بريطانيا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
عاشق شواطي
14-12-2022 - 07:03 pm
  1. الخطوات و المستندات المطلوبة :

  2. 5- لايطلب أي حجوزات لا فنادق ولا طيران ولا تأمين صحي ولا شي.

  3. 6- الجواز تسلمه لهم.


السلام عليكم ورحمة الله وبركاته ..
مثل ماستفدت من المنتدى بجهود أعضاءه .. احب افيد اعضاءه بأهم المعلومات الدقيقه والهامة الي جمعتها خلال شهرين وانا احضر لسفرتي بشهر 7 هجري القادم خصوصا للي أول مره يفكر يسافر للندن مثلي طبعا ..
كثير مننا أول مايفكر يسافر لاي جهة مثلا لندن لأول مره تجيه أسئلة كثيرة واستفسارات .. أولها وأهمها التكاليف واخرها طريقة الحصول على التأشيرة لانه اذا قدرنا على التكاليف كل شي يهون صح
بستعرض معكم بهالتقرير هنا اجراءات الحصول على التأشيرة ومتطلباتها - ارخص تذاكر للطيران - تكاليف المعيشة للرحلة كاملة وتشمل : تكاليف الفندق - طريقة التنقل وتكاليفه - اسعار التذاكر السياحية - واسعار المأكولات - واخرها واهمها المناطق السياحية بلندن .
اسمع واحد يقولي عطني قيمة التكاليف كم تكلفني بالاجمال بسرعه بعدين عرج على التأشيرة
شف غير الفندق والتذاكر .. خصص لك من 700 ريال الى 1200 ريال شاملة معيشة و مواصلات وتذاكر الدخوليات ومطاعم وكل شي : بستثناء مشتروات البضائع من الاسواق والهدايا..
^^ احس هالمعلومة المختصرة تمهد لاكمال النية للسفر
نجي أول جزء :
التأشيرة
اول استفسار يراود الكل كم يصير بالرصيد من مبلغ حتى لما اقدم كشف الحساب يقبلون تأشيرتي ..
شف انا حطيت 20 الف ريال .. لكن ..
لما سألت الموظفة قلت كم يحتاج اقل مبلغ يتوفر بالحساب حتى يقبلون يصدرون لي تأشيرة .. قالت : بفيزا السياحة لايشترط توفر مبلغ محدد ولا ينظرون له .. الي يشترط رصيد ويشوفونه هي رحلة الدراسة .. اوك ..

الخطوات و المستندات المطلوبة :

تروح تحت المكتب حق التأشيرات بالرياض تلقى مكتب يسوي لك الاجراءات بالنت وهي تعبئة الابلكيشن وحجز موعد للبصمة ودفع الرسوم لكل طلب .. ويطبع لك الابلكيشن و ورقة الموعد يعطيك اياه عشان تاخذه معك للسفارة ترفقه مع المستندات الباقيه ( بذكرها الحين ).
اتذكر الشخص ب 150 ريال اتعاب المكتب / 450 او 500 ريال قيمة التاشيرة لكل شخص تدفع عن طريق النت للسفارة عن طريق بطاقة الفيزا او الي معه بطاقة صراف تقبل تدفع بالنت .. مثل بطاقة صراف بنك الانماء .
المستندات :
1- كشف حساب 6 أشهر بالانجليزي
2- تعريف من العمل بالانجليزي
3- تاخذ الابلكيشن وورقة الموعد الي طبعها لك المكتب.
4- صورتين ملونه لكل شخص ( حسب مواصفات السفارة البريطانية ) لما تروح للاستديو تقوله ابي للفيزا البريطانية وهو بيعرف المواصفات المطلوبة .. واهمها انه راسك مكشوف بدون شماغ او قبعه.

5- لايطلب أي حجوزات لا فنادق ولا طيران ولا تأمين صحي ولا شي.

6- الجواز تسلمه لهم.

