اول شي الحمدلله على السلامه
ننتظر باقي تقريرك يا ولد ديرتي بس ياريت اتخلي الخط ثابت لا هنت

حمدلله على السلامة ،،
متابعين معاك عزيزي ،،

هلا بك هلا
متابع معاك واصل الابداع
تحيتي لك

1. ارقام الإتصال + 66026569877


2. موبايل + 660839217773

نعود لمحور حديثنه واللي كان عند وصولنه لمطار بانكوك الدولي هالمطار الكبير جداً واللي يشاهد فيه المسافر العديد من المحلات التجاريه والعلامات والماركات الغنيه عن التعريف خصوصاً ( بالسوق الحره مالتهم ) فيه اشيه جميله جداً وبأسعار متوسطه تلبي حاجيات المشتري
وشي طبيعي عند النزول من الطائره الشخص المسافر يكون تعبان وايد وأول ما يفكر فيه النوم العميق واخذ قسط من الراحه لان السفر لمده طويله بالجو مرهق جداً ويكسر العافيه ان صح التعبير ، وانه كنت حزتها ضايع بهالمطار الكبير ما ادري وين ابتدي وما ادري وين انتهي ومو عارف شسالفه اصلاً !!!!
المهم لقيت لي كذا شخص بحريني الحمد لله وكذا واحد من دوله الكويت الشقيقه بالمطار وسألتهم شنو الإجراءات اللي نسويها الحين ؟ وكان ردهم حالنه من حالك احنه بروحنه ضايعين بالطوشه !!!
فما كان منه الا أنه نستعين بواحد من أمن المطار او احد المرشدين عشان يوجهنه الوجهة السليمه لعمل الجيك إن وتختيم الجوازات و ... إلخ
والحمد لله بعد بحث وتحري ومناوشات مني ومناك طلع لنه واحد ( من أهل تايلند ) فهيم ما شاء الله عليه ويفهم يازعم انقليزي (( يس ونو وذيس وي وذات ووي )) !!
زين جان اكرمتنه بسكوتك من اولها جان ما تعرف شي ، وتمينه نتفاهم وياه بلغه الصم والبكم ( لغه الإشارات ) لين وصلنه لي مكان تختيم الجوازت وفحص الأمتعه والشنط وأخذها من المطار والتوجه للفندق
قبل كل هالأشياء تذكرت كلام اصحابي يوم قالوا لي اول شي مفروض تسويه إذا نزلت بمطار بانكوك اشتر لك بطاقه موبايل مدفوعه الأجر (( شحن )) وقيمتها حوالي 1000 بات = 12 دينار بحريني = حوالي 120 ريال سعودي ، وهالبطاقه يقدر الواحد يشحنها ب 100 بات يعني دينار و 200 فلس بحريني = 10 ريال سعودي ،، وفيها مميزات حلوه جداً اولها ان النت مفتوح على طول وسريع جداً مقارنه بدول الخليج وخصوصاً للبلاك بيري والآي فون ممتاز للغايه وكذلك الإتصال الدولي للدول الخليجيه او الخارجيه يكون جيد ايضاً ويفيد جداً للتواصل بداخل تايلند مع الأصحاب او الأحباب
وتم شراء البطاقه والتوجه للتكسي او الباص اللي بيوصلنه للعاصمه بانكوك بوسط السوق (( للتسوق )) لان فندقي راح يكون موقعه بوسط الحي العربي وكلشي قريب مني ، ورحت اكلم الموظفه اللي على الرسبشن ( الإستقبال ) عن سعار التكاسي والتوصيل لي الفندق المذكور وهو فندق (( مونوكو بانكوك )) وقالت لي التوصيل ب 500 بات تايلندي حوالي 6 دينار بحريني = 60 ريال سعودي والمده راح تكون تقريباً نص ساعه لي الفندق ، وتم اخذ التاكسي والتوجه للفندق بتمام الساعه ال 8 ونصف صباحاً على حسب توقيت تايلند
