1. تاريخ الاقلاع: 24/12/2012 الى كوالا لمبور


2. تارخ العودة: 10/01/2013 من كوالا لمبور الى جده


3. 1- أفضل مكان للتواجد فيه وقت الكريسماس ؟


4. 2- أفضل مكان لحضور رأس السنة لرؤية الألعاب النارية؟

السلام عليكم ورحمة الله وبركاته ،،،
انا وزوجتي من متابعين المنتدى من فترة طويلة وأشكركم جميعا على المواضيع المطروحة و عن جميع مشاركاتكم ورحابة صدوركم في تقبل الاسئلة مهما كانت ...وبرأيي هذا المنتدى أفضل من كل المواقع الاجنبية
وماأخفيكم بحث كثير ومن كثرة المعلومات فقدت تركيزي وماعرفت أكون برنامج لي انا وزوجتي خاصة ان الاجانب جوهم غير جونا...
الخطة أن نحضر الكريسماس و رأس السنة بماليزيا بحكم أنها افضل للعوائل من تايلند (من المعروف ان حفلاتهم صاخبة جداً وماتنفع للعوائل نهائياً وخاصة مع وجود السياح الاستراليين وغيرهم) وبعدها نروح لتايلند....

تاريخ الاقلاع: 24/12/2012 الى كوالا لمبور

تارخ العودة: 10/01/2013 من كوالا لمبور الى جده

بالنسبة لي أنا زرت كوالالمبور 3 مرات و اخر مرة كانت في نهاية شهر 3 من هذي السنة وبصراحة أستغربت جداً من تغير شعبها وصار تعاملهم سيء جداً حتى بينهم وبين بعض! مع العلم اني قبلها كنت بمانيلا لاول مرة واتفاجأت أن شعبها جداً مرح والابتسامة ماتفارق وجوههم ومتعاونين الى ابعد درجة (عكس الماليزيين بكوالا لمبور ،، لان الشباب الي عايشين هناك يقولوا فعلا كلامي صحيح وهم لاحظوا نفس الشي بس خارج كوالا الشعب أفضل بكثير بالتعامل و عكس كوالا لمبور تماماً)....
أسف جداً على الاطالة وهذي استفساراتي:
بالنسبة لماليزيا:

1- أفضل مكان للتواجد فيه وقت الكريسماس ؟

2- أفضل مكان لحضور رأس السنة لرؤية الألعاب النارية؟

فيه ناس أقترحت علينا النزول في فندق التريدرز عشان نتفرج على الالعاب النارية وعدم النزول للساحة بسبب الزحام و الجو الحار ،،، وفيه ناس أقترحت مطاعم تكون تطل على البرجين أو الحجز بمطعم Menara KL. إيش رأيكم؟
3- كيف الجو بنهاية شهر 12 هل حيكون سيء من الرياح الموسمية بالنسبة لتايلند و ماليزيا؟
4- قريت عن بينانج و لانكاوي بس على حسب مافهمت اذا زرت بوكيت بتايلند راح تغنيني عن لانكاوي و بينانق ..خاصة ان لانكاوي فاضية ومافيها أي شيء الواحد يسويه و كمان كل شي يقفل بدري قبل حتى الساعة 10! فعشان كذا كان ببالي اني ننزل كوالالمبور من 25 الى 31 وخلال هذه الفترة ويوم 01/01/2013 الى بوكيت
فين افضل أماكن تسوق للماركات المقلدة بماليزيا و ايهما افضل في هذا الشي كوالالمبور ام بانكوك؟
بالنسبة لتايلند:
1- ماعمري زرتها وفكرت ننزل ببوكيت الى يوم 4/1/2013 وبانكوك الى يوم 09/01/2013 وبعدين الى كوالا وثم العودة.
بالنسبة لشنغامي كل الي فيها الحديقة وكم معلم وبس فعشان كذا ماحطيتها ببالي..
2-ايش رايكم ب Ko Phi Phi و Ko Lanta بدل بوكيت وايهما تفضلوا ولماذا وكيفية الوصل لها من ماليزيا؟
3- ايش افضل الاماكن للتسوق ، شنط وملابس وتقليد ماركات بسعر رخيص (مابدور على الماركات عندهم لان أسعارهم زي دول الخليج ومافرقت وممكن كمان تكون أغلى)؟
4-سؤال آخر يمكن يكون مضحك للبعض بس لو زوجتي تريد السباحة و التمتع بالفعاليات المائية فين أفضل مكان و ايش الملابس الي المفترض تلبس من رأيكم؟
5- هل المدن المذكورة فيها حياة ليلية بس تكون محترمة للعائلات مثل كوفي شوبز و هدوء بدل البارات و الاشياء الي نهائيا ماتنفع للعوائل؟
طبعاً أنا مستعد لاستقبال جميع الاقتراحات حتى لو قلتلولي غير تاليند الى أندونيسيا واكنسل كوالالمبور بمدن تانية برضو مافي مشاكل بس أهم شي الواحد يروح مكان ينبسط فيه ويكون آمن (موضوع تحذيرات تاليند من جد خوفني انا وزوجتي من السفر لتايلند) ومافيه مشاكل او مضايقات او الشحاته (انا في مسلم هات صدقة أو انا في مسلم وانت مسلم تعال أشتري مني!!! شي يرفع الضغط مع احترامي للجميع)،،،،
ولو فيه فنادق تفضلوها بأسعار معقولة أتمنى أيضا اضافتها
عارف اني طولت و أعتذر مقدماً وجزاكم الله خير