لمتابعة الموضوع الأساسي بالردود
https://artravelers.com/p/re/645132 أحببت أن أضع لكم تقريري التفصيلي كباقة عرفان لما قمتم به معي من
مساعده ونصائح وتوجيهات قبل رحلتي..
وليس بيدي إلا أن أضع هذا التقرير..أقل مايمكن تقديمه
ف من القلب..اشكر كل من كتب أي تقرير او معلومه بهذا المنتدى الذي يعتبر أكبر مرجع لكل مسافر..
وأخص بالشكر _ أبجديا:الأسفار متعتي- المغادرون - أبو ساره – خليلها – زازازا - صوت السهارى -
ماجد الفهد – وافي في زمن جافي ..والجميع بلا استثناء
وبخصوص تنسيق الصور..
أشكر ماجد الفهد على موضوع دروبكس مره ممتاز
وأشكر صاحب هذا الموضوع اللي افادني حيل
بالشرح وبالصور(تصغير الصور+وضع اطار+وضع توقيعك) ،بخطوه واحده ولو كانت الف صوره ، تفضل "Arial">/
التخطيط للسفر:طبعا السفر لماليزيا كان يراودنا منذ العام الماضي..وبالفعل قمنا بحجز التذاكر ذهاب وعوده على الماليزيه.. عن طريق مكتب لصديق زوجي..
ولأننا قررنا السفر قبل الرحله بأقل من شهر لم يجد صديق زوجي الا الماليزيه
و جاب لنا تذكرتين بقيمة 6 الاف ريال.
ولكن تكنسلت السفره فقمنا بالغاء الحجز ..وقامت الخطوط الماليزيه بارجاع
المبلغ بعد ان خصموا منه 500 ريال
المهم ولله الحمد قررنا السفر هذا العام.. وكان التخطيط من بدري (قبل الرحله بأكثر من 3 شهور)
ولكن كان تخطيط سيء و فاشل كله مني ههه للأسف وطلعت تذاكرنا غاليه
قمت بحجز الذهاب بتاريخ 4سبتمبر على الماليزيه دايركت من جده الى
كوالا ..تذكرتين ذهاب بقيمة 3900 ريال..الحجز كان عن طريق النت
وكنت شايفه حجز على الخطوط السعوديه عوده للشخص 800 ..وانا على بالي 800 رييال اصلا
ماناظرت للرمز وشو دولار او ريال.
واقول بنفسي والله صادقين العرب المسافرين كلما حجزنا بدري كلما كان ارخص بس
عيا موقعهم لا يقبل الفيزا ابد..قالي زوجي دقي على رقمهم ودقيت قالي المقعد بألفين وشوي قلت
انا شايفتها بالنت ب800 قال يمكن دولار قلت لا ريال
قلت خلاص شكرا باي وطراخ سكرت السماعه وطيران على اللاب
والا فعلا دولار
وأكلم زوجي وأقوله ايه ترى دولار قلت ها عندي فكره (نقطينا بسكاتك بس ) المهم
قلت له عندي فكره نرسل للماليزيه ايميل نقولهم يعدلون حجزنا يخلونه
ذهاب وعوده ويصير المقعدين ب6 وشوي. وراسلهم زوجي بس
تأخروا مره ماردوا الا عقب اسبوعين أو زود..
ولما تأخروا زوجي راح لمكتب للخطوط وحجز العوده على السعوديه
بتاريخ 23 سبتمبر دايركت من كوالا للرياض .. تذكرتين إياب
بقيمة 4200 ريال.
وعقب الاسبوعين جانا ايميل من الماليزيه بخصوص التعديل للحجز وكذا
رد عليهم زوجي انكم تاخرتوا وشكرا خلاص حجزنا على خطوط ثانيه
بعد فتره ارسلوا ايميل اب قريد للرحله. اقولكم قصته تحت.
المهم عشان كذا كان تخطيط سيءموب على نفس الشركه يعني الذهاب على
خطوط والعوده على اخرى.. بحكم ان عيدنا بجده لان اهل زوجي ماشاءالله
كل العشر الاواخر يقضونها بمكه..فكنا مضطرين نحجز ذهاب من جده..
والعوده عاد على الرياض حيث أن عمل زوجي يبدأ بعد يومين من عودتنا
وكان أهم شي عند زوجي الرحلات تكون دايركت مايبي مرمطه بالمطارات .
