بشرى سارة لكافة اعضاء ورواد منتدى العرب المسافرون حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق arTravelers.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب وقد تم نشر 400,000 ألف موضوع 3,500,000 مليون مشاركة وأكثر من 10,000,000 مليون صورة ما يقرب من 30,000 ألف GB من المرفقات وهي إجمالي محتويات العرب المسافرون للاستفادة منها والتفاعل معها كحق اساسي لكل عضو قام بتأسيس هذا المحتوى على الانترنت العربي بغرض الفائدة.

لمزيد من التفاصيل يمكنكم مراسلتنا من خلال نموذح الاتصال, العرب المسافرون على Facebook



كويتيه مزيونه كويتيه مزيونه
تقريري عن الصين وبالتحديد ( كوانزوا - شنزن - هونغ كونغ ديزني لاند )
17-12-2014 - 09:49 pm

السلام عليكم ورحمة الله وبركاته

هذا التقرير أهداء للمنتدى الاكثر من رائع والاعضاء المميزين
والمنتدى الذي اسهم في تسهيل الكثير من الامور التي تعيقنا في السفر
فما واجبي الا ان اقدم له هذا التقرير المتواضع
رد على الجميل وعلى المواضيع الجميله التي يقدمونها لنا
واتمنى من الله ان يوفقني بكتابة هذا التقرير
وان نسيت شيئأ فاتمنى ان تعذروني

بسم الله الرحمن الرحيم
طبعا الكثير منا خصوصا البنات يسمعون عن الصين وعن اسواقها
وعن الرخص الغير طبيعي الموجود فيها
وكنت دايما ادخل واقرى مواضيع وتقارير
وكنت اتمنى اني اروح واشوفها عالطبيعه
واتسوق فيهاا لكثرة مجمعاتها

الفكره صارت ماتفارقني انا واختي
فكرنا كثيرا واستقرينا على الذهاب
فقلت حق اختي نتوكل على الله ونجرب
فاصرنا كل يوم ندخل وناخذ معلومه
وندونها في المذكرات
مازال الرعب موجود
شلون ندبر امورنا
خصوصا انهم لايتحدثون الانجليزيه
فكانت اول خطوة لنا بعد وصولنا للصين البحث عن المترجم
ياجماعه لاتغلطون مثلنا اول يومين ضيعناهم في المجمعات
لا هم فاهمين علينا ولا حنا فاهمين عليهم
ماتقدر تتفاهم معاهم لا بالاشارات ولا باللغه الانجليزيه
صاروا يعصبون علينا واحنا كذلك صابنا احباط بشكل رهيب

فا اهم شي بحطلكم رقم المترجم اللي تعاملت معاه
مو شرط تتعملون معاه اهو بالذات
لكن لا تمشون بالصين بدون مترجم
راح ابين لكم اهمية المترجم بالتقرير ان شاءالله

طبعا احنا اثنين خوات مشتركين بنك واحد
لاتستغربون اختلاف الاسلوب
لان اثنينا اتفقنا اننا نشارك بكتابة هالتقرير
طبعا هالموضوع كتبته اختي
وحبيت انسخه لكم اهني

السلام عليكم ورحمة الله وبركاته

اول شي احب اشكر جميع اعضاء هالقسم بدون استثناء لولا الله ثم مواضيعهم جان ضعت بكوانزو

وحبيت افيدكم بشي بسيط يمكن يفيد الكثير اهني

لما وصلنا كوانزو وشرينا ارقام صينيه دقينا على مترجمه حاطين رقمها اهني وقالت انها مشغوله وراح ادز لنا وحد من صديقاتها نطرنا اشوي ولا تقول ماعندها وحده حاليا بس في واحد انا انصدمت شلون نأخذ راحتنا قالت بس اليوم على ما ادور لج باجر

ووصل المترجم والحمدالله الله وفقنا فيه انسان محترم وخلوق وثقه وينصح من قلب ويتعب عشانكم

