موستار المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
waledq8
13-12-2022 - 04:25 pm
رحلتي إلى البوسنة شهر 9 – 2011
بسم الله الرحمن الرحيم
بالبداية أحب أشكر أخوي بوسناس على موضوعه الذي استفدت منه حيل في رحلتي إلى البوسنة كم أشكره على الخدمات و المساعدات التي أعانني عليها , وله مني جزيل الشكر.
أحببت أن أكتب في تقريري هذا عن رحلتي للبوسنة وعن بعض المعلومات التي لدي و عن التفاصيل و الأسعار
تاريخ الرحلة كان 8-9-2011 انا و صديقي
الخروج من البوسنة 20-9-2011 المغرب وطبعا وصلنا الكويت تاريخ 21-9-2011 الفجر لانها ترانزيت
الذهاب على شركة الخطوط التركية وسعر التذكرة 201 دينار كويتي للشخص والوزن المسموح 30 كيلو
راح أكتبلكم بعض الاسعار باليورو او بالمارك البوسني
المارك البوسني يساوي تقريبا 195 فلس
اليورو يساوي تقريبا 380 فلس و ذلك يعتمد على سعر الصرف
وقبل لا أبداء التقرير..... الرحلة مدة 12 يوم وتم صرف 470 دينار كويتي للشخص
يعني مجموع السفرة انا و صديقي كلف علينا 470 ضرب 2 =940 دينار كويتي
التكلفة تشمل ( السكن مع فطور مجاني – الغداء و العشاء – المواصلات – الرحلات – مكالمات الهاتف – المقاهي – وكل شي بالسفره ) ماعادا سعر التذكرة الطيارة .
و الآن نبداء بالتقرير
التاريخ 8-9-2011 الساعه 5 فجرا ركوب الطائرة
الساعه 8:55 صباحا الوصول الى مطار اتتورك ( تركيا) ترانزيت 3:40 ساعات ( طبعا في ترانزيت ساعتين لكن كانت فول)
المغادرة من المطار الساعه 12:35 ظهرا
الوصول الى مطار سراييفو الساعة 1:25 بتوقيت سراييفو أكرر بتوقيت سراييفو لانهم سابقينا بساعه
طبعا الشنط لاتحاتيهم من تحملهم بالكويت خلاص مالك شغل فيهم
تستلمهم بالبوسنه
هذي صورة من الجو
بعد الوصول أخذنا تكسي لفندق هوليود ويبعد عن المطار تقريبا 5 كيلو
التكسي أخذ 10 يورو
بعض المعلومات عن الفندق
الفندق سعر الليلة لشخصان 75 يورو مع الأفطار وقعدنا فيه الرحلة كلها ( وميزة الحجز يقولك إذا سكنت أكثر من 6 ليالي يحسبولك خصم 10% )
الفندق 4 نجوم ويوجد بالفندق غرف سونا و بخار وحوض سباحة مجاني مع السكن
ويوجد للتسلية بولنج و بلياردو و غرف مساج و كل هذه غير مجانية
والفندق موقعه ممتاز و انا مابي اسوي دعاية للفندق لاكنا قولكم عن شي انا شفته
هذي صورة عن طريق قوقل إيرث توضح لكم ليش موقعه ممتاز
المربع الأصفر موقع الفندق
المربع الأحمر مجمع تجاري او محلات تجارية
المربع الأزرق محطة قطار و باصات و نقطة تجمع تكاسي و كلهم يودون للسنتر
المربع الأبيض مصح التيرمة للعلاج الطبيعي
المربع الاسود أحلى مطاعم جربتهم و عندهم شوي و شغل عدل
المربع البنفسجي نقطة تجمع عربات الخيول و تحصل تأجير قاري ( دراجة هوائية – بايسكل ) الساعه ب 2 مارك
والسهم الابيض يأشر على أتجاه النبع الي راح تشوفون صورة تحت
هذي صورة الغرفة
وهذي أطلالة الغرفة على النهر
وبعدها رحنا صوب تجمع عربات الخيول وركبنا حنطور و يمشي فينا متجهين إلى نبع الاليجا او نبع البرولفو مادري شنو اسمه ( يصلحلي أخوي بوسناس )
والخيل يوديك ب 15 مارك ويجيبك من هناك 15 مارك ( لو عددكم 1 او اثنين او ثلاث ) يويديكم كلكم 15 مارك
ثم وصنا الى النبع و هذي بعض الصور
الماء بارد و لونه شفاف سبحان الله
وبعدها رجعنا و أتجهنا الى القطار و ذهبنا الى السنتر
القطار رايح راد لشخصين 6 مارك
وهذا بوفيه الفندق الافطار
طبعا لحقنا على اخر شي لانهم يسكرون الساعه 10 وصورتلكم جزء من البوفيه
وهذا الطريق الي يمشي فيه الخيل و العربه
بس بالليل مافيه خيل
ولاتحاتون الديرة أمنه بإذن الله
