قطر المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
alma3ani
16-12-2022 - 05:02 pm
السلام عليكم
هذ اول تقرير لي بلمنتدى من صويري وكتابتي
طول عمري كنت متردد من كتابة اي تقرير لاني اخاف ما اكمل التقرير
ولاكني حبيت توثيق الاعضاء لرحلاتهم وسفراتهم
لهشي تشجعت وحبيت اسوي تجربه وهي صور لمخينا مع عشانا
وهذي راح اعتبرها تجربه واذا حبيت الموضوع اكيد راح اوثق لكم سفراتي الجاية
التقرير بسيط وحاولة اقلل الصور قد ما اقدر
علشان يكون التقرير خفيف عليكم
هو عباره عن كم صوره للمخيم مع صور طبخ عشانا
وراح نبدي الحين اول صوره عبارة عن الاغراض الي جايبينها معنا
اول شي حبيت اضيفكم باحلى كرك او شاي حليب
اتفضلو احلى كرك قطري
ومايحلى الكرك الا بشوية خفايف
وللي مايحبون الحليب ما نسيناهم
اتفضلو مدو ايدكم وبردو على قلبكم
وبعد ماضيفناكم وصرتو من اهل البيت راح نبتدي للطبخ
وعشانا اليوم عباره عن كبسة دجاج وراح اخليكم معاي خطوة بخطوة
اول شي صورا لاغراض العشاء
والحين نبتدي بطبخ اول شي انحط الزيت والسمن والبصل
وبعدها انحط ورق الغار والفلفل الاخضر بس انخله مقفول لان احن نبي نكهه مب حرارة بالاكل
والحين نبتدي بوضع الليمون الاسود واعواد القرفه
ولقطة قريبه علشانكم وقولولي اشرايكم بتصوير انفع مصور ولا لا
والحين انحط اشوي من ورق البقدونس
والحين انحط بهارات الكبسة الصحيحة
والحين انحط الدجاج الي مقطع ومنظف وجاهز من البيت
وبعد ما حطينا الدجاج نبتدي بتشويحه تحريكه
وبعد تحريك الدجاج انحط الخضار مثل الفلفل الرومي والطماط
وبعدها حطينا الماي وبدينا انحركه اشوي
والحين انصكر الجدر اشوي
وناخذلنا استراحة
تابعوني بعد اشوي


التعليقات (9)
AL3DNI
AL3DNI
متابعين يا سلام شكلها بتطلع طبخه رهيبه
ياريت تقول لنا على اي نار طابخين خشب فحم غاز ؟

alma3ani
alma3ani
باك بعد الاستراحه
بهلوقت الي قاعد يجهز فيه العشاء
نقعنا الزبيب بلماي وخليناه اشوي
وصبينا ماي الورد على الزعفران
والحين بعد بدينا انقع الرز البسمتي بلماي
وبدينا انحركه اشوي علشان انظفه من الشوائب وتركناه 10 دقايق بلماي
والحين ضفنا ملعقتين ونص من ملح الطعام على الاكل
وبعد ما نقعنا العيش بلماي لمدة 10 دقايق ضفناه على الاكل وصكرنا عليه
والحين نبتدي بتلوين البيض بصبغت الطعام
وبعد مالونا البيض نبتدي بقلي البيض وضفنا عليه فلفل اسود وبدينا بتجهيز الحمسه
وبعد ماقلينا البيض ولوناه
بدينا بتجهيز الحمسه اول شي بقلي البصل مثل ما اتشوفون
وبعدها بشوي حطينا الجزر وبدينا انحركه اشوي
وحطينا الفلفل الاسود واشوية من الملح
وبعدها حطينا الزبيب الي نقعناه بلماي لو تتذكرون
والحين فتحنا علبة النخي
وضفنا النخي على الحمسه
وهذي صورة الحمسة بعد ما اجهزت
وبعد ما خلصنا من الحمسه طلعنا الدجاج وصبغناه بصبغت الطعام وصبينا عليه ماي ورد اشوي
وبدينا في قلي الدجاج اشوي
وبعد ماقلينا الدجاج شيكنا على العيش وحصلناه استوا وبينا عله اشوية زعفران
وجهزنا الصحن
وبدينا نغرف العيش
وبعدها حطينا الحمسه والبيض على العيش
والحين حطينا الدجاج وزيناه بلبقدونس
لقطه من بعيد بعد ماجهز العشى
لقطة جانبية اجرب فيها تصويري
وبلهنا ووالعافية
تابعوني راجعلكم بصور متفرقه بعد اشوي

