للعلم * كتبت رد كامل وين طار مدري .. !!بعيده لكم بس مختصر جدا
اول رحله لاوروبا مقرر انها تكون عزابي
بعد عيد الفطر . شفت الشباب وشاورتهم . وعلمتهم كل اللي في راسي ..
ثلاثه غيري عزموا على الروحه ان شاء الله معي .
وقلت لا احد يقولي بروح الا بعد مايعطيني القطه
عشان مافي امل يهون . مانتعب الا على شي بين ..
المهم جلست على البوابه النمساويه اكثر من شهر
ماخليت ولا تقرير . ولا موضوع في الاستفسارات , الارشيف
الا شفته .
صار عندي تصور كامل عن النمسا وزيلامسي بالاخص
وجرتني مواضيع الاعضاء للبوابه السويسريه .. رحت
خشت مزاجي انترلاكن ..
وخذت شهر بعد في بوابة سويسرا
ادخل بشكل يومي ..
صار عندي تصور كامل عن انترلاكن والاماكن اللي حولها
جاء عيد الاضحى .. واجتمعت مع ابوعبدالله عشان نبدا نحجز الطيران
لازم نرسم مسار الرحله عشان نقدر نطلع الطيران
بس اسابيع من المشاورات .. والقرايه والاخذ والرد
صلمنا على ان ميونخ نقطة وصول ومغادره
يصير الجدول
يوم ميونخ
5 ايام رست
5 انترلاكن
6 زيلامسي
يوم ميونخ
قالوا اللي بيروح انترلاكن لا يروح لزيلامسي والعكس
وانا قلت بروح للاثنين كلها .. عزوبيه مايضرنا لو نمتر اوروبا كلها
عزمنا ..
رحنا نشوف مواقع شركات الطيران
الاماراتيه .. الاتحاد , القطريه , المصريه , الاردنيه , التركيه
اسبوعين نتردد عليها .. المهم يوم من الايام كنت في الرياض ..
مع العلم ان الرياض يبعد عني 250 كيلو تقريبا
دخلت موقع مصر للطيران . وحصلتها في 22 May
ب 1800 ريال
المهم ماقبل الموقع الفيزا حقتي
قلت ننقز لاقرب مكتب طيران ونخليه يحجز
نلحق على هالسعر ..
قال عطوني الجوازات
قلت معي بعطيك الاسم .. قال الكيرلاوي ..لا لازم صوره
قلت كل ... الخ ( مشفر )
رحت جبت جوازات الشباب بعد اسبوع رجعت الرياض
رحت المكتب انا وابوعبدالله
اللي شلنا الرحله من اولها لاخر حنا الاثنين . والباقيين مكبرين الوسايد
قبل لاووصل المكتب . دخلت بجوالي على موقع المصريه
حصلتها ب 1500
قلت الحق ياولد ..
نروح للكوفي اللي كان نقطة تجمع .. تخطيط والحجوزات والمشاورات كلها هناك
حجزنا عن طريق الموقع اخذنا ارقام الحجز ورحنا لمكتب طيران مصر على طريق الملك عبدالعزيز اتوقع .. وحاسبنا بالفيزا من هناك بنفس الحجز
خلصنا من سالفة الطيران ..
جاء واحد من الشباب خامس وقال بروح ..
وحجزنا له ب 1812 ريال تقريبا
وصرنا خمسه الحين
بعدها نلتفت للسكن عشان يمدينا نخلص من السكن .. عشان امور الفيزا
كنا في اول السنه الميلاديه باقي تقريبا 5 شهور تقريبا
خلصنا امور السكن بعد في اسبوعين تقريبا
طبعا ماكان لنا نظر نهائي في المدن .. كلنا متفقين على الريف
الريف وبس
جلسنا نحتري متى يجي قبل السفر ب اسبوعين عشان الفيزا
وقريت قريت قريت قريت عن هالفيزا لين شيب هدب عيني
في النهايه شريت راحتي وعطيتها مكتب بزود 200 ريال عن كل فيزا ..
حجز السياره كان عن طريق مكتب سكست في الرياض على خريص
طلعت فيزا الراجحي الفضيه .. بارزة الاحرف عشان احجز بها السياره
حجز السكن والطيران كان عن طريق فيزا تسوق الراجحي
انا موظف راجحي ماكان عندي مشكله في هالامور نهائيا ..
قبل السفر جانا خوي عزيز علينا .. بيروح معنا
حجزنا له طيران ب 1789 ريال تقريبا
جانا قبل مانطلع الفيزا وقبل مانحجز السياره
واضطرينا نلغي كل حجوزاتنا لاننا حاجزين 5 اشخاص
ونبي نحجز 6 اشخاص
الغينا السكن كله
وحجزنا من جديد
طلعنا الفيزا .. وحجزنا سياره من سيكست ل 7 اشخاص اوسع وازين