وتروح لموعدك بالتحديد .. تعطيهم ورقة الموعد ويعطيك رقم .. ولما تدخل تعطي الموظفة الابلكيشن وباقي المستندات والجواز ويمكن تعطيك ورقة استبيان تعبيها .. ثم ينادونك للتبصيم .. وبتقولك تدفع مبلغ 250 اضن لكل تاشيرة حتى تسرع الاجراءات قل لا .. انا حقتي قدمتها الشهر الماضي قعدت يومين وطلعت ، وبتقولك تدفع 8 ريال رسوم تجيك رسالة ع الجوال اذا طلعت التاشيرة .. انت حر بس بصراحة انا اخذتها ولا استفدت منها لاني شيكت بالنت العصر حصلته طالعه ولما رحت اخذتها وكل شي جتني الرسالة متاخره ...أوك ..
الجزء الثاني
الطيران :
الطيران .. يفضل تحجز قبل موعد سفرك ب 3 او 4 اشهر ..
انا حجزت على طيران الخليج لشخصين 4650 ريال .. وطيران الخليج يعتبر تذاكره مخفضه جدا .. وفيه ناس تحجز على السعودية تحصل شي مخنفض وفيه من يحجز على التركية والهولندية والبريطانية كلها اسعار كويسة .
الجزء الثالث
اسعار الفنادق :
عندك موقع بوكنق ممتاز
الفنادق لاربع نجوم ونظيفة وبوسط المدينة عند النهر وقريبة للاماكن السياحية مثل البق بن ولندن آي وبالصيف تتراوح الاسعار لست ليالي وسبع ايام باجازة الصيف ..
مابين 4000 ريال الى 7700 ريال.. واكثر بس انا ادرج لكم الاسعار المعقولة ولو تبغون ندرج لكم اسماء فنادق ماعندنا مانع بالرغم ان الاخوان ماقصروا ادرجوا بمواضيعهم افضل الفنادق ..
انا سفرتي بشهر 7 بالصيف القادم بعد شهرين تقريبا .
حجزت ب novotel blackaffrairs 4 نجوم ست ليالي ب : 1010 باوند .. يعادل 5700 ريال وكسور.
فيه معلومة مهمة / العملة وش اسمها وكم تعادل بالريال السعودي ..
هي الجنية الاسترليني .. وتسمى باوند .
تعادل مابين 6 ريال الى 5.70 ريال ( اذا انخفضت ، لانه كل العملات باستثناء الدولار ترتفع وتنزل امام الريال) .
حاليا هالايام تعتبر منخفضة تعادل 5.70 ريال .. وسمعت كثير يقولون بالصيف يزود الاقبال عليها وترتفع الى 6 واكثر ممكن.
لي تكمله باسعار التذاكر السياحية وطريقة شرائها والتنقلات وكل شي وفيه اشياء كثير بذكرها ينقصني معلومات عنها راح طلب من ذوي الخبرة يعطينا افادة بها ... يجهزون انفسهم.
اتمنى ان يحتوي تقريري معلومات تهم كل شخص راغب بالسفر خصوصا مع اقتراب الصيف..
تحياتي ،،


التعليقات (9)
عاشق شواطي
عاشق شواطي
  1. طريقة وتكاليف التنقلات والمواصلات

  2. 13- متحف صدق او لاتصدق ( ماعرف كم التذكرة ).

  3. 14- نايتس برج ستريت : شارع محلات ارقى الماركات.

  4. الجزء السادس

  5. المأكولات

  6. اما السوبر ماركت اسعاره تقريبا مثل السعودية والخليج.

  7. بخصوص استرجاع الضريبة :