الزبده
خط السير: جدة- كوالا – الرياض
المسافرون:انا وزوجي
مجموع التذاكر الدوليه:0ريال
طبعا مثل ماقلت لكم الحجز الدولي صار من بدري..
وانتهيت من حجز الطيران الداخلي قبل الرحله بشهر ونصف
كوالا- لنكاوي على اير اسيا اللي موقعهم يغث ويجيب الهم والضيق ماصدقت أخلص حجز
وطبعا تم شراء وزن اضافي للشخص 20 كيلو ب 30 رنقت..اثنينا 60 رنقت .. وتم اختيارمقعدين ب 12 رنجت..ولما جاني الفاوتشر لقيت
مكتوب رسوم راحه ب16 رنجت
عاد والله مدري وش خبصت انا بموقعهم لليوم مادري شنو رسوم الراحه اللي طلبتها..
طبعا مجموع التذكرتين مع الضرائب والخدمات كان : 286.00 MYR
الزبده: لو ادري حاجزه على الماليزيه أريح وأصرف..
لنكاوي- بينانق – طبعا اختصرت الزحمه كلها اللي صارت بموقع اير اسيا
وحجزت على الماليزيه وكان سعر التذكره طبعا مشمول 20 كيلو للشخص:MYR 248.00
مجموع الطيران الداخلي 435 رنقت
مدة الرحله :من 4 سبتمبر (نوصل 5 سبتمبر ) الى 23 سبتمبر .. يعني 18ليله
موزعه كالتالي : 3 ليالي سلانقور – 4 ليالي لنكآآآآآوي – 3 ليالي بينانق –
ليلتين كاميرون – 5 ليالي كوالا – ليلة بورت دكسون
انتهيت من حجز الفنادق مبكرا قبل الرحله بأكثر من شهرين
وكانت كالتالي:سلانجور فندق ريومز 3 ليالي ب525رنقت (بوكنق)
لنكاوي فندق موتيارا ليلتين ب 622رنقت (بوكنق)
وفندق برجايا ليلتين ب 1078 ريال (اقودا)
بينانق فندق بارك رويال ع ليالي ب1686 ريال (اقودا)
كاميرون فندق دي لي فرانس ليلتين ب608رنقت (بوكنق)
كوالا فندق دورست 5 ليالي ب1380 رنقت (بوكنق)
بورت دكسون منتجع خليلها قراند لكسز ليله ب 522رنقت (بوكنق)
مجموع تكلفة الفنادق : تقريبا 7500ريال
طبعا كلها الغاء مجاني .. وكلها شامله الفطور ماعدا برجايا لنكاوي..
الفنادق اللي من اقودا اثاري خاصمين المبلغ من وقت ماحجزت..وانا على بالي من خلال قراءتي بالمنتدى
انه مجرد حجز للمبلغ..ولما نروح للفندق يخيرونا بين كاش او فيزا ..
ولكن اقودا كانوا ساحبينها وفندق برجايا وبارك رويال ماطلبونا أي مبلغ..
عكس فنادقنا اللي حاجزينها من بوكنق.. كلها دفعناها عند الوصول
للفندق عن طريق الفيزا..
طبعا زوجي ربي يخليه كان يقول الرحله كلها عشانك اختاري الاماكن
اللي ودك تروحينها ورتبي الجدول وانا معاك باللي تبين (ايه هين تبي الفكه من الجدول ) ..
هالشي كان حلو بالنسبه لي وموب حلو.. حلو لان خترت الاماكن اللي متوقعه انها تعجبنا واماكن شاورت زوجي عليها واماكن خليتها سربرايز ..
وموب حلو لان من جد تعبت تعب يعني كل شي مسؤوليتي من حجوزات طيران
الى فنادق الى تنسيق الجدول .. بس الحمدلله صار عندي خبره
كثير بالتخطيط للسفر
المهم بعد ماحجزت تخيلوا كل شي (ماعدا الطيران الداخلي) يعني
حجزت التذاكر الدوليه والفنادق وبعد مابديت احط مخطط الرحله
واكتب الجدول اليومي... بعد هالتعب كله بالصدفه زوجي راح لمكتب
الخطوط الماليزيه لان جاه ايميل مثل ماذكرت لكم .
ايميل يقول اذا تبي تسوي ابقريد للرحله
يعطونه خصم 75%..ف راح يستفسر وقصده يرقي الدرجه.
