السلام عليكم ورحمة الله وبركاته
في البدايه اود ان اشكر جميع الاخوة والاخوات في هذا الصرح الرائع والجميل
الذي بفضله وبفضل الله اولا تجولت في ماليزيا والسبب يعود للاخوة والاخوات على تقاريرهم
ومعلوماتهم المفيدة وبالاخص الاخ العزير بدر بوناصر على كل مايقدمه من تقارير مميزه
هذا القسم.
كانت سفرتي الى ماليزيا لشهر العسل اللي كان في شهر 7 من العام الماضي
والصراحه اتاخرت كثير علشان اطرح التقرير وذلك بسبب عدة عوامل وهي
1- فقر التقرير لمقومات النجاح وقلة الخبرة
2- العديد من المواضيع المميزه عن ماليزيا
3-عدم المعرفة بامور الفوتوشوب
4-عدم وجود الوقت الكافي
5- تعرضي لعوكة صحية لمدة شهر ف المستشفى
ومن باب رد الجميل لهذا الصرح فقررت ان يشاركني الصور اخوتي واخواتي ف المنتدي
بداية الفكرة
فالبداية كانت اجازتي لبعد يوم الزواج اسبوعين وفي الحقيقه لم اكن اعرف الى اين اذهب
وكان يخطر في بالي ان اقضي اسبوع مابين ابوظبي ودبي من قصر الامارات وبرج العرب
واذا باعز اصدقائي يقول لي تصفح موقع العرب المسافرون!!! وفعلا دخلت وتصفحت القسم الماليزي
واعجبت بالتقارير واخذت كل شي ف اوراق صغيره ومن ثم تطور الامر لكي اطبع التقارير واختار الاماكن
والفنادق والمطاعم في كل منطقة من مناطق ماليزيا
من الفصحى الى العامية
خلاص انا بكتب باللغه العاميه تعبت وانا احيس لساني المهم
بعد ماشفت التقارير والمواضيع قررت التالي
- ليلتين في سيلانجور في منتجع صن واي لاقون
- اربع ليالي في لنكاوي فندق الفور سيزون
- ثلاث ليالي في كوالامبور فندق جي دبليو ماريوت
السفر عن طريق الاتحاد للطيران درجة رجال الاعمال
وكانت قيمة التذكرة للشخص 11500 لكن الاتحاد للطيران كان عارض علينا في الدوام عرض وهو عباره عن
خصم 30% لدرجة الاعمال وطلعت علي 8000 للشخص الواحد مجموع 16000
بالنسبة لاسعار الفنادق كانت مجموع التسع ليالي 11000 وكسور طبعا الفور سيزون كان مسوي عرض
3 ليالي والرابعه مجانا وتكلفة 3 الليالي 7000 يعني هو سبب الارتفاع وانا اتوقع الكثير يقولون الرحلة مكلفة
بس تعالوا بنشوفها من كذا جانب
بالنسبة للطيران انا اخترت البزنسس لعدة اسباب
اول سبب انا احب اقعد ف النص ماحب الكراسي اللي على الجنب بجنب الشباك لاني اخاف نوعا ما
فقلت يمكن اقعد ف النص بس يكون رجاجيل ف الكرسيين الباقيات وجي انا مابرتاح ولا المدام
ثاني سبب اول سفره لي مع المدام فكنت حاب اخذ راحتي ويا المدام
ثالث سبب الرحلة طويله ست ساعات ونص وكانت الساعه2 الصبح فكنت حاب انام
اسعار الفنادق غاليه
لاني حجزت عن طريق مكتب سياحي وكنت حاجز قبل فترة السفر باسبوعين وكل الفنادق تقريبا فل ومحجوزة
وبصراحة ماجربت الحجز عن طريق المواقع لاني ماكنت واثق فيها بس حاليا علمني اعز ربعي ودايما احجز عن طريق البوكينغ وان شاء الله التقرير ينال اعجابكم
بالنسبة للمواصلات من المطار والى الفنادق الثلاثه مع العوده الى المطار كلفتني 2000 درهم
لان المكتب حاجز لي هالامور بس تندمت اني حجزت عن طريقه كان اوفر لي لو خذت من برع المطار
يوم السفر
التاريخ 16/07/2010 الساعة 10:30
مع تذاكر البزنسس يوفرون لك سياره من والى المطار
وصلت السياره ع 10:30 وتحركنا من العين الى مطار ابوظبي يعني ساعه ونص وصلنا ع 12:00
ودخلت التشكن مال البزنسس وعقب رحنا نتمشى ف السوق الحره لحد وقت البرودينغ كان ع 1:15 وطارت بنا الطياره
ع الساعه 2:30 الصبح.......
ظبعا صاحبكم اول ماطارت الطياره نام وماصحيت الا قبل الهبوظ بنص ساعه وجتني المضيفه اتقول لي
بمناسبة شهرالعسل مسووين لكم كيكه تبيها الحين ولا بتشيلها وياك قلت لها بشيلها وياي وطبعا نسيتها
في شغله طافتني قبل الهبوط وهي كرت الدخول الظاهر المضيفه شافتني نايم وماعطتني الكرت وطبعا لما وصلت
الجوازات ف المطار قالي وين الكرت ورجعت وراء وعبيت الكرتين لي وللمدام...
ختمت الجوازات واستلمت الشنط وطبعا المكتب كان حاجز لي سيارة من والى المطار
صح قبل ماطلع من المطار خذت شريحتين والله ماذكر بكم المهم اول ماوصلت الصن واي لاقون كانت الساعة 4 العصر
سويت شيكن وخذوا من مبلغ 400 رنجت تامين ورحت لغرفتي والله حتى ناسي نوعها بس يمكن الاخوان من الصور يعرفونها
يمكن الكل يستغرب اني ماحطيت ولا صوره للحين لاني بصراحه ماصورت ولا صوره الا يوم وصلت الفندق
واتركم مع صور للغرفه بس للاسف ماصورت غير هالصور
يتبع
واصل يامبدع