وتعشينا انا و صاحبي واحد كيلو لحم مشوي طازج و سلطة و 2 عصير فرش طلع علينا 40 مارك
ولاتنسون تشربون القهوه البوسنية بالفندق و هذي صورتها
في اليوم الثاني ذهبنا زيارة لأخوي بوسناس و أستضافنا أحلى أستضافه
في اليوم الثالث ذهبنا رحلة للرافتنج و شبكنا مع قروب
مجموعنا 7 اشخاص
ورحلة الرافتنج تشمل ذهاب و إياب من وإلى الفندق + أفطار ( ريوق ) + غداء + لبس كامل من خوذه و سترة نجاة و لبس بحر و جوتي
و الرحلة بالبحر مدتها تقريبا 3 ساعات و نص
تكلفة الرحلة للشخص 40 مارك
وهذي بعض الصور للرافتنق
وفي اليوم الرابع ذهبنا الى جبل بروكوشكو يازرو ( تقريبا جذي اسمه) ارتفاعه عن مستوى سطح البحر 1700 متر تقريبا و
يوجد فيه بحيرة و فيه مطعم وكذلك تقدر قبل الرحلة بيوم تحجز غدا خاروف كامل وسوينا شاي و قهوا ... و تكلفة الرحلة 130 يورو تقسيم 4 = 32.5
السايق يوديك للجبل 130يورو سواء كنت بروحك او كنتم 10
والاكل كلفنا اربع اشخاص وحسبنا السايق معانا لان فشله ناكل و مانوكله 25 مارك يعني تقريبا 5 دينار
وهذي صورة أستكانة الشاي كنت مصورها عند النبع القريب عند الفندق
يعني مو من ضمن رحلة الجبل
وتغدينا نفس الفطيرة الي بالصورة
اليوم الخامس كان راحة ورحنى للنبع القريب للفندق يبعد 4 كيلو تقريبا و سوينا شاي و قهوه
اليوم السادس رحلة طويله تشمل شلالات كرافيتسا و مدينة موستار
الرحلة من الساعه 10 الصبح تقريبا لغاية الساعه 11 بالليل تكلفة الرحلة 150 يورو تقسيم 5 اشخاص
لان السايق يوديك 150 يورو سواء كنتم 2 او 8
عا انت هني قسمها
وسوينا قطيه بينا حق الغداء و العشاء و القهوه و الايس كريم و اي شي نبيه
وكل شخص قط 50 مارك
وهذي بعض الصور
هذا عشانا اخذنا مدري كم كيلو
اليوم السابع رحلة الى جبل اتوقع اسمه ايجما قريب عند سراييفو و أستأجرنا بقيات ( بقي – دباب – سيكل ابو 4 تواير)
الساعه ب 60 مارك
وشربنا قهوا بالمطعم هذا
وهذي أطلالته
يقولون هني يصير التزحلق على الجليد بالشتاء
هذي صورة موجوده بجهازي اتوقع في مدينة بيهاتش تبعد عن سراييفو 5 ساعات
اليوم الثامن ذهبنا للمصحه و فتحنا ملف
الشخص 100 مارك
وجلسات العلاج 70 مارك لليوم
الجلسه على حسب
انا عطوني جلسة كهرباء و مغناطيس و جلسة طين حار و جاكوزي ماء كبريت و حوض سباحه و تمارين
بس رحتله يوم واحد لان عندي حب استطلاع
يقولون لونك ساكن بسكن المصحه نفسه يطلع عليك العلاج مجانا ( ياليت تصلحلي اخوي بوسناس)
هدف
اليوم التاسع رحلة خاصه لشخص في بيت ريفي فوق الجبال( طبعا مايعتبر بيت يعتبره للنزها) و رحنا دخلنا كهف
هذي صور للبيت الشخص الي زرناه و شوي و حركات
وهذي صورة الكهف من برا
وهذي من داخل
عبرت النهر و متمسك بالعصايه لان الصخر يتحرك و اخاف اطيح و اتكسر
وهذا حلالهم ماشاء الله تبارك الرحمن
هذي كنا نتمشى بالغابه
اليوم العاشر و 11 و 12 كان يوم راحة و تسوق وكنا نبي نروح لمدينة بيهاتش بس قدر الله ما شاء فعل صاحبي مرض بسبة تغيير الجو
وهذي الصورة اخر يوم
أخر ثلاث ايام جانا مطر
الايام الي فيها شمس كانت درجة الحرارة الكبرى 30 و الصغرى تقريبا 11
لما ضرب مطر الكبرى صارة 18
بالنهاية
الديرة خوش ديرة و خوش شعب و الديرة أمنه حيل حيل
انا كنت اتمشى بروحي الساعه 12 باليل و 1 و امر عند ناس ومالهم شغل بأحد
وبخصوص التسوق
اصحاب المحلات يتعاملون معاك بالفاتوره
ومافي عندهم نظام تعال تفضل تفضل و يسحبونك مثل الي عندنا
لا يا بابا نظامهم بس يشوفك و يبتسم
و انا عن نفسي أكتفيت بسكن هوليود وماحبيت اغير لانه يعتبر السنتر بالنسبه لي
مجرد تقول السلام عليكم يرد عليك و عليكم السلام
و شكرا لكم


