بريطانيا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
سفير البترول
06-12-2022 - 10:14 am
السلام عليكم ورحمة الله وبركاته
انا حاليا ادرس دكتوراة ببريطانيا ،حبيت اشارككم بالمراحل اللي مريت فيها ، بقدمها لكم بشكل عفوي وبسيط. واللي عنده سؤال يسأل.
اول شي نبدا بموضوع التقديم.
هل اروح امريكا أو بريطانيا. السؤال الذي يسأله الملايين
الموضوع كنت اطالعه من ناحيتين:
1- طبيعة الدراسة في البلدين
2- ظروفي
نجي للنقطة الأولى:
طبيعة الدراسة في بريطانيا تختلف عن امريكا.
بريطانيا عادة الدراسات العليا ما فيها كورسات (يعني ما تاخذ مواد) مجرد انك تجي الجامعة تقعد مع الدكتور وتحطون خطة البحث. والباقي عليك. تروح تقرأ، تتثقف، تدخل النت وتبحث.
وعادة يكون فيه مناقشة بعد 9 شهور من البداية. بعدها يقررون هل تكمل برنامج الدكتوراة أو تطلع وماعرف بالضبط وش الإجراء.
في أمريكا كل الجامعات تتطلب ساعات معينة كورسات كجزء من برنامج الدكتوراة. الفترة هذه تقريبا سنتين.
بعد الكورسات فيه اختبار شامل أو تقرير تناقش فيه ويحدد هل تكمل برنامج الدكتوراة أو يعطونك شهادة ماجستير.
بعدها تكمل الدكتوراة وتكون طبيعتها بحثية إلى وقت المناقشة (تقريبا بعد 3 سنوات على حسب الطالب) وبعدها تمنح الشهادة.
طبعا بعض الجامعات الأمريكية تتطلب امتحان قبول يتحدد فيه مستواك. واذا رسبت باحد المواد تحتاج تاخذ المادة قبل ما تلتحق ببرنامج الدكتوراة.
مثال: انت طالب كيمياء ورحت تبي تكمل دكتوراة. يسوون لك امتحان بأقسام الكيمياء، الفيزيائية والعضوية والغيرعضوية والتحليلية. واذا رسبت بالتحليلية يدرسونك اياها بالاضافة الى مواد الدكتوراة. اذا رسبت فيهم كلهم راح تاخذهم وبكذا مارح تبدأ بمواد الدكتوراة الا بعد سنة او شي.
هذا بالنسبة للفروق وأركز على أهمية قراءة البرنامج ومتطلباته بالتفصيل. أذكر كل جامعة كانت تفرق عن الثانية بأمريكا.
متطلبات أمريكا وبريطانيا من ناحية اللغة شبيهه لبعضها لحد ما. التوفل أو الآيلتس. والدرجة هم يحددونها. والبعض يطلب واحد من غير الآخر.
الشي الإضافي اللي موجود بأمريكا وما شفته ببريطانيا، هو الجي أر إي gre. هذا بهذلني وحست فيه بالأخير ما رحت أمريكا. في جامعات قليلة ما تطلبه.
فقدمت على أكثر من جامعة أمريكية وبريطانية. وكان هدفي اروح أمريكا. اخذت ال gre وجبت درجة كويسة. عدته مرة ثانية وجبت العيد.
اخذت التوفل والايلتس والحمدلله بدعت فيهم.
قبلوني اكثر من جامعة والأغلب رفضوني.
فضلت بريطانيا عشان القرب والمدة. بريطانيا تقريباً من 3-4 سنوات وأمريكا 5-6 سنوات.
نتكلم شوي عن التقديم..
التقديم بجامعات أمريكا عادة فيه رسوم.
كل التقديمات أون لاين.
وكل جامعة تختلف عن الثانية بأسئلتها.
بعض الأشياء اللي يسألون عنها:
مقدمة عن نفسك، اهتماماتك
ايش درست وكم معدلك؟
عندك أبحاث سابقة؟ هل تم تكريمك بمناسبة؟
شنو تحب تدرس؟ وليش اخترت هالمجال؟
ماهي طموحاتك العلمية بالمستقبل؟
ملاحظة اذا كان بينك وبين دكتور تفاهم مسبق يكون هذا بريدك للقبول ان شاء الله
مثلاً: تمر على دكاترة الإدارة بموقع الجامعة. وتشوف كل واحد ايش يسوي وشنو اهتماماته. بعد كذا ترسل له ايميل وتقوله انا ارغب في دراسة المجال هذا وانا عندي بحث سويته مثلا وتقديري بالجامعة كان 4 فرضاً.
فالدكتور بيرد عليك أحياناً يرحب وأحيانا يقولك قدم ويصير خير.
أما إذا كان فيه دكتور بالسعودية مثلاً يعرف دكتور بره فهذه انت محظوظ فيها جداً.
هذا الجزء الأول ان شاء الله ونكمل بالحلقة الجاية
سفير البترول


الدراسة في بريطانيا
التعليقات (5)
بو الزبير
بو الزبير
بصراحة سرد رائع وممتع وننتظر تكملة الموضوع

Stranger Man
Stranger Man
الله يعطيك العافيه دكتور المستقبل
مستمتعين معك
وبانتظار الباقي
وكل عام وانت بخير
تحياتي

