برشلونه المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
foryoux
13-12-2022 - 07:49 pm
  1. بسم الله والصلاة والسلام رسول الله

  2. نبدأ بسم الله

  3. 4- بطارية شحن يو اس بي

  4. اليوم الأول :


بسم الله والصلاة والسلام رسول الله

كم تمنيت في السابق ان أقوم بكتابة تقرير عن رحلتي لبرشلونه في ابريل 2012 لكن للأسف ومع إنشغالي بالعمل والخطبه والدنيا لم أقم بكاتبة التقرير, أما الآن وانا ابحث عن تقرير لشهر العسل قررت أني أكتب تجربتي في السفر لبرشلونه.

نبدأ بسم الله

كان هدفنا في هذه السفره هو أن نحضر مباراة برشلونه وتشلسي والتي كان موعدها يوم 24/04/2012م. فكرة حضور مباراة لبرشلونه كان يراود أخي البرشلوني من زمان وبعد ما توظف ولله الحمد قررت أنا وهو أن نذهب لبرشلونه لحضور مباراة برشلونه مع تشلسي وذلك حتى قبل أن يتأهل برشلونه إلى نصف النهائي, قضينا وقت طويلاً في تقرير أي من الخطوط نذهب معاها وماهو الوقت المناسب, حتى وقع أختيارنا على الخطوط المصرية وذلك لقلة السعر "كان هدفنا رحلة إقتصادية" ومع اختيار الوقت الأنسب للرحلة حتى يصادف موعد المباراه ولا يأثر على عملي أو عمل أخوي كانت الخطوط المصرية هي هدفنا. موقع الإقلاع هو يوم الأحد 22/04/2012م والعودة يوم الخميس 26/12/2012م. حجزت في البداية من الموقع يوم 21 مارس وكانت رسوم الرحلة للشخص الواحد هي 2500 ريال ورحنا بعد دوامي على المغرب وحصلنا المكتب مقفل واطالع ثاني يوم أحصل السعر أرتفع إلى 2900 للشخص الواحد ورحنا بدري على الفرع الموجود في شارع حائل وصلينا العصر هناك وقطعنا التذاكر.
بعد كذا واجهتنا مشكلة إصدار الشنقل لدخول إسبانيا, وأرسلني أحد الأشخاص إلى موظف في شركة عبداللطيف جميل يعمل في المساء في مكتب حجوزات طلب من الواحد منا مبلغ 700 ريال لإصدار الشنقل وقال أنه سيتكفل بكل الأوراق, أصدر لنا الشنقل الإيطالي في حوالي الأسبوع وقمت بالحجز في فندق HOSTAL BALER وتم إختياري لهذا الموتيل المتواضع بسبب قربه من القطار ومن ساحة PLACA ESPANYA الشهيرة حيث يبعد فقط 400 متر عن محطة Sants Train Station وحوالي 10 دقائق مشياً عن الساحة, كلفنا السكن لمدة 5 أيام / 4 ليالي 304 يورو (حوالي 1500 ريال سعودي) المميز في الموضوع أن إلغاء الحجز مجاناً والدفع كان بعد الخروج (عن طريق BOOKING.COM) جهزنا أوراقنا والتذاكر وكل شيء قبل موعد مباراة برشلونه واي سي ميلان والتي يتقرر فيها المتأهل لدوري نصف النهائي " مره واثقين في برشلونه .
بعد فوز برشلونه على اي سي ميلان تأكدت رحلتنا وقمت بتقديم إجازة لمدة أسبوع من الشركة وبحثت عن العديد من التقارير عن برشلونه حتى اني كتبت كلام وأرسلته لأخوي وكان التنسيق بيننا بالأيميل, إلى أن قال لي أخوي مافيه داعي تقارير أو شيء عندي برنامج يغني عن كل شيء وبالفعل هذا اللي صار أننا أستخدمنا الجلكسي تاب ونزلنا برنامج يتكلم عن السفر لايحضرني أسمه الآن ميزة البرنامج أنك تختار مدينة ويقوم يعطيك خيارات كثيره فيها والأماكن اللي تزورها ومربوط بالجي بي أس ويعطيك الناس كيف تقضي يومها ومسار رحلاتهم بالأقدام!!
كان موعد الإقلاع قبل فجر يوم الأحد 22, وقبلها يوم السبت كان الكلاسيكو بين الريال وبرشلونه شاهدنا الكلاسيكو وللأسف أنهزم فيه برشلونه وطلعنا بعدها على الصالة الشمالية في مطار الملك عبدالعزيز, أنهينا إجراءات سفرنا وشحنا أغراضنا ورحت لبنك الراجحي عشان احول فلوس لليورو, كان إعتمادنا في المصاريف على الكاش وبطاقتي الإئتمانية المسبقة الدفع من البنك الاهلي.
كانت معانا هذه الأغراض:
1- كمرة canon 600d مع عدسة Tamron 17-50 2.8 وبطاريات إضافية " سهل توفر البطاريات لأني اتاجر في إكسسوارات الكمرات الإحترافية"
2- كمرة canon 500d مع عدسة 50mm 1.8
3- جهاز الجلكسي تاب