لما شافه ابوي جذي قال لا تغيرونه ارتحت معاه

وفعلا تم معانا من ثاني يوم لنا بكوانزو لي اخر يوم واحنا مسافرين للمطار

سعره 150 ريمبي ساعات اذا تعب معانا نعطيه 200 ريمبي من نفسنا

رقمه : 008613688857321 (اذا اتصلت عليه من برا الصين )

: 13688857321 ( من داخل الصين )

من المواقف الي اتضح امانته

لما سافرنا هونغ كونغ اختي اعطته مبلغ عشان يستلم اغراضها وفعلا استلمهم وتمت الاغراض عنده ولما وصلنا ثاني يوم الصبح جاب الاغراض لنا

واحنا سلمنا له مبلغ الشحن اشوي كبير بدون لا اوراق ولا شي وشحن لنا الاغراض ( ابوي كان خايف يأخذ الفلوس بدون لا يشحن الاغراض ) والحمدالله قد الثقه

ورسل لنا ايميل اذا وصلت اغراضكم بلغوني عشان اعطي شركة الشحن الفلوس اخاف ينقص شي من اغراضكم

يعني امين ومحترم

والله يوفقكم بسفرتكم


اللي حاب يتواصل مع المترجم محمد عن طريق سكايبي هذا حسابه :
congwenqi1
فانا اقترحت عليه يفتح حساب بسكايبي عشان اوفر عليكم قيمة المكالمات الدوليه

احنا كنا 3 اشخاص
الوالد الله يحفظه وانا واختي
وسوينا فيزا من الكويت الدخول مرتين للصين
لان حاطين في بالنا نروح ديزني لاند
الطيران كان السيرلانكيه
طبعا اذا جيت بتقول سيرلانكيه
فاتأكد انك بتمر على مليون ديره

رحلة الاقلاع كانت كالتالي :
( كويت - دبي ترانزيت ساعه - كولمبو ترانزيت ساعتين "تبديل الطياره" - بانكوك ترانزيت ساعه - عقب كوانزوا )

وعلى ماتوصل كوانزوا تكون اعصابك كلها تلفت من الهبوط والاقلاع
وانا من النوع اللي اخاف من الطيارة واكرهها وفي بينا عداوه منذ الصغر
ولا احب اركبها واهون علي اسافر بسيارة لمدة 20 يوم ولا اركب طياره
المهم الطيران بشكل عام مايعيبه شي
خدمة نظافة الوجبات يقدمونها على مدار الرحلات وكلها حلال
لكن يبيعون المشروبات الروحيه بالطياره
بس للامانه ماشفنا مضايقات من المسافرين
والرحله من بانكوك الى كوانزوا كلها مطبات هوائيه
وبعض المرات تكون قويه

هذي بعض الصور من الطيران
واعذروني على قلتها لان شرحت لكم حالتي وانا بالطياراه :

شكل الطائرة من الداخل :




هبوط عالاراضي السيرلانكيه كولمبو وصور من المطار :




مطارهم جدا صغير ومتواضع
عندهم شارعين بس واحد للهبوط واحد للاقلاع
يعني الطائرة بس تأخذ فوق تحت وتقلع
لدرجة ان المطار يهتز من صوت الطائرة لانها جدا قريبه من المطار
وهذا الشي غلط طبعا




كولمبو مدينة جدا جميله
وانصحكم بقضاء يوم على الاقل بها
في رحلة العوده قضينا يوم جميل باحدى فنادقها المطله على البحر
وان شاءالله راح احط صور الفندق والاطلاله الخياليه

وجبة الافطار بعد الاقلاع من كولمبو




تصنيف الوجبات على حسب الدول :
من كويت الى دبي ( ساندويش مسحب دجاج مع كولا )
من دبي الى كولمبو ( برياني دجاج لذيذ الصراحه )
من كولمبو الى تايلند ( وجبة افطار مثل الصوره )
من تايلند الى كوانزوا ( الله يديم النعمه اندومي مع سمك كان جدا سئ )

