السعودية المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
Mekyaag
10-11-2022 - 06:05 am
  1. لاتخلون الأطفال يشعرون بالجوع اشبعوهم قبل لايبدأون بالصراخ لطلب الأكل


السلام عليكم...
حبيت اليوم أكتب لكم موضوع مو جديد عليكم بس ان شاء الله يفيدكم من خبرتي البسيطه بالسفر مع الأطفال يمكن تكون غايبه عن البعض
عشان تتجنبون بعض المواقف اللي تسبب الملل وعدم الراحه للطفل التي قد تسبب الصراخ والإنزعاج...
يحتار الأزواح إذا ارادوا السفر مع أبنائهم ويفكرون ألف مره قبل اتخاذ القرار (ناخذهم ولا لأ) مع إن آبائنا أول ياخذونا ويتحملونا ويفترون فينا كل مكان بدون ملل بس الحين الزمن تغير وكل ياهل معاه خدامته وممكن توفير المكان المناسب لهم مع أهل الزوجه او الزوج لمراقبتهم والإهتمام بهم...
برأيي إذا قررتوا أخذ الأبناء معاكم لازم يكون الزوجين متفقين مع بعض باختياراتهم وتحديد المسؤوليات في السفر وتوزيع المهام بينهم وأن لايترك الواحد فيهم المسؤوليه على الطرف الآخر بدون احساس فتكون المسؤوليه مشتركه وهذي مااسميها بدايه السفره الناجحه سواء مع الأطفال أو بدون الأطفال وحتى مع الربع
رأيي بالنسبه للرضع أتوقع إنهم أسهل بالسفر فقط يحتاجون تغيير للحفاض والحليب وينامون بسلام إلا إذا حاشهم لاسمح الله مرض كإسهال أو إنفلونزا مع إني ماجربت السفر لديره بعيده مع رضع بس هذا اللي شفته مع اللي اعرفهم وطبعا قبل السفر لازم تجهيزات السفر للأطفال عربة الطفل السهلة الطي موتشترون جديدة حزة الحزة ماتعرفون تفتحونها ولا يسكرونها سووا بروفه عليها قبل السفر بامبرز -حليب -لهاية ووحده زياده -ملابس بزياده -ملابس مريحه ودافئه للطائره لأني بصراحه أنغث لما اشوف الماما شايله الياهل بالطياره ورايحه لديره بارده ولابس الياهل قصير وبأكمام قصيره خصوصا البنات الأمهات يبدعون فيهم يكفي المطارات والطياره بارده على الطفل لأنه مايتحرك واايد وإذا وصلوا البلاد اللي رايحين لها تكون بارده بس الله يهدي بعض الأمهات لزوم الكشخه يمرضون الطفل بعدين يقولون ليش مرض !!!
أنصح للرضع بلبس البيجامه الكامله مع توفير غطاء للرأس مع أخذ اللحاف الخاص بالطفل
وبالنسبه للأطفال الأكبر سنناوطبعا إذا كانت الرحله طويله عزيزاتي الأمهات لاتلبسون عيالكم بنطلون غير مريح من الخصر تجنبوا الحزام والجينز الثقيل والأكمام القصيرة والسفر ببدلات رياضيه بدون حزام ويفضل أن يكون من أسفل الرجل(سير) =(مطاط) ماأدري شنو تسمونه عشان (كرمكم الله) لما يروحون الحمام مايطيح بالأرض وانتوا عارفين بعض حمامات الطيارات ومطارت بعض الدول أو حتى للسفر بالسياره
وأنصح لبس الجوارب الطويلة مع حذاء مريح كأحذية الرياضه لأنها بعد تنفع إذا ما انوجد البنطلون اللي فيه سير من تحت فتصلح الجوارب لأدخال البنطلون من تحت داخلها لتمنع سقوطها على الأرض عند دخول الطفل للحمام واتلاف نفسه
وطبعا دايما لما الطفل يلبس لبس مريح وحذاء مريح يحبه تكون نفسيته مرتاحه وهادئ وأنصح باللبس الغامق قليلا عشان لا يتسخ بسرعه فيلعبون وياكلون على راحتهم بدون تقييد إن الملابس ستتسخ ..
يجب توفير حقيبه إضافيه باليد فيها ملابس أخرى وملابس داخليه -ألوان (تتوفر بالمكتبات ألوان خاصه بالأطفال تزال بالماء عن الملابس) روعه عشان الوالدين مايتحسفون على الملابس ملاحظة :كل طفل لازم تكون له أدواته الخاصه عشان تتجنبون معاهم الهوشه مع معض والصوت العالي يفضل يكونون أغراضهم متشابهه عشان لايقول كل واحد ان الثاني أحسن منه -أوراق بيضاء وملونه للرسم عليها - قصص يحبها الطفل بعضها جديده وبعضها قديمه يكون الطفل متعود عليها
طبعا السناك فطاير (التصبيره ماركة الوزين السعوديه روعه وتشبع زعتر وجبن تكفي وتوفي بصراحه)
حلويات ميخالف عطوهم حلويات بس ديروا بالكم بكميات معتدله وبأوقات مختلفه حتى مو شرط بطلب منهم فاجئوهم بدون مايطلبون لاتكثرون عشان لايعورهم بطنهم خطتي دايما افتح كيس الحلاو واخش نصه واسوي نفسي توني فاتحته يحسبون إني معطتهم الكميه كلها فيفرحون

