النرويج المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
FuNnY GiRL
18-12-2022 - 03:42 am
  1. ماعرف ليه الايام الحلوه تمر بسرعه

  2. مالمو

  3. كوبنهاجن


السلام عليكم يااعضاء العرب المسافرون
امس وصلت من السفر بعد جوله اوروبيه رائعه رائعه رائعه رائعه

ماعرف ليه الايام الحلوه تمر بسرعه

بدايتنا كانت في برلين والختام كان كوبنهاجن والسكن كان في مالمو السويد تبعد بالقطار بس 20 دقيقه تقريبا او 25 .. كل تنقلاتنا كانت بالطيران الداخلي الاوربي
سفرتنا كانت على الخطوط الجويه القطريه على درجة رجال الاعمال في الروحه كانت الطياره صغيره ومارتحت بالكرسي بس في الجيه كانت فوق الروعه الكرسي يقلب سرير ومريح جدا جدا جدا ... وبصراحه مع احترامي لكل الطائرات نفس القطريه مافي جربت طيارات وش كثر حتى الاماراتيه ابدا ماتصك عند القطريه ابدا

مالمو

بصراحه ماانصح بزيارتها لانها مدينه صغيره وتعتبر ثالث اهم مدينه في السويد بس من اللي شفته عاديه جدا جدا ماانكر اني استمتعت فيها وحبيتها بس كسياحه مافيها اي شي غير السنتر حقها وحديقه وحده ... احنا صادف تواجدنا في يوم الكريسمس تعرفون شنو استخفينا لان محلات مافي كل شي مسكر والاهم منهم مافي مطاعم واحنا كنا ميتين جوع
ماانصح اي حد يروح وقت الكريسمس اوروبا من تاريخ 24-12 راح تتلتهون مثلنا في الاخير التاكسي ودانا على شارع كله مطاعم عراقيه من النوع اللي خذ سندويج واطلع ماتنفع للقعده للي معاه حريم لان مافي تواجد لااي عنصر نسائي في المطعم ومن النوع المتواضع جدا مستوى المطعم ماكان فيه غيري انحرجت لان هالمطاعم مليانه عراقين وعرب مهاجرين طلعت وزوجي جاب الطلب ورحنا الفندق على طول
طول ماانت في مالمو بتحس نفسك في البصره من كثر تواجد اخوانا العراقين مشاءالله انصدمت بصراحه من العدد
وعلى فكره السويد رخيصه رخيصه انا مصدومه ارخص من اوروبا اخر ليله لنا فيها تعشينا في مطعم تركي يعتبر راقي الوحيد اللي كان فاتح قعده حلوه وخدمه واكله جدا لذيذ ومن ضمن المنيو انكم تطلبون ستارتر وطبق رئيسي وسويت لشخصين كلفنا بس 132 ريال ... والمطعم العراقي طلبنا منه سندويجيتين وبيتزا لان كنا ميتين جوع و2 كولا بس 60 ريال ... وحتى الفندق سكنا في الهيلتون كان رخيص مع انه شامل الفطور وحتى لما سالنا قالو لنا ان السويد ارخص من المانيا ومن دول كثيره وشعبها لطيف لطيف جدا ويعرفون انجليزي كل الشعب لان يدرسونه ابد ماتتوهقون ولاعندهم عنصريه ابدا الكل يرحب واذا سالتهم على طول يجاوبونكم وواحد مسكين مشى معانا يدلينا على مكان كنا نبيه شعب يجنن

كوبنهاجن

حلوه كاتصاميم وكمدينه ومحلات وش كثر ويبين ان سوقهم حلو بس للاسف كل شي مسكر على حظي بس مافيها شي مميز كسياحه واماكن اتروحون لها في كوبنهاجن مدينه نفس كل المدن فيها مدينه ملاهي اسمها tivoli للاسف كانت متسكره وقت تواجدنا .. ركبنا الباص السياحي محطوط عليه من ضمن اللغات العلم العراقي على اساس ان في ترجمه عراقيه طلعو كذابين مافي ترجمه عربيه
بس المكان عادي ومافيه شي مميز عندهم هندسه عمرانيه حلوه شدت انتبهاهي وفي تواجد للعرب بشكل كبير كبير كبير كبير ماتخيلت اني بعد بحصل هالجاليه الكبيره في الدنمارك وشعبها يجنن عكس ماكنا متوقعين ان يكرهون المسلمين ومن هالكلام بالعكس اكتشفت ان ماعندهم اي مشكله مع العرب والمسلمين وصادفنا كذا شخص يقولون الشخص السيئ يمثل نفسه مايمثل البلد اللي جاي منها ... وللاسف للاسف ويحز بخاطري هالشي ان بعض العرب المغتربين يخربون سمعتنا من ناحية سرقات ومن ناحية ازعاج ومشاكل يسونها يارب يهديهم احنا العرب ننزعج اشلون الغرب بصراحه زين منهم انهم يحبونا ويعاملونا عدل
بس الحلو في الموضوع اني زرت مكانين جداد والدول الاسكندنافيه كانت حلم بالنسبه لي السويد والدنمارك خصوصا السويد من قلب كانت داشه بخاطري والحمدالله زرتهم وشفتهم المره الجايه ناوين على النرويج ان شاءالله
باختصار العرب يحبون المتعه والوناسه والاماكن السياحيه الكثيره المكانين اللي جيت منهم مافيهم هالشي الكثير .. ويمكن كوبنهاجن فيها اشياء انا ماعرفها مادري من اللي شفته وحتى لما ركبنا الباص السياحي ماشفت شي مميز عاديه جدا
اتمنى قدرت افيد كل شخص ناوي على المكانين اللي تكلمت عنهم .. واتمنى للجميع سفره حلوه وممتعه