طبعا الحلو بالطياره ان فيها كاميرا تعرض صور لجو من الخارج
هالصوره كنا تحت الاراضي التايلنديه
نستعد للهبوط في بانكوك




ومازلنا نستعد للهبوط







جميله مبانيهم




في رحلة الاقلاع من بانكوك الى كوانزوا
تعرفنا على مجموعه من بنات صينيات مقيمين بكوانزوا
وتبادلنا الحديث عن مجمعاتهم وعيشتهم في كوانزوا
واستفدت منها معلومات كثيره
وكانوا مصدومين من درجة الحراره بالخليج شلون توصل الى 50 درجة مئويه
وكانوا يستفسرون عن الحجاب ليش لابسين حجاب ماتحسون بالحر
يعني هذي كانت اسالتهم
وطبعا وريناهم عملتنا بالكويت
فكانو يبون يحتفظون فيها للاسف ماكان عندنا كثير
فاعطيناهم اللي عندنا

وصلنا مطار كوانزوا وكنا تقريبا شبه ضايعين
سمعت من الاعضاء ان افضل شي استخدام المترو
وطبعا كانت فكره فاشله بكل ماتحمله الكلمه من معنى
اضطرينا الى سحب حقائبنا من محطه الى الاخرى وكان افضل خيار طبعا التاكسي
ولاتعيدون تجربتنا مع المترو مانصح فيها

ذهبنا مع التاكسي الى نيومينلاند فندق شندادي بنق وا
وتم الحجز من الفندق نفسه
غرفه ستاندر مع سرير اضافي ب432 + سرير اضافي 160
المكتب بالدور الثاني ماكانوا متعاونين معانا ماعرف شنو السبب
يمكن لان عددنا 3 فكان تقول لي ان الفندق لايسمح ب3 اشخاص في غرفة ستاندر
فانا كنت اقولها نبي سرير اضافي
وماكانت تفهم علينا
وانجليزيتها ضعيفه جدا وحتى الرسبشن انجليزيتهم ضعيفه
فا من التعب حجزنا من الفندق مباشره
وطلبنا عشاء عباره عن بيتزا
كان لابأس فيه
بشكل عام الاكل العربي هناك سئ
ماعدا مطعم البيت الشامي اكلهم جدا لذيذ

والان انتهيت من الفقره الاولى
انتظروني غدا في الاندرجراوند





المشاركات

مجنون الخبر مجنون الخبر
تقريري عن الصين وبالتحديد ( كوانزوا - شنزن - هونغ كونغ ديزني لاند )


منتظرينك
لاتطولين علينا


beyond expectation beyond expectation
تقريري عن الصين وبالتحديد ( كوانزوا - شنزن - هونغ كونغ ديزني لاند )


بداية رائعة ومشوقة..
بانتظار باقي التقرير..لاتطولين علينا.....


siam siam
تقريري عن الصين وبالتحديد ( كوانزوا - شنزن - هونغ كونغ ديزني لاند )


حمدلله عالسلامه ورحله موفقه


hewa hewa
تقريري عن الصين وبالتحديد ( كوانزوا - شنزن - هونغ كونغ ديزني لاند )


رحلة موفقة كانت حمدلله على سلامتك
يالله ننتظر التكملة سفري بعد اسبوع ،،،من اليوم انتظر منك التفاصيل من فضلك


غلاااهم غلاااهم
تقريري عن الصين وبالتحديد ( كوانزوا - شنزن - هونغ كونغ ديزني لاند )


تقرير رووعه كملي

بانتظآآآرك ياقلبي....

