الكويت المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
كيفي بحرينية
09-12-2022 - 11:54 pm
السلام عليكم والرحمه وبركاته
تقريري المفروض انزله من زماان بس نظرا لظروفي وانشغالي ما قدرت
التقرير بيكون خفيف وقصير لان مده الرحله يوم واحد بس
قبل ما ابدا التقرير احب واجه كل الشكر والتقدير إلى اختي وحبيتبي كويتيه^رحاله
الصراحه ما قصرت ابدا
اول شي سبب زيارتي للكويت هو دعوتها لي..وثاني استقبالها الاكثر من الرائع..وكرم هل الكويت اللي غرقتنا فيه وهالشي مب يديد على الكويتين
واخر شي هي سبب عشقي للكويت واهلها
فكل الشكر موصول لها وإلى ارفيجاتها..بالفعل ما قصرتوا
نبدا التقرير
فكره السفر: بعد ما عزمتني كويتيه رحاله,يلست مع ارفيجتي في الكوفي وطرحت الفكره كمزحه..وحبتها, فتحولت المزحه إلى واقع..
فتحنا النت واحنا بالكوفي ( حار بحار) وجيكنا على الطيران..وبعد الاستفسار عن احسن الفنادق, نصحتني كويتيه يزاها الله الف خير بافضل المنتجعات في الكويت وتم الحجز
تاريخ السفر:16-17 نوفمبر
عدد الاشخاص: شخصين
الطيران: الجزيره
سعر التذكره لشخصين مع حجز الكراسي اون لاين : 136 دينار بحريني
مسار الرحله: بحرين-كويت-بحرين
اسم الفندق: منتجع موفنبيك البدع
سعر الفندق : 88.55 دينار كويتي شامل الريوق والانترنت
نوع الغرفة: ستاندر روم وتطل على المسابح الخلفيه
Late Check Out: 44:33 دينار
حجز سياره من الفندق إلى المطار بسعر : 5 دينار كويتي
الرده من الفندق إلى مطار: عن طريق سباجه " سياره كويتيه^رحاله " >> والله وايد حبيت اسمها
واهديها هالباقه الحلوه
والحين بخلي الصور تتكلم
جوازتنا
طبعا اول ماوصلنا المطار كنا مختبصين وماصورت اي شي
وصلنا المطار الساعه 11 الصبح..وكانت الاجراءت سهله..ولقينا ترحيب حلو من البنات الموجودات في الجمارك
وهذي صوره الدرايفر من فندق موفنبيك
الطريق إلى الفندق
صوره الفندق من الخارج
في طريقنا نسوي تشيك ان
صوره الغرفه من داخل " وهي عباره عن نظام شقه غرفة وصاله فولي فرنتشيتر"
المطبخ
السرير مع الصوفا
صوره اخرى " واضح فيها ضيافتهم مع غرشه عصير تفاح"
المنظر من البلكونه
المسابح الخلفيه
بعد ما ريحنا شووي..دقت ساعه الجوع...زنقه زنقه...إلى الاماام..لا تراجع
تلبسنا..وطلعنا للمطاعم الموجوده خارج المنتجع
صوره مأخوذه من الريسبشن
ووقع اختيارنا على تشلييز
الربع كانوا يصورون ..فارتزينا معاهم وصورنا..بي مب ذي الصوره
المطعم من الداخل " كنا اول ناس نفتتحه"
الاكل اللي طلبناه:
صوره لمطعم ثاني خارج المجمع
بعد ماشبعنا ردينا الغرفه نريح..كنا نتشاور ان نروح مسرحيه " ليله رعب" بس للاسف الله ما كتب فاتصلت في كويتيه رحاله تدلني على اقرب مول..ورشحت لي المارينا
طلبنا تاكسي وعلى المارينا..الدنيا حلوه والاجواء احلى..
وصلنا المارينا تسوقنا فيه..وكان وايد زحمه فعشان جذي سامحوني ماعندي اي صوره للمكان
تعشينا في كافيه بلان.وبعدها ردينا..
حاولنا نسلس في المطاعم الخارجيه بس للاسف كانت وايد زحمه..فكملنا سهرتنا في الحديقه اللي بداخل الفندق..واللي فيها اكثر من مطعم يخدمها