واول صدمه انصدمت فيها اول ما نزلت للفندق المذكور هو ان حجزي يبتدي الساعه 12 الظهر وانه وصلت الساعه 9 الصبح تقريباً فقلت الحين شهالحيله وشالتصرف !!!
فما كان لي اني ان انزل السوق لانه قريب جداً واشتري بعض الأشياء البسيطه وعقبها بارجع الفندق عشان اريح شوي ، وللأسف الشديد اول ما توجهت رحت للحي العربي (( سوي 3 )) قاصد المجمع اللي هناك وفيه مطاعم وايد مثل مكدونالدز + برجر كينق وغيرها من المطاعم الصينيه واليابانيه والسي فود
وخذت لي وجبه خفيفه من الصبح وهي ( فطيره جبنه تايلنديه لذيذه + حليب تايلندي اول مره اذوق حليب بهاللذه + بسكوت ماعرف اسمه ) وعقبها قلت باطلع اجوف السوق مالهم لان باقي عن الظهر ساعتين وبعدها باروح الفندق ، اول ما طلعت من المجمع مال المطاعم مالهم رحت سوق طويل بحي ( نانا ) وهو ملاصق للحي العربي اللي تكثر فيه البضايع العربيه والصراريف + الدهن عود والعود بكافه انواعه والكثير من البضائع الحلوه والرخيصه والمتوسطه والغاليه
وكنت بشتري العديد من الأشياء اول ما وصلت بس قلت خل اتصبر شوي وأأجل هالشي لي بعدين لاني ما ادري شيصير !!
ولفت انتباهي شي غريب جداً بأحد الأسوقه عندهم وهو ( يعرضون عليك افلام اباحيه بوسط السوق وأمام مرأى الجميع وهم يضحكون ولا كنه صاير شي ) !!!!!!
وثاني شغله اكتشفتها ان الحي العربي هو أغلى من باقي الأحياء وبقيه المطاعم المجاوره له وما ادري ليش هالمبالغه مثلاً هل لانه بديره غربه ويستغلون اخوانهم الخليجين بهالطريقه ،،، الله العالم !!!
وعقبها قلت بارجع فندق لان صارت الساعه 12 بالضبط ولكن لسوء الحظ ضيعت الدرب !!
ووقفت تاكسي حاولت اكلمه وما فهم لي ابداً فقلت استخدم وياه لغه الإشاره وبعد ما فاد وياه
اساله خذ البطاقه اللي بيدي وفيها عنوان الفندق يقولي (( تبي مساج )) !!! ههه لا حول الله !!
المهم واصلت الدرب وحضرته وصلني سوق ثاني وبعيد جداً عن منطقتي المذكوره وخذت بعدها حوالي اربع تكاسي وبالهيصه والميصه والتعب طلع آخر واحد يفهم وقالي ما عليك من التكاسي ياخذون عليك دبل اذا جافوك سائح ووصلني ما قصر بمبلغ زهيد ،،، وهذي ثاني صدمه كانت لي لان مجموع المبالغ اللي دفعتها بس حق التكاسي من أول ما وصلت تقريباً 850 بات يعني 10 دينار بحريني = 100 ريال سعودي وهالمبلغ جداً كبير على التكاسي لان التوصيل يكون فقط ب 1 دينار يعني 100 بات تايلندي
وعقبها الحمد لله وصلت للفندق وصليت الظهر ولله الحمد لان جدول مواقيت الصلاه مضبطه من البحرين
وبعدها قلت بنام شوي وبالليل يحلها الف حلال ، وفعلا خذتني نومه عميقه ما حسيت بروحي الا الساعه 8 الليل !!
صور للفندق اللي سكنت فيه واسمه (( موناكو بانكوك )) وموقعه جداً ممتاز وراقي وبعيد عن الضجيج والإزعاج ويبعد عن السوق حوالي 10 دقايق مشي
وهذا عنون الفندق والتفاصيل عنه
http://www.monacobankok.com/

