- السلام عليكم ورحمة الله وبركاته
أخواني عشاق اندونيسيا
السلام عليكم ورحمة الله وبركاته
كنت في اندونيسيا الفترة اللي راحت وتوي راد من اسبوع تقريبا و إن شاء الله إن ساعدني الوقت أعدكم بتقرير متواضع عرفاً لكل الأعضاء الذين أطلعت على مواضيعهم الرائعة والشيقة وعرفاً لهذا المنتدى
أنا بصراحه جاي وجايب معي خبريه و إن شاء الله ما تطلع قديمه وأطلع جايب العيد على هالخبريه ويصيبني أحباط من بدري ولا عاد تشوفون وجهي ولا به تقرير ولا أي حاجه ، ، وإذا هي جديده فيحق لي فيها قصب السبق وشوفوا وش استاهل عليها
المهم أنا لما كنت في اندونيسيا كنت أعاني من مسألة شحن البطاقة بشكل مستمر بسبب الإتصالات مع العمل والأخوة والزملاء وبعض الملاقيف اللي يحبون يعرفون كل شيء بوقته ،، السواق اللي كان معي حس بمعاناتي وقال لي وش تستخدم قلت له تعوذ من الشيطان حنا جايين سياحه بس وش تستخدم ما تستخدم ،، قال لا لا انا سؤالي عن جوالك الإندونيسي قلت له من هذي وجاي بسيطه أستخدامتنا ما تعدت السمباتي (simPATI)
قال لي فيه طريقة أعملها وتريحك بشكل كبير وتوفر عليك وتكلم دولي كأنك تكلم داخل إندونيسيا
قلت له ويش الطريقة
قال لي تضيف قبل كود بلدك من غير الصفرين أو + رقم (01017)
بشكل يصير الرقم بالطريقة هذي على كود السعوديه (01017966) الخ وراح يوفر عليك تكلفة الإتصال ،، أنا بصراحه جربتها وفعلاً وفرة علي المكالمات بشكل رهيب وأرتحت ،، وحبيت أنقل المعلومه هذي لكم.
أتمنى أني جيت بالجديد وما جبت العيد وما أتفشل وتطلع قديمه
ولكم تحياتي
متعب العنزي
شكراً لك أخي متعب وفعلاً الكود يوفر في الاتصال كثيراً ولكن عيبه تردد الصوت ولكن يبقى خيار جيد
وهناك أكواد أيضا للشركات الآخرى مثل منتاري وغيرها