سفير البترول
سفير البترول
وانت بخير كلك ذوق
تسلم حبيبي

سفير البترول
سفير البترول
كل عام وانتم بخير بكره عيد الاضحى وانا فاضي ما وراي شي قلت اكتب
نكمل..
الجزء الثاني
بعد التقديم بشهرين جاني القبول. تقريبا في مارس.. طلبوا مني أرسل لهم نسخة من شهادة الآيلتس..
وطلبوا حاجة اسمها ATAS
هذا في بريطانيا لطلبة الدراسات العليا فقط. وهو عبارة عن تعهد انك ما تستخدم بحثك في صناعة أسلحة دمار شامل.
دخلت الموقع وعبيت البيانات واخذ تقريبا 14 يوم على ما ردوا علي بالموافقة. ارسلت الموافقة حقتي للجامعة
بعدها ما بقى لي الا انتظر شي اسمه رقم CAS ، بدون هذا الرقم مافي فيزة طالب.
ارسلوا لي الجامعة رقم CAS
قبل ما اقدم على الفيزا جددت جوازي عشان اذا انحطت فيه الفيزا ما تطلع
وبعدها على طوول قدمت على الفيزا أون لاين ودفعت الرسوم وأخذت موعد
رحت للمكتب حقهم اللي بالخبر (انصح تاخذون أبكر موعد صباحاً عشان الزحمة).
الاوراق اللي طلبوها مني:
  • فورم من النت أعبيه وأسلمه
  • شهادة الآيلتس
  • رقم CAS مع موافقة الجامعة
  • نموذج ATAS
  • الشهادة الجامعية
  • الصور

الجوازات القديمة ما طلبها
طلبوا 8 ريال حق رسائل الجوال ولا كان عندي صرف ولا عندهم، فتعطلت شوي
استلمت الفيزا تقريبا بعد 4 أيام
حجزت على الخطوط القطرية
بالنسبة للعفش..
جهزته كالتالي:
  • شنطة اشحنها بالطيارة
  • عفش، على اساس بشحنه عن طريق شركة شحن جوي

شنطة الطيارة كانت متوسطة الحجم. بحيث انها تنشال وتتمشى (بتعرفون بعدين ليش)
الشنطة المتوسطة الحجم حطيت فيها ملابس تكفيني حق اسبوعين. واللي هي مدة الشحن المتوقعة. أدوات النظافة
بنفس الوقت اقدر اغسل والبس مو مشكلة.
العفش عبارة عن:
  • شنطة كبر البعير فيها الملابس والجزم اكرمكم الله
  • كراتين صغيره فيها اغراض مطبخ، الكترونيات، كتب وخرابيط المكتب والبيت

بالنسبة لطريقة شحن العفش فيه طريقتين أعرفهم:
  • وحده استخدمها زميلي
  • وحده استخدمتها انا

بصراحة هو دلني على شركة كانو للشحن الجوي (شارع الملك خالد بالخبر) وهذا رقمهم 038948968
زميلي راح وحط الأغراض عندهم ووقع الأوراق الرسمية ودفع الفلوس. ثم سافر ولما استقر بعنوان ارسل لهم العنوان
بالنسبة لي انا سافرت. بعديت خليت اخواني يرسلونها للمحل. وأرسل لي الموظف الأوراق بالايميل، طبعتها، ووقعت عليها. بعدين سويت لها scan وارسلتها له مع صورة الجواز والفيزا والعنوان
الشحن نوعين:
  • من الباب للباب (وهذا أغلى)
  • من الباب للمطار اللي انت عنده

كلفني الشحن من الباب للباب 1900 ريال
نرجع للسفرة..
كانت السفرة الحمدلله طبيعية.. بذكر سالفة للاكشن لا اكثر..
رحت مطار الدمام وكانت الرحلة بعد منتصف الليل. وانا نظامي دجاجة انام بدري
المهم لما وصلت عند بوابة الركوب كان باقي عالرحلة نص ساعة. واستلم لك الثلاث كراسي اللي جنبي، ونووم
ما وعيت الا هاللي يصحيني يالله قوم الا اشوى الناس توها تركب.
طبعا للقصة تكملة < ما ينعطى وجه
نفس الشخص اللي صحاني لما كنا ننتظر بقطر رحت عنده بما انه بسني شباب والباقين كلهم اجانب وشياب
قلت له: شكراً على التصحية
قالي: لا عادي شدعوه
بعدين دخلنا مع بعض شوي
لما ركبنا الطيارة افترقنا
بس كانت الطيارة شبه فاضية
والرحلة 7 ساعات
التفت ورا الا طلع الكرسيين اللي جنبه فاضيين
قلت للمضيفة ممكن اغير قالت يالله
نقزت
وقضيت الوقت معاه سوالف ونوم وسعة صدر
لما وصلنا لندن الا هو متفق مع ولد عمه يمر عليه لكن ما كان مفعل خدمة التجوال
دقينا من جوالي على ولد عمه والحمدلله قابلناه
حلفوا علي انهم يوصلوني الفندق وفعلا وصلوني للباب
واستفدت أمانة من ولد عمه وللحين متواصلين
اعتذر عالشطحة .. الجزء الثالث والأخير: شنو سويت لما وصلت الفندق والجامعة
المعذرة جهازي ما يكتب عربي كتبته بالجوال
سفير البترول

بو الزبير
بو الزبير
يعطيك العافية .. جزء رائع وممتع


خصم يصل إلى 25%