بانكوك المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
فواز29
16-12-2022 - 03:42 am
  1. السلام عليكم

  2. مساكم / صبحكم الله بالخير جميعاً

  3. وطلعنا فوق أعلى وأعلى و وصلنا لأحلى مكان وأحلى جو عشته بحياتي pb189


السلام عليكم

مساكم / صبحكم الله بالخير جميعاً

هذا تقرير مبسط و صغير عن زيارتي الأولى لمملكة تايلاند الشقيقة .. ولن تكون الأخيره .. وما أتوقع التقرير الي بسويه بيعطي هالديره حقها لأني قصرت كثير بالصور وبالجوده خصوصا .. بسبب عدم إحترافية بالتصوير+الكاميرا المتواضعه والمعذره للجميع
طبعا سفرتنا في 10 سبتمبر 2010 اللي هو اول ايام عيد الفطر المبارك ولمدة 21 يوم ..
بالبدايه كانت رحلتي من الرياض-البحرين-بانكوك .. طبعا وقفنا بالبحرين ساعه ونص وقضينا وقتنا في السوق الحرة بمطار البحرين وراح الوقت سريع وممتع .. وكانت مدة الرحلة ثمان ساعات .. على طيران الخليج وبقيمة 2500 ريال ..
والرحلة كلفت للشخص الواحد شامله كل شي وطيران داخلي وفنادق (9000) ريال لمدة 21 يوم وعايشين عيشة ملووك وما نبخل على انفسنا في شي وكل يوم مساج pb189
تقريري بيكون ل (شنقماي (أربع أيام)-بوكيت (ست ايام)-بتايا (ست ايام)-بانكوك (اربع ايام))
وأي إستفسار انا حاضر
وصلنا بانكوك على الساعه 9 صباحاً طبعا كان الجو مغيم وشوية مطر
مطار كبير جداً جداً ونظيف وكل شي متوفر فيه حتى المساجد موجوده في كل دور ونسيت اصورها .. خلصنا من الجوازات بإنسيابيه ونظام
طبعا وصلنا 9 الصباح وكانت موعد رحلتنا من بانكوك إلى شنقماي الساعه 12 ظهراً يعني بعد ثلاث ساعات من وصولنا بانكوك
وهاذي لحظة الاقلاع لشنقماي الساحره وكانت مدتها ساعه وربع وقيمة التذكره للشخص فقط 100 ريال على طيران AIRASIA
وصلنا هالديره الهاديه .. طبعا معروفه لأكثر المسافرين لتايلاند أن شنقماي مناسبة للعوائل نظراً لعدم وجود البارات والاماكن اللي خبري خبركم بكثره .. وسكننا في فندق ملاصق للنايت بازار وقريب من الحياة الليلة المزدحمه .. محلات المساج عندهم مثل المطاعم عندنا تحصلهم في كل مكان واحلى مساج والله يدوم الرخص لمدة ساعه ب 30 ريال كامل الجسم
خلونا نكمل طبعا شنقماي في شمال تايلاند على الحدود مع (بورما) وتتميز بالطبيعة الخضراء و نقاوة اجوائها و جبالها المكسوة باشجار الغابات الاستوائية الكثيفة و لطافة مناخها شعب شنجماي ودود للغاية و سهولة التعامل معه عكس مدن اخري مثل بانكوك او بتايا او فوكت و الشعب محافظ للغاية على صفاته المحبة للاخرين و بكل سهولة يندمج معاك و ليس هناك حدود للمحبة .. وتحتوي على اماكن سياحية متعددة و خدمات عامة منتشرة في كل مكان و شعب طيب القلب و حياة رخيصة نسبيا مقارنة بمدن اخرى لذلك انصح الاخوان بالذات العوائل السفر لهذه المدينة و التمتع باجوائها و طبيعتها الجميلة .. وفيها مطاعم عربية كثير .. والاكل التايلاندي أصلا حلو مع الحرص عن البعد الاكلات المحرمه .. وجلسنا فيها أربع أيام فقط pb131 .. والمسافر لها بيلاحظ وجود عدد كبير من الأسرائيليين سياح .. بسبب وجود حي خاص لهم في شنقماي .. لكن ما يضرون أحد وفي حالهم
أدري هذررة كثير لكن أترككم مع الصور
هذا صنم صغير يعبدونه وحاطين له عصير جوز الهند عشان يشرب
فيه واحد جوا تشوفونه ولا لا pb094 سباحة تجيب العافيه و ترد الروح بهالمناظر
ترا هذا صنم حقهم .. مو صدقي pb058
هذا للبزران يعبدونه وإذا كبروا يحولون على اللي فوق ههه
دخلوا علينا واحنا نتفرج وشافونا لابسين الجزم الله يكرمكم وقالوا افصخوها برا وادخلوا على راحتكم pb192
اعلى شلال في تايلاند غير الاول وممنوع السباحه فيه لأنه يجرفك تحت
مسوي فيها صورة احترافية ههه اجرب حظي
مزارع الارز
هاذي قبيله الكارون رقينا لهم فوق الجبل وشفنا كيف عيشتهم وهاذولي يصنعون ملابس طبعا شغل يدوي ويعرضونها للبيع واسعارهم رخيصه
هاذي باصات السياح ومن ضمنها باصنا ينزلونا لمدة ساعة نفر المكان ونرجع مره ثانيه للباص نكمل الرحله

