برشلونه المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
احلى من العقد
17-12-2022 - 05:51 pm
  1. وماننسى طبعا الكوفي لاتيه ...


السلام عليكم جميعاً ...
بدون مقدمات خلوني ادخل في الموضوع ...
بعد مارجعنا من سفرتنا الي غطت كذا دولة اوروبيه ... وبعد مارتحت لي يومين جيتكم بالتقرير ...
البداية ...
طرنا من الدوحة تاريخ 24-6-2011 الى مدريد بالخطوط الجوية القطرية ... و وصلنا مدريد الساعة 8 الصبح ...
طبعا قبل موعد الشيك ان .. لان الشيك ان الساعة 2 الظهر ...
فقررنا نحط شنطنا في الفندق ونتمشى في شوارع مدريد الجميلة ...
اليوم كان الجو حلو ماحسينا بالحر ابدا ... يمكن لان حنا مشينا الصبح عالطراوه على قولة اخوانا المصريين
اتجهنا جهة ساحة ديل سول او ساحة الشمس (( ماهقيت ان البراقع يفتنني خ ))
وكانو عاملين مجسمات غريبة وكثيرة من الزبالة ...
هاللوحة اضنها تمثل ثورات الشعوب وفيها كلام بالعربي
وهاي تمثيل للبطالة والهوم لس ... شكل مانتو عارفين كنا رايحين بوقت فيه احتجاجات على كثرة العاطلين عن العمل واعتقد هالتماثيل والصور و المجسمات تمثل العاطلين
وفي هذه الصورة بالتحديد تشوفون امي قاعده تدقق بالمكتوب خ
مجسم اخر
وبعدها حسينا روحنا ميتين من الجوع فقعدنا في احد الكافيهات الي عالشارع وتريقنا ...
كورواسون بالجبن لذييذ
هوت شوكلت .. وفي اسبانيا لما تطلب هوت شوكلت يعطونك معاه شي يشبه زنود الست خ بس طويل وايد وبدون شيره عشان تغطه في الهوت شوكلت وتاكله بالهناء والشفاء

وماننسى طبعا الكوفي لاتيه ...

وبينما نحن جالسات على الكراسي ... لاحظنا ان الشحاتين مايجون الا عند المحجبات (( احنا )) يعني كانو يتركون الكل ويجون يشحتون منا كان منهم من دول شمال افريقيا و في منهم غجر ... لكن احسن حل لهم انك تسوي نفسك مب منتبه لهم حتى لو طلو في جهك وقالو لله يا محسنين ...
وبعدها قمنا نكمل جولتنا في شوارع مدريد ...
وتمشينا في الال كورت انجليس وهو مول كبير له افرع عديده في اسبانيا والمول حلو يستحق الزياره
ونال التعب منا ماناله على قولتهم وكنا خلاص داييخين ونبي ننام ... فاتجهنا جهة الفندق ..
فندقنا يقع هنا في المبنا الي مكتوب عليه شوبس
ووصلنا الفندق ... فينشي كابيتيلو ...
و سأتوقف هنا واكمل معكم لاحقا تفاصيل مدريد والفندق ... شاو


التعليقات (9)
lo0onely
lo0onely
يعطيكي الف عافيه
تقرير حلو وبإنتظار البقية... (خاصة برشلونة
)
عندي سؤال : كيف المواصلات في مدريد (المترو - الباص - القطار - التاكسي)؟؟
موفقه

احلى من العقد
احلى من العقد
lo0onely
ان شاء الله برشلونه في الطريق عقب مدريد اما بخصوص المواصلات في اسبانيا عامتاً وليس في مدريد بالذات فهي سهله جدا جدا المترو مرتب وواضح جدا و الباصات خطها واضح وسهل ومن الفندق ممكن تعرف اي باص تاخذ بالضبط واما محطة القطار ففي محطتين قطارات واحده وسط مدريد وهي محطه رائعه وبتشوفها لاحقا في التقرير ومنها تروح لباقي مدن اسبانيا ومحطة ثانيه قريبه من المطار و من طريقها تروح الى باقي المدن الاوربيه

lo0onely
lo0onely
احلى من العقد
الف شكر اخت احلى من العقد

FuNnY GiRL
FuNnY GiRL
ياسلام احلى شي اني لحقت على التقرير من بدايته وشكله روعه
ويارب يخلي لج الوالده ويحفظها لكم من كل شر
متابعين وبقوه