رحلتي الى الكويت
التعليقات (9)
كيفي بحرينية
كيفي بحرينية
اليوم الثاني
طلعنا نستكشف الفندق ونرح للمطعم عشان الريوق:
المسبح الخارجي
جانب من البحر ويلسات التشمس
محد لعب معاي تنس طاوله
وذي الشقق اللي تطل على البحر وطبعا اسعارها اغلى
المطعم ويقدم الفطور الصباحي..والجو روعه
ذي الكراسي اللي يلسنا عليها امس بالليل والتابعه للمطهم
شباب الامارات ماشاء الله واصلين الكويت بالموتر سيكل
صوره للمسابح الخلفيه بالليل
صوره للفندق والاضواء عليه" طبعا الاضاء كل شوي تتغير
للوبي
الريوق
من خارج المطعم
طبعا هالخيم على بالي خيم مساج مثل الخيم الموجوده في فار إيست..وذبحني الفضول وتميت الف وادور حول الخيمه
لين ما مديت ايدي وفتحتها..اطل شنو داخلها..ومن الريحه عرفت انها تنتفح على جريب المغرب او الليل للشيشه
المنتجع فيه الكثير من المسابح..وذي صوره المسبح مع الجاكوزي " للاسف الجو بارد جدا"
جانب من الحديقه
اي نسيت اقول لكم..ما عجبنا ريوقهم..فاتجهنا صوب
المنيو
وطلبنا فلوتينغ فانيلا ايسكريم ....حياكم
هاا تعذيب نفسي
صدقوني تعذبت معاكم
خلص
اي في كلوب سندويش في الصوره...تبون ؟؟؟
حياكم
وبعدين طلبنا
هذي طعمها مش طبيبعي..لذيذه..آبي
وبعد ما دفعنا الفاتورة اتصلت علي كويتيه..وقالت انا موجوده في الفندق وين انتوا؟؟
قلنا لها دقايق واحنا عندج..
فديتها ما قصرت احلى استقبال..دخلنها شقتنا تريح شوي..وبانتظار ارفيجتها فديت روحها..استعدادن للهياته
رحنا الافنيوز..وكان وايد كبير ومافيه زحمه عكس المارينا..وطبعا ما صورت شي نسيت
بس في صو لشوارع الكويا الحبيبه
عجبتني الاشارات منسدحه
ابراج الكويت الشهيره
الاكوا بارك
بعد ما افترينا...دقت ساعه الجوع...زنقه زنقه..إلى الامام..لا للرجوع واتجهنا إلى حبيب الشعب
المطعم زحمه مب طبيعيه احس ان الكويت كلها في هالمطعم
المنيو
كويتيه الله يهداها ..شوي وتطلب المنيو كامل..وكل ما اقولها بس احنا الا اربعه قالت لا ما يكفي..يا عمري بس قالت لا اكيد يواعه بس مستحيات..ما تدري ان ماكلين في جوكليت بار >>فديتها كريمه وراعيه واجب
جزء من الاكل المطلوب
وبعدها ردينا الفندق..والكرشه مليانه على الاخر..يادوب..سكرنا الشنط..وتشيك اوت وطيران على المطار
رافقتكم السلامة
السوق الحره
مطار البحرين
السلبيات:
1.الغرفه عند المصعد فكان وايد ازعاج وصياح اليهال,,يعني لين الليل ما تقدر ترتاح او تاخذ راحتك وعند التشيك اوت ذكرت لهم هذي النقطه وان المره اليايه ما اريد يم المصعد
2.ماعنده مكواه ولا الطاوله فيعطونك اوفر انهم بيكون لك قطعتين بس والباقي على حسابك " وتعرفون حريم لازم كل قطعه بنلبسها تكون مكويه"
3.البحر كان مسكر
الايجابيات:
1.المنتجع روعه
2.الغرفه كبيره وواسعه والاثاث يديد
3.عند بوابه الموفنبيك في مجمع مطاعم وصالونات " يعني ما بتحتار في اختيار المطاعم" ومن ضمنها تشلييز وفرايديز وسراي وشكولت بار
وأخيرا وليس اخيرا..تعلمت 3 كلامات وتميت اردد هالكلمات اكثر من شهر
1.هذي الساعه المباركه..
2.امبيه لا
3. سر ما بقولها
وآنه بانتظارج ياكويتيه عشان نرد لو جزء بسيط لج وإلى ارفيجتج فديتها
صج صج ما قصرتوا ورايتكم بيضه
كل الشكر للاعضاء اللي بيتابعون تقريري البسيط..واللي بيردون عليه..واهديهم ذي الباقه
وهذي الساعه المباركه

اصول2
اصول2
حياج الله اختي الكريمة في بيتج الثاني الكويت وان شاء الله استمتعتي بالزيارة وان طاب لج المكان عوديه يابنت البحرين.