وحمدالله ع السلامه


champoo champoo
تقريري عن الصين وبالتحديد ( كوانزوا - شنزن - هونغ كونغ ديزني لاند )


تقرير جميل متابع بشدة


كويتيه مزيونه كويتيه مزيونه
تقريري عن الصين وبالتحديد ( كوانزوا - شنزن - هونغ كونغ ديزني لاند )


مساكم الله بالخير
نكمل مع اليوم الاول في الارضي الصينيه
وبالتحديد كوانزوا
طبعا اليوم الاول طولنا بالنوم
لان الرحله كانت جدا متعبه
هبوط اقلاع
اقلاع هبوط
وكانت تقريبا يوم كامل متواصل
لذلك اي شخص ناوي يسافر
انا انصحه يحجز على الخطوط القطريه
قبل 4 شهور من يوم السفر
بيحصل سعر جدا مناسب

نرجع لتقريرنا باليوم الاول نزلنا للفطور
وكان الفطور مثل ما اهو من اول مانزلنا للفندق
لحد ساعة الخروج يعني مافي تنوع
قعدنا يوميا ناكل بيض زبدة توست شاي
شاي توست زبدة بيض
والحمدلله على النعمه
في خضروات يعني ناكل منهم بعض المرات
انصحكم تشترون من ديرتكم اجبان
لان الاجبان ماراح تشوفونها بالصين
حتى بالسوبر ماركت
فلا تغلطون غلطتنا
احنا اخذنا معانا كاكاو وشبس وعصاير
بس نسينا اهم شي الاجبان

المهم بعد الريوق راحت اختي مع الوالد
الى صراف مسلم
وامين بنفس الوقت
يعني كل ماتحولون عنده العملات
يعطيكم العمله ويحطلكم ختم على جنب
عشان تعرفون ان العمله غير مزوره
والحمدلله ارتحنا للتعامل معاه
من تطلعون من فندق شندادي بنق وا
روحوا على ايدكم اليسار
بتحصلون محل خضروات بعده مطعم اسلامي
اهو ملاصق بالمطعم الاسلامي
طبعا الصراف يشتغل اهو وزوجته
بس يوم جيت بصور مالقيت الا زوجته
تذكرت ان عندي كرت الصراف
وصورته لكم اليوم :


وهذي صورة الصراف


طبعا تلاحظون اكياس مكادونالز على جنب
هذا كان غداي
واكيد بيكون سمك
لان الذبح عندهم مو حلال
والحمدلله على نعمة الاسلام
واشترى الوالد خطوط للاتصال
فانا مااستخدمت الخط لان مو راضي يركب على البلاك بيري
فا قلت بشتري منهم تلفون وبعدين ضاعت الشريحه
والحمدلله على كل حال
وهذي صورة بطاقات الاتصال :



اول يوم طلعنا رحلة للاستكشاف الاسواق اللي حوالينا وبقولكم شنو في بجانب الفندق :
امام الفندق مباشره سوق للملابس الداخليه بانواعها جمله ومفرق
على يسار الفندق مجمعين لسوق الاكسسوارات سوق جميل جدا وانصح فيه تقريبا مسافة 5 دقايق مشيا عالاقدام
على يمين الفندق مدخل للاندرجاروند ( اكبر سوق تحت الارض ) من بوابه رقم 3
سوق لي خوا من المخرج رقم 17 مانصح فيه بضاعته جدا قديمه والمجمع لايصلح للتسوق
بتحصل بنفس المكان مكاتب لبيع المنيكانات اشكال والوان وعلاقات الملابس
مكاتب لعمل فواتير واكياس الحد الادنى تقريبا 1000 كيس من النوع الواحد ويعملون لك لوغو يعني مناسب للاشخاص اللي عندهم محلات لان اسعارهم جدا رخيصه
في مجمع كان شكله حلو بس للاسف مادخلته
وسوق بايما وايما قريب مسافة 5 دقايق بالتاكسي
ومطعم مكادونالز اول ماتطلعون من الفندق على ايدكم اليمين امشوا سيده بتشوفون اشاره اقطعوا الشارع هم بعد سيده وبتشوفونه على ايدكم اليمين
وفي بعد له فرع ثاني بس اللي وصفته لكم اقرب
وطبعا تطلبون بس وجبة سمك
ان شاءالله اني مانسيت شي لان هذا اللي اذكره بس