لاتخلون الأطفال يشعرون بالجوع اشبعوهم قبل لايبدأون بالصراخ لطلب الأكل

عزيزتي الأم إذا في مجال صنع كيكه منزليه يحبها الأبناء والزوج بعد عشان لايغار كل شي لليهال ووضعها بعلبه سهله الحمل وطبعا البسكويت بأنواع مختلفه لأن في مطارات لاتتوافر فيها مايحبها الطفل وانتوا تدرون عيالنا بالخليج ماشاء الله متدلعين ومتعودين على أصناف محدده
الآن وفي ظل التكنلوجيا عيالنا بصراحه مايسكتون إلا وفي إيد كل واحد ipad أو ipod touch هذا إذا مو بو 6 سنوات عنده iphone وفي أنواع مختلفه من الفيديو جيمز تقدرون توفرونها لعيالكم وتحطون فيها الألعاب اللي يحبونها وتتجنبون وتريحون الناس من حركتهم بوضع الصور والفيديو اللي يحبونها واللي موحابين يشترون منتجات Apple لعيالهم تتوفر في بعد الأسواق مثل جيان و كارفور ipod تقليد للأصلي بصراحه فادوني وايد بسفراتي بالسياره معاهم قبل لا اشتري الآيبود الأصلي كان هدوء رهيب بالسياره فهذا شجعني بعد ماكبروا اشوي وقاموا يعرفون للأجهزه إني أشتري لهم أصلي
وبالنسبه لولدي الصغير 3 سنوات مايعرف للأجهزه عطيناه القديم وحطينا له صور وفيديو وسماعات مريحه
حبيباتي البنيات الصغار اللي معاكم بالسفر واللي بعمر ال9 ومافوق اشغلوهم بالأشغال اليدويه المتوفره بالأسواق والمكتبات ولازم تكون تسريحه الشعر للبنات الصغار مريحه بدون شباصات وايد وللشعر الغير ناعم عمل جدايل بالصالون قبل السفر عشان الأم لاتتعب بالسفر بالتمشيط وصراخ البنت وتضييع الوقت بتسريح الشعر
عزيزتي الأم احملي الحقيبه السهله الحمل يفضل التي تعلق على الظهر يقدر زوجج يساعدج في حملها بدون احراج وتكفي لحمل الأشياء مع مراعاه وضع قنينة ماء فيها واشوية بسكويت للظروف الطارئه
اعزائي ... للسفر بالصيف لاتنسون وضع ملابس السباحه لأبنائكم عشان إذا رحتوا مكان في احواض سباحه مايضطرون يسبحون بالملابس الداخليه مثل مانشوف البعض يتوفر بالسوق عند الرياضي ملابس سباحه محتشمه للبنات سواء للمحجبات أولغير المحجبات اللي يحب يلبس بنته محتشم وهو أفضل من الملابس القطنيه عندالسباحه باحواض السباحه
للأطفال أقل من 4 سنوات يفضل أخذ عربه صغيره للتمشي من النوع الذي يطوى بسرعه
وضع بجيب كل طفل وحتى الكبار كرت الفندق تحسبا للضياع وللأطفال الي يفهمون اشوي مصروف جيب بسيط مع التنبيه لعدم صرفه إلا بحالة الضروره
لاتنشغلون عزيزاتي الحريم بالسوق وتتركون عيالكم عرضه للضياع وتنبيه الطرف الآخر بإمساك الطفل في حال الإنشغال وتأكيد وجوده عند الطرف الثاني
في النهايه تحملوا بعض مع مراعاة ان معاكم اطفال هواشكم يؤدي إلى التأثير بنفسياتهم وتذكروا دايما انكم مسافرين تستانسون وتغيرون جو مو واحد يلوم الثاني على أخطاء تافهه وبسيطه يعني طوفوا وايد الدنيا ماتسوي
وفي نصيحه أخيره إذا طفلكم من النوع اللي يحن وايد طوفوا وجنكم ماتسمعونه مو كل مايبجي تصرخون عليه ووفروا له اللي يبي دايما مو نفس ماتكونون بالديره تقدرون تتحكمون لأن المهم بالسفره الهدوء يعني لازم تتغير اطباعكم اشوي
الصديق والأخو والزوج والأبناء يبينون بالسفر فهذا اختبار للكل أتمنى للجميع النجاح فيه وهو فرصة للتغلب على النفس الأمارة بالسوء فحافظوا على صلاتكم وأرحامكم وبحفظ الله ....
هذي نصائحي وقولوا Mekyaag ماقالت...
تمنياتي لكم بإجازة صيف سعيده
وتردون بالسلامه ان شاء الله
إذا في شي نسيته ذكروني ...