ارقام الإتصال + 66026569877

موبايل + 660839217773

وسعر الليله الوحده للغرفه المكونه من ( حمام + سرير لشخصين + تلفزيون إل سي دي + خدمه وفي للنت + بلكونه + سائق خاص يوصلك لي السوق اللي تبيه وانت تتصرف بالرجعه ) = 2700 بات يعني بالبحريني 32 دينار بحريني ومع العرض الخاص مالهم الليله تصير 1900 بات يعني بالبحريني = 23 دينار بحريني ما يعادل 230 ريال سعودي
صور لوسائل النقل الموجوده عندهم
التاكسي العادي ويفضل للراكب انه يقول لسائق التاكسي افتح العداد عشان يطلع له ارخص وبدايه العداد تكون بسعر 30 بات يعني 400 فلس بحريني ويعتمد على المسافه المطلوبه
الوسيله الثانيه والأرخص والأسرع هي ( التك تك ) ابو ثلاث عجلات وهو مثالي للتنقل من سوق لي سوق واوفر وارخص وما يكلف الا القليل على حسب المسافه
يتبع باقي المغامرات ببانكوك .............. بررب

مشكورين على الردود
ومتابعه شيقه ان شاء الله
وآسف اذا اتأخر بالكتابه لان الظاهر عندي خلل في إستخدام الأكواد بالإنترنت اكسبلورر
تحياتي للجميع

اهلا و سهلا فيك يا حبيب البحرين و الخليج
تقرير باين عليه من عيار الثقيل و سوف نشهد اجزاء رائعة ان شاءالله منك
بارك الله فيك
تقبل تحياتي """

1. عدنا


2. شدعوه شهالربع إللي هالنمونه هذول !


3. والفلوس شكلها بطير كلها على هالسبه !!!!

عدنا

وصلنه لي سباتي العميق اللي استغرق حوالي 7 ساعات بالفندق المريح والسرير الاريح اللي من تخلي راسك عليه على طول تنام بدون وعي !
وعقب هالنومه الطويله بعد عناء السفر ومشقته صحيت وعلى طول اتصلت في الأصداء المتواجدين في بتايا وكانوا سابقيني بأسبوعين لانهم حصلوا الإجازه قبلي واستثمروها وعلى طول قرروا يروحون تايلند ، وسألتهم متى بتلاقوني وتمروني بانكوك فكان جوابهم : ( اشبع تسوق بعدين بنلاقيك ) !!!

شدعوه شهالربع إللي هالنمونه هذول !