4- بطارية شحن يو اس بي

اليوم الأول :

وصلنا إلى مطار القاهره في الصباح الباكر وكان الترانزيت في المطار حوالي 3 ساعات استغليناها في النوم قليلاً في مصلى المطار وأيضاً بتناول الإفطار في صالة الترانزيت حتى موعد الرحلة المقرر حوالي الساعة 10 صباحاً. حركنا من القاهره إلى برشلونه ووصلنا في الظهر في المطار, تتبعنا الناس الداخلين للمطار حتى أنهينا إجراءات السفر بكل نجاح.
كان هدفنا شراء التذاكر لاننا لم نشتريها وذلك لأن اغلب المواقع غاليه جداً قد يصل السعر إلى 3 أضعاف التذكره والي شجعنا أكثر ان النادي إلى الأن لم يقم بإصدار التذاكر. خرجنا من صالة القدوم وتوجهنا إلى مركز الخدمات لقطع تذكرة القطار, وكانت الميزة ان تعاملهم جداً جميل شرحو لنا ماهي الباصات التي نركبها حتى نصل للفندق والخطوات الآزمة.
ركبنا الباص متوجهين إلى الأوتيل, وصلنا الأوتيل على الساعة 4 ونص على ما أعتقد. ميزة النهار أنه جداً طويل من الساعة 6 إلى 9 " طبعاً احاول أفتكر المواعيد بالتحديد".
قررنا في أول يوم ان نتوجه إلى ساحة كاتلونيا طلعنا من السكن إلى الساحة سيراً على الأقدام وجلسنا نتنقل في الساحة والمناطق المحيطة بها ووصلنا إلى القلعة عن طريق التلفريك وجلسنا هناك وبعد ذلك رجعنا إلى قمة الساحة وجلسنا مع الناس " الجو كان جداً رائع والسياح بشكل عام الخليجين والعرب جداً قليل لأن الوقت كان وقت مدارس وأغلب الناس كان ينتضر النافورة المشهوره لكن أكتشفنا بعد ذلك أنها تعمل يومي الجمعه والسبت L طبعاً احنا جالسين نستنا مع الناس متوقعين أنها راح تشتغل. بعدها توجهنا للقرية الأولومبيه ومن ثم نزلنا لكي نتعشا في مول Arenas Shopping Centre وجلسنا هناك وخربوا علي الاجواء جامعة الملك عبدالعزيز برسالتهم لرفض طلبي في القبول في برنامج الدبلوم العالي " بس الحمد لله انقبلت أحتياط والأسبوع هذا إختباراتي"


التعليقات (9)
foryoux
foryoux
  1. حركنا من الملعب وقلنا حنروح ل الرامبلا نقضي فيه بقية يومنا.


