- وسكنا بفندق الكامبرلاند
- لمعرفتي مسبقا انها اكبر لانها من نوع الاكتزف روم والترقية اتكون مجانا
السلام عليكم ورحمة الله وبركاته
الصراحه مادري شكتب او شقول لان بجيني انهيار عصبي
تخيلو كان بس باقيلي اكتب العنوان واظغط اوكي وفجأ ينمسح كل شي
الصراحه قمة في القهر احس نفسيتي من البداية تصكرت تجاه التقرير الي بكتبه اذا هذي اولها ينعاف تاليها والله
بس ما اقول الا الله يعين
يكفي ان مركز التحميل مادري شسالفته واظطريت احمل من موقع ثاني صوره صوره
المهم مالكم بطويله
تقريرنا اليوم هو عن لندن وباريس
المسافرين اثنين انا وواحد من ربعي
السفره من البداية كانت لي انا بس لان عندي امتحانات بقدمها بلندن بلجامعه وبرجع مجرد كم يوم
بس صادفت صاحبي عنده اجازة وحب يرافقني وانا رحبت بلفكرة لان راح يونسني بسفره
الرحلة من 10 يناير الى 19 يناير مقسمه بين لندن وباريس
الناقل الخطوط الجوية القطرية
صور من داخل الطياره
صور من سماء الدوحه
صوره ثانية لطياره من داخل
صور لوجبة الطيارة
وصوره للسناك الي قدموه لنا قبل الهبوط
صوره من سماء لندن قبل الهبوط
وبعد ما هبطنا وخلصنا الاجراءات وهي كانت قمة في التنظيم والسهوله كلعاده
اخذنا تكسي الى الفندق
وسكنا بفندق الكامبرلاند
والحجز كان عن طريق مكتب السفريات بدوحه وصاحبي هو لي كان حاجز ومتكفل بسكن الله يعطيه العافيه مع ان منطقتي الي ساكن فيها مب بعيده من لندن بس ماحب يثقل علي خصوصا ان هذي اول زياره له الى بريطانيا واوربا عموما وكان حاب يستمتع باجازته
وقبل لا انتقل الى صور الغرفه حاب اعتذر اني ماصورت اللوبي او الممرات لاني اول مره كنا تعبانين وبعدها نسيت اصور بس الي حاب يطلع على الفندق في صور له بموقع بوكنق من غير الاعضاء الله يعطيهم العافية زاروه من قبل وتكلمو عنه
والحجز كان غرفه من نوع استاندر ولاكني كنت حاط ملاحظه اني ابي غرفة لذوي الاحتياجات الخاصه
لمعرفتي مسبقا انها اكبر لانها من نوع الاكتزف روم والترقية اتكون مجانا
بس ثاني يوم بصدفه نسيت المفتاح بلغرفه ويوم نزلت تحت اطلب منهم مفتاح جديد
قابلت وحده هندية تشتغل هناك وطبعا عطيتها رقم الغرفه وعطتني المفتاح بس قالتلي حجزك استاندر وانت بالاكتزف روم وان لازم تدفع زياده على اليوم 30 باوند بس انا قلت لها اني تكلمة مع واحد اسمه باول ووحده ثانية بعد وماقالولي شي خصوصا ان من قوانين الفندق اذا الغرفه متوفره يقدرون يأمنونها لي فبعدها اسكتت واعتذرت وسبب ذكري لهلحادثه اني لاحظت البعض ومب الكل من الهنود اذا شافوك عربي يحبون يغلون عليك وهشي لاحظته مع كم واحد اكتبو مواقفهم من قبل وكانت مع الهنود الي بلفنادق
واناما ابي اجمع لان للامانه كان في وحده سيرلانكيا مسلمه كانت ما اتقصر برسبشن باي شي وتسال عنا دايم وارجع اتكلم عن الغرفه
ومن غير ان غرف ذوي الاحتياجات الخاصه اتكون اكبر لانهم يستخدمون الكراسي المتحركه بتحركاتهم فلغرفه اتكون مصممه لراحتهم لاهشي اخترتها وبحكم ان صاحبي مومتعود على فنادق اوربا الي اتكون ضيقة بعكس فنادقنا بلخليج او بشرق اسياء اتكون الغرف اكبر
وانا جربت الغرفه الي بسرير زوجي من قبل واكثر من مره فعطيتهم رقم الغرفه ولاكن للاسف كانت محجوزه فشافولي غرفه ثانية من نوع التون باد او السراير المنفصله
وللامانه هي افضل بحكم ان انا مو ابروحي بلغرفه مع ان الغرفه الي بسرير زوجي اتكون اكبر
والحين بعد الشرح الزايد
ننتقل الى صور الغرفه
صور من زوايا ثانية
صور للخزنه ولو لاحظتو انهم امخفضين مكانه ليسهل استعمالها لذوي الاحتياجات الخاصه
الثلاجة ويكون فيها مياه غازية ومياه معدنية وهي مجانا طبعا
تلفوناتي
اطلالة الغرفة
اطلالة الغرفه من زاويا ثانية واتبين لكم الهايد بارك