q8ya metnaqla
q8ya metnaqla
لول ساعتج ابرك بحرينيه
حياج الله في ديرتج والحمدالله على سلامتكم ،، الحمدالله انكم استانستوا وماقصرت كويتيه رحاله يزاها الله الف خير
تقريرج ورحلتكم سريعه وخفيفه وحلوه مثلكم
انا راح اقولج الكلمه الثالثه دامج قلتي امبييه لاا
3 - اي شي
وحياج الله مره ثانية في ديرتكم

كويتية^رحالة
كويتية^رحالة
بصراحة أقف عاجزة عن وصف شعوري عند قراءة التقرير الذي أخجل تواضعي واحنا ماسوينا شي بالعكس انتوا تستاهلون
أكثر ومثل ماقلت لج هالزيارة مو محسوبة وان شاء الله نعوضها باليايات..بالنسبة للتقرير أولا أشكرج على كلامج الجميل
وشعورج الطيب والله يديم المحبة والصداقة وصدقيني مهما سوينا لكم مانوفيكم حقكم وانتوا عالعين والراس وتستاهلون
كل خير..نرجع للتقرير الاكثر من رائع بصراحة الصور موصج ماشاء الله عليج دايما فنانة بتقاريرج وأسلوبج الرائع..على فكرة
يوم أكلمج ويتحول الكلام الى واقع كنا قاعدين في نفس المكان اللي تريقتوا فيه جوكليت بار سبحان الله والصورة اللي
عذبتني صورة التكساس فرايز بتشيليز يمي عليكم بألف عافية نسيت أشكرج على باقة الورد الزوغة ببداية التقرير
كلج ذوق حبيبتي وضحكتيني على سالفة سباجة الراعي الرسمي للسفرة تباركت فيكم والله
وأكثر شي ضحكني الكلمات اللي تعلمتيها وانا بعد تعلمت أمثال حلوة منكم بس لازم تقولين لي السر شنو؟!!
وبصراحة أول مرة أدري ان ديرتنا جذي حلوة بعدستج..كل الشكر لج بحرينية وسامحيني على القصور واليايات أحلى
ان شاء الله وساعتج أبرك حبيبتي

كويتية^رحالة
كويتية^رحالة
q8ya metnaqla
الله يسلمج حبيبتي كويتية متنقلة وماسوينا غير الواجب بالنسبة للكلمة ماعتقد اي شي بصراحة حاولت اتذكر بس
موعارفة ولا يهمج بس اعرفها أقولها لكم على طول بس ان شاء الله تكون كلمة حلوة مثلج الله يستر تصدقين عاد
ماشاء الله عليها ماحسيت بنفسي وهي قاعدة تتصيد لي بس الكلمة اللي صج ارددها وايد لاشعوريا وما أحس
بنفسي ( أمبيه ) ماسكينها علي

q8ya metnaqla
q8ya metnaqla
كويتية^رحالة
هذا من طيبج .. خلاص لاقالتها لج قوليلنا فيني لقافه بعرف اي وحده في جم وحده بس ماراح اقولهم ننطر منها
لول ان شاء الله .. انا بعد جذي رفيجاتي بحرينيات من اتحجى يبدون يلقطون وبعدين يدونهم عليي
هذي امبييه كلنا انا نفس حالتج لول

كويتية^رحالة
كويتية^رحالة
q8ya metnaqla
قالتها لي بالوتس اب بس طلعت مو كلمتي انا الحمدالله
وي ذكرتيني أيام الملتقى الثقافي الاجتماعي لفتيات دول مجلس التعاون كان عندنا العام وسبحان الله كان بنفس الفندق
الله ياني تعلمت كلام ولهجات وناسة صرت خبيرة وعرفت شغلات وايد المهم كانوا الوفود كلهم ناس تتصيد على ناس
اذكر كانوا خواتنا البحرينيات يسولفون وانا اقول ماتتعبون وانتوا تتكلمون ههه وهم بعد مو مقصرين فينا بس الحمدلله طبعا
أكيد حبايب الله لا يغير علينا بس اللي اكتشفته ان أقرب لهجة وكلام لنا شرايج؟ شتقولين؟ يعني تقريبا مثلنا

فاررسه
فاررسه
ماشاء الله صور حلوه
وزياره خفيفه جميله وخصوصا انها للبنات بس ياحظكم ماشاء الله وناسه
في كلمه نسيتيها ...موصج خ بنات خالاتي كله يقولونها
يعطيج العافيه حبيبتي خوش تقرير

برنسs
برنسs
يا الله عليك
وش ها التقرير الخفيف و في نفس الوقت دسم بمعلوماتة
الكويت ذكريات جميلة
كل الشكر لك
تحياتي


خصم يصل إلى 25%