الجزء الرابع

طريقة وتكاليف التنقلات والمواصلات

.
اشهر وسيلة تنقل هي المترو .. وفيه الباصات .. واخيرا التاكسي وهو الاغلى .. يمكن يوديك من المطار للفندق مايقارب 500 ريال. واذا بغيت تاخذ تاكسي من المطار للفندق تقدر تحجز سيارة تجي توصلك عن طريق شركات التاكسي ويكون اسعارهم اقل من التكاسي الواقفة عند المطار .. وتقدر تستخدم المترو من المطار لاقرب محطة جنب الفندق حقك.
المترو
فيه موضوع مثبت عن طريقة استخدامه ، لانه هو زي المحطات والخطوط المتقاطعة .. تمسك خط مثلا اصفر ثم توصل عند نقطة تقاطع مع الخط الرمادي تنزل بها وتركب مترو الخط الرمادي وهكذا لين توصل المحطة المراده.
وفيه خرائط مجانية توزع بكل محطة
وبخصوص تذاكره : تاخذ كارد تسمى اويستر .. تقدر تشحنها بالمشوار - وفيه حق يوم كامل - وفيه اسبوع..
بالمشوار تدفع بقيمة المشوار مثلا بتروح لاي مكان يعطيك التكلفة 5 باوند مثلا وتدفعها ( الي عنده تفصيل يذكره لنا )
وفيه باليوم تشحنه حق يوم تستخدمه للمترو والباص وين ماتروح
وفيه حق اسبوع بقيمة 34 باوند اعتقد ( ياليت الي جاء من لندن قريب يأكد لنا السعر) حق اسبوع تستخدم المترو والباص ع كيفك داخل منطقة زون 1&2 .. وهو افضل طريقة.
زون 1&2 يعني منطقة 1 و 2 تحصلها بالخريطة .. وهالمنطقتين تقع بها اغلب الاماكن السياحية
بشرح للي مايعرفها واول مره يسمع بها.
لو افترضنا ان زون 1 : تغطي ط الملك عبدالله والعليا العام والتخصصي ، زون2 تغطي الاطراف الابعد مثل حي الغدير وحي الشفا وحي الربوة.. .. عاد زون 3 ابعد تغطي الثمامة وطريق القصيم والجنادرية.
زي النطاق الدائري .. اوك
والي عنده اضافة بالمواصلات لا يبخل علينا.
الجزء الخامس
الاماكن السياحية وقيمة التذاكر للدخوليات
1- لندن آي ( عين لندن ) .. تطل على النهر امام (الساعه المشهورة البق بن) .. هذي لها تذكرة تشتريها اعتقد قيمتها تتراوح مابين 19 الى 22 باوند.
2- الهايد بارك - مجانية
3- حدائق كنغستون - قرين بارك - الريجنت بارك " بها حديقة الزهور" . ( ياليت احد يفيدنا هل هي مجانية او بتذكرة )
4- حديقة الحيوانات فيه ثنتين : لندن زوو - وسفاري بارك = اسعار تذاكرهم مابين 20 - 19 باوند للشخص ( بس تحتاج تستاجر سيارة تدخل بها يمكن تكلفك الى 150 باوند ).
5- قصر باكنغهام : استعراض تبديل الحرس الصباح ( اعتقد مجاني ، ياليت اكد يأكد لنا مجاني او بتذكرة ).
6-الباص السياحي : يلف بك اشهر الاماكن المشهورة والسياحية بلندن وخوذوا الرد لاين - واركبوا فوق مفتوح .. ( تذكرته اضن لاتتجاوز 30-22 باوند)
7- متحف الشمع : تذكرته لاتتجازو 20 باوند ( اكد يأكد لنا بالدقه بكم )
8- وفيه قوارب بالنهر اخر مره شفت بالكتيب الاسعار لا تتجاوز 20 باوند للشخص ، وفيه قارب كبير عشاء ولمدة 3 ساعات بالنهر الشخص 450 ريال تقريبا.
9- فيه متجز الهارودز : من اشهر المتاجر ومعروفه جدا .. وهو لما تشتري منه بضائع تقدر تسترد قيمة الضريبة الي دفعتها بمشترياتك " كاش" بالمطار .. ( بشرح لكم استرداد الضرائب بالاخير).
10- فيه مول الويست فيلد
11- فيه قرية البستر فيلج : هذي قرية اولت لت .. كلها محلات ماركات وتبيع البضائع باسعار مخفضة .. وتبعد عن لندن ساعه تروح لها اما بالمترو او بالتاكسي .. ( ونطلب احد يعطينا شرح وافي لانه يهم الحريم ههه ).
12- شارع اكسفورد : كله محلات ومتاجر ماركات ( قريب من الهايد بارك ).

13- متحف صدق او لاتصدق ( ماعرف كم التذكرة ).

14- نايتس برج ستريت : شارع محلات ارقى الماركات.

15- ميدان البيكاديلي : ميدان حلو يكثر فيه السياح والمطاعم وخصوصا بالويكند واخر الليل لاتقربونه يكثر به السكارى .. بس مادري الى كم الساعه الليل الواحد يغادر المكان .. بس مره اخذت كتاب من السفارة اكثر المحلات تسكر 7 او 8 الليل اقصى شي.
16- لستر سكوير : ميدان حلو مطاعم ومحلات وكافيهات حسب علمي وحلو.
والحي الصيني .. وانت تمشي بالشارع محلات واشياء تحس كانك بالصين حلو بعد ..
17- الاجوارود : شارع العرب كله مطاعم عربية وهندية وايرانية ومحلات بها اشياء تهم العرب.
لو تلاحظون اكثر التذاكر مابين 19-22 باوند : قيمتها بالريال 20*6 = 120 ريال تقريبا.... قدرت ان 1 باوند = 6 ريال. ( حسبه بسيطة).
هذا ماعندي .. نطلب من الغير يفيدوننا اكثر من ماعندهم..