اليوم الثاني:
أول شيء سويناه الصباح بعد الإفطار في الأوتيل هو التوجه إلى ملعب برشلونه وذلك لأخذ التذاكر من هناك أو شراءها من السوق السوداء
وصلنا إلى محطة القطار وقابنا شخص نحاوله نكلمه بالإنجليزي شوي وطلع دكتور عربي وأشتغل في مكه قبل كذا شرح لنا كيفية الوصول إلى الملعب ركبنا القطار ومن خط إلى خط حتى وصلنا إلى الملعب
كان الشعور جداً رائع أول ماوصلنا. على طول توجهنا للسؤال عن التذاكر وللأسف طلع الملعب فقط يبيعوها لأصحاب العضوية, حلسنا نلف ومحتارين إلى إن حصلت شخص يقول لي Tickets قلت له Yes شوي قال لي انت عربي قلت نعم قال عندي تذاكر وبدأ يعرض لنا مالديه من تذاكر (اللي سعرها 70 يورو يبيعها ب 300 يورو) وعلى هذا المنوال. مره استغربنا من السعر وتورطنا في الموضوع ومن محاسن الصدف حصلنا هناك في السوق السوداء عن باب التذاكر اثنين من المغرب جلس يقول لنا واحد منهم أنه هنا عشان ياخذو تذاكر لهم و لثلاثه من أصحابهم وجلس يكلمنا على انه من ساكنين برشلونه من زمان. تنقلنا بين الأشخاص وكل واحد يتفاوت سعره من 300-500 يورو حسب المكان وكل واحد منهم شايل خريطه في يده يقول لك وين مكان المقعد في نفس الوقت حلصنا واحد يبي ياخذ التذكره من مالطا بس سألنا قال جاي عشان التذاكر وتجاهلناه واحنا ناحاول نكاسر وفيه ناس تشتري ب 400 و 450 يورو, وكل العرب اللي قابلناهم يقولوا أحذروا ترا يوم السبت فيه شباب سعوديين أشتروا تذاكر ب 600 يورو وطلعت مزوره ورجعوا من عند باب الملعب!! اان مره استغربت وخفت, أصلن حتى البائعين يحكوك نفس القصه. جلسنا حوالي الساعتين ندور على تذكره إلى أن نصحنا أحد الأشخاص العرب أننا نستنى إلين يوم المباره الثلاثاء وفي الصباح يجيون كبار في السن يبيعون تذاكرهم ب اسعار معقوله. خرجنا من هناك وأحنا مره متحطمين وقال لي أخوي وقتها لو ان التذكره ب 300 يورو حاخذها, أصلن جانا عرض التذكره ب 250 يورو وجلسنا نفكر إلين جاء واحد وشراء التذكرة قدامنا ومشى. دخلنا بعدها متحف الملعب والملعب وللأسف غرفة تبديل ملابس الاعبين كانت مقفله عشان المباراه.

حركنا من الملعب وقلنا حنروح ل الرامبلا نقضي فيه بقية يومنا.

توجهنا من القطار إلى المحطة العليا في شارع الرامبلا في ساحة بلازا كاتالونيا. ووصلنا هناك وعلى حظنا كان فيه أعلان لمسلسل Game of thrones وجلسنا على كرسي العرش J واهم شيء تصورنا واحنا جالسين, بعدها بدينا على رحلتنا في شارع من أوله حوالي الساعة 1 ظهراً نمشي ونطالع ونتسوق ونصور وأتبعنا المسار الموجود في الجلكسي بالخطوات وميزة البرنامج يشرح لك كل مكان قيمته التاريخية. وصلنا ساحة كريستوف كولومبوس ومنها كملنا المسيره إلى أن وصلنا إلى مناطق تاريخية ورجعنا للساحة بعد ما تعشينا حوالي الساعة 9, أكلنا كثير في الشارع عشان نجرب الأكل لكن ما أعجبنا أكثر شيء هو الشاورما وألرائع أنه مكتوب عليها حلال واللي يبيع على ما أعتقد هندي أو بكستاني.
رجعنا بعدها للشقه واحنا مكسرين من التعب وصنا هناك 10 وجلسنا في الشقه مستعدين ليوم المباراه وخايفين من التذاكر!!

foryoux
foryoux
  1. اليوم الثالث:


اليوم الثالث:

صحينا الصباح افطرنا وعلى طول على الملعب في الطريق واحنا رايحين قابنا الشخص اللي من مالطا وكان ماشي معانا إلى أن وصلنا للملعب في حدود الساعة 9 صباحاً جلسنا هناك وبرضه نفس الموضوع السوق السوداء شغاله وزحمة ناس والعربي اللي قابلنا أمس عشان يبيع لنا موجود وطلب الحين حوالي 450 يورو في التذكره " 2250 ريال" قمت انا وقلت خليني أسأل في الشباك الرسمي لبيع التذاكر ممكن يفتحوها, سالت الموظه قالت لي أن الساعة 10 سوف يتم البدء في بيعها في موقع برشلونه لكل الناس والساعه 11 راح يبدأون في بيعها رسمياً
انا على طول قلت لأخوي وصاحبنا المالطي قلنا الحمد لله ورحنا جلسنا في مقهى قريب ناكل فيه شيء خفيف ونسولف وصلت الساعة 10 ودخلنا على الموقع صاحبنا المالطي ماعنده جهاز فقلنا له راح نحجز احنا لنا اول شيء وبعدين انت خذ الجهاز واحجز لنفسك, اللي صار بعد مافكو التذاكر حجز كل شيء واول ماجيت للدفع عن طريق البطاقة رفض لاني في البنك الأهلي مافعت خدمة اسمها " الدفع الآمن " وتورطنا. قمنا قلنا له انت احجز تذكرتك بعدين احنا نحجز, مر علينا واحد من السوق السوداء وقال لنا ترا الدفع عن طريق البطائق الإتمانية الإسبانيه فقط, قمنا وصرفناه وقلنا حنحاول
تم الحجز له ولله الحمد وحجز لنا ولأخوي عن طريق بطاقته كان سعر التذكره حوالي 120 يورو " نفس التذكره اللي سعرها 300 يورو في السوق السوداء!!, نظام الموقع أنك تحجز وبعدين عند الدفع يتم سحب المبلغ من البطاقة.
بعد ما أخذنا البطائق قلنا الحين راح نتوجه إلى زيارة معالم برشلونه الأخرى حتى يجي وقت المباراه رحنا لمنتزه في جبل نسيت أسمه لكن كان المنظر جداً عالي وفي الأخيز نزلنا منطقه كان فيها مجسمات بالسراميك بعد كذا توجهنا إلى Casa Mila وكنيسة Sagrada Familia وبعدها بدأت رحلة البحث عن مطعم أسمه Pizza marzano وماحصلنا ورحنا مطعم بيتزا في نفس المنطقه وأكلنا فيه وبعدها توجهنا إلى الأوتيل نغير ملابسنا وبعدها حركنا مع جموع الناس الغفيره إلى الملعب كانت القطارات زحمه وتسمع المشجيعن الإنجليزي همه وعباطتهم خرجنا من المحطة متوجهين إلى الملعب ودخلنا بكل سلاسه إلى مقعدنا.
بعد المباراه والتحطيم اللي صار رجعنا للسكن, انا عني كنت مره تعبان ورحت انام واخوي راح يتمشى قليلاً " يفك عن نفسه"

foryoux
foryoux
  1. اليوم الرابع:


اليوم الرابع:

قلنا في هذا اليوم اننا راح نحاول نزور باقي الأماكن اللي ما زرناها في برشلونه عشان نختم رحلتنا, وبكل صراحه كان يوماً صعباً " لاننا جايين عشان المباراه واول ما خلصت المباراه خلص ماصار الواحد له نفس يصور كثير" وبرضه هذا اليوم قلنا نشتري فيه هدايا وتذاكر للكل, عشان نرضي جميع الأطراف, الصباح توجهنا إلى Poble Espanyol وللأسف ولجهلنا بالمكان ركبنا الباص عشان نطلع شويتين على التل لان مكانها عند ساحة اسبانيولا وفوتنا المكان واخذنا لفه محترمه بالباصات ورجعنا لنفس المكان وكملناه مشي " ردخل القرية وكانت جداً رائعه تتميز بوجود مناطق عن كل أقليم في اسبانيا, وشفنا وقتها أطفال مدارس موجودين, تمشينا فيها وتسوقنا منها الكثير " هذه معلومات عن المكان منقول من أحد الأشخاص جزاه الله خيراً في المنتدى:
تم بناء هذه القرية المصغرة في عام 1929م, وتعتبر نموذج مصغر للقرى الأسبانية وفيها عدد من المطاعم الشعبية الأسبانية والأسواق وتقع فوق تل منجويك بالقرب من القرية الأولمبية" خرجنا منها واحنا محملين بالأغراض, أتفقنا أننا نروح أول شيء الشقه نحط الأغراض ونزور باقي الأماكن وبرضه في أخر الطريق نروح الرامبلا عشان نشتري. شرينا وكل شيء وقلنا لازم نزور الشاطىء البرشلوني توجهنا للشاطىء من تمثال كريستوف كولومبوس سيراً على الأقدام حتى تعبنا من بعد الشاطىء الرملي وبعدها أخذنا تاكسي, وصلنا للشاطىء وجلسنا فيه شويتين وبعدها قلنا حنروح مطعم " Ciudad Condal" وكانت لنا تجربة سيئه فيه " بعد هذه التجربة أطلقت كلمتي المشهوره " لاثتق في ذوق شخص شرق أسيوي" وبعدها لحقنا أخر رحلة إلى الأوتيل مستعدين لرحلة العودة

foryoux
foryoux
  1. اليوم الخامس:


اليوم الخامس:

يوم الوداع, بعد الفطور في الأوتيل صباحاً ذهبنا إلى ملعب برشلونه لكي نشتري فلائن عليها الشعار, أشترينا الفلائن وأخذنا كرت tax free وذلك لإستعادة المبلغ الذي قمنا بدفعه وتوجهنا بعدها للشقه أخذنا أغراضنا متوجهين إلى المطار, المميز أن في ساحة اسبانيول فيه باصات مخصصة فقط للذهاب إلى محطات القطار, تبعنا أحدها إلى ان وصلنا إلى المطار وتوجهنا إلى مكتب ال tax free وكانت هناك زحمه جداً طويله على المكتب فيه ناس تدخل من الجنب بدون ماتوقف في الطابور وفيه ناس تاخذ أرقام ومافي الأرقام فائده, خلصنا وبسرعه رحت لمكتب الخطوط المصرية وأنهيت إجراءات سفري " بعض الناس في طابور التاكس فري تقول لازم يشوف اغراضك لكنه ماطالع فيها بس ختم على الورقه وشاف الجواز والتذكرة. ودخلنا صالة المطار وتوقهت وانا ادور على البنك عشان اخذ قيمة الضرائب طلع مكانه بعد ماتختم جواز الخروج وتطلع رايح للطائرة. ركبنا الطائرة متوجهين إلى القاهره,
وصلنا القاهره أتوقع المغرب وصلينا وبعدين نقلونا للأسف إلى صالة تم إنشاءها حديثاً خاصة بالمتوجهين إلى مكه والمدينة وليس إلى صالة الترانزيت الرائعه. جلسنا هناك إلى أن حان موعد رحلتنا إلى جده.
للأسف لا أذكر التكلفة الإجمالي رغم حرصي الشديد على تدوينها وذلك بسبب شراءنا لهديا جداً كثيره
هذا وصلى الله على سيدنا محمد وآمل أن تكونو أستفدتو من هذه المعلومات القليلة.
وانا هنا لتلقي إقتراحاتكم وإستفساراتكم
وشكراً لكم

ريفالدو 4664
ريفالدو 4664
ياهلا وغلا بالنكبه
تقرير جميل ومختصر يعطيك الف عافيه على مجهودك
طبعا قلت لك نكبه لا النكبه انا موب انت انا حضرت المبارتين كلها حق برشا ومدريد وبرشا وتشيلسي
كانت اول زياره لي الي اسبانيا وبصراحه ايام عشتها في برشلونه مقدر انسساها
والحين ان شاء الله ناوي احضر مباراة البرشا وديبرتيفو لاكرونيا والبرشا والميلان
فرق اضعف عشان افوز اقول انه مو انا النحس
طبعا في المبارتين الماضيه حق مدريد وتشيلي اخذت التذدار من السوق السوداء حوالي 3000 ريال لكل مباراه يعني 6000 ريال بس مباريات صح الموقع حلو بس تحس فيه استغلال
لكن هالمرره اشتريتها من موقع النادي وسعر ولا في الخيال وافضل مكان بالنسبه لي في الوسط الدور الثاني
بس سوالي لك الحين انا اشتريها وجاني على الايميل الايصال حق المباراه اوديه الشباك يسلموني التذكره ولا كيف
وبالتوفيق ان شاء الله

saleh 1
saleh 1
الحمدلله على السلامه اخوي وتقرير حلو
وانا بسافر ان شاء الله لبرشلونه لمدة اسبوع ان شاء الله في شهر مارس ومحتار في الخطوط
انا بسألك عن الخطوط المصريه كيف كانت معكم ؟؟

ريفالدو 4664
ريفالدو 4664
اسمح لي اجاوبك عنه الخطوط المصريه ممتازه اقتصاديا
وسعرها جدا رائع ونظافتها افضل من نظافة الخطوط السعوديه
ولك الحريه

غير الناس 1
غير الناس 1
الحمدالله انك ماشريتها من السوق السووده لان اغلبها مزوره ... اذا تبغي تضمن في ناس يبيعيون بطايق العضويه وبسعر معقول او انك تتريه قبل المباراه بساعتين الموقع الرسمي يفتح التذاكر
اما السوق السووده فأحذرو منهم

فيصل
فيصل
الله يوفقك ويتمم لك علي خير بالزواج وتنهي اختباراتك بكل تفوق
السوق السوداء ما اشتري منهم أبدا
لو التقرير نتأخر بس صراحه واضح
شكرا لك


خصم يصل إلى 25%