المغرب المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
حيو مافى زيو
09-12-2022 - 06:56 am
  1. السلام عليكم ورحمه الله وبركاته

  2. خف المطر شوى بس لسا الواحد ما يقدر ينزل وكل الناس فى سيارتهم جالسين


السلام عليكم ورحمه الله وبركاته

اسمحوا لى اخوانى الكرام بان اشارككم بهاذا التقرير المبسط املا ان يحوز على رضاكم
حقيقه كانت لى هذه الرحله يوم الجمعه 21 / 05 / 1433 الموافقق 13 / 04 / 2012 والتى لم تكن على البال او الخاطر وبدون اى تخطيط او نيه مسبقه وبدايه القصه كانت بعد عودتى من صلاه الجمعه استقبلتنى المدام بلسته طويله عريضه من اغراض المنزل وقالت روح جب الاغراض هاذى من كارفور على بال ما اجهز الغداء بعد ساعتين
خرجت من المنزل وكان الجو بعد عودتى من صلاه الجمعه حار ومشمس ولكن بعد خروجى من المنزل تفاجأت بهبوب رياح منعشه نوعا ما قادمه من الغرب ( محمله برائحه المطر ) وبحكم موقع منزلنا فى غرب الرياض نظرت للسماء فوجدتها غائمه على الاجزاء الغربيه من الرياض وتحديد منطقه المزاحميه ونساح فقلت فى نفسى يا حظهم والله يرزقنا ويرزقهم من واسع رحمته
وانا جالس احمى السياره اخذت نظره لقائمه اغراض المنزل ووجدت انه يتوجب على الذهاب الى السوبرماركت وبعده الى سوق الخضار وبعده الى الملحمه ومن ثم الى سوق السمك ونظره فى القائمه ونظره الى السماء وبعدها قلت لنفسى .. كارفور وسوق الخضار قاعدين فى محلهم بس الاجواء هاذى ماهيب قاعدتن لك .. فقلت ياولد لبدنك عليك حقا ورميت ورقه الاغراض فى الدرج وانطلقت صوب المزاحميه
واليكم الصور
صوره سابقه للطريق

دخلت المزاحميه ومسكت طريق الخراره على قوله اهل نجد ( الخرار ) على قوله اهل الجنوب ومع هالاجواء الماطره راحت ضيقه الصدر وبدأ القلب يخفق والعين تترقب واللسان يدعوا الرب بالرحمه والمغفره

وصلت للموقع بالسلامه

وحقيقه كان المكان مزدحم واثر الناس كلهم ضايقه صدرورهم مش بس انا .. وقلت خلنى انزل للروضه استكشف الخرار

الابل ترعى

من داخلها وما زالت الامطار تمطر بشكل خفيف

وجدت هذه الشجره وقلنا بعد اسبوعين لا اعشبت الارض جبنا عبدالعزيز واخوانه بس الله يعينا على التنظيف .. والله شئ يقهر بس حطوا فى بالكم تراها محجوزه من الحين

المهم فريت ما لقيت اثر للخرار وسالت ناس قالو فى طريق انشى حديثا وقطع الخرار عن المنطقه هاذى وصارت المويه محجوزه خلف الطريق قلت يالله خيره
وبعدين قلت لنفسى خلنى اطلع من المنطقه المنخفضه هاذى لانالمطر شد شوى وخفت فقلت اشوف لى مكان مرتفع نسبيا

شباب ينسمون كفراتهم .. ونصيحه نسم من بدرى فيه ناس كثير تعلقوا والسبه انهم يعتقدون ان الارض ممطوره ما يحتاج الواحد ينسم والبعض يكابر يقول دفع رباعى ما يحتاج .. فنسم وريح سيارتك ونفسك وهالله الله بالركاده

هاذا مغرز بس الشباب ما قصروا فزعوله .. وصراحه فيه فيه كثير يعتبون على بعض شبابنا ولكن للحق غالبيتهم اهل فزعه ومواقف والله يعطيهم على قدر نيتهم