الجزء السادس

المأكولات

هذا الجزء ثري جدا وفيه مواضيع كثيره حطوها الاعضاء زي الدليل به اسماء المطاعم واعتقد اسعارها .. لكن راح نحاول نحط لكم بعض اسعار الوجبات. وياليت كل من جرب وجبة او مطعم ويتذكر سعرها تقريبا كم يدرجه لنا .. حتى الكل يصير عنده تصور شامل لمستوى الاسعار للوجبات والمطاعم.
اتذكر مره قريت .. اضن اسعار مطاعم الهارودز .. البيتزا يعادل 90 ريال .. العصير 30 ريال .. وواحد كد قالي تاكل وجبة مثلا بمطعم صيني يكلفك 35 باوند. يقول متوسط المطاعم يكلفك مابين 30 الى 40 باوند للشخص. واكيد الشركات ارخص شوي.

اما السوبر ماركت اسعاره تقريبا مثل السعودية والخليج.

بخصوص استرجاع الضريبة :

لما تشتري من محل ملابس مثلا يعطيك ابلكيشن تعبيه و تحتفظ بالايصال الفواتير والملابس ماتكون مستخدمة تبقى بقراطيسها جديدة .. ولما تجي المطار تحضر معك البضاعة توريهم اياه مع فاتورتها ويخصمون لما قيمة الضريبة ويعطونك اياه كاش .. اذا قالوا تبي نرجعها لك ع بطاقة الفيزا قل لا .. كاش افضل لانه بالفيزا احيانا تتاخر ..
طبعا فيه محلات ماتدعم هالشي يعني فاتورتها ماتسترجع عليها ضريبة .. ع المحل من برى تشوف شعار ازرق او اي شركة حقت free tax
طبعا لما توصل المطار تروح لكاونتر يختم لك على ورقة الابلكيشن الي اخذته من المحل والفاتورة.. ثم يوجهك لمكتب حق الضرائب وتعطيهم الابلكيشن والفاتورة ويشوفون البضاعة ( ماتكون استخدمت) ، وانتبه لاتحط البضاعة مع العفش الي بيشحن قبل ماتوديه معك للمكتب حق الضرائب لانه لو ماشافوا البضاعة نفسها بيقولون لك لا.. ثم تاخذ فلوسك.
واهم نقطة لاتقل مشترياتك بنفس اليوم من نفس المحل عن 30 باوند.
( هذا الكلام قريته من نفس الموقع حق شركة استعادة الضرائب). كد احد الاعضاء مشكور حط الموقع ولو حصلته بدرجه لكم .
وشكرا لكم .. وان شاء الله نواصل لو فيه اي معلومات استجدت..

فارس الجبيل
فارس الجبيل
ما اقول الا ماشاء الله عليك الله يجزاك خير على هالمعلومات الغنية
شكرا لك عاشق الشواطئ وجعلها الله في ميزان حسناتك

عاشق شواطي
عاشق شواطي
يعطيك العافيه اخوي فارس
وهذا ماستفدناه منك ومن البقية
وشكرا لتشرفيك الموضوع

عاشق شواطي
عاشق شواطي
بخصوص السينما بمتحف الشمع ( مدام تاسو )
سينما 4d
بس ماعرف كم تذكرة
وفيه ساحة التلغراف شبيهه بالبيكاديلي ممتازه .. نسيت اضيفها

عاشق شواطي
عاشق شواطي
وقت تبديل الحرس بالقصر الملكي 11 ص
خلفه الحدائق ممكن لخلصت تروح لها
قبل ماتسافر رح لمكتب التاشيرات حق السفارة وخذ منه كتيب دليل عن فعاليات الشهر وبه خصومات لما تحضر الاعلان معك
قص تذاكر الاماكن السياحية ممكن وافضل عن طريق النت تتجنب الوقوف
وحتى مكتب السفارة يبيع تذاكر وبطاقة اويستر بس مادري لو ارخص او اغلى
الهارودز به شكولاته روعه بس انتبه للي بها كحول او خنازير قل للموظف ابي حلال لمسلم ويعطيك .. يقولون الي تلمع بها كحول .
وباي مطعم او اكل اسال لو به خنازير او مشروب مثل عصير به كحول .. الحذر واجب

عاشق شواطي
عاشق شواطي
الريجنت ستريت
شارع حلو وفيه مطاعم وكافيهات ومحلا تجارية يستحق الزيارة

عبدالله86
عبدالله86
الله يعطيك العافية اخوي
موضوعك جدا ممتاز وفيه معلومات يحتاجها المسافر

ابوسيمو
ابوسيمو
موضوع وافي .. بارك الله فيك

Majdoleen
Majdoleen
الله يعطيك العافية ويجزاك خير
من جد ماقصرت
عطيتنا المختصر المفيد بطريقة سلسة ورائعة
بصراحة أنا خاطري أزور لندن..بس دايم أسمع انها غالية ومكلفة
بس بعد هالتقرير راح أتشجع ان شاء الله
مشكور


خصم يصل إلى 25%