والحين ننتقل الى الحمام ((الله يكرمكم))
ومثل ما كنتو شايفين الحمام ((الله يكرمكم ))
مصمم لذوي الاحتياجات الخاصه واما الحبال الي بلون الاحمر فيه مثل اجراس تنبيه لو ظغط عليها
على طويل يتصلون فيك الفندق ويتاكدون من سلامتك لو حصل اي طارء ولو مارديت على طول يتجهون للغرفه ويساعدونك لو انت محتاج اي مساعده
وانا جربت من قبل وسحبت الحبل مره وعلى طول جاني اتصال من الفندق يتاكدون على سلامتي ولاكني اعتذرت لهم وقلت لهم بلغلط وانا كنت ابي اجرب سرعة استجابتهم
وبعد ماريحنا بلغرفه
طلعنا وقلنا بروح لاحد مقاهي الاجوار رود علشان ناخذ لنا شاي نعناع وشيشة بحكم ان احنا من مدخنين الشيشة
وهذي بعض الصور من طريقنا للجواررود او شارع العرب
وهذي صور لشارع العرب
واستقرينا على مطعم ومقهى قصر النخيل وهو الي بعد الصرافه
ماقدرت اصوره عدل لان جدام المطعم في ناس وماحبيت ازعجهم بتصويري
وقررنا ننزل الطابق الي تحت مع ان كانو للحين مب فاتحين لان ماينزحم الا بليل بس بحكم معرفتي فيهم خلونا ننزل
ومثل ما انتو شايفين ماقدرت اصور عدل بحكم ان للحين ينظفون
واحلى شاي لكم
وبعد الشاي قررنا انروح لهارودز
بعد ما اتمشينا بهارودز وغيرت بعض الاشياء الي كنت ماخذها قبل من عندهم وبحكم انشغالي ماقدرت اصور داخل الا صورتين
الاولى لاميرة ويلز الاميرة ديانا وخطيبها عماد الفايد او دودي الفايد والصوره اتبين خاتم اميرة القلوب ديانا
والصورة الثانية الي للحين مومستوعبها وكل ما اشوفها افكر فيها
وهي صورة الخشبه المشهوره بهارودز الي يقولون عمرها 30 مليون سنه
للامانه الموضوع مو داخل مزاجي لان اذا حضارة الفرعنه صارلها 5 الاف سنه وهي من الحضارات القديمة
فاشلون بخشبة صار لها 30 مليون سنه
لهشي عندي اساله اتمنى الي يعرف الاجابه عليها لا يبخل علي
اولا اشلون اصمدة هذي الخشبه كل هلعمر
وثاني شي من وين جابوها
واهم شي اشلون اعرفو عمرها
وبعد ما كملنا تمشية في هارودز قررنا نتقهوة في اشهر كوفي شوب بهارودز
اكيد عرفتوه وهل يخفى القمر مافي غيره لادوريه
طبعا ماقدرت اصور من الزحمه وهتصوير من الجوال
وصورة لطلبنا
طبعا انصحكم ما اتفوتون كيكة الورد لانها فعلا لذيذة
وبصيف اتكون كيكاتهم بلحجز لدرجة انك تحجز الكيكه قبل لا اتحصلك كرسي تقعد عليه
وبعد ما تقهوينا قررنا نطلع واتمشينا اشوي بنايس بردج
وبعد ما اتمشينا قررت اروح الى لندن اي
ولان صاحبي كانت امنيته يشوف البق بن وانا وعدته ماينام الا وهو شايفها
فاخذنا اقرب تكسي الى لندن اي او عين لندن
ولاكن مع الاسف لندن اي كانت وقتها صيانه مثل ما انتو شايفين لغاية 25 يناير
واحنا كنا بنقعد من 10 يناير الى 15 يناير وبعدها بننتقل الى باريس
لهشي ماحالف الحظ صاحي انه يجرب ويركب لندن اي اما انا فركبتها من قبل
وبعد ماوصلنا قررنا نمشي من لندن اي الى البق بن
وهذي صورتين من تمشايتنا
ماحاولة اكثر الصور وايد بهلقسم لان راح نرجع لهلاماكن ثاني مره وراح تستمتعون بصور اجمل ان شاءالله
وبعدها دخلنا قسم الالعاب الي قريب الاكواريم ولاكن مع الاسف ماصورت لان التصوير كان ممنوع
بس ماخليتها بخاطري ورجعت لهم ثاني مره بيوم ثاني وخذت صور لكم
وان شاءالله بحطها بيومها
وبعد ما اتمشينا ذبحنا البرد وذبحنا الجوع
فقررنا ناخذ تكسي ونرجع للفندق واول ما وصلنا قررنا ناخذ شي سريع قبل لا روح الغرفه
فوقع اختيارنا على مطعم كنتاكي وللاسف من الزحمه والتعب ماقدرنا انصور
ولاكني صورت لكم عشانا
والى هنا وينتهي يومنا
وان شاءالله الجاي احلى وادعولي ان لي صارلي اليوم ما يتكرر ثاني مره
واتمنى التقرير المتواضع ينال على رضاكم
وان شاءالله بحاول كل يوم انزل حلقة علشان ما اتملون
واشوفكم بكرا بحلقة جديده ان شاءالله
اخوكم
alma3ani