ما علينه المهم قلت دام الوقت ليل والحياه توها مبتديه عند الأخوه ( التايلنديون ) ليش ما اروح اكتشف لي سوق آخر بعيد شوي عن الحي اللي انه ساكن فيه ، فقمت وفتحت الجدول اللي سواه لي المرشد واللي اشكره من اعماق قلبي على تكفله بتضبيط هذي الرحله الشخصيه لي ، ولقيت قائمه طويله بأسماء الأسواق والمحلات اللي تصلح ( للشوبينق )
وحددت لي وجهة معينه وهو سوق باتونام - بانكوك وهالسوق هو سوق شعبي فيه كل الأشياء الحلوه واللي ما تخطر على بال أحد من ساعات + اكسسوارات + ثياب + شورتات + احذيه وغيره ... ألخ
فعلى طول قمت واستعديت للرحله وكلمت سائق الفندق الخاص انه يوصلني لي الشارع الرئيسي ومنها اجوف لي تكسي يوصلني للسوق المذكور أعلاه
وعلى طول من نزلت من التك تك الخاص بالفندق توني حاط رجلي على الارض الا اجوف التكاسي تهل علي من كل جانب (( مثل المطر من كل صوب ))
وهذا يقول سبايدي كاب وذاك يقول هاو آر يو وذاك مادري شيخربط بالتايلندي وياني واحد منهم يقولي : هلوو آآآراب !! يعني حيا الله العرب !!
وعلى طول ضحكت بويهه لان لهجته مضحكه وايد وقلت هذي اللي بيونسني طول الدرب وخبرته انه باروح سوق الباتونام ، وشفته على طول كشر بوجهه !!
قلت عسا ماشر بعد شسالفه وشصاير وشحاصل ؟؟
يقول : باتونام كلوز كلوز !! مسكر السوق الحين الساعه 9 وهم بيسكرون !!
قلت افا ما في نصيب اليوم ، سألته عن سوق ثاني او مجمع او اي مكان يبيع بضاعه زينه فقالي بكره بوديك وعطاني رقم تلفونه الموبايل وقال اتصلي بكره الصبح بوديك كذا مكان وانت اختار اللي تبي
قلت طيب مو مشكله ننتظر لي بكره ، بس الحين وين اروح ! خطر ببالي اني ارجع مره ثانيه (( سوي 3 )) الحي المشحون عرب واقعد لي في قهوه او ما شابه ذلك عل وعسى القى احد اعرفه لاني كنت شبه ضايع يومها !!!
ولحسن الحظ الدرب اللي مشيته كان شارع مشحون عرب كويتين + سعوديين + اماراتيين + قطريين + عراقيين + عمانيين وغيره من الجنسيات العربيه الشقيقه ، فقعدت وياهم وتبادلنه اطراف الحديث وسؤال ورى سؤال وسالفه ورى سالفه لين صار الوقت الساعه 3 الفجر وما حسيت بروحي ابد !!! كل ساعه يطلبون لي قهوه وكوفي وشاي ولا على حسابهم بعد (( ما قصروا الشباب ))
فقلت لهم احين باترخص يا جماعه الخير والقاكم يوم ثاني ، ومشيت عنهم بعد سهره حلوه وقعده ما تنمل مع الأخوه العرب الأشقاء
رجعت الفندق وكان الجوع هو العنوان الرئيسي حزتها فإتصلت في الإستقبال من غرفتي وسألتهم شعندكم عشه حزتها الا يقولي الموظف : المطعم مال الفندق مسكر !!
لول شهالحاله البطن يصاوي والحاله حاله ولازم آكل لي وجبه وقعدت ادور احاوس يمين يسار لين لقيت ( لسته بالطاوله مالت الفندق ) بأسماء المطاعم المجاوره للحي اللي ساكن فيه وما لقيت الا مطعم مكدونالدز لانه مفتوح 24 ساعه فخبرت الرسبشن يطلب وجبه ماك جكن على قوله اخوانه التايلنديون (( ماق جقن ))
وتفاجأت ان دوام الأول خلص ويلس محله واحد ( دبدوب ) وحبوب جداً ووايد لبق مع زباين الفندق فقلت له ابي هالوجبه يقول انتوا العرب كله تحبون الدجاج وما تاكلون لحوم بتايلند اقول بقلبي " وشدرانه ان اللحم مو لحم خنزير " !!!
وتم الطلب ووصل الأوردر (( الماق جقن )) على قولتهم وكلته كله كأني اول مره اكل وجبه بحياتي وعلى طول وبدون وعي وشعور نمت نومه اخس من اللي قبلها من الساعه 4 ونص تقريباً لي الساعه 2 الظهر اليوم الثاني !!
لا حول وفاتني السوق من الصبح وضاع وقتي كله بالنوم ، الظاهر مخليين شي بال (( ماق جقن )) مالهم وخدرني ، المهم صليت صلاه الظهر وبعدها على طول خبرت السايق يوصلني لأقرب مكان عشان اتغدى لاني باروح السوق العصر ، فخذني بالتك تك ماله ووداني مطعم سي فود ( أكلات بحريه ) وقالي شرط يعجبك ، قلت مو مشكله نجرب شورانه دامها اول مره يلا ناكل اكلكم يا ( التايلنديون ) وقال انه باروح وبارجع لك عقب نص ساعه لان زباين الفندق يبون توصيل ، قلت له مو مشكله عزيزي مرخوص ، وحضره العامل اللي يشتغل بالمطعم ياب لي اللسته مالت الطعام واللي فيها جميع الأكلات البحريه الغريبه والعجيبه واللي اول مره اجوفها بحياتي كلها مثل ( سلطاعون بالروب ) !!!
( سمك زبيدي مشوي مع صلصه الكريب مادري شسمها ) !!
( سلطه تونا مع محار ) !!!!
شدعوه خب احنه مب متعودين ناكل هالأشيه حدنه مجابيس وغوازي ، فقلت يلا نجرب السمك الزبيدي مع الكريب عل وعسى اكتشف شي يديد بحياتي
وفعلاً كلته وياريتني ما كلته اول ما حطيت اللقمه الأولى بحلجي على طول ياتني اللوعه قلت شنو هالأكل الغريب !!! لول
السمك صحيح مشوي بس بدون بهارات شكله طالع على طول من البحر لي الشوايه قلت له تعال بس مابي بغير الطلب ، يقول اوكي بس بحسبه عليك ، وطلبت شي ثاني وهوالربيان المشوي وكان لذيذ وحلو شكلاً وطعماً بس الغريب في الأمر ان الدوخه ياتني مره ثانيه !!!!
يعني الظاهر اني باروح الفندق وبكمل نومه البارحه السعيده ههه
ولسوء الحظ خذتني نومه عميقه ثانيه من العصر لي المغرب الساعه 7 ونص ، ويوم قلت شهالحاله بس شكلنه بنقزرها بس اكل و نوم ولا بنتسوق يعني !!!

