قطر المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
صالح السلامه
03-12-2022 - 12:38 pm
السلام عليكم والرحمة ياجماعة..انا داخلة بمعرف زوجي وابغا برنامج سياحي طبعا الوصول يوم الجمعة 23_1__1434الرياض قطر ..
الفنادق... اماكن سياحية...الحدائق لان معاي اطفال ثنين.. وافضل الاسواق اللي تستحق الزيارة. ولكم جزيل الشكر.


التعليقات (5)
Jawaher_Qatar
Jawaher_Qatar
اهلين فيك اختي
اول شي تنورينا
وثاني شي انا عندي اعتقاد ان اجهل ناس في البلد هم اهلها لانهم ما يسون سياحه فيها
اول شي ان شالله معاكم سيارة ؟
بالنبسة للفنادق : تقدرين تشيكين عليها من موقع بوكينج وانا ارشح لك هالفندق من ناحية سعره و اناقته وموقعه K108 Hotel Doha سعر الليلة فيه 394 واذا تبين شي غالي وفخم ورفاهية قولي لي بعد وبطلع لك .
بالنسبة للاماكن السياحية راح اقولك الاماكن الي جنب الفندق هذا :
1/ الكورنيش
2/ المتحف الاسلامي
3/ سوق واقف ( سوق شعبي + مطاعم + مقاهي اجوا حلوه نهار وليل حلو تروحين تفطرين فيها او تتعشين فيه و تتسوقين منه الاشيا المميزه الي موجوده في قطر)
ونصيحة اذا رحتي محلات البهارات اطلبي شي اسمه ( زرشك) هذا مافي منه عندكم اعتقد هو عباره عن رمان صغار تعطينه فوق الرز مثل الصنوبر له طعم حلو و يعطي نكه وغريب حلو تقولين لضيوفك انه من قطر *_-
أماكن سياحية أخرى :
1/ كتارا ( الحي الثاقفي) اطلالة جميله ع البحر و مطاعم و مقاهي افضل المطاعم (ماميك والمطعم البحري لوزار) و مري ع محل كرك وجباتي احنا مشهورين في هالشي
هذا موقع كتارا بالعربي فيه كل شي عنه وتابعي الفعاليات يمكن يعجبك شي وتحبين تحضرينه كتارا | وادي الثقافات http://www.katara.net/arabic/
2/ اللولوه جنب كتارا اطلاله ع البحر قوارب او تكسي بحري و محلات عالمية ومقاهي ومطاعم .
كتارا والولوه جنب بعض بس انا ما انصح ينراح لهم في يوم واحد لانهم تقريبا نفس الاجوا
الاسواق :
1/ الستي سنتر مجمع كبير جدا و متعب شوي ومافي محلات مميزه وانا شخصيا اذا جوني ضيوف ما اوديهم له الا اذا تبين تلعبين الصغار فيه فوق العاب لهم .
2/الاند مارك المجمع المفضل لدى الغالبيه لمساحته المتاسبه في التسوق و تنوع المحلات والمطاعم وفي منطفه لالعاب الاطفال
3/ فيلاجيو احلى مجمع من ناحية التصميم و اغلب الماركات العالمية تلاقينها في قسم الماركات وفيه العاب للاطفال راح تكون ممتعه لهم بيعجبك جدا ن شالله
الحدائق:
حديقة سباير : جنب فيلاجيو اضخم و اجمل حديقة في قطر حلو تطلعين تقعدين فيها بعد العصر وقهوه وشاي او مشي .
شلون ترتبين الاربع ايام
اختاري الظهر مجمع و العصر والليل اماكن مفتوحه .
مراح تنزعجين من اي ترتيب لاماكن جنب بعض واطول مشوار 20 دقيقه
حاولي تطلعين قبل 12 الظهر عشان زحمة الدوامات والمدارس من 12 الى 2:30 تقريبا زحمه زحمه
واذا تبين اي استفسار انا موجوده وحياكم الله

ســـــعـود
ســـــعـود
المحترمة / Jawahar _ Qatar
أشكرك على هذه الإفادة الرائعة والمتكاملة ولا تحرمينا من إبداعاتك القادمة
دمتي بحفظ الرحمن

ســـــعـود
ســـــعـود
حرم الأستاذ / صالح السلامة
إليكِ رابط المواقع والأماكن التي تستحق الزيارة على الخارطة ( هنا https://maps.google.com.sa/maps/ms?msid=203266113680209801348.0004c5f33c125ee2396d5&msa=0 )
وتروحون وترجعون بالسلامة

Jawaher_Qatar
Jawaher_Qatar
سعود
العفو .. واجبنا

صالح السلامه
صالح السلامه
مشكورة اختي جواهر.وماقصرت اخوي سعود. الله يعطيكم الف عافية.


خصم يصل إلى 25%