التعليقات (9)
آخـــرفـــرصــة
آخـــرفـــرصــة
***
و عليكم السلام
الحمد لله على السلامة
فعلاً العراقيين و الايرانيين كثير في مالمو
و هي مدينة صغيرة و صناعية أكثر و قد ذكرنا هذا بالدليل
طيب وين الصور ؟؟؟
ياليت تكتبين لنا تقرير مصور عن رحلتك لكي نستفيد جميعاً
سعيدين بتواجدك المستمر بيننا
و شكراً عالمعلومات المفيدة

FuNnY GiRL
FuNnY GiRL
أخي آخر فرصه
سعيده بتواجدك وان شاءالله راح أحاول. احظ صور
في شيء مرعب تو شفته في اليوتيوب
يقولون في قناصه تستهدف العرب المهاجرين وش كثر عرب ماتو في مالمو الحمدالله ربي ستر علينا آخرهم صبي عراقي عمره 15 في 2012. تو توفى اطلقو عليه الرصاص موجود في اليوتيوب
الحمدالله ربي ستر علينا كنا نرجع فالليل مشي مأنصح حد يروح لها في فيديوات في اليوتيوب عنها تقدرون اتشوفونها

فيصل
فيصل
وعليكم السلام
حمدلله علي السلامه
لا تخوفين الناس من القناصه خ

FuNnY GiRL
FuNnY GiRL
الله يسلمك اخوي فيصل
يمه لاتلومني للحين أنا خائفه من الفيديو اللي تو شفته لحد يروح لها أبد. بسم الله أكتب مقتل شاب في مالمو. بيطلع لك. مادري إشلون ماشفنا. الفيديو قبل لإنسافر مع أني كنت أحوس في اليوتيوب.
ربي يحفظنا كلنا يأرب ويحفظ المهاجرين مساكين

الحوسني
الحوسني
الحمدلله على سلامتكم ومشكورة على النصايح ونترية منك تقرير مصور باذن الله

مــــــــــ بنت ــــــكة
مــــــــــ بنت ــــــكة
اولا ...الف حمد الله ع السلامة ...وانكم سلمتو من القناصة
ثانيا ...بازعل منك .... ماتفقنا كدا
فين التفاصيل ؟؟؟؟
بليز ....كل شي بالتفصيل + الصور
ودي الباقات هدية مقدما عشان تتحمسي وتنزلي تقرير مزبوط

سوسو الصغيرة
سوسو الصغيرة
الحمد الله على السلامة .....
مالمو معروفة بكثرة العراقيين فيها .... حتى مطربينهم يسوون حفلات عندهم هناك ....
اللى اعرفه إن عندهم جرائم الشرف منشرة وايد هناك ....
الله يحفظ امة محمد ....
في انتظار تقرير منج اختي ...

أبن السعودية
أبن السعودية
الحمدلله على سلامتكم أختي الكريمة
وشكرا جزيلا لك على هذه المعلومات المفيدة
تحياتي وتقديري وأحترامي لكي ..

FuNnY GiRL
FuNnY GiRL
الحوسني
شكرا لك وعلى مرورك .. ان شاءالله راح احاول اذا حصلت وقت اسعدني تواجدك
بنت مكه
حبيبتي انتي مشكوره على تواجدك الحلو واللي كثير اسعدني .. ان شاءالله راح احاول انزل الصور في اقرب وقت
سوسو الصغيره
اسعدني تواجدك كثير حبيبتي .. وربي يكفينا شر الجرايم ويحفظ المسلمين وصدقتي بكثرة تواجد العراقين مشاءالله قريب يحتلونها واتصير بلادهم ومالومهم مساكين الله يعينهم لافي بلادهم مرتاحين ولا في الغربه راحه حياتهم صعبه الله يعينهم
ابن السعوديه
شكرا على تواجدك وربي يسلمك انت وكل من عز عليك من كل شر يارب


خصم يصل إلى 25%