أمير الروح1
أمير الروح1
ماشاءالله تبارك الله
ولا أحلى من كذا
يعطيك العافيه

alma3ani
alma3ani
باك
جبت لكم كم صورة للمخيم وسامحوني انها مب وايد بس لان تو موسم التخيم بادي ماصارله اسبوعين
لهشي المخيم ماجهز بلكامل حتى المطبخ ماجهز كله والعشى طابخينه على جولة غاز
صوره للمخيم من بعيد
وهذي صورة ثانيه بس امانه اشرايكم بتصوير ههه احس مليتو من كثر ما اسال
صوره لكيرمنا
تلفوناتنا وانا لي 3 تلفونات منهم الي بعرفهم له جائزة
واما كامير التصوير فهي كانون مثل الي في الصوره بس الي بصوره هي 500 دي واما كمرتي الي الي صورت منها التقري فهي كانون 1100 دي
واخر شي لقطتين من طريق العوده الى الدوحه
واسمحولي التصوير مو واضح لان كنا نمشي وانصور والرجع كانت الفجر
اسمحولي اني ما صورت لكم المخيم من دخل بس لان كان اشوي معفوس وللحين في خيم فاضيه لان تونا مخيمين
وان شاءالله المره الجايه بعد ما يجهز اصور اكثر
وانا حاولة اقلل الصور قد ما اقدر علشان ما اتملون من التقرير وهذي اول تجربة تقرير لي يكون من تصويري وكتابتي
وبنهاية حاب اشكر طباخنا الرسام على الطبخ الحلو لان فعلا طبخ رائع
وحاب اشكر ربعي كلهم على الرحلة الحلوة لان فعلا استانست بلمخيم عندهم
وحاب اشكر كل من راح يشارك او يزور الموضوع
وسامحوني لو طولت عليكم
واي حد حاب ينقل الموضوع انا ماعندي مانع بس حاب منه دعوة ان الله يوفقني بدنيتي وبدراستي
واتمنى عليه كتابة المصدر لاني ماعرفت احط حقوق على الصور ولاني تعبت في التقرير
خصوصا في تصغير حجم الصور بلفوتوشوب ومن غير ان هذي ثاني مر اكتب التقرير لان اول مره انمسح وانا في اخر شي
وجاني احباط بس لانكم غالين علي قلت لازم اكتبه ثاني مره وانزله لكم
والحمدالله اني خلصته
وتقبلو تحياتي
اخوكم
alma3ani

الايماان
الايماان
ماشاء الله تقرير رائع
والطبخ مرتب ومجهزين كل شي للرحلة
عليكم بالعافية

مسافره 27
مسافره 27
ماشاء الله عليك يالمعاني واخيرا شفنا لك تقرير.
الطباخ الله يسلم يدينه جوعتني وانا ماكنت ناويه اصلح غداء بس شكلي بهون عقب هالصور. هني وعافيه على قلوبكم وان شاء الله المره الجايه نشوف تقرير لاحدى سفراتك
.
الله يوفقك في حياتك ودراستك ويسهل امورك كلها.
تحياتي

* غلاتي *
* غلاتي *
ماشاءالله تقرير رائع
الطبخة يم يمي ... هنا وعافية يارب
من ناحية التصوير والله روعة وخص نص هذي الصورة

نجي لجوالاتك ( اي فون بلاك بيري N96 ) ان شاءالله صح
بداية مشجعة وان شاءالله نشوف لك تقارير اكثر
بالتوفيق ان شاءالله في حياتك الدينية والدنيوية والدراسية
يعطيك العافية ي المعاني

alma3ani
alma3ani
al3dni
مرحبا اختي
نورتي الموضوع بهلمشاركة الحلوة خصوصا ان هي اول مشاركة بلموضوع
وبنسبة لطبخ فهو على جولة غاز

alma3ani
alma3ani
أمير الروح1
والله مرورك الي ولا احلى من كذا
حياك اللهاخوي امير الروح منور


خصم يصل إلى 25%