صور للفندق :




صور الفندق من الداخل


صور مكان بوفية الافطار :




وهذي صور للاماكن اللي حوالين الفندق :

مدخل 3 للاندرجاروند ( المداخل القريبه من الفندق 1 , 9 , واعتقد 13 مو متأكده )




هذا مجمع الملابس الداخليه مقابل الفندق مباشرة :




مجمع الاندجراوند



سوق الاكسسوارات



من شوارع القريبه من الفندق



وبجذي انتهيت من عرض الصور
وطبعا اللي يسافر الصين بيعرف ان مافي وقت للصور
واعذروني على قلة الصور لان الوقت مايسمح لي
المجمعات تفتح الساعه 8 الصبح وتسكر 6 مساء يوميا

اعطيكم تفاصيل اليوم الاول في الاندرجراوند ولي خوا والمجمعات اللي حوالين الفندق :
دخلنا المجمع من المدخل رقم 3
قعدنا نتمشى بالمجمع وطبعا التفاهم شبه معدوم بينا وبينهم
وماينزلون بالاسعار نهائيا اذا نزلوا لك تقريبا 10 يوان
وبضاعتهم حلوه الصراحه ومتنوعه لكن الاسعار عاديه مو رخصيه ولا غاليه
يعني الاسعار متوسطه
بس الاندجراوند يعنبر اغلا سوق دخلته
وجدا مرتب ويفتح النفس للتسوق
والحمدلله تسوقنا رغم عدم الفهم والتواصل بينا وبين البائعين
صرنا بس نحط السعر
واذا قلنا لهم نزلوا يرفضون
على قولتهم wholesale price
لاشفنا سعر الجمله ولا شي
يعني اسعارهم عاديه
ومانصح تشترون ملابس
لان اغلب ملابسهم طلعت ضيقه وقصيره
مع ان اوزانا ماتتعدى ال60 وال 55
لكن ملابسهم مقاساتهم حيل صغيره
حلو للتسوق ملابس الاطفال
ملابس الرجال
يعني ماقولكم ماشرينا لا اشترينا ملابس
بس مثل ماقلتلكم غصب بتدخل فيكم من ضيقها
يعني المجمع متنوع وكبير جدا
وماينمل منه بس للاسف احنا كنا تعبانين
وطلعنا بدري من المجمع
وتوجهنا الى لي خوا
على قولة اختي المكتوب مبين من عنوانه
افترينا فيه شوي
مافيه شي يسوى
والمللابس حيل قديمه
والجوده معدومه
فافضلنا نروح نتغدى ونريح شوي

فاخذت رقم البيت الشامي لان كان عندي من زمان
وطلبنا للوالد كبسة دجاج
انا واختي عرايس وفتوش وحمص
الاكل جدا لذيذ ومثل ماقلت لكم احلا مطعم عربي جربته
وهذي صورة الاكل


اعتذر عن ازلة بعض اجزاء الصوره لانها غير صالحه للنشر

من مسأوى سوق الاندجراوند :
رائحه المجمع وخصوصا وقت الغداء لما اقول عن رائحه فانا اقصد انها رائحه لاتطاق مادري شنو يحطون بالاكل بس الاكيد اني ماقدرت استحمل ريحة المجمع حتى والدي لاحظ نفس ملاحظتي
حتى الرائحه ربكتنا واحنا نتجول في المجمع وهي السبب الرئيسي اللي خلتنا نطلع من المجمع بوقت قصير وغير التعب طبعا فاكان يبيلنا فترة نتأقلم مع رائحة الاكل
والرائحه منتشرة بكل اماكن الصين لدرجة اننا نمشي ونشعر بالغثيان من قوة الرائحه

