بسم الله الرحمن الرحيم
السلام عليكم ورحمة الله وبركاته
اول شي حاب اشكر كل اللي في المنتدى على كم المعلومات المفيدة واللي استفدت منها كثير
ومن هالمنطلق حاب انكم تتعرفوا على تجربتي الفريدة المتواضعة الجديدة وخصوصآ في مسألة الفنادق في كوالا و لينكاوي
بسم الله نبدأ
طبعآ بداية رحلتي كانت في وسط شهر اكتوبر لهذا العام جلست في كوالا مدة 10 ايام تنقلت فيها بين الفنادق فأنا مغرم بتغيير الفنادق يعني كل يثلاث ايام انام على سرير غير ومخده غير ووجيه غير
من اجمل فنادق كوالا فندق ( شنقريلا ) من فئة الخمس نجوم , تعامل راقي , سهولة في الحجز وحسن في الأستقبال
غرفه واسعه بس لك شوي على المطل ,, فهناك على المدينه او على برج منارة كوالا
عمومآ وين ماضفيت وجهك ماراح تشوف الا خضار في خضار مو دواعيس مغبره والا قطاوه متسدحه
ماعلينا نرجع لمحور حديثنا
فندق شنقريلا يعتبر من فئات الفنادق اللي غاليه شوي وبصراحه يستاهل واحلى شي فيه بوفيه الأفطار
صح ان الصينيين مسيطرين في أكلاتهم بس برضو حلو واذا تبي تاخذ معك للغرفه بالعكس يرحبون ويعبون لك في كراتين خاصه
والا الحديقه أوف ما زينها
واللوبي هادي والجلسه فيه مع اصوات الموسيقى والبيانو قمة في الروعة واللي مايبي موسيقى يحط قطن في أذنه ويستمتع بالجلسة
ما علينا نرجع لمحور حديثنا
الفندق الثاني اللي هو فندق The Royale Chulan Hotel Kuala Lumpur
هذا الفندق قريب من شارع العرب يعني دقيقتين وربع وانت في وسط شارع العرب اللي بصراحه مدري وش يبي , زحمات وحوسه ومناظر وع ومدري وشو
ماعلينا نرجع لمحور حديثنا
فندق شولان هادي ورومانسي ورايق وبرضو احترام للنزيل
بالنسبة لي كان اختياري من السويتات الخاصة لذا كان استقبالي مو في الريسبشن العام بل في الدور الخامس وهو مركز رجال الأعمال
حتى الأفطار مايكون مع عامة الشعب في الدور الأرضي بيكون في الدور الخامس واذا تبي مع العامة مو مشكله
طبعآ اللي يميز هالفندق هو وجود البلكونات في معظم الغرف المطلة على المسبح وتطل في نفس الوقت على البرجين التوأم عشان كذا احرصوا على هالنوعية من الغرف بهالفندق
طبعآ غير الخدمات الثانية مثل المساج ونادي ليلي محترم ووجود شركات اجنبية تقدم عروضها من خلال هالفندق وانصح فيه كثير
ومن ضمن الفنادق اللي انصح فيها فندق سكنته برضو اسمه انتركونتيننتال كوالالمبور
يا الله على هالفندق وغرفه واللوبي والحركات والسكنات اللي فيه
شي بيعئد ,, بس فيه مشكلة واحدة وهي كأنك ساكن في طهران
ثلاث ارباع الساكنين من ايران بس بصراحه محترمين
يعني مو محترمين مره بس اقصد انهم بحالهم ولالهم فيك, بس تشوف العرق الفارسي
ماعلينا نرجع لمحور حديثنا
فندق الانتركونتيننتال مو قريب من شارع العرب وموقعه شوي مزحوم احس انه بمنطقه ماليه وبرضو قريب من مكتب الخطوط الجويه السعودية
وعلى سالفة الخطوط السعودية نصيحة لله لا احد يسافر عليها
قسم القسمات انها ماتحترم العميل تخيلو بدون سابق انذار الغو رحلتنا وحولوها على جده
ماعلينا نرجع لمحور حديثنا
هذا الجزء الأول من حكايتي في كوالا واللي تتعلق بالفنادق فقط
بستكمل معكم بقية المعلومات بالتفصيل لاحقآ
ونسيت اقول السائق اللي معي كان قمه في كل شي جزاه الله خير ووفقه يارب
ماعلينا نرجع لمحور حديثنا بس مو اللحين
باي