التعليقات (9)
شغب قلم
شغب قلم
ماشاء الله عليكِ حسستيني ان السفر مع الاطفال له متعه بس لابد من الخبره القليله
انا ماجربت السفر مع طفل الا مره وحده بعمر 5سنين تبهذلت شوي بسس يمكن لانه لحاله وحس بالملل
ان شاءالله اجرب مع اخته وتتسهل اوضاعنا ويكونوا كبرووا شوي ...
المتعب في سفر المواليد والرضع هو الخوف على صحتهم لان المناعه تكون قليله وتقلبات الجو متواجده في السفرر
فهذاالشيء يضر الكبار قبل الصغار

مسافره 27
مسافره 27
موضوع رائع وماقصرتي
كانك قاريه ردي في موضوع السفر مع الاطفال
طيب بسألك.. ولدي الله يحفظه من النوع الملول.. قررت قبل السفر اشتريله
دي اس
واي بود تتش
واخليها مفاجأه عشان يلهي فيها
بس لظروف شريتها له الحين ومل منها,,, برايك وش ممكن اوفر شي مسلي وجديد.؟

Mekyaag
Mekyaag
شغب قلم
فعلا عزيزتي. السفر مع الاطفال متعه وإن شاء الله تطبقين اللي ذكرته وراح تشوفين كل خير
وآنه طبعي أول شي أسافر مع زوجي نستكشف المكان اللي رايحين له ونسهر ونتمشى ونتسوق على راحتنا وإذا انكتبت لنا روحه ثانيه مع اليهال لنفس المكان يصير ماعندي مشكله لاني شفت المكان من قبل واستانست فيكون وقتي ومن كثر حبي لليهال دايما أحاول أبتكر لهم الجديد
والحين في وسائل كثيره للترفيه استخدميها عل وعسى تنفعكم وتفيدكم وأهم شي طوله البال

Mekyaag
Mekyaag
مسافره 27
بالنسبه لملل الطفل من الجهاز لوكنت مكانك كنت راح أتصرف كالإتيآقبل السفر بفتره كافيه أخبئ الإيبود لمده كافيه حتى يفتقده أو ينساه أو أخبره بأنه ضاع قبل الخروج من البيت أخبره بأني وجدته وطبعا أحط له الالعاب اللي يحبها والعاب جديده وأفلا م جديده وأغاني إذا كان يحبها أو قرآن لان الياهل إذا ضاع منه شي يصير عزيز عليه وطبعا مشاركه الطفل باللعب وإبداء الإهتمام يعطي الطفل طاقه وحب وشعور بأن الجهاز جديد وحلو وفي اللي يشاركه اللعب
وتحسبا للطوارئ آخذ لعبة جيم بوي جديده أطلعها في وقت الطوارئ
وإذا مافاد آنه أقول خلوه بالبيت وايد أحسن
أتغشمر

عذبة
عذبة
مشكورة اختي
والله يعينا و يعينكم على حنة اليهال في السفر
وانشالله هالسفرة تكون اهدى لانهم كبروا شوي
و تحياتي

Mekyaag
Mekyaag
عذبة
عفوا عفوا وبالخدمه.....

بسمة حياتي
بسمة حياتي
سلام
حلوه النصائح .. يعطيك العافيه
انا مره سافرت مع بنتي عمرها 3 شهور مره مريحه
وناوين نسافر الحين واهي عمرها سنه و3 شهور مره خايفين منها لان شيطانه وحركيه ههه
بس استفدت من الي ذكرتيه
يسلموو

وحيدة اهلها
وحيدة اهلها
بصراحة اختي ما قصرتي
فعلا الاطفال يبي لهم طولت بال
اذا كان الاب حار او عصبي ما ينفع الطفل يسافر مع الاهل
واختي نفس النصايح حقت الملابس حق الصغار و الكبار نفس الشي لازم البس مريح واسع من النوع الي مايتكسر
يسلمو على هالنصايح الرائعه

cash2000
cash2000
نصايح مفيدة ... تسلمين وما قصرتي ... الحين اللي يبي يسافر مع عياله ماله عذر .
( ذ )


خصم يصل إلى 25%