ان شفت هاذا لحاله قلت خلنى افزع له

بعدها اخترت موقع مرتفع وقلت اجلس اتفرج شوى واترقب .. وبعدها شد المطر ما شاء الله
والحمد لله خير
واستمر قرابه نصف ساعه مطر غزير وما يمديك الا تجلس فى السياره وكانت الساعه 2 الظهر تقريبا

ماشاء الله تبارك الله .. يالله لك الحمد .. وتلاحظون المياه تصب فى الروضه لين صارت بيضاء

خف المطر شوى بس لسا الواحد ما يقدر ينزل وكل الناس فى سيارتهم جالسين


بعدها وقف المطر واتجه السحاب الى غرب الرياض ( حينا ) قلت ياولد الحقها واروح مناك وادى حنيفه بس بعدين قلت لا اجلس واحمد ربك على ما جاك وبينى وبينكم ولعت لمبه الكافين عندى وقلت هاذا مكانى واحط فراشى ومركاى

ونظبط الدله فى ها الاجواء

شايفين الجيب القديم اللى تحت ... هاذا له قصه بعدين اقولكم عليها

هاذا جاء جنبى وغرز .. قلت على بال ما تجهز القهوه نروح نساعده

بعدها تقهويت وزبطت بارد الشاى واحلى جلسه

لكن عكر مزاجى راعى الجيب اللى قلتلكم عليه ... شوفوا بالله وش قاعد يسوى .. قاعد يفحط جوات الروضه على الزرع وصوت العادم مزعج جدا وكل الناس والزرع تاذت منه

وبصراحه مصخها شوى وارتفع ضغطى ولكن دواه عندى ... واعطيه وحده دعوه ياشباب لا احد يفهمنى غلط ههه
وشوى الا موقف موتره وجاى رفيقه يسحبه وقلنا الحمد لله افتكينا منه

ولكنه نتع السياره واشتغلت مره ثانيه لكنه ما تاب !!! ... ورجع مسلسل الازعاج

ولكن عطيته الحين وحده من قلب دعوه ياشباب لا احد يفهم غلط ههه
ورفعت يدى وقلت يالله انت شايف وش يسوى يالله المكينه ..
ومافيه غير دقيقه الا انفجرت المكينه .. دعوه يا شباب هاه

وفك الباب وانحاش وهو يصيح ويولول ههه .. وارتفعت اصوات السيارت والناس والاطفال ضحكا عليه وفرحا ان الله فكنا منه .. وطابت لنا الجلسه

وجاه خويه يبى يفزع ... والله لو تجيب مين .. كان خذيتها من قاصرها وروحت .. وارتحت

وارتحت وتقهويت وانبسطت

لين جانى هاذا !!! لاحول الله

قلتله بتروح والا اعطيك وحده قال وش وحده قلتله : هاه بياله شاى ههه قال لا شكرا متقهوين
الا ياولد قال تسلم وراح ههه والله فكنى منه وفكه منى
الناقل الحصرى

بعدها قرب المغرب طالعت والا .. ذيك العاصفه الى جايه

والم عفشى بسرعه واركب السياره

وانطلقوا الناس مذعورين وتعال وشوف .. وش السالفه تراه غبار اول مره يعنى .. متعودين

وانقلب الوضع الى ليل .. وقلت ياولد بما انك عزوبى فيه ناس كثير من الربكه وسياراتهم صغار غرزوا فى الرمل واغلبهم عوائل قلت خلنا نساعد الشباب الطيبين اللى ما قصروا تلقاهم هنا وهناك كل واحد يساعد الناس .. مش راعى الجيب اللى اذى الناس وازعجهم