التعليقات (9)
لائحة السلام
لائحة السلام
خوش تقرير والله .. روعة ويعطيك ربي ألف عافية
أنا أفكر أسافر لها .. بس أكثر ماكان مشكل عائق لي هو الأمن
وأنت تقول أنه ممتاز
بس بسألك فيه مدن روعة غير للي رحتوا لها .. و هل زرتوا الأرياف ؟

waledq8
waledq8
أخي العزيز لائحة السلام
المنطقه أمنه بأذن الله
انا عن نفسي أتمشى الساعه 12 و الساعه 1 و 1 و نص بنص الليل ولا في أحد يتعرضني
والفندق الي سكنته أكثرة كويتيين
والناس مسالمة و مالهم شغل في أحد
و بالنسبة لسؤالك انه في مدن روعه
انا مخلي نقطة التمركز هي سراييفو ورحت منطقه ريفيه قريبه عن العاصمه
رحلتها الفجر و قعدت فيها لي المغرب استانست و رجعت
يوجد بيوت ريفيه للاجار بس مادري هل هي امنه ( لان اخاف يطلعلك دب ولا ذيب ) لانه كلها غابات
في قالولنا مدينة ترافينيك قالو حلوه بس مارحنالها لان صاحبي كان تعبان وقتها
انا اكلمك رحت البوسنه و ماعرف شي غير المنتدى
لقيت شباب و قالولي هذا رقم مكتب أتصل عليه و قوله الي تبي ( سايق - مترجم - رحلة) و يلبيه لك
والمسئله سهله حيل مو مثل الي انت متوقعها

waledq8
waledq8
في اليوم الثاني ذهبنا زيارة لأخوي بوسناس و أستضافنا أحلى أستضافه
في اليوم الثالث ذهبنا رحلة للرافتنج و شبكنا مع قروب
مجموعنا 7 اشخاص
ورحلة الرافتنج تشمل ذهاب و إياب من وإلى الفندق + أفطار ( ريوق ) + غداء + لبس كامل من خوذه و سترة نجاة و لبس بحر و جوتي
و الرحلة بالبحر مدتها تقريبا 3 ساعات و نص
تكلفة الرحلة للشخص 40 مارك
وهذي بعض الصور للرافتنق
اضغط الى الرابط
أرجو تصحيح اللون الأحمر 40 يورو
تكلفة الرحلة للشخص 40 يورو -------------> هذا هو الصحيح

bosanac33
bosanac33
السلام عليكم
اخي وليد اشكرك على هذا التقرير المفصل ولي عوده في وقت اخر باذن الله

az3eem
az3eem
السلام عليكم ورحمة الله وبركاته
شكرا لك على التقرير المفصل الممتع بصياغته وممتع بصور الطبيعه الخلابه
الحمدلله على السلامه اخوي وليد
عندي بعض الأسئله اذا كانت عندك خلفيه اتمنى ان تفيدنا
بخصوص الأستثمار المزارع الشقق الاراضي والبيوت ...الخ
هل أستفسرتم عنها وبكم تقدر ؟
واسف جدا على ازعاجك
دمتم بحفظ الله ورعايته

ولد الاحمر
ولد الاحمر
الحمدلله على السلامه
وليد تقرير رائع
ومتابعينك للاخر

waledq8
waledq8
اخي الزعيم
وعليكم السلام ورحمة الله وبركاته
والله يسلمك ياغالي
بخصوص سؤالك. لا والله ياغالي ماعندي خلفيه
بس اخوي بوسناس يمكن يفيدك

waledq8
waledq8
الله يسلمك اخوي ولد الاحمر
وشكرا للمتابعه

بوسناوي هرسكاوي
بوسناوي هرسكاوي
تقرير رائع اخوي
بودي اقول انو اخوانا الكويتين ماليين علينا الديرة في البوسنة جزاكم الله خير
أخوكم يوسف من البوسنة


خصم يصل إلى 25%