المهم دق علي من المكتب يقول لي
زين اني جيتهم..قلت ليه؟ قال ابد لو تأخرت كانوا راح يلغون الحجز لانك
مسويه حجزين ولو اكتشفوا كنسلوا الاثنين(دنا غلبانه بس من جد شلون صارت حجزين ليومكم هذا
مادري يمكن فصل النت علي فجأه وعدت الحجز..مدري ناسيه زهاييمر مبكر جعله مايجيكم ) .
والهندي اللي بالمكتب قاله لو اكتشفوا هالشي كنسلوا الحجزين.
(بس مدري شلون يكنسلون الحجز وهو مدفوع ..عاد مدري يمكن الهندي يبي يسوي فيها ) ..
الزبده يوم قالي زوجي واء بغيت اصيح..قلت زين والله انك رحت من حسن الحظ ..
التجهيزات للسفر:- الشنط حاولت اقلل ملابس قدر الامكان عشان اخلي مكان للهدايا وقت الرجعه
- جهزت الكاميرتين الفديو والديجيتال وشحنتهم
- شرينا ميموري اضافي للكاميرا 16قيقا تقريبا ب130 من جرير.
وترى ماستخدمتها لأن كفتني ال16 قيقا الأولى اللي موجوده بالكام
- شرينا 5اشرطة فيديو بقيمة 50ريال..استخدمنا 3 فقط
- من الصيدليه تم شراء سن بلوك طبعا هالنوعيه ممتازه حمايته 100% بقيمة125ريال
وشرينا مثل مو مبين لاصق طارد للبعوض ب40ريال..
- صرف زوجي 5الاف ريال الى دولارات ورنقت وجابت لنا:
0دولار ب 4125 ريال
و 683 رنقت ب 874 ريال
طبعا تحسفنا ان ماكثرنا دولارات
ولما خلصت الفلوس كنا معتمدين بالصرف على الفيزا وعلى السحب من صرافات الراجحي المتوفره هناك
الكاميرا المستخدمه لوميكس باناسونيك موديل DMC-FH22
حلوه وبطاريتها ماتخلص بسرعه يعني ولا مره ولله الحمد خلص الشحن علي
اصعب نقطه واجهتنا في السفر
وداع اولادي حبايب قلبي اللي عمري ماتركتهم وسافرت..ودعناهم الله وتوجهنا للمطار
وهنا بالطريق للمطار
وصلنا المطار من بدري الساعه 4 العصر ..كان اقلاعنا 6ونص المغرب.. شحنا العفش
ورحنا للانتظار امام البوابه المحدده..
والحمدلله ركبنا الطياره بسلالالام
الطيران الماليزي حلو ويعيبه صوت الموسيقى
(تعودنا على دعاء السفرعلى خطوطنا ) .
وزعوا الهيدفون
وبعد شوي وزعوا كرت الدخول وعبيناه..
قدموا عصير ومكسرات
ثم بعد شوي قدموا الوجبة
انتظروني في الجزء المقبل،،
- مع موقف طاقم الماليزيه حينما أراد جماعة من السعوديين أن يصلوا المغرب جماعة !!
- انطباعي عن رومز هوتيل.
أختكم / أم فهد ،،
نكمل،،
من المواقف اللي صارت بالطياره،،
اللي قدامنا سعودي وزوجته.. زوجته صورت المضيفه وطلع فلاش على جهة المضيفه .. وتلتفت عليهم المضيفه وبصوت عالي:
يو تيك ماي بكتشر .. يو تيك ماي بكتشر.. يوكانت تيك ات .. وتنافخ .... شوي اخذ زوجها الكام قامت المضيفه تقول دليت ات بليز.. ومسحها ووراها انه مسحها.. وراحت.. بس ماعجبني تصرفها خلت الكل ينتبه ..
وصار موقف سخيف بعد،،
زوجي قام يتوضأ وجا جلس يقول مكان الصلاة مليان.. شوي نسمع اصوات عاليه.. اثاري مساكين سعوديين يبون يصلون المغرب جماعه.. وجوا المضيفين فرقوهم وقالوا ممنوع..لازم واحد واحد.. ومن زود الوقاحه تخيلوا شغلوا علامة ربط الاحزمه..والطياره هاديه لامطبات هوائيه ولاشي..والله خلوها شغاله اكثر من ساعتين والوضع هادي .. قال زوجي هذي حركه منهم عشان يمنعون الناس تصلي جماعه..والدليل انه ماكانوا يمنعون الناس تروح دورة المياه.... مره قهر واللهالمهم زوجي مسكين كل مامر مضيف قاله ابي اصلي قال لحظه فيه واحد يصلي اذا خلص قلت لك.. والله العظيم يمكن 5 مرات وزوجي يكلم المضيف او المضيفه.. كل مامر واحد كلمه .. اخر شي قال خل نصلي مكانا.. وصلينا قاعدين بمكانا..