Mezajee_KSA
Mezajee_KSA
والله خالتي تقود الوفد تمشي في المقدمه ,, اللي يشوفها يقول مولوده في مدريد ههه
تصوير جميله ودخلات حلوه وبصراحه جالس اضحك على سالفة التغميس بالهوت شوكلت نو واي ههه
بانتظار المزيد من اكتشافات خالتنا في مدريد :d

الليل و النهار
الليل و النهار
كل سنة اتحرى لك تقرير
بداية حلوة

احلى من العقد
احلى من العقد
lo0onely
ياهلا بالاستاذ الليل والنهار و احلى مسى للناس الكويسه

سهم الحب
سهم الحب
.
.
يظهر أننا على موعد مع تقرير طري جداً بل ساخن من البداية
كم هو جميل تصويرك وكم هو جميل تعليقك سيدتي
واصلي مبدعتنا وكلنا شوق ل متابعة ما تنثريه لنا من صور ومعلومات لاشك أنها راح تكون وافيه وكافيه
ودي ووردي
سهم الحب
.
.

احلى من العقد
احلى من العقد
  1. فندقنا اسمه

  2. Vincci Capitalo

  3. تقريبا ماشفنا عرب كلش


أولا جميعا (( على قولت خوالي الاسبان ))
وقفنا عند جزء الفندق ...

فندقنا اسمه

Vincci Capitalo

ويقع على شارع القران فيا .. وهو احد اهم الشوارع الاساسيه في اسبانيا وتكثر حوله المولات والمحلات التجاريه والمطاعم و محطتين مترو ومحطة الباص المكشوف جدامه وجمبنا سينما ومسرح وتياترو ومطاعم عربيه وصينيه واسبانيه وفاست فود .. هاي غير انه قريب من اغلب الاماكن السياحية مثل القصر الملكي و كنيسة المدينة والعديد من المناطق الي ممكن تمشي لها ...
حجزنا كان 3 ليالي × غرفتين وحده دبل والثانيه ثلاثية بسعر 900.27 يورو للثلاث ليالي ..
وهاي صور الفندق ... من هنا ندخل
وهذا هو الرسبشن
وهذه الغرفه المزدوجه
اما هذه الغرفة الثلاثيه نبدأها بباب الحمام خ
وهاي سريرين
وهذا هو السرير الثالث الاضافي
كرسيين وطاوله في النص
وندخل الحمام
ومرحى مرحى للحمام انت صديقي يا حمامي (( للي لحقو على اغاني افتح يا سمسم ))
اما هالمنظر الجميل هو من شباكنا ..
وكما ذكرت لكم مسبقاً ان الفندق جمبه محطتين مترو هاي وحده منهم
بالنسبه لي هالفندق موقعه الممتاز هو الي يخليني اجدد السكن فيه هاي اضافتاً الى ان النت مجاني فيه .. والخدمه فيه ممتازه ... والموظفين متعاونين وهو فندق نظيف بصراحه ومن فئة 4 نجوم ...
ريحنا في الفندق شوي .. وعقب حسينا بالجوع الشديد ونزلنا نتغدا ... كنت اخبر من المره الي طافت ان احنا كنا ناكل في مطعم صيني قريب من الفندق وشغلت نافيغيتر المخ و دلانا الطريج الصحيح ... من هنا مشينا
والمطعم جدا قريب من الفندق
وعينا من الله خير وهاي هو المطعم
شفتوه كاهو
وطلبنا االاكل بس للاسف مب مثل الي خبرنا ... طعمه تغير وصار مب حلو وهاي الصحون بعد ماشبعنا
ويقولك تعشى وتمشى ... فقمنا وتمشينا في طرقات مدريد
واذكر الجو كان حلو والهوا عليل والزحمة ماليه الشوارع ناس رايحه وناس راجعه وكان قلييل ماكنا نشوف عرب