وطلعنا فوق أعلى وأعلى و وصلنا لأحلى مكان وأحلى جو عشته بحياتي pb189

هاذي معابد كبيره فوق الجبل .. لكن الاجواء غير غير غير .. اتعب وانا اقول غير .. أحس أني بحلم وقتها .. بإختصار اللي يبغ يسوي فلتره للرئتين يروح هالمكان ويقعد ساعه بس .. جو براد والغيوم تشطفك والجو صافي ما فيه اي شوائب مع رذاذ خفيف .. ما أقول ألا ربي عطاهم جنتهم في الدنيا
حديقة النمور في شنقماي طبعا تدخل وتختار مقاسات النمور الي تبغا تصور معها وكل واحد وسعره وتصور معاه لمدة ربع ساعه ويدخلون معاه جوا الشبك حقه pb093 وتمخمخ معاه وسوالف ههه ويدخلون معاك ثلاثه حراس من الحديقه طبعا صورنا وفليناها معاه واخترنا النمر الوسط مو الكبير
بتفكير في أيه !!
وبعدها طلعنا لأعلى قمة في تايلاند pb189 وكل ما طلعت فوق كل ما زادت الاجواء والمناظر احلى واحلى .. يعجز اللسان عن وصف هالاماكن اللي شفناها pb030
اللي يروح تايلاند لا يفوت ((مطبق تايلاند)) تحسبون المطبق عندنا بس ههه
عندهم مطبق يجنن وأكثر الزباين عليه هم الخواجات .. مطبق حالي طبعا مو مثل الي عندنا كراث وبصل pb030
المطبق حقهم سوويت يعني مثلا بالشوكولاته او بالذره مع البيض او مع النستله وانواع كثير نسيتها لكن لزوم ناخذ من عندها كل يوم بعد العشاء .. وهذا مقطع من تصويري لوحده مسلمه هنديه تسوي المطبق
YouTube - &


رحلتي الى تايلاند
التعليقات (9)
ليمونة حزينة
ليمونة حزينة
يا سلام
عليك يا فواز
ابدعت في كتابة التفاصيل وياحلات التصوير الا احتراف
عيني عليك بارده ابدعت في جمال شنق ماي شوقتنا اكثر واكثر للروحه لها باقرب وقت
اتمنى ان اكون من ضمن المتابعين لك وانت اكون اول من يقطع تذكره المسلسل الشنقاوي

@ الحنوووون @
@ الحنوووون @

بتفكر في إيه !!!
هههاي حلوه
يعطيك الف عافية
متابع على شاي ومكسرات كمل لاعدمناك

@ الحنوووون @
@ الحنوووون @
تعال بسألك :
عزاب او عوائل ؟؟؟
وكم شخص ؟؟؟

ابوليونه
ابوليونه
متى تقرير بوكت لاعدمناك .

Al Osaimi
Al Osaimi
يعطيك العافيه فواز
تسلم يديك
موفق ان شاء الله

طائر بلا حدود
طائر بلا حدود
بدايه قويه للتقرير... متابعين.

gattuso8
gattuso8
الله يعطيك العافيه واصل ولا تنسى ذكر مكاتب حجوز الرحلات في فوكيت عشان تعم الفايده

الهدار
الهدار
جزاكم الله كل خير اخي فواز تقرير رائع وجميل
وبارك الله فيكم

mohluv
mohluv
تقرير رائع و صور توجع القلب
ومطبقهم جرّبته في احد الاسواق الشعبيه هناك طعمه مختلف و في يسوو مطبق بيض بعد


خصم يصل إلى 25%