ومر الوقت و ماطب النوم عيني.. والساعه 1 جابوا العشاء
كنت انتظر الخط الفاصل بين الليل والنهار و شفته..سبحان الله
عاد قولوا الصدق زين تصويري والا ماش؟ .. حسيت اني فيني موهبة تصوير احترافي مدفونه.. بس الكاميرا ماساعدتني
وهنا بدأت تظهر لنا ماليزيا ..
وهبطنا بسلام ولله الحمد..ونزلنا للمطار وتمت اجراءات الدخول بسهوله الحمدلله.. ولكن تأخرنا في انتظار العفش مايقارب النصف ساعه او اكثر قليلا
ماصدقنا ناخذ الشنط ومشينا.. لقينا محل التاكسي وسألتنا الموظفه على وين قلنا لها رومز هوتيل ماعرفت قلت لها صوبانج جايا وعطيتها الفاوتشر قالت 167 رنجت.. مدري ليه مع ان قالوا لي مايزيد عن 90 رنقت .. المهم دفعنا
وراح زوجي هوت لينك شرا شريحه.. يوم جا قلت بكم قال 20 رنقت قلت افا ليش غشوك مفروض ماتزيد عن 9 قال والله مدري عنهم نسى اني قايلة له ب9 رنقت..قلت يمكن مشحونه قال لا مافيها الا 2رنقت.. بعد 3 ايام زوجي شرا لي شريحه من هوت لينك (من مطار اير اسيا ب 8,5 رنقت ) مدري ليش غشونا مع انه من الشركه نفسها..
المهم رحنا للتاكسي وكان مرسيدس وقلت يمكن عشان كذا غالي..
التاكسي بالبدايه مادل مكان الفندق قلنا له تايلر يونيفرستي ماعرف بعد ..طلبنا رقم الفندق وعطيناه من الفاوتشر..بعدين عرف وين..
والآن مع اليوم الأول لنا بسلانقور:
وصلنا 10 الصبح الفندق تعبانين ومرهقين ..
للوهله الأولى انسدت نفسي وقلت وش هالمكان اللي جينا فيه..وانتظر اي علامة تعجب من زوجي وزحمة من طلاب الجامعه اللي جمبنا
قال زوجي
حاجزة لنا مع سكن الطلاب؟
قلت وش دراني ماكنت ادري انه مع السكن..أثاري الفندق يقع مع السكن
المهم رحنا للرسبشن عطيناهم الفاوتشر وخيرونا بين الدفع مقدم او عند التشك اوت ودفع لهم زوجي مقدم بالفيزا .. ماطلبوا تأمين ..يمكن لأن الثلاجه فاضيه..
وقعدنا ننتظر.. شوي جا واحد منهم قال لنا الغرفه موب جاهزه تجهز الساعه 2الظهر.. اذا تبي تخلي الشنط وتروح مكان لين تجهز الغرفه .. قال زوجي انا تعبان بنتظر هنا ماعندي مكان اروحه حاليا..
قعدنا باللوبي ننتظر ودخلنا على النت اللي كان مجانا ..واخذت كم صوره للوبي اللي مفتوح عليه مكان الفطور
هنا الرسيبشن:
وجمبه بالضبط الفطور(صورت جزء من الرسيبشن عشان تشوفون شلون مافيه مسافه) :
شوي جا واحد منهم ..شكلهم حنوا علينا .. قال فيه واحد كنسل حجزه وبنعطيكم الغرفه حقته دقايق ينظفونها وتكون جاهزه..
