الكويت المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
توبليرون
05-12-2022 - 04:53 pm
اهلا فيكم في موضوعي الاول بهذه البوابة
بوابة الرحلات وان شاءالله التقرير يكون بالمستوى المطلوب
راح نشوف يوم في بر الكويت ومخيم عائلي
يوم الجمعة كانت لنا جمعه عائلية ببر الجليعة بالكويت حيث تكثر المخيمات العائلية في هذه المنطقة
كما في جميع اماكن التخييم بالكويت واللي تبدأ مواسمه في بداية شهر نوفمبر الى نهاية شهر مارس
واجنا عادة نروح بوقت الغدا الى منتصف الليل والعوايل ترجع للمبيت في البيت وبعض الشباب ينام بالمخيم
وبعطلة نص السنة يكون ذهابنا يوميا وبنفس الطريقة ما نبات في البر بس بعض المرات يصير اتفاق للنوم
والمبيت هناك وفي عوائل تنام في البر
نشوف يومنا ومخيمنا
هني اول ما دشينا البر لازم تشوفون هالمنظر تأجير بقيات

مخيم وبقي

خزان ماي وخيام ومكينة اساس لوازم البر

الاغلبيه هالسنة حاطين الشبك الاخضر ليكون حلجز لحماية الاطفال من السيارات

اول ما وصلت لقيت اخوي قاعد يرتب خيمة الطعام اهو وضيوفه من سنغافورة ربعه بالدوام مع حريمهم تعرفت على الحريم
ولقيت اساميهم عربية مثل.. وحيدة ام حليم..وسوارينا ام زكي
والاول ما عرفت الا اسمه ابو حليم ...والثاني زول او زكي

سياراتنا بره المخيم

داخل الخيمة الرئيسية

الغدا وطبعا جاهز من البيت

مجبوس لحم ودياي

مربين

الدقوس وشوربة العدس لزوم البرد

توابع ضروريه

سلطات

قفشتي علشان تعرفون اشلون انا مسويه ريجيم

اللبن المنعنع.....والماي

وبعد الغدا اشتغلت نشاطات اليهال عيال اخواني
الطيارة شوفوا اليهال كل واحد ينطر طيارته مجابلين ابوهم

وانتهت وحدة

وطارت الطيارات يا حلو علم الكويت دايم مرفوع ان شاءالله

يتبع


التعليقات (9)
زائر
تابع
وبعض الحلويات للعصرية

ومكسرات

والنفيش او الفشار او البوب كورن بالجبن

وعقبها انفخوا النطاطية

صار المغرب وغروب الشمس

حشرة البو بشير ......البنات خافو منها لما قلت لهم تبشركم بالنجاح استانسوا

والكبار الكل يتسلى بشي نشوفهم
الايباد

الدومينو

والعرب المسافرون تبعنا

وتوبليرون في موضوع الشكولاته

وكيكتي

وصار لازم الدوة والشاي المخدر
والحليب

والكستن المشوي

يا ويلهم من الحجية اللي يكسر كرسي يجيب بداله 2

البر بالليل والاضاءة والجراغي ما لحقت اصوره عدل

واهل الدومينو للحين يلعبون

البقي بالليل

وبدأت لعبة الحماس اللي ما استغني عنها خ قلت لهم ما ابي العب
ويوم شفت الحماس زاد نزلت الملعب ومع الصفقة لاني حريفة فيها خ
لعبة المحيبس
وهي اخفاء الخاتم في يد واحد من الفريق وعلى ((الابو)) رئيس الفريق الثاني اخذه علشان يلعبون و
كل مرة ما يلاقي الخاتم تحسب عليه نقطة ......واذا اخذه يحسب له نقطة
وهني الفريق الاول وهم مشترين الخاتم ب8نقاط تسجل للفريق الثاني لكي يبدأون باللعب

ومحاولة سماع من ابو الفريق الثاني لما يدور في الفريق الاول لمعرفة مكان الخاتم

مغاسل خمس نجوم خ

وبعد لعب المحيبس تعشينا وكنا طالبين عشا
اللي مشى البيت واللي قال بسهر وابات بالبر اكيد هذا الشباب
اتمنى ان يكون التقرير عجبكم
واذا صارت انشطة ثانية ان شاءالله بحطها لكم

أعشــق أموآجــك يآبحــر
أعشــق أموآجــك يآبحــر
الله عليك روعة آجوائكم وفعلا البر له طعم خاص هالايام ... استمتعت ووياك وانا اقرأ تقريرك .. وماشاء الله عليكم ترتيب ونظاافه وكل لوازم الرحلة وهذا اهم شئ .. تصدقي احنا لما بنروح للبر لازم كل شئ ينطبخ هنااك من فطور وغداء وعشااء مافيه غير الحلى والمعجناات اللي بنجيبها ويانا لكن كله نسوويه في البر حتى السلطات وعجبتني مغااسل خمس نجوم عيل لو شفتي مغااسلنا سبع نجووم ....

زائر
فصل علي المنتدى وانا اعدل بالصور ..
فهذه صورة من الجزء الاول طلعت صغيرة وهنا ان شاءالله تكون مضبوطه

وهذه صورة ايدي الفريق الاول اللي غلبنا طبعا لاني ما كنت لاعبة بدري مع فريقي
والا جان ما وصلوا للعشرة
اي لازم يكون عدد نقاط الفوز 51

وهذيل شباب المخيم قالوا الا تصورينا وتحطينا بالمنتدى
وانا رأفة بكم شلت وجوهم خ

وسامحونا على القصور

زائر
أعشق أموآجك يآبحر
اهلا فيج يا عاشقة البحر ...اشوفج غيرتي من الهدوء للامواج
اكيد تشجعتي من د.معمارية ما شاءالله عليها
البر هذه ايامه وهذه وناسته والحين جوه
اما الترتيب واللوازم اذا ما في ما في احد يجي البر تعلمنا
لا وابشرج ركبوا لنا سخان للماي الحار
والطباخ احنا ما نروح بدري نطلع على وقت الغدا ويكون الغدا جاهز ناخذه معانا بس اللي ينامون بالبر وخاصة ايام العطل يطبخون هناك كل شي
واذا ان شاءالله ونمت بالبر اصور لك كل ما نطبخ هناك
شكرا لمرورك الكريم

ام اللولو
ام اللولو
روعه ماشالله يازين البر وطلعاات البر لها طعم رائع الله يهنيكم

بوحميـــــــــد
بوحميـــــــــد
يا مااحلى جمعة الاهل وسط البر وربي لحظات لاتنسى
الله لايفرقكم يا ام يوسف
والحين اخر الليل ومنزله لنا اكل وحلويات وش اسوي بنفسي الحين
شكلي اقرب بقاله وتصبيره لوزين ههه
يعطيكِ العافيه مميزتنا
وتقرير بغاية الروعه وكل الشكر لكِ ام يوسف
تحياتي لكِ

زائر
ام اللولو
يسعدك ربي على هالمرور الاروع
اشكرك يا ام اللولو

زائر
بوحميد
الله يسلمك اخوي بو حميد
افا الغدا والحلو يوصلك برعصة زر خ
الله يعافيك ويسعدك على المرور الرائع

F.A.H.D
F.A.H.D
ما شاء الله تبارك الله..
اجواء جميلة ولحظات حلوة..شكراً اختي ام يوسف على مشاركتنا اياها..
الله يجمعكم دايم على كل خير..
تحياتي وتمنياتي لك ولعائلتك الكريمة بالتوفيق.


خصم يصل إلى 25%