من مسأوى الفندق :
اللوبي ماتتوفر فيه كراسي يعني لابغينا نستلم شغلنا وحبينا نتأكد منه لازم نأخذ البائع لغرفتنا ونفتح ونجرب
هالشغله حيل ضايقتنا حتى مره اضطريت اني اجرب حذائي ( وانتو بكرامه ) وانا واقفه وامام الماره من الناس
فعندما سألتهم عن عدم توفر كراسي كان جواب المؤظف بتشتيت السؤال ويقول لي انتبهي البائع يكلمك !
تصرفه جدا سئ ولم يعجبني
الفطور : فطور واحد اصناف وحده لم تتغير منذ دخولنا الفندق بس للامانه اذا شي موموجود بالفطور تطلبه منهم يجيبونه لك مثال على ذلك البيض
وطبعا لايتحدثون الانجليزيه جيدا يبيلك وقت تشرح لهم وتمثل تحس نفسك مهرج وبالاخر يجيبون الشغله اللي تبيها
مانكر انهم جدا خدومين لكن هذي بعض ملاحظتي على الفندق واتمنى انها تتعدل في المرات الجايه

مزايا الفندق :
قريب جدا من الاسواق
الرسيبشن والروم سيرفس جدا خدومين
الروم سيرفس يوميا ينظفون الغرفه
الاسعار متوسطه الى جيده
الامن ممتاز في كل مكان كاميرا واي ضيف يدخل عندك 5 دقايق جايين يسألونك منو هالشخص
الاصنصير مايصعد الا ببطاقة الغرفه
صندوق الامانات متوفر عندهم تحت بالرسبشن للامانه مانحط فيه مبالغ ماليه فقط جوازاتنا
لان في شخص حط فلوسه بالامانات مبلغ كبير مايقل عن 30 الف رمبي والفندق تصنيفه 5 نجوم وولاسف الفلوس تحولت الى مبالغ مزوره حبيت احذركم من عدم الثقه بالفندق
فاخلوا مبالغكم معاكم حتى لو كان المبلغ كبير اظمن طريقه لكم
طبعا بجانب الفندق مطعم اسلامي ماانصح فيه لان بعد مااكلنا منه صابنا عوار بالمعده
في صراف اللي حطيت لكم صورته فوق
ومحل خضروات
ووشنو بعد لاتذكرت شي بقوله لكم ان شاءالله

واسفه عالاطاله لاني احاول اذكر كل شي ومانسى اي معلومه او موقف صارلي
اتمنى عجبتكم هالفقره
ولنا تكمله بأذن الله


كويتيه مزيونه كويتيه مزيونه
تقريري عن الصين وبالتحديد ( كوانزوا - شنزن - هونغ كونغ ديزني لاند )


المشاركة الأصلية كتبت بواسطة مجنون الخبر
منتظرينك
لاتطولين علينا
ان شاءالله ماطول عليكم
المشاركة الأصلية كتبت بواسطة beyond expectation
بداية رائعة ومشوقة..
بانتظار باقي التقرير..لاتطولين علينا.....
شكرا من ذوقك اخي الكريم


المشاركة الأصلية كتبت بواسطة siam
حمدلله عالسلامه ورحله موفقه
الله يسلمك ان شاءالله شكر لك

المشاركة الأصلية كتبت بواسطة غلاااهم
تقرير رووعه كملي

بانتظآآآرك ياقلبي....

وحمدالله ع السلامه
شكرا من ذوقك
الله يسلمك من كل شر

المشاركة الأصلية كتبت بواسطة champoo
تقرير جميل متابع بشدة
شكرا لك
تابعني


بدر القصيم بدر القصيم
تقريري عن الصين وبالتحديد ( كوانزوا - شنزن - هونغ كونغ ديزني لاند )


إبداع لكن الطياره دوخة !

عمومآ بإنتظارك انا بكوانزوا ولنستفيد من تقريرك !

أشكرك إبداع من البدايه !



يمكنك فتح موضوع جديد للمناقشة او الاستفسار والمشاركة.

احجز الفندق بأعلى خصم:
خصم يصل إلى 25%

Share

تقريري عن الصين وبالتحديد ( كوانزوا - شنزن - هونغ كونغ ديزني لاند )