وفعلا شوي وقال لنا تفضلوا الكرت حق الغرفه
اول ماوصلنا للدور اللي فيه الغرفه..ابد حسيت اننا بسجن ورايحين للعنبر حقنا
ايه لاتلومونن شوفوا المنظر
ماعاد الا يوزعون لنا لبس المساجين
لا وممرات الفندق التهويه فيها جداا سيئه مره مكتوم وريحة رطووبه مره مره
وهنا رقم العنبر حقنا
دخلنا الغرفه على الساعه 11 كذا . صورتها لكم
ونووم الى 9 بالليل ..صحينا صلينا ..ولبسنا ونزلنا نبي عشاا ونبي نكتشف المنطقه المحيطه بالفندق..سأل زوجي اللي بالرسبشن وكان طالب جامعي روسي جدا محترم اسمه دمتري.. قاله ابي فاست فود قال فيه ماكدونالدز قريب من هنا 10 دقايق مشي.. وصف لزوجي وقال اذا تبي توصيل تراهم يوصلون..قلنا لامانبي شكررا بنروح لهطلعنا نستكشف المنطقه المحيطه بالفندق
طبعا ملاصق للفندق ستاربكس
وهذا الممر امام الفندق وحوله مطاعم وبقاله ومحلات :
لقينا سوبرماركت سفن ..باسكن روبنز ..ستاربكس ..بريد ستوري ..صب وي
وفيه مغسله لمن يهمه الأمر..والا انا ما أأيد شغلة المغاسل
نهاية الممر مطاعم الظاهر ماليزيه وصينيه
وهذي البحيره خلف الفندق ..تفصل بين سكن الطلاب والجامعه
بعد الاستكشاف رحنا على وصف دمتري نبي ماك.. ماعرفنا وين
شوي الا نشوف مكان الباصات ..فيه باصات مجانيه تابعه للجامعه .. وفيه باصات بسعر رمزي مثل اللي بالصوره
قاله زوجي له توصل لبيراميد.. قال ايه قلنا له وفيه ترجيع قال فيه بس الحين هذي اخر دفعه اوصلها ومافيه ترجيع خلاص انتهى الدوام..كانت الساعه 10.. قلنا زين اهم شي اخذنا فكره
رجعنا الفندق لدمتري قلنا له اطلب لنا.. دق عليهم والظاهر تلفونهم خربان.. ياليل الشقى
قالي زوجي اقعدي باللوبي بروح مع دمتري يوريني من وين الطريق.. قلت اوكي..
شوي ورجع دمتري لحاله وانا فيني الصيحه وين بعلي ..جا قالي يور هازبند ويتنق يو قرقرقرقرقر.. عاد هذا اللي فهمته قلت اوكي .. وانا مادري وين الله حاطني..ايه فهمت ينتظرني بس وين..طلعت لفيت شوي مالقيت زوجي وخفت اضيع ورجعت حق دمتري.. قلت له كلمه وحد.. وير؟
المهم فهم علي قال يو ونت مي أوصلك
.. قلت يس ولاعليك امر
مسكين وداني الله يهديه للاسلام ..واشوف بعلولي من بعيد يأشر لي واقول بنفسي لاياشيخ
يوم جيته قلت بليز لاعاد تتركني افرض اني مافهمت وش يرطن..الحمدلله بس ان ثقافتي انجليزيه
مشينا لماك يمكن 10 دقايق تقريبا مشي..
هذي الجهه مقابله للمطاعم اللي اقولكم ماليزيه وصينيه..وماك يقع في الجهه المقابله:
هنا بالطريق
قربنا
وصلنا..وطبعا كان ماك بالمحطه
تعشينا ب20رنقت (19 وشوي)
وحنا راجعين قال زوجي باخذ لدمتري هديه..ياذا الدمتري .. قال يبي له باسكن روبنز لقيناه مسكر..
ورحنا بقالة سفن شرينا عصير وبسكوت ب3رنقت وعطاها دمتري وطلعنا للغرفه بغينا ندخل نت بس الشبكه احيان تشبك واحيان لا ..
قلت لزوجي خل ندق على شاهرون السواق اللي ماخذته من المنتدى..نتفق معه حق بكره
دق عليه قال انا في بينانق موب سلانقور بس برسلك رقم واحد
وارسل لنا رقم واحد اسمه جاك دقينا وقلنا له حنا في سلانقور نبي نروح بوتروجايا بكره قال وين ساكنين قلنا له ريومز ماعرف وقال عطوني رقم الفندق وعطيناه وكل شي... اخر شي تدرون وش قال
قال انا بكاميرون .. ابو الفهاوه ياشيخ صح النوم
المهم شوي دق علينا واحد اسمه هاشم قال انا بسلانقور وبوصلكم (شكله من طرف شاهرون) واتفقنا الساعه ب25 رنقت ويجينا الصبح على 11 ..
وهذا منظر من الشباك ويظهر سكن الطلاب :
وهنا
ونمنا استعدادا لبكره،،
المصروفات لليوم الأول:
7مشوار التاكسي + 20 شريحة + ماك 20 + سفن 3 =210 رنقت
نكمل في وقت لاحق،،