سوريا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
(((وسيم العرب)))
15-12-2022 - 07:04 pm
بصراحة الواحد محتار
يكتب لغة عربية فصحى
ولا يحكي شامي
مع أنه وقت بحب أكتب شي من قلبي بحب أحكي شامي
وقت تقول دمشق تلتصق بذهنك العراقة والتاريخ والأصالة
بس وقت تقول عن دمشق
((( الشام)))
يعني أنت من أهل الشام حصرا
وقت تقول الشام طبيعي لازم تكون بتعرف شجرة النارنج واللي ما بيعرف شجرة النارنج بيكون من الجيل الجديد شورأيكم نقول الجيل الجديد ولا نقول الفئس الجديد
وقت تقول الشام لازم تعرف شو يعني الوردة الجورية
ولازم تعرف شو يعني الياسمين الياسمينة نبتة بتفتح ورد ابيض بيكفي تكون ريحته عطر للعطور
وشمته نشوة للقلوب الياسمين الشامي بينزرع في أكتر من مكان صح ؟
بينزرع داخل البيوت الشامية
وبينزرع على سور البنايات وكلمة بناية (( عمارة )) كمان كلمة شامية
بينزرع كمان بدفاتر الصبايا بكتبهن
بينزرع بمناديل العشاق
وبينزرع بجيبة القميص الأبيضcache/62897a4308.jpeg
وقت تقول الشام لازم تعرف نهر بردى واخوات نهر بردى
نهر تورا / نهر الديراني / نهر بانياس / نهر االقنوات / نهر يزيد / نهر المزاوي / نهرالعقرباني
بالمناسبة أنا سابح بنهر بردى وسابح بنهر يزيد
ونهر يزيد بيمر من داخل بيت جدي يلي بالعفيف
مع أنه أغلب هذا الجيل يمكن ما بيعرف غير نهر بردى وبيعرف أنه يتفرع لسبعة فروع
وقت تقول الشام لازم تعرف شو يعني حبلاس / شجرة الحبلاس /وقت تقول الشام لازم تكون بتعرف غنية وديع الصافي
يلي بتقول : يا توت الشام يا شامي يا شامي سلم ع السمرا اللي ع خدا شامة
يعني لازم تعرف شو يعني التوت الشامي يعني ممنوع قميص أبيض وتقول بدي قطف توت شامي
يعني بدك تستغني عن كم بقعة ينصبغ فيها القميص
يعني كفوفك واصابيعك لازم تدوق التوت الشامي قبلك
وقت تقول الشام لازم تعرف شو يعني كلمة العوجا وكيف الملح ترافق مع العوجا وكيف العوجا بتجي قبل الجارنك
صح كلمة الجارنك ؟؟
العوجا والجارنك أكثر من مكان محبب الأكل معهم
بتتاكل العوجا أول شي عالماشي وطيابيتها وأنت بطريق الصالحية
ولو أشتريت كيلوا عوجا للبيت ضروري ضروري تقول لبياع العوجا حطلي شي وقية لحالها على جنب ورشلي عليها شوية ملح لأنه لو أشتريت بس كيلوا للبيت مو مضمون يوصل الكيلوا كيلوا
والعوجا بتتاكل كمان بالسيارة عالماشي
حتى سواق التاكسي بيقرب جنب بياع العوجا وبيطلع نصه من الشباك وينك يا أبو الشباب حطلك وقية عوجا وكتر الملحات
والعوجا بتتاكل بالسهرة بالجمعة بجمعة العيلة على التلفزيون وأكيد مو ضروري تكون بصحن واحد قدام الكل
لأنه كتير معقول كل واحد ياخد حصته بزبيدة ويحط الزبديه بحضنه وجنبها صحن قهوة فيه شوية ملح
مع أنه العوجا ها لأيام صايرين عم يحطوها جنب جهاز الكمبيوتر
وقت تقول الشام بتعرف شو يعني كراوية وبتعرف أنه يعني كراوية في بيبي صغير وفي مولود بيت فلان
وقت توقف بالبزورية (( البزورية يعني سوق العطارين عند بياع العطارة ))
وتقول للبياع الله يوفقك اخي بدنا كيلوا كراوية
مباشرة البياع بيقولك: ريته ألف مبروك كروية مع المكسرات والحباشات ولا بس كراوية
لحاله بياع الكراوية بيعرف أنه في بالبيت مولود جديد
وقت تقول الشام
بتعرف أنه الحديث بعد طويل
والحديث ما أنتهى


التعليقات (8)
الحوسني
الحوسني
الله يفرج عن اخوان في الشام ،،، تحياتي لك وعلي هذا كتابة هذا الموضوع اشكرك ،،، متابع

ياسمينة ستي
ياسمينة ستي
يارب يحمي الشام واهل الشام ويفرج عنهم ويزيل همهم كربتهم
كلام شامي اصيل طالع من قلبك
اشتقنا لريحة النارنج والكباد والياسمين والعوجا بالصيف
و الكستنا المشوية بالشتا
الشام هي السهرة حول البحرة تحت الليمونة والياسمينة بأرض الديار
شو نقوق لنقول ياشام الله يحميكي
وماأجمل حديثك اخوي وسيم تسلم الايادي
اكمل يعطيك العافية

ام عزيـــز
ام عزيـــز
يعطيك العافيه ...
و الله يعيد الايام الحلوه ل الشام و لكل المسلمين ..

ارووومه
ارووومه
(اللهم فرج هم اخواننا في سوريا ونفس كربتهم وعجل بنصرهم واحقن دمائهم)
الله عليك ياشام
قالها نزار قباني ..
لا أستطيع أن أكتب عن دمشق دون أن يعرش الياسمين على أصابعي .
ولا أستطيع أن أنطق اسمها , دون أن يكتظ فمي بعصير المشمش والرمان , والتوت , والسفرجل .
ولا أستطيع أن أتذكرها , دون أن تحط على جدار ذاكرتي ألف حمامة .. وتطير ألف حمامة ..
الكل متابع بإذن الله .. ويعطيك الف عافية ..

عامر الزعابي
عامر الزعابي
يعطيك العافية
الله يحفظ سوريا واهل سوريا

(((وسيم العرب)))
(((وسيم العرب)))
اللهم امين ولكم كل الشكر على جميل متابعتكم

love uk
love uk
اه ياقلبي يتقطع الماً وحزنا على أهلنا في الشام
حسبي الله ونعم الوكيل فلنبكي دماً على أهل النخوه والشهامه

النشمي 2009
النشمي 2009
سلمت يداك على هذا الموضوع الدسم لقد ذكرتنا بأحلى الايام في الشام الحبيب اسأل الله ان يعجل بالفرج وان تعود تلك الايام لنسعد بلقاء الصحب الكرام هناك
لاننا اشتقنا كثيرا لتلك الارض الطيبه التي تبقى في القلب مادامت الحياه 0


خصم يصل إلى 25%