تقريبا ماشفنا عرب كلش

وبينما نحن نمشي مرينا جنب مسرح يعرض مسرحية لي ميزربل او البؤساء للكاتب الفرنسي المشهور فيكتور هوغو والي له شارع كامل في باريس يتفرع من قوس النصر باسمه ... وانا قد حظرت هالمسرحية في لندن بالانجليزي كانت وكانت رائعه حلوه جدا جدا جدا فتشاورت مع الاهل وقلت لهم اش رايكم نقص لنا تذاكر ونسهر الليله في هالمسرح ونشوف البؤساء بالاسباني ؟؟؟
ايدوني واختي الي شافت المسرحيه معاي في لندن ازرتني وشدة على يدي وقالت لي شورتج وهداية الله ورحنا قصينا لنا تذاكر وسعر التذكره ب 47 يورو للشخص ... وكان موعد العرض اذا ماخانتني الذاكره الساعة 10 بالليل
بعدها كملنا تسكعنا في شوارع مدريد الجميلة ووصلنا الى ساحة اسبانيا وكانو ناصبين خيام في الساحة و كأنهم يبيعون شي .. قلنا جدام الى وسط خيام بني مدريد ...
وهالنافوره جدام الخيام ...
ودخلنا للمعرض
المعروضات كانت حلوه واسعارهم بعد حلوه
وهاي نصب ساحة اسبانيا
شرينا اكسسوارات من هالمحل عندها اشياء حلوه و مميزه
وكملنا مشي حول ساحة اسبانيا
ومازلنا نمشي ونحن مبسوطين
وشلون ماننبسط واحنى حولنا الماي والخضره والوجه الحسن ...
لمحنا ستاربكس .. فقلنا نروح له و نقند راسنا بقهوه من ستاربكس
ودخلنا ستاربكس
من الصغير الى الكبير
انا قندت راسي بفرابتشينو
وعقب ماشربنا قمنا وتوجهنا باتجاه المسرح لان الساعة صارت تسع ونص وطبعا لين الحين الشمس طالعه .. ماله حلا يومهم تحس تتعشى مجبور ...
حلاة العشى على ضوء القمر خ مب على ضوء الشمس
وهانحن ذا نمشي باتجاه المسرح
ووصلنا المسرح
وهاي المسرح من داخل كان جدا فخم .. والناس لابسين سواريه
والمسرح من كبره 3 طوابق ... فركبنا السلم عشان نروح للطابق الثاني الي فيه كراسيينا
وقعدنا ... وهاي المسرح من داخل
مقاعدنا كانت بعيده نوعا ما (( حاجزين بو رخيص )) بس ماكان ارخص شي كان وسط بس مكانا كان في النص وبعيد شوي بس كنا نشوف
شوفو المربع الازرق هاي هو المسرح واحنا فوق
طبعا التصوير في الداخل ممنوع فماصورت لكم العرض ...
وبعد ماخلص العرض طلعنا وكان المكان مزحوم
رأيي عن المسرحية ..
النسخة الانجليزية في لندن احلى بمليون مره ...والسبب
1- انك تفهم اللغة الانجليزية وتعرف بالضبط الي يقولونه ..
2- المسرحية غنائية والكلمات بالانجليزي وايد احلى
3- الممثلين الانجليز ماشاء الله عليهم طول ورزه وتمثيلهم وايد احلى من الاسبان
4- التأثيرات الضوءيه والمسرحية في لندن وايد احلى واقوى كان المسرح يلف ماعرف شلون اشرح لكم بس عرض لندن اقوى بوايد وانصحكم تشوفون المسرحية في لندن مب مدريد ..
وحتى لو حبيتو تشوفون المسرحية في مدريد ماراح تقدرون لان بالصدفه اكتشفنا انه كان العرض الاخير خ
وعقب ماطلعنا من المسرحية على طول للبيت رحنا ننام من التعب الي صادنا ..
والقاكم قريبا ...


خصم يصل إلى 25%