وبعدها مسكت خط العوده للرياض .. وحاله استنفار من رجال الامن الله يقويهم

ورجعت للبيت وما جبت من اللسته الا صندوق طماط شريته من احد مزارع المزاحميه

وقامت المره تقول وش عندك تقول مشغول وما جبت لنا الا ها الصندوق بس فاتتك الامطار واخذنا غدانا ونزلنا عند عمى ( الوالد ) وتغدينا فى بيت الشعر والاولاد لعبوا فى الحوش ...
قلتلها انا رحت للخرار والحمد لله انبسطت .. فكت الموال عاد .. انت تحب نفسك ومدرى وشو .. قلتلها بتروحين والا اعطيك وحده .. قالت منهى ذى واعلمها بالسالفه واوريها الصور .. ما تت من الضحك وقالت لا خذ راحتك اصلا لو قلت ما كنت باطلع لان الاولاد تعبانين
واصلا السياره هاذى جدى مات وهى باقى شغاله .. قلت والله اللى راحت تشليح اذكرى الله .. يعنى انت خليت فيها شئ
وهاذى كل السالفه واسف جدا على الاطاله والمعذره لو بدر قصور فقد كتبت هاذا الموضوع على عجل
شكل ما احد بيرد تراها مصادفه ياشباب ولا دعيت ولا شى بس اتفرج واصور ههه .. والا الهلال فاقع مرارتى من زمان بس ما قدرت فيه ههه كل سنه بطوله


التعليقات (9)
فيصل
فيصل
لا تعطينا وحده خ
الهلال يا رجال ما قدروا عليه
صراحه جو خيال ما شاءالله
يوم جمعه وصادفت دعوة الناس يا اخي نبي ننبسط بلاش ازعاج قسما بعضهم ما ادري وش يحس فيه
من الفجر عيني علي التقرير متي ينزل

حيو مافى زيو
حيو مافى زيو
فيصل
هلا بك اخى الغالى فيصل ونور التقرير
والحمد لله انهم قله والله يهديهم .. واذا واجهت احد منهم عطنى خبر بس
( واحد ما خذ مقلب بنفسه )
وتقبل خالص الشكر والتقدير

ام عزيـــز
ام عزيـــز
ما شاء الله ..
موضوع ممتع و خفيف ,, و كان التصوير ماشاء الله معطي الموضوع حقه ..
كثير طلعات مفاجأه تصير احلى من اللي تستعد لها ..
سبحان الله شلون تغيرت الاجواء ,,
و الحمدلله ما تأذى احد ..
يعطيك العافيه .. و تحيه خاصه ل ام عبدالعزيز ..
.
.
.

حيو مافى زيو
حيو مافى زيو
ام عزيز7
ياهلا والله بمراقبتنا الفاضله ام عزيز واسعدنى تواجدك
وبالفعل حلاوه الرحله من غير تكلف .. بس اهم شى توفر الاساسيات
وبنوصل تحيتك لام عبدالعزيز .. ولو انى المح فيها بوادر تعاطف .. بس لا تخافين تراهم كل اسبوع لازم لهم طلعه
تحياتى لك

ام عزيـــز
ام عزيـــز
ما شاء الله عليك ..
و صدق المثل القائل " وراء كل رجل عظيم امرأه "
.
.
.

خالد ابو مشاري
خالد ابو مشاري
ماشاء الله
تقرير خفيف وجميل
ومناظر رائعه
يعطيك العافية ابو عبدالعزيز
تحياتي لك

ياسمينة ستي
ياسمينة ستي
ههه
احلى تقرير واحلى وحدة ههه بس لاتعطينا شي خ
تقرير روعة الله يسلم هالايدين والتصوير اروع ماشاء الله
الصراحة مشكلة لما يروح الواحد عشان يستانس ويلاقي انواع الازعاج الله يهديهم بس
مشكلة التغريسات اغلبها لما تكون الارض ممطورة شوي سطح الارض ممطور والي تحتها لسه ماوصله المطر
كده الناس تحسب مابه تغريس وتفحط وتعلق طبقة الطين الممطورة في الكفر ويغرسون (معلمة سواقة)
يعطيك العافية مشرفنا امتعتنا بالسوالف الحلوة

**نونا**
**نونا**
يسعدك ربي..
المطر وماأدراك ماجمال هاللحظات..
وزين انك رحت انبسطت الله يديم هالوناسة..
اما وحدتك ذي تخوف..
يعني ننتبه!
عساك دوم على القوة مشرفنا..
الف شكر..

زائر
ما شاءالله ام العيال تطلب اغراض وانت تقط الورقة بالدرج ههه
ما شاءالله روعه مكانك والمطر يونس بس العاصفة بعيدن يعني صارت السيارات طين
وبس عليك وحدة صج اللي يؤذي الناس يبيله وحدات
شكرا على التقرير الجميل الممتع عليك بالعافية


خصم يصل إلى 25%