صار ظرف لواحد من الشباب كان مودينه تبع العمل للصومال . وكان المفروض يحي قبل شهر من موعد الرحله يمدينا نطلع له فيزا .. لكنهم مددوا له .. وكل هواء
المهم خيره . ماقدر يروح
خمس اشخاص في سياره ل 7 اشخاص
ويالله كفتنا حنا وعفشنا
خلاص صرنا جاهزين ننتظر يوم الرحله
شرينا الاغراض الضروريه للعزبه قبلها باسبوعين
شنطة عزبه
كاتم
تاوه
صحون
شطاف
افياش
وقبل الرحله بيوم . رحت وشريت
رز , مكرونه , طحين , نواشف , بهارات , ملاعق وكاسات والاشياء هذي
يوم الاثنين الموافق 21 مايو قبل الرحله بساعات اجتمعنا في البيت
عشان نرتب العزبه .. ونوزنها . ونضبط امورنا
نضبط العزبه . شنطتين وحده كبيره والثانيه صغيره
ونضبط الوزن عشان مايتعدى 23 كيلو كل شنطه
مسموخ لكل شخص 46 كيلو . مقسمه على قسمين 23 *23
ونوزن شناطنا وناخذ القارمن مع اني دخلت الاحداثيات قبل الرحله كلها
متجهين للرياض بعد العصر
وصلنا قبل المغرب ..
بعد المغرب رحنا للحلاق .. تضبطنا لزوم التميلح تعرفون
وبعد العشاء . حمام مغربي وتدليك ..
والساعه 11 رحنا لبيت الشوايه ..
الساعه 12 وحنا في المطار
الاذان كان قبل الاقلاع بدقائق .. اعلنوا عن الرحله وانتظرنا عشان نصلي قبل
امدانا نصلي جماعه في المطار ونركب الطياره بدون تأخير يذكر
الاقلاع تأخر شوي
وطرنا للقاهره
وصلنا للقاهره تقريبا الساعه 7 الصباح بتوقيت القاهره
موعد اقلاعنا من القاهره .. الساعه 10:45 ص
جلسنا في مطار القاهره , ونومه على الكراسي طال عمرك لين قبل الرحله
نومه يمكن ساعه او اقل .. ماتقدر تنام زين وانت على كرسي
المهم اعلنوا عن الرحله واقلعنا في الوقت المحدد
او مآي قاد
اول ظهوور .. للخضار
يمال الجنه البارده ياجدتي ..
ماحلمت اشوفها
اليانز ارينا .. كان فيه نهائي ابطال اوروبا قبل ثلاث ايام
وقفنا ووصلنا في الوقت المحدد 2:55 م بتوقيت ميونخ
ماكان فيه زحمه ابدا . ماقدامنا الا ثنين مدري ثلاثه
سؤالين . وين بتروحون .. وش عندهم ..
قلنا جايين ل كذا وكذا ..
المهم ختم جوزاتنا
حصلنا مدير مكتب مصر للطيران في ميونخ
ودانا للسير الخاص برحلتنا ..
خذنا شناطنا ..
ورحنا ندور اللي يفتشونا عشان يطلعونا من المطار ..
ندور ندور ندور ندور ندور .. ماحصلنا شي
المهم ونلقى مكتب وندرعم داخلين .
دخلنا ..!!
كلن يناظرنا .. الموظفين كلهم يناظرونا
ل 20 ثانيه ..
واحصل عندهم مصري وقلته قلهم يفتشونا وخلنا نمشي
ترجم لهم ..
رجع المصري وقالي يقولون لك ختمت جوازك .. قلت ايه
قال يقولونك " سقها " .. !!
وفعلا اشر لنا على الباب وفتحنا الا وحنا في وسط سوق . وشلون مدري
رحنا مكتب الاستعلامات , وين مكتب سكست اشرت على العماره الثانيه
رحنا للمكتب
جيت للمكتب .. قالت الرخصه . وعطيتها الرخصه السعوديه بس
وقالت بطاقه الائتمانيه . وعطيتها اياها ..
قالت وش التأمين اللي تبون . قلت زيرو
احسن شي مايندرى وش يصير ..
خصوصا ان السواقه من جنبها ..
المهم مدة المفتاح وقالت خلاص
قلت تستهبلين ..
قالت لا والله .. جعلني اقسم اني صادزه
وانا ماصدقت خبر . رحنا للمواقف
وحصلنا سيارتنا
حملنا الاغراض وطلعنا من المواقف عشان نركب القارمن
ركبناها ولقت الاقمار على طول
وحطيت شقة ميونخ . وتوجهت
ماكانت تبعد عن المطار ولا خمس دقايق
طبعا سياره زيرو .. مامشت الا 14 كيلو بس
يعني بنضبطها لهم ونرجعها ..
على طلبنا . ديزل تماتيك أحسن شي
كلنا اول مره نروح لاوروبا ..
بس كلهم سافروا قبل لاندنوسيا والفلبين وسيرلنكا ومصر وسوريا
الا انا .. ماعمري طلعت الا لسوريا وجلست اسبوع على السياره
طبعا ..
حنا في حلم . ولا علم .. استلمت الطاره وروحت
اقرب محطة بنزين وقف وعب ديزل ..