والفلوس شكلها بطير كلها على هالسبه !!!!

ولكن بعدها نزلت صوب التكاسي ( الحراميه ) قلت لهم ابي اروح سوق ليلي واسمه ( بات بونغ ) وهو عباره عن سوق ليلي يفتح من الساعه 8 الليل إلى 2 منتصف الليل ووداني حضره التاكسي بمبلغ 100 بات = 12 ريال سعودي = 1.200 دينار بحريني ونزلت اتسوق وفعلاً السوق كان جميل جداً وعجبني على الآخر من ناحيه البضائع الموجوده وخصوصا الساعه ( الكوبي ون ) فيه مالذ وطاب وبأسعار تبدي من 1500 بات وتنتهي ب 3000 بات حوالي (( 20 دينار بحريني إلى 30 دينار )) والساعات بكل أمانه تسوى اكثر من هالمبلغ لاني اشتريها بالبحرين بمبالغ خياليه ، ويوم جفت جوده التقليد والماركه بطلت عيوني على الآخر وقلت شالفرق الحين بينها وبين الاصلي !!!!
فخذيت لي اربع ساعات دفعه وحده بدون الإلتفات للمبلغ اللي حامله وياي ومثل ما يقولون (( كني مو جايف خير من قبل )) !!
تميت الف السوق يميناً وشمالاً ، شرقاً وغرباً وفيه بعض المناطق الخطره على العزاب امثالي ........ مثل الديسكوات وبنات آخر الليل و ...
ولكن انه بعيد عن هالسوالف الحمد لله وسفرتي كانت كلها للترفيه عن النفس والتسوق واكتشاف الجديد
المذهل في هالسوق الليلي وهو ( البات بونغ ) انك لازم تمتلك وتتعلم مهاره جديده الا وهي مهاره (( المكاسر - المقاصص )) بلغتنه العاميه فمثلاً : إذا قالك البائع هالشي بعشره دينار تقوله ابيه ب 5 دينار يعني طيح نصف السعر وعطه ظهرك وهو بنفسه اذا جافك معاند معاه بيوافق ، بس انه للاسف اثناء شرائي للساعات ما انتبهت لهالنقطه الا عقب ما جفت كذا واحد يساوم وياهم على الآخر وينشف ريجهم
فقلت مو مشكله الأيام بيننا يا ( التايلنديون )
وبعدها رجعت الفندق بساعه متأخره من الليل وانتهى ثاني يوم
بعض الصور من السوق المذكور وهو
البات بونغ - السوق الليلي
وهالأخ التايلندي الحبيب اللي شريت منه الساعه وكله كان يقول ( انت وايد هيلواه ) قصده اني وايد حلو والساعات حلوه ههه
هالحذاء الجميل دش بالي ولكن قيمته غاليه جداً وهو صناعه يدويه من جلد التمساح تكلفته حوالي 12000 بات اي ما يعادل بالبحريني 146 دينار = 1460 ريال سعودي تقريباً
واخيراً مع المتحري ( سينشي كودو ) كونان على كبر وهالشخص ما قصر وياي خبرني عن السوق من أوله لي آخره فله جزيل الشكر واسمه الحقيقي ( تيونان براتونغ سنغ )
تابع بكره عن بقيه المغامرات ،،،،،، برب 2