره مره يوم جيت اكتب استفساراتي الظاهر طار نصها
ادري بربرتي شكثرها بس والله ماتحصلون مني الا الدعاء