مساء الخير
طرح حلو وبدايه جميله
متابعين معاك اخوي الرسام
تقبل تحياتي

ALI_Q8_77
مساك الله بالرضا والنعيم
الاحلى مرورك
والحلقه الثانيه ان شاء الله قريب

حمدلله علي السلامه
متابعين ممعاك
شكلك ما سويت اضراب مثل حقين حائل ^_^
يا اخوي لحست مخي
وشلون الساعه 11 بالشوايه و12 رحتوا للمطار واحتريتم الاذان قصدك اذان الفجر
شكلكم اول بقاله نزلتوا فيها ما غير تطالعون وهوايل اول يوم في اوربا

تقرير رائع اخوي كمل متابعه لك اتمنى لكم رحله موفقه يارب وعسى ربي يستر عليكم

تقرير روعه وباين عليه جميل
وياليت تقولي كيف حجزت السكن من اي موقع وبالاخص الشقه الي في ميونخ شكلها كبيرة وجميله
وكمل وحنا معك متابعين

فيصل
هلا هلا بفيصل
والله قاطعت ع الخفيف
فرعي بعيد عن الزحمه دايم بمركز
يعني دايم مضربين
والله اللحسه اني كتبت رد بصوره وطار ماانحفظ
وعصبت وكتبته ع السريع
اي نعم السفر كان الفجر
والساعه 11 وحنا نتعشى ببيت الشوايه ع الدايري الشرقي
ومشينا بعدها وجت 12 وحنا عند المطار

ام عبدالسلام
الله يسعدك يارب
متابعتك شرف

فيصل
بالنسبه لاول بقاله
لا تقول
صرت اشوف كل شي فيه كحوول
مسوي مثقف اقرا كل شي